Amepusho Ukufuma ku Babelenga

Bushe imfwa ya bantu ba kwa Lesa aba cishinka ‘yauma shani umutengo mu menso ya kwa Yehova’?

▪ Kemba wa malumbo aimbile ati: “Imfwa ya bantu bakwe aba cishinka yalyuma umutengo mu menso ya kwa Yehova.” (Amalu. 116:15) Yehova alicindika sana ubumi bwa bakapepa bakwe bonse aba cine. Lelo amashiwi ayaba pa Amalumbo 116 tayalanda pa mfwa ya muntu fye umo.

Kanshi pa kulanda ilyashi lya cililo pa Mwina Kristu, te kuti ciwame ukulanda pe lembo lya Amalumbo 116:15 nangu uufwile aali uwa cishinka kuli Yehova. Mulandu nshi? Pantu amashiwi ya kwa kemba wa malumbo tayalanda pa muntu umo. Aya mashiwi yapilibula ukuti, Lesa te kuti aleke ababomfi bakwe aba cishinka bonse ukufwa pantu ba mutengo sana kuli ena.—Moneni Amalumbo 72:14; 116:8.

Amalumbo 116:15 yatweba ukuti Yehova takaleke ababomfi bakwe aba cishinka bonse ukuloba pa calo. Na kuba, ilyashi lyesu ilya muno nshiku lilangilila ukuti tulapakaswa sana no kushipikisha amesho ayakalamba, ukulangilila fye apabuuta tuutu ukuti Lesa takaleke abantu bakwe ukuloba pano calo.

Pa mulandu wa kuti Yehova ni Lesa wa maka yonse e lyo kabili akafikilisha ifyo afwaya, takaleke umuntu nangu umo ukutulofya pano calo. Nga ca kuti aleka ica musango uyu cacitika, kuti camoneka kwati abalwani bakwe balimucila amaka, nomba ica musango uyu te kuti cicitike nangu panono! Pantu ninshi ifyo Yehova afwaya ukuti icalo conse cikekalwemo na bantu bakwe aba cishinka te kuti ficitike, nomba takuli nangu cimo icikalesha ukuti ifyo afwaya fikacitike. (Esa. 45:18; 55:10, 11) Ico twalandila ifi ca kuti, Yehova nga aleka ica musango uyu cacitika, ninshi pa calo te kuti pabe abantu ba kumubombela mwi tempele lya mushilo ilya mampalanya! Te kuti pabe abantu abalungama aba kuba mu “calo cipya” aba kutekwa no buteko bwa ‘myulu ipya.’ (Ukus. 21:1) E lyo kabili, te kuti kube no Kuteka kwa kwa Kristu ukwa Myaka Ikana Limo pantu ninshi takuli abantu ba kuteeka.—Ukus. 20:4, 5.

Nga ca kuti Lesa aleka abalwani balofya abantu bakwe bonse pano calo, ninshi takuli nangu umo uwingacetekela na kabili ukuti Lesa ni Lesa wa Maka Yonse uwakwata ukutemwa. E lyo kabili takuli no wingacetekela ukuti Yehova ni Mulopwe uwabumba ifintu fyonse. Apo Yehova alicindika sana ishina lyakwe ilya mushilo, takuli nangu umo uukalofya abantu bakwe. Baleni tontonkanyeni pa mashiwi ayatila: “Lesa taba na lufyengo,” kanshi apo taba na lufyengo ninshi takafilwe ukucingilila abantu bakwe aba cishinka abamubombela. (Amala. 32:4; Ukute. 18:25) Nga ca kuti aleka abantu bakwe baloba, ninshi kuti capusana ne fyo Icebo cakwe cilanda ukuti: ‘Yehova takalekeleshe abantu bakwe pa mulandu we shina lyakwe ilikulu.’ (1 Sam. 12:22) Ca cine, “Yehova takalekeleshe abantu bakwe, nangu ukusha icikwatwa cakwe.”—Amalu. 94:14.

Ala kanshi imitima ilekala nga twaishiba ukuti abantu ba kwa Yehova tabakalobe pano calo! Shilekeni kanshi, tutwalilile ukuba aba cishinka kuli Lesa no kumucetekela ukuti akafikilisha ifyo atulaya pantu alanda ati: “Icanso conse ico bakakupangila tacakabombe, kabili ululimi lonse ulwakwimina mu bupingushi ukalwebaula. Ubu e bupyani bwa babomfi ba kwa Yehova, no bulungami bwabo bwafuma kuli ine.”—Esa. 54:17.

[Amashiwi pe bula 22]

Lesa takaleke abantu bakwe bakabalofye