Bushe Yehova Alimwishiba?
Bushe Yehova Alimwishiba?
“Yehova aishiba abakwe.”—2 TIM. 2:19.
1, 2. (a) Finshi Yesu abikileko sana amano? (b) Mepusho nshi tufwile ukuyipusha?
BUSHIKU bumo umuFarise aile kuli Yesu no kumwipusha ukuti: “Lifunde nshi ilikalamba mu Mafunde yonse?” Yesu ayaswike ukuti: “Uletemwa Yehova Lesa obe no mutima obe onse, no mweo obe onse, no kutontonkanya kobe konse.” (Mat. 22:35-37) Yesu alitemenwe sana Wishi uwa ku muulu kabili ne fyo alecita fyalelanga ico. Yesu alefwaisha ukulacita ifyo Yehova atemwa kabili alilangile ico pantu ali uwa cishinka ilyo ali pe sonde. E ico ilyo ali mupepi no kufwa, alandile ukuti Lesa alimwishibe ukuti wa cishinka kabili alekonka amafunde Yakwe. Kanshi Yesu alikalilile mu kutemwa kwa kwa Yehova.—Yoh. 15:10.
2 Abantu abengi ilelo batila balitemwa Lesa. Ukwabula no kutwishika na ifwe twaba pali aba bantu. Lelo kuti cawama ukuipusha ifi fipusho fyacindama: ‘Bushe Lesa alinjishiba? Bushe ine Yehova amona shani? Bushe naba pa bantu bakwe?’ (2 Tim. 2:19) Tulomfwa bwino ukukwata ishuko lya kuba ifibusa fya kwa Mulopwe Uwapulamo!
3. Mulandu nshi bamo batwishikila nga kuti baba abantu ba kwa Yehova, kabili cinshi cingalenga baleka ukutwishika?
3 Lelo bamo abatemwa sana Yehova cilabafya ukusumina ukuti Lesa kuti abeshiba baba na bantu bakwe. Bamo bali-isuula e ico balatwishika nga kuti baba abantu ba kwa Yehova. Tulatemwa sana ukwishiba ukuti Lesa tatusuula. (1 Sam. 16:7) Umutumwa Paulo aebele Abena Kristu banankwe ukuti: “Ngo muntu atemwa Lesa, uyu e waishibikwa kuli ena.” (1 Kor. 8:3) Ukutemwa Lesa kulafwaikwa sana pa kuti atwishibe. Tontonkanyeni pali ici: Cinshi mulebelengela ino magazini? Mulandu nshi mufwaila sana ukubombela Yehova no mutima wenu onse, umweo wenu onse, ukutontonkanya kwenu konse na maka yenu yonse? Nga mwali-ipeela kuli Lesa no kubatishiwa, cinshi calengele ukuti mucite ifyo? Baibolo ilondolola ukuti Yehova, uuceeceeta imitima alakula abantu abasuma. (Belengeni Hagai 2:7; Yohane 6:44.) Kanshi mufwile ukusumina ukuti icalenga mulebombela Yehova ni co alimukula. Takalekeleshe abantu abo akula nga ca kuti batwalilila ukuba aba cishinka. Abantu ba musango uyu balicindama sana kuli Lesa kabili alibatemwa icine cine.—Amalu. 94:14.
4. Mulandu nshi tufwile ukulatontonkanishisha pa fyo twaishibikwa kuli Lesa?
4 Yehova nga atukula, tufwile ukubombesha pa kuti twaikalilila mu kutemwa kwakwe. (Belengeni Yuda 20, 21.) Ibukisheni ukuti Baibolo itila nabo Lesa akula kuti basensenunwa nelyo ukufumako kuli Lesa. (Heb. 2:1; 3:12, 13) Ku ca kumwenako, ilyo umutumwa Paulo talalanda amashiwi yaba pali 2 Timote 2:19, alandile pali Humenai na Filete. Inshita imo aba baume babili bali bantu ba kwa Yehova, lelo pa numa balipaaswike bafuma mu cine. (2 Tim. 2:16-18) Ibukisheni no kuti mu filonganino fya mu Galatia, bamo abo Lesa aishibe tabatwalilile ukwenda mu cine. (Gal. 4:9) Tufwile lyonse ukulaibukisha ukuti bucibusa bwesu na Lesa bwalicindama.
5. (a) Mibele nshi iyo Lesa atemwa? (b) Bantu ba musango nshi twalalandapo?
