Bushe Muleibukisha?

Bushe mwalibelenga bwino bwino impapulo sha nomba line isha Ulupungu lwa kwa Kalinda? Moneni nga kuti mwayasuka ifi ifipusho:

• Bushe Olivétan ali ni nani kabili mulandu nshi twingafwaila ukwishiba ifyo acitile?

Abantu abengi baishibe ukuti Pierre Robert umu French ali ni Olivétan. Ilyo kwali ukwalula ubuteko muli ba 1700, alipilibwile Baibolo mu ciFrench. Asalilepo ukubomfya ishiwi lya kuti “kangalila” ukucila ukubomfya ishiwi lya kuti “shikofu” na kabili abomfeshe ishiwi lya kuti “icilonganino” mu nshita ya kulanda ukuti “icalici.” E lyo mumo mumo alibikilemo ishina lya kwa Lesa ilya kuti “Yehova.”—9/1, amabula18-20.

• Bushe Lesa aloseshe mwi ilyo aebele abena Lebi ati ‘Nine cakaniko cenu’?

Imikowa yonse iya bena Israele balibapeele impanga, lelo abena Lebi bena Yehova e wali “icakaniko” cabo. (Impe. 18:20) Tababapeeleko impanga, lelo balibapeele umulimo uwaibela. Nalyo line Yehova alebapeela fyonse ifyo balekabila. Na muno nshiku mwine bonse ababombako umulimo wa kutwala Ubufumu pa ntanshi balishiba ukuti Yehova kuti abapeela fyonse ifyo bakabila.—99/15, amabula 7-8, 13.

• Twaishiba shani ilyo abena Babiloni baonawile Yerusalemu?

Abalemba amalyashi ya kale balilanda ifyalekanalekana pa mfumu sha bena Babiloni na pabo baleteka. Lelo abasambilila sana abengi balisumina ukuti Koreshe uwalenga bubili acimfishe Babiloni mu 539 B.C.E., uyu mwaka walicindama sana mu lyashi lya kale. AbaYuda balilubwilwe no kubwelelamo ku calo cabo mu 537 B.C.E. Baibolo itila bali mu busha pa myaka 70. Kanshi Yerusalemu afwile aonawilwe mu 607 B.C.E. (2 Imila. 36:21, 22; Yer. 29:10; Dan. 9:1, 2)—10/1, amabula 26-31.

• Finshi fingafwa Umwina Kristu ukwishiba bwino ifya kuleseshamo icitendwe fimo nga fisuma nelyo iyo?

Umwina Kristu ngalefwaya ukwishiba nga ca kuti ifya kuleseshamo icitendwe fisuma kabili nga ca kuti Lesa alifisuminisha kuti cawama aipusha ati: Finshi filesanshamo? Ni lilali mficita? Ni bani mba nabo?—10/15, amabula 9-12.

• Mulandu nshi cabipila ukuponya ifumo?

Ni pa mulandu wa kuti Lesa amona ubumi ukuti bwalicindama kabili amona no bumi bwa kaana akali mu mwi fumo ukuti muntu. (Amalu. 139:16) Ukulingana ne Funde lya kwa Mose ukwipaya umwana ushilafyalwa wali mulandu, pantu no wacena fye umwana uushilafyalwa balemupingula. (Ukufu. 21:22, 23)—11/1, ibula 6.

• Bushe ilembo lya Amapinda 7: 6-23 kuti lyatwafwa shani ukukanatamba ifye shiku?

Ili lembo litweba pa mulumendo uwaleenda mu musebo umwaleikala umwanakashi cilende. Uyu mwanakashi alisembeleke umulumendo. Na muno nshiku mwine, tatufwile ukutamba ifikope fyabipa ifiba pa intaneti kabili cisuma ukupepa kuli Lesa ukuti atwafwe ilyo tushilaya na pa intaneti.—11/15, amabula 9-10.

• Bushe icalo cikonaulwa mu 2012?

Pa mulandu wa fyo inshiku shaba muli kalenda ya kale iya bena Maya, bamo batontonkanya ukuti icalo cikonaulwa mu 2012. Lelo ici te kuti cicitike pantu Yehova abumbile isonde ukuti abantu baleikalamo. Baibolo ilanda ukuti icalo cikatwalilila fye ukubako. (Luk. Mil. 1:4; Esa. 45:18)—12/1, ibula 10.

Ni bakalemba nshi aba Baibolo abaliko pa Pentekosti mu 33C.E.?

Cimoneka kwati bakalemba 6 aba Malembo ya ciGriki balisangilweko. Na batumwa batatu Mateo, Yohane na Petro nabo e ko bali. Yakobo na Yuda bamunyina ba kwa Yesu nabo e ko bali. Cimoneka kwati no mulumendo Marko na o e ko ali.—12/1, ibula 22.