Ukulongana Ukushakalabwe

MUNYINEFWE Stephen Lett, uwa mwi Buumba Litungulula ilya Nte sha kwa Yehova alengele abantu ukufwaisha ukumfwa ifyalalandwa pali kulya kulongana ilyo atile: “Ilyo uku kulongana kwalapwa, bonse mwe basangilweko mwalalanda ukuti ‘Cine cine uku, kulongana kwa pa mwaka ukushakalabwe!’” Uku kwali kukumana kwa pa mwaka ukwalenga 126, ukwa kabungwe ka Watch Tower Bible and Tract Society of Pennsylvania. Uku kulongana kwabelele pa Cikulwa ca Kulonganinamo ica Nte sha kwa Yehova mu Jersey City, ku New Jersey, mu United States of America pa 2 October, mu 2010. Finshi fimo fimo ifyalandilwepo pali uku kulongana?

Ilyashi lya kubalilapo ilyo Munyinefwe Lett alandile, lyali lyashi lya kucincimusha ilyalandile pe celeta lya mu muulu ilya kwa Yehova nga fintu lyalondololwa mwi buuku lya mu Baibolo ilya kwa Esekiele. Ili celeta ilikalamba sana kabili ilya bukata, limininako ukuteyanya kwa kwa Lesa, uko umwine atungulula. Munyinefwe Lett atile, ili iceleta ilyapangwa ne fibumbwa fya ku mupashi, ilyaba ulubali lwa ku muulu, lilabutukisha, e kutila lyenda lubilo lubilo ukulingana ne fyo Yehova aletungulula. Ukuteyanya kwa kwa Yehova Lesa ukwa pano pe sonde, nako kulasela. Munyinefwe Lett alandile pa fintu ifingi ifisuma ifilecitika mu kuteyanya kwa kwa Lesa muli shino nshiku.

Ku ca kumwenako, amaofeshi ya musambo mu fyalo fimo baliyesala pa kuti ifyo fyalo filesakamanwa ne misambo imbi. Ne ci cikalenga ukuti aba muli ifi fyalo abalebombela pali aya maofeshi balebomba sana umulimo wa kushimikila. Munyinefwe Lett akoseleshe ne bumba ukutwalilila ukupepa ukuti Ibumba Litungulula, ilimininako umusha wa cishinka, litwalilila fye ukuba ilya cishinka lelo litwalilile no kuba ilyashilimuka nelyo ilya mano.—Mat. 24:45-47.

Amalipoti ya Kukoselesha e lyo no Kwipusha

Munyinefwe Tab Honsberger, uwaba muli Komiti ya Musambo, ku Haiti, ashimike icacitike ukukuma ku cinkukuma caliko pa January 12, 2010, icaipeye abantu napamo 300,000 muli ici calo. Atile bashimapepo baleba abantu ukuti Lesa e wakandile balya abantu bafwile pantu tabamucetekele, e lyo abasuma bena alibacingilile. Na lyo line, muli ici calo mwali bampulamafunde abengi abashafwile ilyo ifibumba fya cifungo fyawile pa mulandu wa cinkukuma. E ico, abena Haiti abengi abafumacumi balesansamushiwa nga baishiba ico amafya yafulile mu nshiku shesu. Munyinefwe Honsberger alondolwele ukuti munyinefwe umo mu Haiti uwa citetekelo sana uo umukashi afwile muli cilya cinkukuma, atile: “Ukufika na lelo ndaloosha. Nshaishiba ilyo nkaleka ukulosha, lelo ndasekelela nga namona ukutemwana kwaba mu kuteyanya kwa kwa Yehova. Nalikwata isubilo kabili ndafwaya sana ukwebako bambi pali ili isubilo.”