5 Kwaliba imibele iyo tufwile ukukwata pa kuti tube abantu ba kwa Yehova. (Amalu. 15:1-5; 1 Pet. 3:4) Imo pali iyi, citetekelo no kuicefya. Natulande pa bantu babili abakwete iyi mibele pa kuti tumone ifyo ukukwata iyi mibele kwalengele Yehova abatemwe. Twalalanda na pa muntu uwalemona kwati Lesa alimwishibe, uwaishilekwata icilumba icalengele ukuti Yehova amukaane. Twalasambililako amasambililo ayasuma kuli aba bantu.
Ni Wishi wa Bantu Ababa ne Citetekelo
6. (a) Bushe Abrahamu alangile shani icitetekelo mu malayo ya kwa Yehova? (b) Mulandu nshi twingalandila ukuti Yehova alishibe sana Abrahamu?
6 Abrahamu ‘alitetekele Yehova.’ Na kuba etwa ati “wishi wa bantu bonse ababa ne citetekelo” (Ukute. 15:6; Rom. 4:11) Citetekelo calengele Abrahamu afume uko aleikala no kusha ifibusa fyakwe e lyo ne fikwatwa no kuya ku calo ca kutali. (Ukute. 12:1-4; Heb. 11:8-10) Icitetekelo ca kwa Abrahamu cali icakosa na pa numa ya myaka iingi. Ici calimoneke ilyo “apene atuule Isaki ilambo” lintu Yehova amwebele ukutuula uyu mwana. (Heb. 11:17-19) Abrahamu alicetekele amalayo ya kwa Yehova, ne ci calengele Lesa ukumutemwa sana. (Belengeni Ukutendeka 18:19.) Yehova tapelele fye pa kwishiba ukuti Abrahamu e ko ali, alimutemenwe kabili alemumona ukuti ni cibusa wakwe.—Yako. 2:22, 23.
7. Finshi Abrahamu aishibe pa malayo ya kwa Lesa, kabili alangile shani icitetekelo?
7 Abrahamu afwililemo fye ukwabula ukupokelela impanga iyo Lesa amulaile. Kabili tamweneko uko abafumine mu mwana wakwe bafulile “ngo mucanga wa mu lulamba lwa bemba.” (Ukute. 22:17, 18) Nangu ca kuti aya malayo tayafikilishiwe ilyo Abrahamu ali umumi, alitwalilile ukucetekela sana Yehova. Alishibe ukuti ifyo Lesa alanda ukuti fikacitika, cimo no kuti naficitika kale. Fyonse ifyo Abrahamu alecita fyalelanga ukuti wa citetekelo. (Belengeni AbaHebere 11:13.) Bushe na ifwe Yehova atumona ukuti twakwata icitetekelo nge ca kwa Abrahamu?
Uwa Citetekelo Alalolela Pali Yehova
8. Finshi ifyo abantu abengi bafwaisha mu cifyalilwa fye?
8 Nalimo kwaliba fimo ifyo tufwaya fyacitika. Mu cifyalilwa fye abantu balafwaya ukuupa no kuupwa, ukukwata abana, no kuba no bumi ubusuma. Lelo abengi basanga ukuti, fimo ifyo bafwaya taficitika. Nga e fyo caba na kuli ifwe, ifyo tucita e filanga nga twalikwata icitetekelo nelyo iyo.
9, 10. (a) Finshi abantu bamo bacita pa kuti ifyo bafwaya ficitike? (b) Mumona shani amalayo ya kwa Lesa?
9 Kuti cabipa sana ukusuula ukufunda kwa kwa Lesa pa kuti fye tucite ifyo tulefwaya. Ici kuti calenga icitetekelo cesu ukonaika. Ku ca kumwenako, bamo balasala inshila sha kundapilwamo isho Baibolo yakaanya. Bambi nabo basalapo ukubomba incito ishilenga belaba ne ndupwa shabo pa nshita iikalamba e lyo no kukanasangwa ku kulongana. Inga nga ca kuti Umwina Kristu atendeka ukuba ne cintemwa no muntu uushili kapepa, bushe kuti twatila alecita ifingalenga Yehova amwishiba? Bushe Yehova nga aumfwile shani nga ca kuti Abrahamu alitendelwe ukulolela ifyo Lesa amulaile? Ni shani nga ca kuti Abrahamu apingwilepo ukucita fye ifyo alefwaya, pamo nga ukukwata ing’anda no kuipangila ishina mu nshita ya kulolela pali Yehova? (Linganyeniko Ukutendeka 11:4.) Bushe Yehova nga alitwalilile ukumwishiba no kumutemwa?
10 Finshi mufwaya ukuti fikacitike bwangu? Bushe icitetekelo cenu calikosa ica kutila kuti camwafwa ukulolela pali Yehova, uwalaya ukumupeela ifyo mufwaya? (Amalu. 145:16) Nga fintu cali kuli Abrahamu, fimo ifyo Lesa atulaya te kuti fifikilishiwe pa nshita twingatemwa. Lelo Yehova alafwaya twakwata icitetekelo nga Abrahamu no kulacita ifilanga ukuti twalikwata icitetekelo. Nga tulecita ifyo, Yehova akatulambula.—Heb. 11:6.
