“Bushe te Kuti Mutukopeko!”

Pa numa ya bushiku bwa bubili ubwa kulongana kwa citungu, Josué uubombela pa Bethel ku Mexico aletandala mu musumba wa Querétaro. Abatandashi abaupana aba ku Colombia, ba Javier na ba Maru, balombele ukuti ba Josué babakopeko. Apo ba Josué na baNte banabo balifwele bwino kabili balifwele na mabaji ya kulongana, ba Javier na ba Maru balipwishe nga ca kuti bafumine ku kukumana kumo ukwacindama. Ba Josué balondolwele ukuti balikwete ukulongana kwa citungu ukwa Nte sha kwa Yehova e lyo balibetile ukuti nabo bakasangweko pa Mulungu.

Ba Javier na ba Maru bamwene kwati te kuti ciwame ukusangwako pantu tabakwete ifya kufwala ifyo bengafwala ku kulongana. Na lyo line, ba Josué balyebele aba bantu ishina lyabo no kubapeela inamba ya foni iya ku ofeshi uko babombela.

Ba Josué balipapile sana ilyo bapokelele foni kuli ba Javier ninshi palipita ne myeshi 4. Aba abaupana balisangilwe ku kulongana kwa citungu kabili balefwaya Inte sha kwa Yehova ukulabatandalila ku Mexico uko baleikala. Ukwabula no kupoosa inshita, ba Javier na ba Maru balitendeke ukusambilila Baibolo kabili batendeke no kusangwa ku kulongana. Pa numa ya myeshi 10, basangwike bakasabankanya. Nangu ca kuti aba baupana babili bakukiile ku Toronto, ku Canada, balitwalilile ukulunduluka kabili balibatishiwe.

Inshita imbi, ba Josué balipokelele kalata ukufuma kuli ba Javier, kabili babalondolwelele icalengele ukuti basambilile icine. Ba Javier batile: “Ilyo tatulasangwa ku kulongana kwa citungu, ine no mwina mwandi twalilanshenye ukuti tulefwaya uwa kutusambilisha ifya kwa Lesa. Ilyo twamwene ifyo mwafwele bwino, twatontonkenye ukuti mwafumine ku kukumana kumo ukwacindama sana. Ilyo twali pa kulongana kwa citungu, twalitemenwe ifyo batulangile ukutemwa ilyo baletulanga apa kwikala, ifyo baletwafwa ukubelengela Baibolo pamo nabo, e lyo ne fyo abasangilweko bakwete imibele isuma. Nangu imifwalile yesu tayali bwino, tabasakamene.”

Ba Josué balishininkishe ukuti amashiwi ayo Imfumu ya mano Solomone yalandile ya cine! Solomone atile: “Ulucelo tanda imbuto shobe ukufika icungulo wileka ukuboko kobe kutuushe; pantu tawishibe ishikamena, ishi napamo shilya, nangu nga shonse shikaba ishisuma.” (Luk. Mil. 11:6) Kanshi na imwe kuti mwatanda imbuto ilyo mule-ebako bambi pa lwa kulongana kwa citungu nelyo pa lyashi lya cintubwingi ilyo mukakwata. Nga mulecita ifi, Yehova kuti amubomfya ku kwafwa ababa ne cilaka ca kufwaya ukusambilila ifya kwa Lesa nga fintu cali kuli ba Javier na ba Maru.—Esa. 55:1.

[Icikope pe bula 32]

Ukufuma ku kuso ukulola ku kulyo: Ba Alejandro Voeguelin, ba Maru Pineda, Alejandro Pineda, ba Javier Pineda, na ba Josué Ramírez, ninshi tuli pa Bethel ya ku Mexico