 Munyinefwe Mark Sanderson, uwaba pa Bethel ya mu Brooklyn alandile pa calo ca Philippines. Ilyo ashilaya ku Brooklyn Bethel, alebombela muli cilya calo kabili ali muli Komiti wa Musambo. Ali ne nsansa ilyo ashimike ukuti pa myaka 32 iyapita, cila mwaka impendwa ya bakabila ba Bufumu ilakulilako, e lyo ne mpendwa ya masambililo ya Baibolo ilakula ukucila iya bakasabankanya. Alandile pali munyinefwe Miguel uo baipaile umwishikulu wakwe umwaume. Ba Miguel balikoselepo sana ukuti uwaipeye umwishikulu wabo bamutwale ku cilye no kumukaka. Pa numa, ilyo baleshimikila mu cifungo, ba Miguel bakumenye umwaume uwaipeye umwishikulu wabo. Nangu ca kutila balyumfwile umwenso, ba Miguel balilandile nankwe mu bufuuke. Basukile batendeka ukumusambilisha Baibolo, kabili uyu muntu alitemenwe ifyo alesambilila e lyo alishiletemwa na Yehova. Ino nshita alibatishiwa. Ba Miguel no yu muntu fibusa sana kabili ino nshita ba Miguel balelwisha sana ukuti uyu muntu bakamufumye mu cifungo. *

Icakonkelepo, kwipusha. Munyinefwe Mark Noumair, kafundisha mu Dipartimenti ilolekesha pa Masukulu ya Bulesa aipwishe bamunyinefwe batatu na bena mwabo. Uku ukwipusha kwalengele abantu baishibilapo ifingi pali aba bantu. Abo aipwishe ni ba Alex na ba Sarah Reinmueller, ba David na ba Krista Schafer, e lyo ba Robert na ba Ketra Ciranko. Ba Alex Reinmueller, abafwilisha muli Komiti ya Kusabankanya, balandile pa fyo basambilile icine no kucitemwa ninshi bali ne myaka 15, ne fyo ilingi balebomba fye beka. Ilyo babepwishe ukuti ni bani pa ba pa Bethel ababakoseleshe sana, ba Reinmueller, balumbwile abaume ba busumino batatu no kulondolola ifyo umo na umo pali aba abaafwa ukukosa mu fya kwa Lesa. Abena mwabo ba Sarah, nabo balandile pali bucibusa bwabo nkashi uwashipikishe imyaka iingi mu fifungo fya mu China pa mulandu wa citetekelo cabo. Ba Sarah batile balisambilileko ukushintilila pali Yehova no kulapepa lyonse.

Ba Davidi Schafer, abafwilisha muli Komiti ya Kusambilisha, batashishe sana banyinabo pa citetekelo cabo icakosa. Kabili balandile na pali bamunyinefwe abaletema imiti, ababafwile ukubomba bupainiya bwa kwafwilisha ilyo bali abaice. Abena mwabo ba Krista, balandile ne nsansa ukuti ababakoseleshe ba mishinku ya cikalamba aba mu Bethel abali aba “cishinka mu finono,” nga fintu Yesu alandile.—Luka 16:10.

Munyinefwe Robert Ciranko, uwafwilisha muli Komiti ya Kulemba, alandile ne nsansa pali bashikulu wakwe na banakulu, abafyashi ba banyina na bafyashi na ba bawishi abafumine ku Hungary. Aba bonse bane bali Bena Kristu basubwa. Ilyo bali abaice, balyumfwile bwino ilyo basangilwe ku kulongana kukalamba mu 1950 no kusambilila ukuti ukuteyanya kwa kwa Yehova  kwali ukukalamba sana ukucila icilonganino balimo. Abena mwabo ba Ketra, balandile pa fyo basambilile ukuba aba cishinka ilyo bali bapainiya mu cilonganino umwali ubusangu e lyo na mafya yambi. Balishipikishe kabili mu kupita kwa nshita baishileba bapainiya baibela mu cilonganino umo bamunyinefwe baikatene icine cine.

Pakonkele ba Manfred Tonak, abalandile pa filecitika mu calo ca Ethiopia. Ici calo, e cilya calandwapo na mu Baibolo. Pali ino nshita muli ici calo mwaba bakasabankanya ba mbila nsuma 9,000. Abengi pali aba bekala mu musumba wa Addis Ababa, nelyo lwa mupepi. Kanshi bakasabankanya balakabilwa sana mu fifulo fya mu mishi. Pa kubombela pali ubu bwafya, ba Nte abena Ethiopia abekala mu fyalo fimbi balitilwe ukwisatandala ku Ethiopia pa kuti babombeko umulimo wa kushimikila mu fifulo fya mu mishi. Abengi balishile kabili balisangile abalefwaya ukumfwa ubukombe.