Umuntu Uwali Uwaicefya no Wali ne Cilumba
11. Bushe lishuko lya kumona no kucita finshi ilyo Kora akwete, kabili ici cilanga cinshi pa fyo ali kuli Lesa?
11 Mose na Kora balipusene sana mu fyo balemona ubutungulushi bwa kwa Yehova ne fyo Lesa alebeba ukucita. Ifyo bacitile fyalikumine ifyo Yehova alebamona. Kora ali mwina Lebi uwa mu bana ba kwa Kohati. Alikwete ishuko napamo ilya kumonako uko uluko lwa bena Israele lwaleabuka Bemba Wakashika. Afwile alyonawileko abena Israele bacintomfwa pa Lupili lwa Sinai abo Yehova apingwile ukufwa, kabili afwile alisendeleko ne cipao ca cipangano. (Ukufu. 32:26-29; Impe. 3:30, 31) Afwile ali uwa cishinka kuli Yehova pa myaka iingi kabili na bena Israele abengi balimucetekele.
12. Nga fintu icikope cili pe bula 28 cilelanga, bushe icilumba ca kwa Kora calengele bucibusa bwakwe na Lesa ukuba shani?
12 Nalyo line, ilyo uluko lwa bena Israele lwaleya ku Calo ca Bulayo, Kora atendeke ukumona kwati ifyo Lesa aletungulula abantu tafyali bwino. Abaume bambi 250 abakalamba bakonkele ifyo Kora alelanda kabili nabo bafwaile ukwalula ifintu. Kora na bantu bambi bafwile balicetekele sana ukuti Yehova alitwalilile ukuba cibusa wabo. Baebele Mose ukuti: “Imwe nomba capwa, pantu abantu bonse muli ulu lukuta ba mushilo na Yehova ali mu kati kabo.” (Impe. 16:1-3) Ifyo bacitile fyalangile ukuti bali-icetekele icine cine kabili bali ne cilumba sana! Mose abebele ati: “Yehova akalenga twishibe umuntu wakwe.” (Belengeni Impendwa 16:5.) Ku kupwa kwa bushiku bwakonkelepo, Kora na bonse abamukonkele muli bucipondoka balifwile.—Impe. 16:31-35.
13, 14. Finshi filanga ukuti Mose ali uwaicefya?
13 Mose ena alipuseneko pantu ali “uwafuukisha pa bantu bonse abali pano isonde.” (Impe. 12:3) Calimoneke ukuti alifuuka pantu alefwaya sana ukukonka ubutungulushi bwa kwa Yehova. (Ukufu. 7:6; 40:16) Baibolo tayalandapo icili conse icilanga ukuti Mose aletwishika inshila Yehova alecitilamo ifintu nelyo ukuti alefulwa Yehova nga amweba ukukonka fimo pa kucita ifintu. Ku ca kumwenako, Yehova alimwebele fyonse ifyo alekabila ukukonka no tuntu tonse utunono, pamo nga ifyo ubushishi alingile ukubomfya bwalingile ukuba, ne mpendwa ya tumipeto utwaleba ku tumatenti. (Ukufu. 26:1-6) Nga ca kuti kangalila mu kuteyanya kwa kwa Lesa akolobonda muli tonse ilyo alemweba ifya kucita, limo kuti mulefuupulwa. Lelo Yehova e kangalila wesu uwapwililika, uupeelako bamo imilimo kabili alicetekela ababomfi bakwe. Kanshi ifyo atweba ukukonka pa kucita ifintu, nangu fingafula shani, ninshi umwine naishiba ico acitile fyo. Mose tafulilwe ilyo Yehova akolobondelemo muli tonse utwalekabilwa pa kupanga icikuulwa ca mushilo. Talemona ukuti ico Yehova amwebele fyonse no tunono kumo pa fya kukuula ici icikuulwa, ni co alimusuulile nelyo alemutitikisha. Lelo Mose alibikileko amano ica kuti abalebomba uyu mulimo, “bacitile fye filya fine” Lesa alandile. (Ukufu. 39:32) Ici cilatulanga ukuti ali uwaicefya icine cine! Mose alishibe ukuti ulya mulimo wali wa kwa Yehova no kuti ena ali mubomfi fye.
