Bushe Mano Nshi Mupanda Abantu?

Bushe balimwebapo ukupandako abantu amano? Ku ca kumwenako, bushe balimwipushapo ifipusho pamo nga ifi: ‘Kuti nacita shani? Bushe kuti nasangwako kuli uku ukusefya? Bushe kuti nabomba iyi ncito? Bushe kuti naupana no yu muntu?’

Abantu bamo kuti bamwipusha ukuti mubapandeko amano nga balefwaya ukucita fimo ifingakuma bucibusa bwabo na Yehova, ifibusa, e lyo na ba lupwa. Bushe mukabeba fye ifyo muletontonkanya nelyo mukabeba ifya mu Baibolo? Bushe mucita shani pa kupanda abantu amano? Nangu ca kuti ico umuntu aipushapo camoneka icacindama nelyo iyo, Baibolo pa Amapinda 15:28 itila “umutima wa mulungami ulatontonkanya pa kwasuka.” Natulande pa fintu 5 ifya mu Baibolo ifingatwafwa ukwishiba ifya kupanda bwino abantu amano.

1 Ishibeni Bwino Umulandu.

“Uwasuka ilyo talati omfwikishe umulandu, buwelewele kuli ena kabili ni nsoni.”—AMAPI. 18:13.

Pa kuti tupande bwino umuntu amano, tulingile ukwishiba ico aleipushisha ne fyo aishiba pa fyo aleipushapo. Natulangilile: Umuntu nga amwipusha ifyo engenda pa kwisa ku ng’anda ku mwenu, finshi mulingile ukwishiba pa kuti mu mulangilile bwino? Bushe kuti mwamulangilila inshila iisuma iya kupita nga tamwishibe uko ali? Awe nakalya! E fyo tulingile ukucita nga tulefwaya ukupanda bwino umuntu amano. Tulingile ukwishiba ubwafya ubo umuntu akwete ne fyo aletontonkanya. Bushe kuti kwabako fimo ifyo mulingile ukwishiba pa kuti mupande bwino umuntu amano? Nga tatwishibe bwino ubwafya umuntu akwete, kuti twamweba ifya kuti fya mufulunganya fye.—Luka 6:39.

Ishibeni Ifyebo Afwailishepo. Cisuma ukwipusha umuntu ulefwaya ukupandwa amano amepusho pamo nga: “Finshi Baibolo isambilisha ifyo ulemona ukutila kuti fyakwafwa pali ici?” “Fisuma nshi nelyo ifyabipa ifyaba muli ifi ulefwaya ukucita?” “Fyebo nshi ufwailishepo?” “Bushe baeluda nangu abafyashi bobe nelyo aba kusambilisha Baibolo na bakupandako amano?”

Ifyasuko kuli ifi fipusho kuti fyatwafwa ukwishiba ifyo aibikilisheko ukufwailisha ifyebo pa kuti apingulepo ifya kucita mu nshita ya kufwaya fye ukuti bambi bamupandeko amano. Na kabili kuti twaishiba nga ca kuti umuntu alefwaya fye uwa ‘kumweba ukulingana’ ne fyo alefwaya ukumfwa.—2 Tim. 4:3.

  2 Mwila-angufyanya Ukwasuka.

“Umuntu onse abe uwayanguka ukumfwa, uukokola ukulanda, uukokola ukukalipa.”—YAKO. 1:19.

Limo cimoneka kwati ukwasuka bwangu kuti kwayafwa ulefwaya ukupandwa amano. Lelo bushe kuti cawama ukwasuka bwangu, maka maka nga tatufwailishepo ifyebo pa cipusho batwipwishe? Baibolo pa Amapinda 29:20 itila: “Bushe walimonapo umuntu wa bwangukanwa? Ku watumpa kwaliba isubilo ukucila ilyaba kuli ena.”

