Balishimikile Icebo ca kwa Lesa Ukwabula Umwenso!

Ukushipa nelyo ukukanaba no mwenso kulafwaikwa nga baletulwisha. Iyi e mibele iyakwata Abena Kristu nga fintu calangililwa mu mpapulo pamo nga Ukulabila Sana pa Bufumu bwa kwa Lesa elyo ne citabo ca Jehovah’s Witnesses—Proclaimers of God’s Kingdom. Nga filya abasumina banensu mu nshita sha batumwa baali, na ifwe tulalomba umupashi kuli Yehova pa kuti wingatwafwa ukulanda Icebo cakwe no kushipa.—Imil. 4:23-31.

Nga kulanda pa mulimo wa kushimikila ilyo kwali inkondo ya calo iyakubalilapo, munyinefwe umo atile: “Ababomfi ba kwa Lesa baali sana abacincila ukusabankanya volyumu ya citabo icalenga 7 icaleti Studies in the Scriptures, icakwete umutwe uwaleti The Finished Mystery. Calisabankanishiwe sana ukucila ifitabo fimbi. E lyo mu 1918, trakiti ya kuti Kingdom News No.1 yalifumine. Pakonkele na Kingdom News No.2, iyalelondolola ico aba mu buteko babindiile icitabo ca kuti The Finished Mystery. Lyena pakonkele trakiti na imbi iya kuti Kingdom News No.3. Ishi mpapulo shalisabankanishiwe sana ne bumba lya musha wa cishinka. Pa kuti basabankanye ishi mpapulo, ni co bali aba citetekelo kabili abashipa.”

Muno nshiku, bakabila ba Bufumu ilingi line balasambilishiwa ifya kubomba umulimo, nomba ku numa te fyo caleba. Munyinefwe umwina Poland mu United States uwatendeke ukushimikila mu 1922 atile: “Nshaishibe ifya kulanda pa kupeela abantu ifitabo e lyo no kulanda iciNgeleshi. Naiminine fye neka pa mwinshi wa kwa dokota kabili ilyo nakonkonseshe, nasi e waiswileko. Nshakalabe ifyo cali pantu nalefwaya sana ukulanda lelo nali no mwenso. Ilyo naiswile icola, ifitabo fyonse fyaponene pa makasa ya kwa nasi. Nshaishiba ifyo nalandile lelo nalimupeele ulupapulo. Ilyo nafuminepo, umwenso walipwile kabili nalyumfwile ukuti Yehova nampaala. Ubu bushiku nalipeele abantu ututabo utwingi mu cifulo nalebombela.”

Nkashi umo atile: “Muli ba 1933, pa kusabankanya ubukombe bwa Bufumu, bamunyinefwe balebomfya bamotoka abalekwata ifilimba.” Bushiku bumo, uyu nkashi na munyinefwe na nkashi abaupana baleshimikila mu ncende umwaba impili sana mu California, ku U.S.A. Alandile no kuti “Munyinefwe atwele motoka ya cilimba pa mulu wa mpili e lyo ifwe twabwelela panshi. Ilyo atendeke ukulisha icilimba umwali ubukombe bwa Bufumu, caleumfwika kwati ubukombe bwalefuma mu muulu. Abantu ba mu musumba balyeseshe ukusanga ukwali munyinefwe lelo tabamusangile. Ilyo ubukombe bwapwile ukulila pa cilimba, twaile mu kushimikila abantu abaumfwileko ubukombe. Nali ne myotoka shibili ishali ne filimba lelo abantu abengi tabalefwaya ukumfwa ubukombe.  Nomba tapali ico bali no kucita pantu iciunda ca filimba calefika mu mayanda yabo. Twalimwene ukuti Yehova lyonse alasala inshila iisuma iya kubombelamo. Icalefwaikwa pa kushimikila pa filimba kushipa kabili twalitungulwike ne shina lya kwa Yehova lyalicindikwe.”

Muli ba 1930 na ku kutendeka kwaba 1940, pa kushimikila balebomfya ifilimba fya maseleti umwali amalyashi ya Baibolo. Nkashi umo atile: “Nkashi wacaice aleshimikila ne cilimba ku ng’anda ne ng’anda. Ilyo atendeke ukulisha icilimba pa mwinshi, umwine wa ng’anda umwaume alifulilwe sana ica kuti alipantile icilimba caponena na panshi. Nomba takwali iseleti ilyatobeke. Abaume batatu abalelya ica kulya ca kasuba mu cimbayambaya balimwene ifyacitike. E co balitile nkashi ukuti abalisisheko iseleti kabili balipokeleko ne fitabo. Ici calengele nkashi ukumfwako bwino.” Kanshi icalefwaikwa pa kushipikisha amesho ya musango uyu kushipa.

Nkashi umo wine atile: “Twatendeke ukushalika magazine ku balepita mu musebo mu 1940. Ku numa, kwaleba fye ukusabankanya ifyebo pa filimba. Bamunyinefwe baleya nabatantama umulongo uku ninshi nabasenda ne fipampa ifyalembelwepo ati ‘Ukupepa Citeyo Kabili Kaliilo’ ne fyaleti ‘Bombeleni Lesa na Kristu Imfumu.’ Pa nshita imo ine, twalepeela na bantu ama trakiti. Kanshi pa kuti tushimikile, twalingile ukushipa lelo caliweme pantu twalelenga ishina lya kwa Yehova na bantu bakwe ukwishibikwa.”

Nkashi umbi na o atile: “Ukushalika magazine mu misumba iinono kwale-afya sana. Iyi nshita Inte sha kwa Yehova balebalwisha sana. . . . Kanshi pa kuti wiminine na magazine pa kona no kulanda na bantu ubukombe, kano naushipa sana. Nangu caleba ifi, tatwalepuswa mu mulimo pa Cibelushi. Limo limo abantu baletupokelela bwino sana. Lelo limo abantu baletwimina e co limo twalebelama pa kuti betusansa.”

Nangu ca kuti Inte sha kwa Yehova balebacusha mu Nkondo ya Calo iyalenga Bubili, balitwalilile ukushimikila ukwabula umwenso. Mu bushiku bwalenga 43 ubwa kampeni iyatendeke pa 1 December mu 1940 ukushinta pa 12 January mu 1941, bakasabankanya nalimo 50,000 mu United States basabankenye ututabo mupepi na 8 milioni mu nshita iyo baleita ati Inshita ya “Kushipa.”

Abengi abakalamba mu kuteyanya kwa Lesa balebukisha ifyalebacitikila ifyalefwaikwa ukuti bashipe. Bamo balebukisha ukuti pa myaka iingi, balilangile ukuti bali abashipa mu kushimikila ukufika na ku mpela! Pali ino nshita, tatwaishiba ifyo tukalashimikila ku ntanshi ilyo mpela ya calo cabipa ishilaisa. Lelo pa mulandu wa kwafwa kwa kwa Yehova tukatwalilila ukuba ne citetekelo no kushipa pa kubila Icebo ca kwa Lesa.

[Amashiwi pe bula 9]

Pa kuti tubile ubukombe bwa Bufumu tulingile ukushipa