ILYASHI LYA KALE

Ukusunga Impapulo sha Kale

ABANTU ba kwa Yehova balikwata ubutala bwa fya ku mupashi. Muli ubu butala mwaba ifintu pamo nga ifikope, amakalata, amalyashi ya fyacitikile bamunyinefwe, ne fintu ifyo balenga no kupanga ifilanga umulimo wa kushimikila, ukulongana e lyo na malyashi ya kale aya Nte sha kwa Yehova. Nomba busuma nshi ubwa kusunga ifya musango uyu e lyo no kufwaya ukusambililako? Mu Israele, imitwe ya ndupwa balesambilisha abana babo amafunde ne fipesha amano ifyo Yehova acitile pa kuti ‘bacetekele Lesa.’—Amalu. 78:1-7.

Ifyalembwa fya kale fyalyafwa sana abantu ba kwa Lesa ukumfwikisha imilimo ya kwa Yehova. Ica kumwenako fye, ilyo abalwani balefwaya ukulesha umulimo pe tempele mu Yerusalemu, abalashi balifwailishe mu fyalembwa fya kale mu musumba ukalamba uwa Ekibatana mu citungu ca Madai kabili basangile icalembwa umo Imfumu Sailasi yasuminishe ukuti bakuule itempele. (Esra 6:1-4, 12) E co itempele lyalikuulilwe cipya cipya ukulingana ne fyo Lesa alefwaya. Luka na o alibomfeshe ifyalembwa fya kale pa kulemba ibuuku lyakwe. Baibolo itila: ‘Alikonkele fyonse bwino bwino ukufuma pa kutendeka.’—Luka 1:1-4.

Ibumba Litungulula lilefwaya sana ukuti twishibe ilyashi lya kale pa kuteyanya kwa kwa Lesa. Ilyo umo uwa mwi Bumba Litungulula alelanda pa kusunga ifyalembwa fya kale, atile: “Pa kuti twishibe ifyo  tukabomba ku ntanshi tulingile ukwishiba ifyo twabomba kale.” E calengele ukuti ku maofeshi yakalamba ku Brooklyn, mu New York, babikeko Dipartimenti iipya iya Writing Archives, aba mu Writing Committee e bangalila iyi dipartimenti.

UBUTALA BWA KUTEYANYA KWESU NE FYA CISHALE

Nga papita inshita, ifintu ifyo abantu bakwata mu lupwa filonaika, kabili abengi batontonkanya ukuti, kanshi nga balefisunga bwino. Mu dipartimenti ya Writing Archives, balabombesha ukusunga ifyalembwa no kulemba imilimo isuma iingi iibombwa. Ifikope fya kale ifyasungwa bwino limbi bakafibika na mu butala bwesu. Impapulo shesu isha kubalilapo, na malyashi ayasuma ayo bamunyinefwe abene bashimika, e lyo ne fyebo ifikankaala sana ifilanda pa kuteyanya kwesu e fyaba mu butala bwesu. Ifintu fya musango uyu cuma ca “cishale” icitulenga ukwishiba ifingi pa mibombele ya mu kuteyanya kabii cilatwafwa ukukanabwelela ku numa lelo ukuba ne citetekelo mu kuteyanya kwesu.

Aleni nomba moneni ifya kulaba mu cipande icipya ica kulati “Ilyashi lya Kale.” Ici icipande ca kulabamo limo limo mu Ulupungu lwa kwa Kalinda ulwa kusambililamo. Ku ca kumwenako, mu Ulupungu ululi no kufuma tulepekanya ukulembamo icipande icikasuka ifipusho pamo nga: Bushe Dawn Mobile yali ni cinshi? Ni bani baleibomfya? Ni lilali baleibomfya kabili finshi yalebomba?