14 Ukuicefya kwa kwa Mose kwalimoneke na lintu alufyenyepo fimo ifyo nalimo alingile ukuilishanyapo. Bushiku bumo, ilyo abantu bailishenye kuli ena, Mose alikalipe sana ica kuti afilwa no kucindika Lesa. Ici calengele Yehova ukumweba ati takengishe abantu mu Calo ca Bulayo. (Impe. 20:2-12) Mose na Aarone munyina balishipikishe pa myaka iingi ilyo abena Israele baleilishanya. Lyena, ilyo Mose alufyenye umuku fye umo, bamwebele ukuti takengile mu calo ico alelolela pa nshita ntali! Bushe Mose acitile shani? Nga fintu cingaba ku uuli onse, Mose tatemenwe, na lyo line ali-icefeshe no kukonka ifyo Yehova alandile. Alishibe ukuti Yehova Lesa alilungama kabili takwata ulufyengo. (Amala. 3:25-27; 32:4) Nga twatontonkanya pali Mose, tatutwishika ukuti Yehova alimwishibe.—Belengeni Ukufuma 33:12, 13.
Ukuicefya Kulafwaikwa pa Kuti Tuleumfwila Yehova
15. Finshi twingasambililako ku fyo Kora acitile pa mulandu wa cilumba?
15 Ifyo tucita ilyo kwaba ukwaluka pali fimo mu kuteyanya kwesu na lintu abatutungulula batweba fimo, filalanga nampo nga Yehova alitwishiba nelyo iyo. Kora na banankwe bali-ifumishe kuli Lesa pa mulandu wa kuti bali-icetekele sana, bali ne cilumba, kabili tabakwete icitetekelo. Kora ena alemona ati Mose muntu fye umukote uwalebeba ifya kucita cila bushiku, alilabile ukuti ni Yehova e waletungulula lulya luko. Ici calengele ukuti alesuusha abo Lesa alebomfya. Nga caliweme sana Kora alolela Yehova amwafwa ukumfwikisha ifintu nelyo ukulolela Yehova umwine ukwalula ifintu ilyo amona ukuti cakabilwa. E ico, nangu ca kutila Kora alibombeele Lesa muli bucishinka pa myaka iingi, icilumba calengele imilimo yakwe yaya fye mu menshi!
16. Bushe ukupashanya ukuicefya kwa kwa Mose kukalenga bucibusa bwesu na Yehova ukuba shani?
16 Baeluda na bantu bambi mu cilonganino kuti basambililako fimo ku lyashi lya kwa Kora. Ukuicefya kukabafwa ukulalolela Yehova no kukonka ifyo alanda ukupitila mu bo asonta ukututungulula. Bushe na ifwe twaliba abaicefya kabili abafuuka nga filya Mose ali? Bushe twalisumina ukuti Lesa e wasala abatutungulula no kuti tufwile ukulabomfwila? Bushe bamo nga bacita ifyo tushitemenwe, tulailama? Nga tulacita ifyo, Yehova akatwishiba kabili tukaba ifibusa fyakwe. Ukuicefya kukalenga akatutemwe.
Yehova Alishiba Abantu Bakwe
17, 18. Cinshi cikatwafwa ukutwalilila ukuba abantu ba kwa Yehova?
17 Cisuma ukutontonkanyapo sana pa bantu abo Yehova akulile na bali abantu bakwe. Abrahamu na Mose bali abashapwililika kabili balelufyanya. Na lyo line, Yehova alibeshibe kabili bali bantu bakwe. Lelo ifyo Kora acitile fitulanga ukuti no muntu wa kwa Lesa kuti afuma kuli Yehova, na bucibusa bwakwe na Lesa bwapwa no kupwa. Kanshi ifwe umo umo tulingile ukuipusha ati: ‘Bushe ine Yehova amona shani? Finshi ningasambililako kuli aba bantu abo Baibolo yalandapo?’
18 Mulesekelela ukuti Yehova amona abantu ba cishinka abo akula ukuti bantu bakwe. Twalilileni ukuba abaicefya, no kukwata icitetekelo ne mibele imbi iingalenga Lesa ukumutemwa. Ukwishibikwa kuli Yehova, lishuko icine cine ilituletela insansa pali nomba, kabili na ku ntanshi likalenga tukapaalwe sana.—Amalu. 37:18.
Bushe Muleibukisha?
• Ni bucibusa bwa musango nshi mwingakwata na Yehova?
• Kuti mwapashanya shani icitetekelo ca kwa Abrahamu?
• Finshi twingasambilila kuli Kora na Mose?
[Ifipusho]
[Icikope pe bula 26]
Twalikwata icitetekelo nga Abrahamu ica kuti Yehova akafikilisha fyonse ifyo atulaya
[Icikope pe bula 28]
Kora talefwaya ukumfwila abaletungulula
[Icikope pe bula 29]
Bushe Yehova aishiba ukuti mwali-icefya kabili mulomfwila abalemutungulula?