Ico abantu batemenwe sana, yali malyashi ya kukonkana ayalelanda pa Nte sha kwa Yehova mu Russia na pa fyo bawina imilandu mu filye. Ba Aulis Bergdahl, ababa muli Komiti wa Musambo mu Russia, balandile pa fyo ba Nte bacushiwa mu Russia ukutula fye kale maka maka mu Moscow. Ba Phillip Brumley ababombela pa Bethel, mu United States, muli dipartimenti ilolekesha pa milandu, balandile pa fisuma ifyacitike mu myeshi ya nomba line ilyo icilye cikalamba ica European Court of Human Rights (ECHR) cakutike ku milandu 9 iyo bapeele ba Nte. Bonse muli ici cilye tabasangilepo icishinka nangu cimo pa milandu yonse 9 iyo ba Nte bapeelwe. Nangu tatulaishiba ifikafumamo muli ubu bupingushi, Munyinefwe Brumley, atile ifyo Icilye capingwile, fifwile fikafwa na ba Nte mu fyalo fimbi abapeelwa imilandu yapalako.

Pa numa ya ili ilyashi ilisuma, Munyinefwe Lett aebele ibumba ukuti, icilye cikalamba ica ECHR, calisumina ukuti ba Nte batwale umulandu wa misonko kuli ici cilye uwaba pa Nte sha kwa Yehova e lyo no buteko bwa France. Inono sana imilandu iitwalwa kuli ici Cilye ico abantu bacindika sana. Ukufika pali lelo, icilye ca ECHR, calibebeta imilandu 39 iyakuma Inte sha kwa Yehova, kabili pali iyi, ba Nte baliwinapo 37. Munyinefwe Lett akoseleshe abantu ba kwa Lesa bonse ukulapepelapo pali uyu mulandu kuli Yehova Lesa.

Lipoti ya kulekeleshako yafumine kuli munyinefwe Richard Morlan, uusambilisha mu Masukulu ya baEluda. Alicincimwike ilyo alandile pali ili isukulu e lyo na pa fyo baeluda abasangwa kuli aya masukulu batasha.

Amalyashi Yambi ayo aba mwi Bumba Litungulula Balandile

Munyinefwe Guy Pierce uwaba mwi Bumba Litungulula alandile ilyashi ilyashimpilwe pe lembo  lya mwaka wa 2011, ilitila: ‘Muleuba mwi shina lya kwa Yehova.’ (Sefa. 3:12) Atile nangu ca kuti shino ni nshiku sha nsansa ku bantu ba kwa Yehova, pa nshita imo abantu bafwile ukutontonkanyapo sana pa fili no kucitika. Ubushiku bwa kwa Yehova buli mupepi; na lyo line abantu balitwalilila ukuuba mu kupepa kwa bufi, muli bakateka ba muli cino calo, na mu fyuma, kabili tabafwaya ukubika amano ku filecitika muno calo. Pa kusanga icubo ca cine, tufwile ukulaita pe shina lya kwa Yehova. Ne ci cisanshamo, ukwishiba bwino bwino Umwine we shina, ukumucindikisha, ukumucetekela sana no kumutemwa na fyonse ifyo twakwata.

Pakonkele ilyashi lya kwa munyinefwe David Splane uwaba mwi Bumba Litungulula. Alandile pa mutwe walengele abantu ukukutikisha, uwaleti: “Bushe Mwalingila mu Kutuusha kwa kwa Lesa?” Atile ukutuusha kwa kwa Lesa takwalola mu kuti aikala fye ukwabula ukubomba. Yehova no Mwana wakwe ‘bacili balabomba’ kabili bakatwalilila ukubomba mu bushiku bonse ubwa mampalanya ubwa kutuushamo pa kuti ukufwaya kwakwe pano isonde kukafikilishiwe bwino bwino. (Yoh. 5:17) Lelo kuti twaingila shani mu kutuusha kwa kwa Lesa? Cimo ico twingacita pa kwingilamo, kuleka ukucita ulubembu, no kumona kwati kuti twalungamikwa ukwabula icilubula. Tufwile ukuba ne citetekelo no kulatontonkanya pa kufwaya kwa kwa Lesa muli fyonse ifyo tulecita e lyo no kwesha na maka ukucita ifyumfwana no kufwaya kwakwe. Te lyonse ico canguka, lelo tufwile ukumfwila ukufunda ukufuma mu kuteyanya kwa kwa Yehova. Munyinefwe Splane akoseleshe ibumba ukucita conse icikabilwa pa kwingila mu kutuusha kwa kwa Lesa.

