Bushe Mulatemwa Ilyo ‘Mulepeela Ubupe’?

ABENA Kristu ba mu Filipi baishibikwe ukuti ni bakapekape pantu baletungilila ukupepa kwa cine. Muli kalata iyo abalembeele, umutumwa Paulo atile: “Ntootela Lesa wandi, lyonse ilyo naibukisha imwe mu kupapaata kwandi konse uko imupapaatilako imwe bonse, ilyo mpapaata no kusekelela, pa mulandu wa fyo mwa-afwilishako mu kusabankanya imbila nsuma ukutula pa bushiku bwa ntanshi ukufika pali ino nshita.” (Fil. 1:3-5) Paulo alibukishe ilyo Lidia na ba mu ng’anda yakwe babatishiwe ne fyo apapeete Paulo na banankwe ukuti bekale mu ng’anda yakwe.—Imil. 16:14, 15.

Tapapitile inshita iikalamba, aba mu cilonganino icipya mu Filipi, balitumiine Paulo ifyo alekabila imiku ibili ilyo aikele imilungu iingi na Bena Kristu banankwe mu Tesalonika. Ukufuma ku Filipi ukuya ku Tesalonika pali amakilomita 160. (Fil. 4:15, 16) Pa numa ya  myaka inono, ilyo ababwananyina ba ku Filipi na ba ku Makedonia bale-eshiwa kabili abali “abapiina nga nshi,” balyumfwile ukuti Abena Kristu banabo abalepakaswa mu Yerusalemu baali mu kukabila e ico balefwaya ukubafwa. Paulo atile “bapeele ukucila fye na pa maka yabo.” Lelo alembele no kuti: “Baletulomba no kutupapaata ukuti bapeele ubupe.”—2 Kor. 8:1-4; Rom. 15:26.

Pa numa ya myaka 10 ukufuma apo abena Filipi babelele Abena Kristu, balitwalilile ukuba bakapekape. Ilyo baumfwile ukuti Paulo ali mu cifungo ku Roma, batumine Epafroditi ukutwala ifyo Paulo alekabila, aendele amakilomita 1,287 na makasa e lyo na pali bemba ukufika ku Roma. Ico bacitile ifi, balefwaya ukuti Paulo atwalilile ukukoselesha ababwananyina no kushimikila nangu ca kuti ali mu cifungo.—Fil. 1:12-14; 2:25-30; 4:18.

Muno nshiku, Abena Kristu ba cine bamona ukuti lishuko ukutungilila umulimo wa kushimikila pa Bufumu no kulenga abantu ukuba abasambi. (Mat. 28:19, 20) Balatwala pa ntanshi umulimo wa Bufumu ilyo balebombako uyu mulimo no kusangwilako indalama. Ifyebo ifili mu kabokoshi filelangilila ifyo twingacita nga tulefwaya ukutungilila umulimo wa kushimikila uo Lesa atupeela.

[Akabokoshi pa mabula 22, 23]

IFYO BAMO BASANGULA

IMISANGULO YA MULIMO WA MWI SONDE LYONSE

Abengi balapaatwilako libela, nelyo ukupekanishisha libela indalama sha kubika mu tubokoshi twa misangulo utwalembwapo ukuti “Umulimo wa mwi Sonde Lyonse.”

Cila mweshi, ifilonganino filatuma ishi ndalama ku maofeshi ya Nte sha kwa Yehova aya mu calo cabo. Imisangulo ya kuitemenwa iya ndalama na yo kuti yatumwa mu kulungatika ku Watch Tower Society, Attention Treasury, P. O. Box 33459, Lusaka 10101. (Imisangulo ilandilwepo pe samba kuti yatumwa na ku maofeshi ya Nte sha kwa Yehova ayabela mu calo mwikala.) Umuntu nga atumina cheke pali iyi adresi, alingile ukulemba ukuti abakapoka indalama ni ba “Watch Tower Society.” Abalefwaya kuti basangula ne fibeekobeeko nelyo ifipe fimbi ifya mutengo. Uulepeela ifya musango uyu, afwile ukubikapo na kalata iipi iilelondolola ukuti ifyo atumine, bupe.

UKUPEKANYA UKUPEELA MU KUITEMENWA

Ukulunda pa kupeela indalama, kwaliba inshila na shimbi isha kwafwilisha ku mulimo wa Bufumu mwi sonde lyonse. Inshila shimo shimo ni shi:

Inshuwalansi: Umuntu kuti alembesha ba Watch Tower Bible and Tract Society of Pennsylvania ukuti e bakapoka indalama sha cipangano ca inshuwalansi nelyo isha penshoni.

Indalama sha ku Banki: Umuntu kuti alemba icipangano ca kuti nga afwa, indalama sha ku banki, ifipepala ifilanga ukuti umuntu alibikako indalama ku banki nelyo indalama sha penshoni, fikapeelwe kuli ba Watch Tower Bible and Tract Society of Pennsylvania. Kuti acite fyo ukulingana na mafunde ye banki abikako indalama.

Nsonsela: Bamo abakwata indalama ishingi mu twampani kuti batila nsonsela wabo aleya ku Watch Tower Bible and Tract Society of Pennsylvania ngo bupe. E lyo bambi na bo, kuti bapangana no kubika pamo indalama shabo no kushitwala ku banki, e lyo batila nsonsela wabo aleya ku Watch Tower Bible and Tract Society of Pennsylvania.

Impanga ne Fikuulwa: Impanga, ifikuulwa ne ng’anda ifyo bengashitisha kuti bapeela ubupe. Kuti balemba fye icipangano ca kuti ba Watch Tower Bible and Tract Society of Pennsylvania e bakaba abene ba ng’anda ilyo umwine akafwa. Ipusheni ku maofeshi ya Nte sha kwa Yehova aya mu calo cenu ilyo mushilalembesha ifipepala fya buteko ifya kupeelelapo ba Watch Tower Bible and Tract Society of Pennsylvania impanga nelyo ifikuulwa.

Ubupe bwa Kulapeelwako Akanono: Umuntu kuti akuushisha indalama mu kabungwe akabomfiwa ne Nte sha kwa Yehova. Ena nangu umuntu umbi uo alefwaya kuti alepokelelako akandalama kalinga cila mwaka mpaka akafwe.

Ifya Cishale no Kuseekesha: Umuntu kuti alemba no kusuminishanya na ba Watch Tower Bible and Tract Society of Pennsylvania ukuti nga afwa ifipe fyakwe nelyo indalama fikabe fyabo, nelyo kuti aseekesha ifipe atemwa indalama kuli ba Watch Tower Bible and Tract Society of Pennsylvania. Limo tabalipilisha imisonko nga ca kuti ifipe nelyo indalama fyaseekeshiwa ku filonganino fya mapepo.

Nge fyo amashiwi ya kuti “ukupekanya ukupeela mu kuitemenwa” yatulanga, uulesangula ukubomfya ishi nshila twalandapo afwile ukupekanishisha kabela. Nga mulefwaya ukupeela mu kuitemenwa, mulingile ukulembela ku maofeshi ya Nte sha kwa Yehova no kwipusha nelyo ukubatumina lamya ukubomfya inambala ili pe samba.

Treasury

Watch Tower Society

Box 33459,

Farm 23a, Makeni

Lusaka 10101

Lamya: (021) 1 272062