Bushe Abacaice Bafwile Ukubatishiwa?

BA CARLOS, * Abena Kristu abekala ku Philippines balandile ukuti: “Nintemwa sana ukuti umwana wandi nomba mubomfi wa kwa Yehova, kabili ninjishiba ukuti na o natemwa.” Munyinefwe na umbi, uwa ku Greece alembele ukuti: “Ine no mwina mwandi tulomfwa bwino sana ifi abana besu batatu babatishiwe ukuba Inte sha kwa Yehova ninshi bali fye abapungwe. Balelunduluka mu cine kabili balomfwa bwino ukubombela Yehova.”

Abafyashi Abena Kristu balaba ne nsansa sana ilyo abana babo babatishiwa, lelo limo limo mu kusekelela kwabo mulabako no kulanguluka. Nkashi umo atile: “Nali ne nsansa sana, lelo pa nshita imo ine nalisakamene nga nshi.” Mulandu nshi aleumfwila ifyo? Atile: “Nalishibe ukuti fyonse ifyo umwana wandi akulacita nomba, akalubulwilapo kuli Yehova.”

Ubuyo ubo abacaice bonse balingile ukwimika bwa kubatishiwa no kuba Inte sha kwa Yehova. Lelo, abafyashi abaipeela kuli Lesa nalimo kuti baletontonkanya ati, ‘Nalishiba ukuti umwana wandi nalunduluka bwino, lelo nshishibe nga kuti ashipa no kukaana amatunko pa kuti atwalilila ukuba uwasanguluka kuli Yehova.’ Abafyashi bambi nabo nalimo bayipusha ukuti, ‘Bushe umwana wandi nga atunkwa ukutemwa ifyuma, akatwalilila ukubombela Lesa ne nsansa e lyo no kuba uwacincila?’ Kanshi, kufunda nshi ukwa mu Baibolo ukwingafwa abafyashi ukwishiba nga ca kuti umwana wabo nafikapo ukubatishiwa?

Icifwaikwa Sana, Kuba Umusambi wa kwa Kristu

Icebo ca kwa Lesa tacilanda pa myaka iyo umo alingile ukukwata pa kubatishiwa, lelo cilondolola ukuti icifwaikwa sana kuba umusambi wa kwa Kristu. Yesu aebele abasambi bakwe ukuti: “Kalengeni aba nko shonse ukuba abasambi, [mulebabatisha].” (Mat. 28:19) Kanshi abafwile ukubatishiwa ni balya ababa kale abasambi ba kwa Kristu.

Bushe umusambi nani? Icitabo ca Insight on the Scriptures cilondolola ukuti: “Abetwa ukuti abasambi, ni balya abatetekela amasambilisho ya kwa Kristu no kuyakonka.” Bushe abacaice  kuti baba abasambi bene bene aba kwa Kristu? Nkashi umo uwabomba bumishonari mu fyalo fya ku Latin America ukucila pa myaka 40 alembele pa fyo cali kuli ena na bankashi nankwe babili ati: “Nangu ca kuti twali abaice, twalishibe ukuti ico twalebatishiwilwa, kufwaya ukubombela Yehova no kwisaikala mu Paradaise. Ukuipeela kwesu kwalitwafwile ukuba abakosa ilyo twalekwata amatunko abacaice bakwata. Twalicitile bwino ukuipeela kuli Lesa ninshi tuli abaice.”

Kuti mwaishiba shani nga ca kuti umwana wenu naba umusambi wa kwa Kristu? Baibolo itila: “Umulumendo eshibikilwa ku micitile yakwe nga ca kuti imilimo yakwe isuma kabili yalilungama.” (Amapi. 20:11) Moneni fimo fimo ifingalenga cimoneke ukuti uwacaice ‘alelunduluka’ ukuba musambi.—1 Tim. 4:15.

Ifingalanga Ukuti Umwana Wenu Musambi wa kwa Kristu

Bushe umwana wenu alamumfwila? (Kol. 3:20) Bushe alabomba imilimo ya pa ng’anda iyo mumupeela? Baibolo ilanda pali Yesu ilyo ali ne myaka 12 aiti: ‘Alenakila abafyashi bakwe.’ (Luka 2:51) Kwena muno nshiku, takwingaba umwana uwinganakila abafyashi bakwe muli tonse fye. Lelo Abena Kristu ba cine bafwile ‘ukukonka sana mu ntampulo sha kwa Yesu.’ Kanshi na bacaice abalefwaya ukubatishiwa balingile ukwishibikwa ukuti balomfwila abafyashi babo.—1 Pet. 2:21.

Tontonkanyeni pali aya mepusho: Bushe umwana wenu alabombako umulimo wa kushimikila pa kuti alange ukuti ‘alafwaya intanshi Ubufumu’? (Mat. 6:33) Bushe alaitemenwa ukushimikila imbila nsuma, nelyo ashimikila fye nga mwakosapo? Bushe alishiba umo calola ukuba kasabankanya uushabatishiwa? Bushe alafwaisha ukubwelelako ku bantu ashimikileko? Bushe aleba abana be sukulu banankwe na bakafundisha ukuti ni Nte ya kwa Yehova?

