Mulandu Nshi Cacindamina ‘Ukulalola?’

“CINSHI tukeshibilako ukuti e po muli no kuti icalo cili ku mpela?” (Mat. 24:3) Ilyo Yesu aleasuka abasambi bakwe ici cipusho, abapeele icishibilo ico bali no kwishiba bwino bwino kabili icishingalubika nge fyo calembwa muli Mateo icipandwa 24, Marko icipandwa 13 na muli Luka icipandwa 21. Alandile no kuti: “Mulelola.”—Mat. 24:42.

Nangu ca kuti icishibilo tacali no kulubika nangu fye panono, cinshi abapeelele ukufunda na kumbi? Natulande pa fintu fibili ifyalengele ukuti abapeele uku kufunda. Ica kubalilapo, ifya kubapumbula kuti fyalenga basuula icishibilo, kabili kuti fyalenga baleka ukubika amano ku fya kwa Lesa no kuleka ukulalola. Ica bubili, Umwina Kristu limbi kuti aishiba ifyaba mu cishibilo, nomba pa mulandu wa kuti uko ekala taficitika kuti amona kwati tafimukumine. Nalimo kuti atontonkanya ukuti “ubucushi bukalamba” ubo Yesu alandilepo buli ukutali kabili talingile ‘ukulalola.’—Mat. 24:21.

“Tabapooseleko Amano”

Yesu aibukisheko abasambi bakwe pa bantu abaleikala mu nshita ya kwa Noa. Abantu balemona ifyo Noa aleshimikila, ifyo alekuula icibwato, ne fyo abantu bali abankalwe. Lelo abengi “tabapooseleko amano.” (Mat. 24:37-39) E fyo abantu baba na lelo. Ku ca kumwenako, balamona ifishibilo fya kuti bafwile ukucefyako ukubutusha motoka, lelo abengi tabafikonka. E mulandu wine ubuteko bubikila ifilundulundu mu misebo ya mu misumba pa kutila banamutekenya belabutusha sana. E fyo caba na ku Umwina Kristu, kuti aishiba ifishibilo fya nshiku sha kulekelesha lelo kuti alecita ifintu kwati no kumona talefimona. Ifi e fyacitikile Arielle uwa ku West Africa.

Arielle alitemenwe sana ukutamba umupila wa ku minwe uwa banakashi pa TV. Ilyo pa sukulu alesambilila batendeke ukuteya uyu mupila, tatontonkenyepo no kuti nga atampa ukuteya uyu mupila kuti kwaba ifingonaula bucibusa bwakwe na Lesa. E waleba mu cipanda. Nomba finshi fyacitike? Atile: “Abanandi bamo abo twaleteya nabo balikwete abanabo abalumendo abalebomfya imiti ikola no kupeepa fwaka. Balenseka pantu shalecitako ifyo balecita, lelo natontonkanye ukuti nshakulabikako amano. Ukwabula no kuti njishibe, ici icangalo catampile ukulangonawila bucibusa bwandi na Lesa, calinsendele sana. Nga tulelongana amano yaleba fye ku kuteya umupila. Imibele yandi iya Bwina Kristu nayo yalyalwike. Mu nshita ya kumfwa fye bwino ukuteya umupila nomba nalefwaya ukuti lyonse tulecimfya. Nalikoselepo sana pa kutila fye tulecimfya. Nalenaka sana. Nshalebika amano ku banandi pa mulandu fye wa mupila.

“Ilyo ibumba lya mupila ilyo twalecimfyanya nalyo babapeele ukuuma penoti e lyo  nailwike ifyalecitika. Nali-iteyenye ukwikata pa kuti beingisha. Lelo ukwabula no kutontonkanyapo nasangile fye ukuti ni mpepa kale kuli Yehova pa kuti beingisha! Calengele njiluke ukuti nalibwelele pa nshi mu kupepa. Nacitile shani pa kuti mbe na kabili cibusa musuma uwa kwa Lesa?

“Kale, nalitambilepo DVD itila Young People Ask—What Will I Do With My Life? * Napingwilepo ukutamba na kabili iyi DVD nomba iyi nshita yena nalibikileko sana amano. Na kuba nakwete ubwafya bumo bwine nga bulya André mu cilangililo akwete. Nalibikileko amano ku kukonka ifyo eluda aebele André ukucita, ukubelenga no kutontonkanya pa Abena Filipi 3:8 kwalingafwile kabili kwalengele ukuti ndeke ukuteya umupila.

“Ala calingafwile sana! Ino nshita nshifwaya ukulacimfyanya, kabili nalipalama ku Bena Kristu banandi. Na kabili nalitendeka ukumona ifya kwa Lesa ukuti fyalicindama sana. Ndabika amano ku fyo twalesambilila mu kulongana, nalifitemwa na kabili. Nomba nalitendeka ukulaya sana mu mulimo wa kushimikila. Ndabombako na bupainiya bwa kwafwilisha libili libili.”