Nga filya fine ukumona mu fikope fya kale ifya lupwa kutwibukishako ifintu ifingi, e fyaba ne mpapulo ishaba mu butala bwa kuteyanya. Filatweba ifingi pa fyo twabomba ne fyo twashipikisha, ne fyo bamunyinefwe abatutangilile batwalilile ukuba ne citetekelo no kushipa, ne fyo batwalilile ukuba ne nsansa, na mafya balekwata pa kubombela Shifwe wa ku muulu uwatutemwa, e lyo ne fyo Lesa atwalilile ukucingilila no kutungilila abantu bakwe. (Amala. 33:27) Natushininkisha ukuti, Yehova akatwalilila ukupaala umulimo wa kusunga bwino ifyalembwa fya lyashi lya kale ilya kuteyanya kwesu pa kuti lyonse tuleba sana abaikatana no kukoshiwa ku kubomba umulimo wakwe.

[Akabokoshi ne Cikope pe bula 31]

Ukwakulafuma Ifya Kubika mu Butala

Nga balepekanya ukulemba ifitabo, ama DVD, ne mpapulo shimbi isha Baibolo, bamunyinefwe abalemba na balenga ifikope, abafwailisha ifyebo e lyo na bambi, basanga ifyo balefwaya mu butala. Kanshi dipartimenti ya Writing Archives ilabikako sana amano no kufwaya inshila shisuma isha kusungilamo ifintu ifyalekanalekana ififuma ku maofeshi ya Nte sha kwa Yehova na ku ma dipartimenti ya pa Bethel, mu filonganino, ku bantu balekanalekana, e lyo na ku twampani tumbi. Natulande pa fyo umulimo wa kulabombwa:

Ukwakulafuma Impapulo no Kushipitulukamo: Impapulo ishaibela shakulabikwa mu butala bwa kuteyanya. Impapulo ishingi batupeela fye e lyo shimbi batwashima fye kuli bamunyinefwe abo indupwa shabo shabombela Yehova ne cishinka pa myaka iingi. Ukupituluka muli ishi mpapulo no kulalinganya ifyabamo kulatwafwa ukumfwikisha ilyashi ililanda pa kuteyanya kwesu no kwishiba ifyalebomba abaliko ku numa ilyo ukuteyanya kwatendeke ukushinta na lelo.

Umutande wa fyalembwa: Mu butala bwa dipartimenti ya Writing Archives, mwaliba ifyalembwa fya kale ifingi nga nshi, fimo fyalikala ukucila pa myaka 100. Impapulo shilaba ishalekanalekana kabili shilembwa mu nshila ishapusanapusana, e co shilingile ukusungwa bwino pa kuti ku ntanshi shikabomfiwe.

Ukuwamya no Kusunga Bwino: Pa kuti ifitabo ne fibombelo fimbi ifishakosa filekokola, balafiwamya. Ifyalembwa, ifikope, amalyashi ayepi, ifyebo ifyasungwa ukubikako ne fyebo ifyo bakopa fyonse fili no kuba pa kompyuta. Kanshi nga balefwaya ukufibomfya kuti baya fye pa kompyuta ukucila ukubomfya ifyo basunga.

Ifya Kufisunga Ne fya Kufibomfya: Impapulo ishaba mu butala shilasungwa bwino ica kuti te kuti shonaike ku kasuba na ku mutonshi. Kanshi ifi ifyebo balefibika pa kompyuta pa kuti bamunyinefwe aba mu Dipartimenti ya Writing Committee balefibomfya pa kufwailisha ifyebo fimo.

[Ifikope pe bula 32]

1. Icipampa apo balesabankanishisha ubunkolanya bwa “Photo-Drama of Creation.” 2. Icitabo umo balelemba abalelembesha ba magazine. 3. Motoka iyakwete icilimba. 4. Inkupo ya Ulupungu lwa kwa Kalinda ulwa April 15, 1912, 5. Icishibisho baitilepo ba J. F. Rutherford ukuya mu cifungo. 6. Ifisoselo balebomfya mu mulabasa wa WBBR. 7. Icilimba ca maseleti. 8. Icola ca kusendelamo ifitabo. 9. Ifyebo baleilembela. 10. Telegramu balembeele ba J. F. Rutherford.