Bushe Muleibukisha?

Bushe mwalibelenga bwino bwino bamagazini ba Ulupungu lwa kwa Kalinda aba nomba line? Moneni nga kuti mwayasuka amepusho yakonkapo:

Bushe Solomone aba shani icilangililo ca kutusoka?

Lesa alipaalile Imfumu Solomone kabili alemubomfya. Lelo ilyo aleteka, alilekele ukukonka amafunde ya kwa Lesa. Aupile mwana Farao umwina Fyalo na banakashi abengi abamulengele ukulapepa balesa ba bufi. Kanshi tatufwile ukuba ne mibele yabipa. (Amala. 7:1-4; 17:17; 1 Isha. 11:4-8)—12/15, amabula 10-12.

Cinshi ico tulingile ukukonkela ifyo Baibolo ilanda?

Abakonka ifyo Baibolo ilanda balaba na kampingu iyasanguluka kabili mu ndupwa shabo mulaba ukumfwana. (Amalu. 19:8, 11) Lelo abashikonka ifyo Baibolo ilanda ilingi line balakwata amafya.—1/1, amabula 8, 9.

Mulandu nshi Abena Kristu babatishiwilwa, kabili finshi bafwile ukucita pa kuti babatishiwe?

Umuntu nga alefwaya ukubatishiwa ninshi alefwaya ukuba cibusa wa kwa Lesa. (1 Pet. 3:21) Tulaipeela fwe bene ilyo twapepa kuli Yehova no kumweba ukuti tulefwaya ukumubombela ubumi bwesu bonse. Pa numa ya kuipeela, tulalanga abantu ukuti twali-ipeela ilyo twabatishiwa.—4/1, amabula 16, 17.

Cinshi cilangilila ukuti ukufuma mu nshiku sha batumwa, lyonse kulaba Abena Kristu basubwa aba cine pa calo?

Mu mulumbe wa kwa Yesu uwa “ngano” ne “fyani,” “imbuto shisuma” shimininako “abana ba bufumu.” (Mat. 13:24-30, 38) Ifyani fyali no kukulila pamo ne ngano mpaka inshita ya kulobolola. E co, nangu ca kuti te kuti tulande ababa mwi bumba lya ngano, lyonse kufwile kulaba bamo aba muli ili bumba.—1/15, ibula 7.

Nani watumine “ulutanda” ku kutungulula abalebukila ku ntanda?

Ni Satana Kasebanya uwalefwaya sana ukwipaya Yesu. Satana alasonga abantu ukulabepa, ukulacita ulukakaala no kwipaya. E co Yesu amwitiile ukuti “wa bufi kabili e wishi wa bufi,” ali ni “kepaya wa bantu ilyo atendeke.” (Yoh. 8:44)—4/1 ibula 29.

Kuti twacita shani pa kuti twingaleka ukuba no mufimbila?

Ifingatwafwa ni fi: Bombesheni ukutemwa ababwananyina, muleampana pamo na bantu ba kwa Lesa, mulecita ifisuma e lyo ‘mulesekelela pamo na basekelela.’ (Rom. 12:15)—2/15, amabula 16-17.

Bushe Anasi uwalumbulwa mu lyashi lya Mbila Nsuma ilyo Yesu alepingulwa ali ni nani?

Ilyo Yesu alepingulwa, Anasi ali ni “shimapepo mukalamba.” (Luka 3:2) Ali ni shimapepo mukalamba ukutula mu 6 nelyo mu 7 C.E. ukushinta mu 15 C.E., ilyo bamufumishe pali bushimapepo, lelo alitwalilile ukulatungulula Abena Israele.—4/1 ibula 9.

Finshi tufwile ukwishiba nga tulepanda abantu amano?

Tufwile ukwishiba bwino umulandu. Tatulingile ukwasuka bwangu. Tulekonka ifyo Icebo ca kwa Lesa cilanda no kufwailisha ifyebo mu mpapulo sha musha wa cishinka kabili tatufwile ukusalilako bambi ifya kucita.—3/15, amabula 7-9.

Bushe Yesu aloseshe mwi ilyo alandile pa kushindika umuntu amakilomita yabili? (Mat. 5:41)

Mu nshita ya batumwa, Abena Israele baletekwa na bena Roma. Abena Roma balepatikisha abantu ukubomba. Ilyo Yesu ale-eba abo alesambilisha ukuti bafwile ukushindika umuntu amakilomita yabili, alepilibula fye ukuti tabalingile ukulakaana ifyo aba mu buteko bwa bena Roma balebeba ukucita.—4/1, ibula 9.