Ifipusho Ukufuma ku Babelenga

Bushe kuti twaishiba bwino bwino impendwa ya masesemo yalanda pali Mesia ayaba mu Malembo ya ciHebere?

Nga twabelenga bwino bwino Amalembo ya ciHebere kuti twasangamo amasesemo ayengi ayafikilishiwe muli Yesu Kristu. Aya masesemo yalandile ifingi pali Mesia, pamo nga inshita amonekelepo, ifyo alecita, ifyo abantu balemucita, e lyo no mulimo akwata mu fyo Yehova Lesa afwaya ukucita. Fyonse ifi capamo filatwafwa ukwishiba Yesu ukuti e Mesia. Lelo tufwile ukucenjela nga tulefwaya ukwishiba impendwa ya masesemo yalanda pali Mesia ayaba mu Malembo ya ciHebere.

Ayo bamo bamona ukuti masesemo yalanda pali Mesia, bambi batila te yo. Alfred Edersheim alembele mu citabo cilanda pa bumi bwa kwa Yesu nga Mesia ati, ukulingana ne fyalembwa fya bakasambilisha ba mafunde ifya ku kale, mu Malembo ya ciHebere mwali amasesemo 456 ayalanda pali Mesia, nangu ca kutila tayalanda pali Mesia mu kulungatika. Nga twabebeta sana aya masesemo 456 kuti twaipusha nampo yamo pali yena yalanda pali Yesu Kristu nelyo iyo. Ku ca kumwenako, Edersheim atile abaYuda baleti ilembo lya Ukutendeka 8:11 lilanda pali Mesia. Batile: “Ibuula lya muolife ilyo inkunda yaletele, lyafumine pa Lupili lwa kwa Mesia.” Uyu kalemba alandile na pa Ukufuma 12:42. Ifyo alembele filalanga bwino bwino umo abaYuda baleumfwila ili ilembo. Atile: “Nga filya Mose afumine mu ciswebebe e fyo na Mesia akafuma mu Roma.” Ukwabula no kutwishika, abengi abasoma Baibolo na bantu bambi fye, balafilwa ukusumina ukuti aya malembo ayashalondololwa na bwino yalanda pali Yesu Kristu.

Nangu twingalanda fye pa masesemo yalya ayafikilishiwe muli Yesu Krstu, kuti cayafya ukusanga impendwa. Ku ca kumwenako, tontonkanyeni pali Esaya icipandwa 53, umwaba amasesemo ayengi ayalanda pali Mesia. Ukusesema kwaba pali Esaya 53:2-7 kutila: “Takamoneke umucindami nangu umukankaala . . . Abantu balimusuulile kabili balemutaluka . . . Asendele amalwele yesu . . . Alashiilwe pa mulandu wa filubo fyesu . . . Aleletwa nge mpaanga ku kwipaiwa.” Bushe kuti twatila ifi fyonse ifyalandwapo muli Esaya icipandwa 53, kusesema kumo fye, nelyo bushe tufwile ukufipenda ngo kusesema kumo kumo ukwalanda pali Mesia?

Tontonkanyeni na pali Esaya 11:1 apatila: “Kukapuuka akamusambo ku cishiki ca kwa Yese; kabili mu mishila yakwe mukapuuka ululembelya.” Ukusesema kumo kwine kabili mu mashiwi yamo yene kulasangwa na mu cikomo 10. Bushe tufwile ukupenda fye ukuti kusesema kumo nelyo kuti twatila ni kubili? Ifyo twingapenda amasesemo yaba muli Esaya icipandwa 53 na Esaya icipandwa 11 kuti fyakuma impendwa ya masesemo yonse ayalanda pali Mesia.

Kanshi kuti cawama ukukanalanda impendwa ya masesemo yalanda pali Mesia ayaba mu Malembo ya ciHebere. Ukuteyanya kwa kwa Yehova kwalitweba amasesemo ayengi ayalanda pali Yesu e lyo ne fyo yafikilishiwe. * Aya masesemo kuti yatwafwa no kutukoselesha nga tulelanshanyapo pa mapepo ya lupwa e lyo na lintu tuleshimikila. Na kabili amasesemo ayengi ayalanda pali Mesia, te mulandu nangu tatwaishiba impendwa ya yako, yalatulanga bwino bwino ukuti Yesu ni Kristu, nelyo Mesia.

[Futunoti]