Shininkisheni ukuti ifyo mulepanda umuntu amano filefuma mu Cebo ca kwa Lesa Baibolo. Kuti mwayipusha amuti, ‘Bushe napanda amano uyu muntu ukulingana ne fyaba “umupashi uwa ici calo”?’ (1 Kor. 2:12, 13) Inshita shimo ukufwaya ukucita icisuma te kwingapwisha ubwafya. Ilyo Yesu alandile ukuti ali no kucushiwa e lyo no kwipaiwa, Petro atile: “Muyumfwileko uluse mwe Shikulu; ico tacakamucitikile nakalya.” Finshi twingasambilila ku fyo Petro alandile? Tusambilila ukuti nga tatucenjele, no muntu umufumacumi kuti alenga twakaana ukulatontonkanya “ifya kwa Lesa, kano ifya bantu.” (Mat. 16:21-23) Kanshi cisuma ukutontonkanya ilyo tatulalanda pantu amano yesu te kuti yalingane na mano ya kwa Lesa!—Yobo 38:1-4; Amapi. 11:2.

3 Beni Abaicefya no Kukonka Ifyo Musambilila mu Baibolo.

“Nshicita kantu nangu kamo neka; lelo filya fine Tata ansambilishe, e fyo na ine nanda.”—YOH. 8:28.

Bushe mulalanda ati, “Nga nine, nga na . . . “? Nangu nga ca kuti icasuko cine cayeba, tulingile ukuba abaicefya kabili abafuuka nga filya Yesu ali. Alikwete amano ayengi kabili alishibe ifintu ukucila umuntu uli onse. Lelo atile: “Nshilanda ifyandi ne mwine, lelo Tata . . . alimpeela ifunde lya fyo mfwile ukulanda no kusosa.” (Yoh. 12:49, 50) Lyonse Yesu alesambilisha no kupanda amano abantu ukulingana ne fyo Wishi afwaya.

Ku ca kumwenako, tubelenga pali Luka 22:49 ukuti abasambi ba kwa Yesu balimwipwishe nga ca kuti balingile ukulwa na bali no kwikata Yesu. Umusambi umo alibomfeshe no lupanga. Ilyashi limo line lilasangwa na pali Mateo 26:52-54 apalanga ukuti nangu ni lintu abantu baishile mu kwikata Yesu, Yesu alisangile inshita iya kusambilisha abasambi bakwe ifyo Yehova afwaya. Apo Yesu alishibe ifyo Ukutendeka 9:6 kulanda e lyo no busesemo ubwaba mu Amalumbo icipandwa 22 na Esaya icipandwa 53, alishibe bwino ifya kwafwa abantu kabili calelenga balecindika Yehova.

  4 Mulebomfya Impapulo sha Musha wa Cishinka.

“Nga kanshi nani umusha wa cishinka kabili uwashilimuka uo shikulu wakwe asontele ukuba kangalila pa ba mu ng’anda yakwe, pa kuti alebapeela ifya kulya fyabo pa nshita yalinga?”—MAT. 24:45.

Yesu alipeela umusha wa cishinka, umulimo wa kupeela ifya kulya fya ku mupashi. Ilyo muleafwa umuntu no kumufunda pa fintu ifyacindama, bushe mulabala mwafwailisha ifyebo mu mpapulo shilanda pali Baibolo?

Mu Icisontelelo ca Mpapulo sha Watch Tower na Watchtower Library iya pa kompyuta * mwaliba ifyebo ifingi. Tatulingile ukulaba ukubomfya ifi ifya kutwafwa umwaba ifyebo ifisuma. Mwaliba imitwe ya malyashi ayengi ne fipande ifingafwa ulefwaya ukupandwa amano. Bushe kuti mwayafwako bambi ukwishiba ukubomfya ifi ifibombelo pa kuti bengamona ifyo Baibolo ilanda no kwishiba ifya kupingula pa fintu? Filya fine mapu yafwa umuntu ukusala inshila ya kupita pa kuti afike uko aleya, impapulo na sho shilatwafwa ukwishiba ifya kucita pa kuti tukabe no mweo wa muyayaya.

