Ilyashi Lya Kale

‘Calengele Abantu Banjishibe’

Ilyo ba Charlotte White bafikile mu Louisville, ku Kentucky mu U.S.A., ninshi balekunkulusha sutikesi iya mawilo, balengele abantu balelandapo sana.

MU MWAKA wa 1908, bankashi White balengele abantu ba mu musumba ukulabalolesha sana pa mulandu wa musango wa Sutikesi iipya iyo balekunkulusha iyo baleita ati Dawn-Mobile. Aba bankashi batile, “abantu balelandapo sana kabili calengele njishibikwe.”

Pali ilya nshita, Inte sha kwa Yehova abo baleita ukuti Abasambi ba Baibolo balimwene ukuti balingile ukulasambilishako abantu icine ico basambilile mu Malembo. Abengi balisambilile ifya mu Baibolo pa mulandu wa kubelenga icitabo ca kuti Millennial Dawn (ico pa numa baleita ukuti Studies in the Scriptures). Abena Kristu abaleitemenwa kabili abakwete amaka ya kwenda baleya ukutali mu matauni na mu mishi, ku kwafwako Abasambi ba Baibolo ukusabankanya ifitabo ku bantu abengi abalefwaya sana ukubelenga.

Mu 1908, bankashi White na bakabilisha bambi aba Bufumu abacincila, bafwaile ukushalika volyumu yalenga 6 iya citabo ica nkupo ya nsalu pa madola 1.65 (indalama sha ku America). Lelo mu nshita ya kushalika icitabo apo pene, balelemba fye amashina ya balefwaya e lyo babwelelako pa bushiku bwa kufola no kubapeela ifitabo pa musangulo fye uunono uwa kwafwilisha ukupulinta. Umuntu umo ushalefwaya Inte sha kwa Yehova tatemenwe ukumona indalama ubunono isho abantu balesangula ku fitabo.

Ba Malinda Keefer baleibukisha ukuti inshita imo balilembele amashina 200 ukushinta kuli 300 aya  balefwaya ifitabo cila mulungu. Nomba kwali ubwafya bumo pantu icitabo cimo cakwete amabula 740 e lyo abalefwaya ifitabo balifulile sana! Ulupungu lwa kwa Kalinda lumo lwatile: “Ifitabo 50 fyalefina 18 kg kanshi fyalefina sana,” maka maka kuli bankashi.

Pa kupwisha ubwafya bwa kutwala ifitabo, munyinefwe James Cole apangile ica kusendelapo ica mawilo apo balekakila sutikesi iyo balekakila ne nsunga. Kanshi ubwafya bwa kusenda ifibokoshi fya fitabo ifyafina bwalipwile, munyinefwe uwapangile Dawn-Mobile atile: “Nomba amabeya tayakulakalipa.” Mu 1908 pa kulongana kwa citungu mu Cincinnati ku Ohio, uyu munyinefwe alilangile abalongene Dawn-Mobile kabili balitemenwe nga nshi. Pa tushimbi utwali pali sutikesi balembelepo ukuti Dawn-Mobile pantu ifyo balesendelapo sana fitabo ifyo baleti, Millennial Dawn. Nga wasambililako fye panono, tacaleyafya ukwensha pa kusenda ifitabo ifingi ica kuti kwaleba no kwensha fye no kuboko kumo. Kwaleba no kupima ifyo ulefwaya cibe ubutali, e lyo amawilo yaleya yaleshinguluka. Pa numa ya kushimikila, twaleingisha amawilo mu mbali ya sutikesi no kutampa ukubwelelamo ku ng’anda na makasa nangu na motoka.

Umutengo wa Dawn-Mobile wali amadola 2.50 (indalama sha ku America) lelo bankashi abali mu mulimo wa nshita yonse balebapeela fye. Bankashi Keefer abali pa cikope, balishibe bwino ifya kwensha Dawn-Mobile ica kuti nangu naisula ifitabo bale-ensha fye no kuboko kumo e lyo ninshi nabasenda ne cola ku kuboko kumbi. Pa mulandu wa kuti balisangile abengi abalefwaya ifitabo mu musumba umwali umukoti mu Pennsylvania, ku U.S.A., ubushiku bwa kutwala ifitabo nga bwafika bale-enda inyendo shitatu nangu shine.

Mu kupwa kwa ba 1980 kensha wa ndeke apangile sutikesi ya mawilo iya kusendelamo ifipe, pali ino nshita aya ama sutikesi tulayamona sana ku balenina indeke na ku balepita mu misebo ya misumba iikalamba. Nomba pa myaka 100 iyapitapo Abasambi ba Baibolo abacincila bafwile baleumfwa bwino ilyo abantu balebatamba nga nabasenda ifitabo mu ma Dawn-Mobile ilyo baleya mu kushimikila.

[Amashiwi pe bula 32]

Ubushiku bwa kutwala ifitabo nga bwafika, bankashi Keefer bale-enda inyendo shitatu nangu shine

[Amashiwi pe bula 32]

Ubwafya bwa kusenda ifitabo ifya fina, bwapwa