Amepusho Ukufuma ku Babelenga

Kuti nacita shani nga nshaumfwikishe ifyo nabelengele mu Baibolo nangu nga ndefwaya ubwafwilisho pa bwafya nkwete?

Amapinda 2:1-5 yatucincisha ukuti nga tulefwaya ukumfwikisha no kwiluka ifyaba mu Baibolo tulingile ‘ukufwayafwaya’ kwati tulefwaya “ifyuma fyashikama.” Ici cilepilibula ukuti tufwile ukubikako sana amano ku kufwaya amasuko ku mepusho ya mu Baibolo no kwishiba ifya kupwisha amafya. Kuti twacita shani?

Icitabo citila Nonkelenimo mu Masambililo ya Isukulu lya Butumikishi Ilya Bulesa amabula 33 ukushinta ku 38 yalondolola ifya “Ukwishiba Ukusapika” pa kubomfya impapulo isha “musha wa cishinka kabili uwashilimuka.” (Mat. 24:45) Ibula 36 lilondolola ifya kubomfya Icisontelelo ca Mpapulo sha Watch Tower, umuba icisontelelo ca fyebo ne cisontelelo ca malembo. Ici cilalenga mwasapika amashiwi ayapulilemo nelyo Amalembo kabili kuti mwingasanga ifyebo na fimbi ifilelanda pa fyo mulefwaya. Mulepoosa inshita iikalamba pa kusapika pa kuti mwingasanga ifyasuko ifyo mulekabila nelyo ifyo mufwile ukucita pa kuti fimwafwe. Ico mufwile ukwishiba ca kuti mulefwaya “ifyuma fyashikama” kanshi mufwile ukupoosapo inshita iikalamba e lyo no kubikako amano.

Kwena kwaliba amalyashi na malembo ayo impapulo shesu shi shalandapo mu kulungatika. Nangu fye Malembo ayo twalandapo, nalimo kuti ifyo mulefwaya ukwishiba tatwafilandapo. Na kabili amalyashi yamo aya mu Baibolo yalalenga twakwata amepusho pantu te fyonse Amalembo yalandapo. Kanshi te kuti tusange ifyasuko ku amepusho yonse. Nga caba ifi, tatulingile ukulatunganya fye amasuko ku mepusho yashingasukwa. E co te cisuma ukulakansanina pa ‘mepusho, lelo tufwile ukusambilisha ifya kwa Lesa ifya kukosha icitetekelo.’ (1 Tim. 1:4; 2 Tim. 2:23; Tito 3:9) Nangu fye maofeshi yakalamba nelyo imisambo tayasuka amepusho ayo impapulo shesu shishalandapo. Caliwama pantu mu Baibolo mwaliba ifyebo ifyalinga ifitutungulula. Nangu ca kuti tayalanda pali fyonse, ici cilalenga twakwata icitetekelo cakosa muli Kalemba wa Baibolo.—Moneni mu citabo icitila Palameni Kuli Yehova, pa amabula 185 ukufika ku 187.

Nomba kuti mwacita shani nga ca kuti mwafwailisha lelo tamusangile icasuko ico mulefwaya nelyo ifyo mwingacita? Kuti mwaipusha Abena Kristu banenu abafikapo nelyo umo pali ba eluda. Balishiba ifingi ifya mu Baibolo ne fyo Umwina Kristu afwile ukuba. Kuti bamwafwa maka maka nga namukwata ubwafya nelyo mulefwaya ukupingulapo pali fimo, pantu balimwishiba bwino e lyo nabeshiba no bwafya mukwete. Mwilalaba ukupepa kuli Yehova maka maka pa filemusakamika kabili mwebeni pa kuti amwafwe ukwishiba ifya kucita, umupashi wa mushilo kuti wamwafwa “pantu Yehova e upeela amano . . . no kwiluka.”—Amapi. 2:6; Luka 11:13.