“Nangu Nalilemana, ku Ntanshi Nkapola!”

Abashimika ili lyashi ni ba Sara van der Monde

Ilingi line abantu banjeba abati: “Sara ulamwentula bwino sana. Cinshi wabela uwa nsansa ifi?” Ndabeba ukuti, kwaliba icalenga, pantu: “Nangu nalilemana, ku ntanshi nkapola!”

NAFYELWE mu 1974 mu musumba wa Paris mu France. Lelo pa kuti imfyalwe calyafishe, na pa numa ya kufyalwa bansangile no bulwele bwa ku bongo. Nshaleimya sana amaboko na molu e lyo kabili nshalelanda ifyaumfwika. Nalilwele ne cipumputu kabili ici calelenga ndelwala na malwele yambi.

Ilyo nali ne myaka ibili, twakukiile ku Melbourne, mu Australia. Pa numa ya myaka ibili, batata balibutwike pa ng’anda no kutusha. Ndebukisha ukuti uyu e wali umuku wa kubalilapo uo nayumfwile ukupalama sana kuli Lesa. Apo bamayo bali ni Nte ya kwa Yehova, lyonse balensenda mu kulongana uko nasambilile ukuti Lesa alintemwa no kuti alansakamana. Ukwishiba ifi, pamo na fintu bamayo balensunga no kunsakamana, fyalingafwile ukukanalasakamana nangu ca kuti twashele fweka.

Bamayo balinsambilishe ukupepa kuli Yehova. Na kuba, nasanga ukuti cilanyangukila ukupepa ukucila ukulanda. Nga ndepepa, nshifilwa ukulanda amashiwi, lelo “ndeshiba” ifya kulanda mu mutima. Nangu ca kuti nshilanda ifyaumfwika, ndakoseleshiwa pa kwishiba ukuti nangu ndebulubusa nangu nga ndelandila mu mutima Yehova alomfwa fyonse.—Amalu. 65:2.

Ukushipikisha Amafya

Ilyo nali ne myaka 5, ubulwele bwandi bwalikulileko ica kuti pa kwenda kano nimfwala ku molu ifyaba nge nkonto sha kwendelako fibili ifya fyela. Ala takwali na kwenda kwine kwine, nalewishikana fye! Ilyo nali ne myaka 11, nalilekele no kwenda. Mu kuya kwa nshita nalilekele ukwima pa busanshi, lelo mashini ya malaiti e yalenjimya no kunteeka mu ncinga ya balemana, iyo nale-ensha ne mwine pantu yalikwata ica kwenseshako ica ku minwe

Ukulanda fye icishinka, ubulema bulanenga limo ukumfwa ubulanda. Lelo ndebukisha insoselo twatemwa mu lupwa lwesu, iya kuti: “Tatulingile ukusakamana pa fintu ifyo tushingacita. Tufwile fye ukucita ifyo twingacita.” Ici calilenga ndecita ifintu pamo nga ukunina pali kabalwe, ukooba ubwato, ukuya mu kwangala mu mpanga no kwensha motoka mu musebo umushipita imyotoka ishingi. Ndabombako ifyo naishiba pamo nga ukupenta, ukubila ifya kufwala, ifya kufimbana, ukupikula e lyo no kupanga ifipe fye bumba.

 Apo nalilemana sana, bamo balitwishika nga nali-itemenwa fye ukulapepa Lesa. Ilyo nali ne myaka 18, kafundisha wandi anjebele ukufuma pa ng’anda pa kuti “ndeke” ukupepa ukwalepepa bamayo. Anjebele ukuti akamfwaila umwa kwikala. Nshamupitile mu mbali, namwebele fye ukuti, te kuti ndeke ukupepa e lyo kabii nkafuma fye pa ng’anda nga naipekanya ukulaikalila.

Tapakokwele apo ifi fyacitikile, nalibatishiwe ukuba Inte ya kwa Yehova. Ilyo papitile imyaka ibili, natendeke ukuikalila mu kayanda akanono. Nalikwata ubuntungwa kabili ndekala fye bwino pantu abantu balangafwa.

Nshale-enekela Ukunaansha

Pa myaka iingi, nalipita mu mesho ayengi. Bushiku bumo nalipapile icibi ilyo uo twalesambilila nankwe, na o uwalemana anjebele ukuti tukopane. Pa kubalilapo nalitemenwe sana. Nga filya fine caba ku bakashana bonse, na ine wine ndafwaya ukupwa. Lelo ukuupana no walemana munobe tacipilibula ukuti ninshi ukalaikala bwino mu cupo. Na kuba uyu mulumendo tali ni Nte ya kwa Yehova. Ifyo twasambilila muli Baibolo, imilimo tubomba iya Bwina Kristu, ne fyo tupanga ukulacita fyalipusaninina fye. Nomba kuti twaikala shani no muntu wa musango uyu? E lyo kabili nalefwaisha ukukonka ifunde lya kwa Lesa ilya kuupana fye na kapepa munandi. (1 Kor. 7:39) E co, nalimukeene fye mu nshila iisuma.

Ukufika fye na lelo, nalishiba ukuti nalicitile fye bwino. E lyo kabili nshitwishika ukuti mu calo cipya ico Lesa atulaya, nkaba ne nsansa. (Amalu. 145:16; 2 Pet. 3:13) Pali ino nshita, nalisalapo ukutwalilila uwa cishinka kuli Yehova no kukanasakamikwa pa bwafya nakwata.

Ndafwaisha ukufikako ilyo nkesatoloka ukufuma mu ncinga no kutampa ukulatolauka. E lyo nkatila “Nali icilema, nomba nimpola!”