Nga kuli icilelenga ukuti mwilabika sana amano ku filecitika ifyaba mu cishibilo ico Yesu alandilepo, kuti cawama ukucita ifyo Arielle acitile. Kuti mwacita ifyakonkapo. Kuti mwasapika mu Icisontelelo ca Mpapulo sha Watch Tower. Ulu lupapulo lwaba kwati ni mapu ya kumulanga ukuli ifyuma ifyashikama. Mukasangamo ukufunda kusuma ne fyo bambi bashimika pa fyo bacitile ilyo bakwete amafya. Pa kuti mulenonkelamo sana mu kulongana kwa Bwina Kristu, mufwile ukulapekanya no kulemba ifishinka. Bamo basanga ukuti ukwikala ku ntanshi mu ng’anda ya Bufumu kulabafwa ukulakutikisha. Nga kuli ilyashi lya fipusho ne fyasuko kuti cawama ukwasukapo bwangu. Pa kuti mulelola, mulelinganya ifilecitika mu calo ku fyaba mu cishibilo na ku fintu fimbi ifyasobelwe ukuti fya kulacitika “mu nshiku sha kulekelesha.”—2 Tim. 3:1-5; 2 Pet. 3:3, 4; Ukus. 6:1-8.

“Mube Abaiteyanya”

Ifyaba mu cishibilo ca nshiku sha kulekelesha filacitika ‘mwi sonde lyonse.’ (Mat. 24:7, 14) Abantu abengi bekala mu ncende umucitika ifikuko, ifipowe, ifinkukuma, ne fintu fimbi ifyasobelwe. Lelo bambi bekala mu ncende umushicitika ifi fintu. Nga ca kuti ifi fintu tafyamucitikilapo, bushe mulingile ukutontonkanya ukuti ubucushi bukalamba bucili ukutali? Te kuti ciwame ukutontonkanya ifyo.

Tontonkanyeni na kabili pa fyo Yesu alandile pa “fikuko ne fipowe.” (Luka 21:11) Ica kubalilapo talandile ukuti ifi fintu fikalacitika mu ncende shonse fye pa nshita imo ine. Lelo atile fikalacitika “mu ncende shimo shimo.” Kanshi te kuti twenekele ifi fintu ukulacitika konse pa nshita imo ine. Ica bubili, ilyo alandile pa fipowe, Yesu alandile ukuti abasambi bakwe bamo balekabila ukuba abacenjela pa kuti tabasangwike abaliili. (Luka 21:34) Kanshi Abena Kristu tabalingile ukwenekela ukuti bakalamona fyonse ifyaba mu cishibilo. Lelo, Yesu atile:  “Ilyo mwamona ifi filecitika, mwishibe ukuti ubufumu bwa kwa Lesa buli mupepi.” (Luka 21:31) Tulatamba fyonse ifyaba mu cishibilo pa ma TV nangu ca kuti taficitika uko twikala.

Ico mufwile ukulaibukisha ca kuti Yehova alimika kale ‘ubushiku ne nshita’ ilyo ubucushi bukalamba bukatendeka. (Mat. 24:36) Ificitika pa calo tafyakaalule inshita no bushiku ilyo ubucushi bukalamba bulingile ukutendeka.

Yesu akonkomeshe Abena Kristu bonse ati: “Mube abaiteyanya.” (Mat. 24:44) Tulingile lyonse ukuba abaiteyanya. Kwena tacilepilibula ukuti tufwile ukulabomba umulimo wa kwa Lesa akasuba konse fye cila bushiku. Na kuba takwaba uwaishiba ifyo tukalacita ilyo ubucushi bukalamba bukatendeka. Nalimo bamo bakalalima mwi bala nelyo bakalabomba imilimo ya pa ng’anda. (Mat. 24:40, 41) Nomba kuti twacita shani pa kuti tuiteyanye?

Ba Emmanuel na ba Victorine na bana babo abakashana 6 bekala mu Africa umushicitika sana ifyaba mu cishibilo ica nshiku sha kulekelesha. E co bapingwilepo ukulalanshanya pa fya kwa Lesa cila bushiku pa kutila filebaafwa ukuba abaiteyanya. Ba Emmanuel balondolola abati: “Calyafishe ukusanga inshita iisuma iya kulalanshanya bonse pamo. Twasukile twasalapo ukulalanshanya mu maminiti 30 ukutendeka na 06:00hrs ukufika ku 06:30hrs ulucelo. Nga twapwisha ukulanshanya ilembo lya bushiku twalepekanyako amaparagrafu yanono mu lupapulo lwa kusambililamo pa cilonganino muli uyo mulungu.” Bushe ifi bacita fyalibafwa ukuba abalola? Ee fyalibafwa. Ba Emmanuel ni bakampanya be bumba lya baeluda mu cilonganino. Ilingi line ba Victorine balabombako bupainiya bwa kwafwilisha kabili balyafwa abengi ukusambilila icine. Abana babo balabomba bwino mu cilonganino.

Yesu atukonkomesha ukuti: “Cenjeleni, mulelola.” (Marko 13:33) Mwilaleka ifintu fimbi filemulenga ukukanaba abalola. Lelo mulekonka ukufunda kusuma ukwaba mu mpapulo shesu, e lyo ne fyo tusambilila mu kulongana, nga filya Arielle acitile. Nga fintu ulupwa lwa ba Emmanuel lucita, na imwe mule-esha ukulacitapo fimo cila bushiku pa kuti “mulelola.”

[Futunoti]

[Icikope pe bula 4]

Ukulasambilila lyonse ifya kwa Lesa kwalyafwa ulupwa lwa ba Emmanuel ‘ukuba abalola’