Ilyashi lya kulekelesha lyakwete umutwe waleti, “Finshi Tulelolela?” Uwalandile ili lyashi ni munyinefwe Anthony Morris uwaba mwi Bumba Litungulula. Mwi shiwi lya bufyashi, Munyinefwe Morris akoseleshe ibumba ukulalola. Alandile pa masesemo ayali no kufikilishiwa ku ntanshi, ayo bonse aba cishinka balelolela. Pali aya masesemo paba no kupunda ati: “Umutende no mutelelwe!” e lyo no konaulwa kwa kupepa kwa bufi. (1 Tes. 5:2, 3; Ukus. 17:15-17) Ba Morris batile tatufwile ukulasosa ukuti: “Iyi yaisa ni Armagedone,” nga twaumfwa fimo ifyalandwa mu lyashi ifishilanga no kuti aya masesemo yafikilishiwa. Atile ilyo tulelolela ifi fintu, tufwile ukusekelela no kutekanya nga fintu ilembo lya kwa Mika 7:7 lisosa. Akoseleshe ifwe bonse ukupalama sana kwi Bumba Litungulula nga filya abashilika bapalamana ubulwi nga bwakosa. Atile: “Lekeni imitima yenu ishipe, imwe bonse mwe balolela Yehova.”—Amalu. 31:24.

Na mu kulekelesha kwali ukubilisha ifintu ifisuma ifishakalabwe. Munyinefwe Geoffrey Jackson uwaba mwi Bumba Litungulula atile Ulupungu lwa kwa Kalinda ulwa kusambililamo, lwakulafuma na mu ciNgeleshi cayanguka, kabili lukaafwa bamunyinefwe abashaishibisha iciNgeleshi. Munyinefwe Stephen Lett atile, Ibumba Litungulula nalipekanya ukuti bakangalila ba citungu na bena mwabo mu United States nabo balebacema. Alandile no kuti, nomba Isukulu lya Kukansha Ilya Butumikishi lyakulaitwa ati, Isukulu lya Baibolo Ilya Bamunyinefwe Abashimbe. Atile, kukaba ne sukulu ilipya ilikalaitwa ati, Isukulu lya Baibolo Ilya Bena Kristu Abaupana. Abakulaya kuli ili isukulu bakulakanshiwa pa kutila balebomfiwa sana mu kuteyanya kwa kwa Yehova. Munyinefwe Lett alandile no kuti, kwakulaba amakalashi yabili pa mwaka aya Isukulu lya Bakangalila Benda na Bena Mwabo e lyo na makalashi yabili aya Isukulu lya Baba mu Makomiti ya Misambo na Bena Mwabo. Aya masukulu yakulabela ku Patterson, e lyo balya abayako kale kuli ili isukulu, nabakwata ishuko lya kuya na kabili.

Pa kupwa kwa uku kulongana abantu balyumfwile bwino ilyo munyinefwe John E. Barr, uwa myaka 97, uwali mwi Bumba Litungulula pa myaka iingi sana apepele ipepo ukufuma pa nshi ya mutima kabili mu kuiceefya. * Pa mpela ya uku kulongana, bonse abasangilweko balisumine ukuti cine cine, kulya kwali kulongana ukushakalabwe.

[Amafutunoti]

[Amashiwi pe bula 19]

Bonse balitemenwe ukumfwa ilyashi lya kwipusha ilyalengele abantu baishibilapo ifingi pabo baleipusha

[Amashiwi pe bula 20]

Yehova alipaala umulimo wa kushimikila mu Ethiopia