Bushe Muleibukisha?

Bushe mwali-ipakishe ukubelenga bamagazini ba Ulupungu lwa kwa Kalinda abafumine nomba line? Moneni nga kuti mwayasuka amepusho yakonkapo:

• Finshi fitatu ifingatwafwa ukukanaba no bucenjeshi?

Ni fi: (1) Ukukwata akatiina kene kene aka kuli Lesa. (1 Pet. 3:12) (2) Ukukwata kampingu iyasambilishiwa Baibolo. (3) Ukuteka sana umutima ku fyo mwakwata.—4/15, amabula 6-7.

• Twaishiba shani ukuti nga twabika amano ku kupepa te kutila ninshi tatufwile ukulasekako nelyo ukulakwatako inshita ya kwangala?

Kuti twakonka ica kumwenako ca kwa Yesu. Aletuushako no kuliila pamo na bantu bambi. Twalishiba ukuti talemoneka umukali. Abantu bambi kumo na baice baleumfwa bwino ukuba nankwe.—4/15, ibula 10.

• “Cilubula” nshi calandwapo pali Yobo 33:24 kabili bushe Yobo amwenenemo shani muli cena?

Ishiwi lya kuti icilubula pali ili ilembo lipilibula ati “ica kumulubwilako.” Kuli Yobo, ica kumulubwilako nalimo cali lilambo lya nama, ilyo Lesa ali no kupokelela ukuba ica kufimba, nelyo ukufuta pa cilubo Yobo acitile. Ukwabula no kutwishika, Yehova alipokelele ica kulubwilako Yobo icafimbile pa cilubo acitile kabili alimundepe no kumupaala. (Yobo 1:5; 42:12-17)—4/1, ibula 23.

• Bushe umuolife uwalandwapo mwi buuku lya Abena Roma icipandwa 11 wimininako cinshi?

Umuolife wimininako abena Israele ba ku mupashi, abali no kwisaba ulubali lwa bubili ulwa mwana wa kwa Abrahamu. Umushila wa muolife wa mampalanya wimininako Yehova e lyo icitimbatimba cimininako Yesu. Ilyo abaYuda bene bene bakeene Yesu, Abena fyalo abasangwike Abena Kristu balilundilweko. Ne ci calengele impendwa ya bapanga ulubali lwa bubili ulwa mwana wa kwa Abrahamu ukukumanina.—5/15, amabula 22-25.

• Twaishiba shani ukuti Gehena te Cifulo Uko Abacita Ifyabipa Baya mu Kupya mu Mulilo?

Ukoca abantu abatuntulu mu mulilo cintu ica bunani kuli Yehova. (Yer. 7:31) Na kabili, icisumino ca kuti abafwa balapya mu mulilo tacumfwana ne fyo Baibolo ilanda pali Lesa uwaba no kutemwa kabili calipusana ne fyo isambilisha pa bafwa ukutila “tabaishiba akantu nangu kamo.” (Luk. Mil. 9:5, 10)—4/1, ibula 31.

• Bushe Yehova Acita Shani ku “baba ne mitima ya bulanda” na ku “basakamikwa imitima”? (Amalu. 34:18)

Nga filya fine umufyashi uwatemwa umwana wakwe amufukatila no kumusansamusha ilyo ali na mafya, e fyo na Yehova aba mupepi na bakapepa bakwe abalilila kuli ena ukuti abafwe. Alafwaisha ukusansamusha aba mitima ya bulanda na basakamikwa imitima. Kuti abapeela amano na maka ayo bakabila pa kuti bashipikishe amafya ayali yonse ayo bengakwata. (2 Kor. 4:7; Yako. 1:5)—6/1, ibula 19.

• Abana abapwililika abo Yesu ali no kukwata afwaya, bushe nabo nga bali cilubula?

Iyo. Nangu ca kutila Yesu akwata abana nga bali abapwililika, aba bana nga tabali icilubula. Ubumi bwa kwa Yesu eka fye ubwapwililika e bwalingene no bwa kwa Adamu. (1 Tim. 2:6)—6/15, ibula 13.

• Bushe Abena Kristu kuti balanga shani ukuti balomfwila ukusoka kwa kuti belakonkelela bakasambilisha ba bufi ukwaba pa Imilimo 20:29, 30?

Tabapokelela bakasambilisha ba bufi mu mayanda yabo nelyo ukubaposha. (Rom. 16:17; 2 Yoh. 9-11) Abena Kristu tababelenga amabuuku yabo, ukutamba amaprogramu yabo aya pa TV nelyo ukubelenga ifyo balemba pa intaneti nangu pa fisumino fyabo.—7/15, amabula 15-16.

• Nga fintu ilembo lya kwa Luka 10:40-42, lilanda, mulandu nshi uukalamba uo twampanina na Bena Kristu Banensu?

Umulandu uukalamba tufwaila ukwampana na Bena Kristu banensu kukoseleshanya no kupeelana ica bupe cafuma kuli Lesa, te kupekanya nelyo ukulya ifya kulya ifingi nga nshi. (Rom. 1:11, 12) Ne fya kulya ifya-anguka fye kuti fyalenga twakwata utushita twa kukoseleshanya. 4/1, ibula 13.