Bushe alamona ukuti ukusangwa ku kulongana kwalicindama? (Amalu. 122:1) Bushe alasukapo pe Sambililo lya Ulupungu lwa kwa Kalinda na pe Sambililo lya Baibolo Ilya pa Cilonganino? Bushe alalandako amalyashi mwi Isukulu lya Butumikishi Ilya Bulesa?—Heb. 10:24, 25.

Bushe umwana wenu alesha ukuba ne mibele isuma pa kukaana ukula-angala na baba ne mibele yabipa pa sukulu na ku ncende shimbi? (Amapi. 13:20) Bushe ni nyimbo sha musango nshi akutikako kabili mafilimu nshi na maprogramu ya pa TV ayo atemwa? Kabili abomfya shani Intaneti? Bushe ifyo alanda ne fyo acita filanga ukuti alafwaya ukukonka ifyaba mu Baibolo?

Bushe umwana wenu alishiba ifyaba mu Baibolo? Bushe kuti alanda mu mashiwi yakwe ifyo asambilila pa Mapepo ya Lupwa? Bushe kuti alondolola ifyo Baibolo isambilisha ifyo umusambi abalilapo ukwishiba? (Amapi. 2:6-9) Bushe alomfwa bwino ukubelenga Baibolo ne mpapulo sha musha wa cishinka kabili uwashilimuka? (Mat. 24:45) Bushe alepusha ifipusho pa fyo Baibolo isambilisha na pa fyo abelenga mu Baibolo?

 Ifi fipusho kuti fyamwafwa ukwishiba nga ca kuti umwana wenu alelunduluka. Pa numa ya kubebeta ifi fipusho, kuti mwamona umo alekabila ukuwamyako pa kuti akafikepo ukubatishiwa. Lelo, nga mwamona ukuti ifyo acita filelanga ukuti nalinga ukuba umusambi kabili no kuipeela naipeela kuli Lesa, nalimo kuti mwamusuminisha ukubatishiwa.

Abacaice Kuti Balumbanya Yehova

Ababomfi ba kwa Lesa abengi balilangile ukuti bali ne citetekelo na bucishinka ilyo bali fye abapungwe nelyo abaice. Bamo pali aba ni Yosefe, Samwele, Yoshia, na Yesu. (Ukute. 37:2; 39:1-3; 1 Sam. 1:24-28; 2:18-20; 2 Imila. 34:1-3; Luka 2:42-49) Na bana banakashi aba kwa Filipi abalesesema, nabo bene bafwile balikanshiwe bwino ukutula fye ku bwaice.—Imil. 21:8, 9.

Nte umo mu Greece alandile ukuti: “Nabatishiwe ilyo nali ne myaka 12. Nshumfwa ububi ukuti nabatishiwe ilyo nali umwaice. Nomba napapita imyaka 24 ukufuma apo nabatishiwilwe, kabili imyaka 23 pali iyi, nalibomba bupainiya. Ukutemwa uko natemwa Yehova kwalingafwa ukucimfya amafya abacaice bakwata. Ilyo nali ne myaka 12, nshaishibe ifingi pali Baibolo nga fintu naishiba nomba. Lelo nalishibe ukuti nalitemenwe Yehova kabili nalefwaya ukulamubombela umuyayaya. Ndatasha pa fyo angafwa pa kuti ntwalilile ukulamubombela.”

Nga ca kutila umuntu alanga ukuti musambi wa cine, ninshi afwile ukubatishiwa nampo nga mwaice nelyo mukalamba. Umutumwa Paulo alembele ukuti: “Ku mutima e ko umuntu atetekela no kulungamikwa, lelo ku kanwa e ko aisosela umwine no kupusuka.” (Rom. 10:10) Ilyo umusambi umunono uwa kwa Kristu abatishiwa, ena na bafyashi bakwe ninshi bacita icintu icacindama sana. E ico, mwe bafyashi na mwe bana, mwileka icili conse cikalenge mwafilwa ukusanga insansa ishifuma mu kubatishiwa.

[Futunoti]

[Akabokoshi pe bula 5]

Ifyo Mufwile Ukulamona Ulubatisho

Abafyashi bamo, bamona kwati umwana wabo nga abatishiwa ninshi acita icintu icisuma lelo icingamuletelela, nga filya ciba umuntu nga apoka lasenshi ya kwensha motoka. Lelo bushe ukubatishiwa no kubombela Lesa kuti fyalenga umuntu ukukanatunguluka ku ntanshi? Baibolo itila te fyo caba. Pa Amapinda 10:22 patila: “Ipaalo lya kwa Yehova lilacindamika, kabili talundako ukucululuka.” Paulo na o alembeele Timote wacaice ukuti: “Kwena, bukapepa pamo no kuteka umutima bunonshi ubukalamba.”—1 Tim. 6:6.