Baeluda abengi balisambilishako bakasabankanya ifya kufwailisha ifyebo ukubomfya Watchtower Library nelyo Icisontelelo ca Mpapulo sha Watch Tower, pa kuti bamunyinabo balebomfya Amalembo ilyo balepingula ifya kucita. Ici cilafwa bakasabankanya ukwishiba ifya kufwailisha ifyebo e lyo no ku cetekela ifyebo ifyo Yehova atupekanishisha ukupitila mu musha wa cishinka. Nga balecita ifi, “bakakwata amano aya kulekanya icalungama ne calubana.”—Heb. 5:14.

5 Mwilasalila Bambi Ifya Kucita.

“Cila muntu ali no kuisendela icipe cakwe umwine.”—GAL. 6:5.

Bonse tulingile ukuisalila ukupanda amano no kufunda uko tulingile ukukonka. Yehova alitupeela insambu isha kuisalila, nampo nga kukonka ifyo Icebo cakwe cilanda nelyo ukukonka ifyo fwe bene tulefwaya. (Amala. 30:19, 20) Pa fintu fimo, Baibolo ilalandapo ifingi lelo umuntu umwine e ulingile ukusala ifyo alefwaya ukucita. Ukulingana ne fyo umuntu alefwaya ukwishiba e lyo ne myaka akwete, tulingile ukuyipusha atuti, ‘Bushe ninkwata insambu sha kulanda pali ici cipusho?’ Ifintu fimo fifwaikwa baeluda e babombelapo e lyo nga mwaice, abafyashi kuti bamwafwa.

[Futunoti]

[Akabokoshi ne Cikope pe bula 8]

Ifyo Mwingatemwa Ukusambilila pa Mapepo ya Lupwa

Pa fyo mwingatemwa ukusambililapo pa Mapepo ya Lupwa, kuti mwabikapo no kufwailisha ifyebo ku mepusho ayo bamwipwishe mu mulimo nomba line. Malyashi nshi kabili finshi Baibolo yalandapo ifingafwa uleipusha icipusho? Ku ca kumwenako, inga ca kuti munyinefwe nelyo nkashi amwipusha pa kwishishanya no muntu pa kuti bakopane. Ilyo mulebomfya Icisontelelo ca mpapulo sha Watchtower nelyo Watchtower Library, mu kubalilapo mulingile ukumona amalyashi ayalelanda pali ici cishinka mu kulungatika. Ku ca kumwenako, mu Icisontelelo ca mpapulo sha Watchtower kuti mwamona pe shiwi lya kuti “Ukwishishanya” nelyo “Icupo.” Lyena kuti mwamona utumitwe utunono utulelanda pa fyo umuntu aipwishe. Moneni nga ca kuti umutwe uukalamba naukwata ifyebo pamo nga “Moneni na” icingamulanga ukumona umutwe ulelanda fye pa fyebo mulefwaya.

[Akabokoshi pe bula 9]

Tulatasha Yehova pa fyo abomfya ukuteyanya kwa kwe ukutwafwa ukwishiba ifya kupanda bambi amano e lyo ne fyo ifwe tupandwa amano. Pali Lukala Milandu 12:11 patila: “Amashiwi ya ba mano yaba nge fya kusonkwelako, kabili nge misomali iyapampaminwa bwino e fyaba abalonganika ifyebo; ififuma kuli kacema umo.” Pa kutungulula inama uko shilingile ukuya, balebomfya “ifya kusonkwelako,” e kutila utumuti utwasongoka. E fyo no kupanda amano ukusuma kwaba pantu kulatutungulula mu nshila iisuma. Nga filya “imisomali iyapampaminwa bwino” ibomfiwa pa kuti icikuulwa cikose, e fyo no kupanda amano umuntu ukusuma kumwafwa ukwishiba ifya kupingulapo bwino pa fintu. Aba mano balatemwa ukukonka ‘ifyebo balonganika’ ukufuma kuli “kacema umo” Yehova, ifibalanga ukuti wa mano.

Ilyo tulepanda umuntu amano, tulingile ukupashanya Kacema wesu, Yehova. Tulatemwa ukupandako abantu amano e lyo no kubafwa. Nga tulepanda abantu amano ukubomfya ifyo tubelenga mu Baibolo, tukabafwa kabili cikalenga bakabe no mweo wa muyayaya.