Ca cine ukuti ukubombela Yehova takwayanguka. Kasesema Yeremia alikwete amafya ayengi ilyo alebomba umulimo wa kwa Lesa. Lelo, alembele pa fyo alepepa Lesa wa cine ukuti: “Amashiwi yenu yanenga ukutemwa no kusekelela mu mutima wandi; pantu nainikwa ishina lyenu, mwe Yehova Lesa wa mabumba.” (Yer. 15:16) Yeremia alishibe ukuti ukubombela Lesa e kwalelenga ukuti aleba ne nsansa. Icalo ca kwa Satana cilaleta sana amafya. Abafyashi bafwile ukwafwa abana babo ukwishiba ici cishinka.—Yer. 1:19.

 [Akabokoshi ne Cikope pe bula 6]

Bushe Umwana Wandi Afwile Ukubatishiwa Ino Nshita?

Limo limo, na lintu abana bafikilepo ukubatishiwa, abafyashi babo bamona kwati tabafwile ukubatishiwa pali iyo nshita. Cinshi cilenga ifyo?

Ndomfwa umwenso ukuti umwana wandi nga abatishiwa, nalimo kuti aisacita ulubembu ulukalamba no kutamfiwa. Bushe caliba fye bwino ukulatontonkanya ukuti uwacaice nga tabatishiwe ninshi takalubulule kuli Lesa pa fyo acita? Solomone aebele abacaice ukuti: “Wishibe ukuti pali conse [ico ucita] Lesa wa cine akakupingwilapo.” (Luk. Mil. 11:9) Kabili Paulo aebele abantu aba mishinku yonse ukuti: “Ifwe bonse umo umo tukalubulula kuli Lesa.”—Rom. 14:12.

Kanshi, bonse ababatishiwa na bashabatishiwa bakalubulula kuli Lesa. Mwilalaba ukuti Yehova alacingilila ababomfi bakwe pa ‘kukanabaleka ukweshiwa ubwesho ubo bashingashipikisha.’ (1 Kor. 10:13) Nga ca kuti batwalilila fye ‘ukuba abalola’ no kulwisha amatunko, Lesa kuti abafwa. (1 Pet. 5:6-9) Nkashi umo uwakwata abana alembele ukuti: “Ku bana ababatishiwa, ulubatisho lulalenga baletaluka ku kucita ifyabipa ifya muli ici calo. Umwana wandi, uwabatishiwe ilyo ali ne myaka 15, amona ukuti ukubatishiwa bucingo. Atile, ‘Takuba no kutontonkanya pa kutoba ifunde lya kwa Yehova.’ Ukubatishiwa kulalenga umo ukulafwaisha fye ukucita icalungama.”

Nga mulasambilisha abana benu ukumfwila Yehova ku fyo mulanda no kucita, tamufwile no kutwishika ukuti bakalacita ifyo fine na lintu babatishiwa. Pa Amapinda 20:7 patila: “Umulungami endela mu bulungami bwakwe. Balipaalwa abana bakwe abakakonkapo.”

Kuti natemwa umwana wandi atala acitako fimo. Abacaice bafwile baishibako imilimo imo pa kuti bakaleisakamana abene ku ntanshi. Lelo mwaliba ubusanso mu kubakoselesha ukukonkelela amasomo no kufwaya ifingabafwa ukulapanga indalama mu nshita ya kubika amano ku kupepa kwa cine. Ilyo Yesu alelanda pa “lubuto,” nelyo icebo ca Bufumu icishamenene, atile: “E lyo ulwatandilwe mu myunga, ulu e muntu uwaumfwa icebo, lelo pa mulandu wa masakamika ya muli cino calo na pa mulandu wa kumubeleleka ku fyuma, icebo catusa, kabili afilwa ukutwala ifisabo.” (Mat. 13:22) Nga ca kuti abafyashi bakoselesha umwana ukukonkelela ifya calo, ne co calenga umwana ukulamona bucibusa bwakwe na Yehova ukuti tabwacindama sana, umwana te kuti abike amano ku kubombela Lesa.

Ilyo eluda umo uwabelesha alelanda pa bacaice abafikapo ukubatishiwa lelo abo abafyashi babo bakaanya, atile: “Ukulesha umwana ukubatishiwa kuti kwalenga aleka ukulunduluka mu cine ica kuti no kufuupuka afuupuka.” Kangalila wenda umo na o alembele ukuti: “Uwacaice kuti atampa ukutwishika bucibusa bwakwe na Lesa, nelyo ukulamona kwati talebombesha ukulingana ne fyo bambi balebomba. Nalimo kuti abika amano ku fya ku calo pa kuti aleumfwa ukuti alecitako fimo ifyacindama.”

[Icikope]

Bushe amasomo ya ku yuniversiti e yo mufwile ukucindamika sana?

[Icikope pe bula 3]

Ifyo umwaice engalanga ukuti musambi

[Ifikope pe bula 3]

Ukupekanya ukulongana no kwasukapo

[Icikope pe bula 4]

Ukunakila abafyashi

[Icikope pe bula 4]

Ukubombako umulimo wa kushimikila

[Icikope pe bula 4]

Ukulapepa