Bushe Mulabelebesha Ubukata bwa kwa Yehova?
Bushe Mulabelebesha Ubukata bwa kwa Yehova?
‘Ubukata bwa kwa Yehova bumonekela muli ifwe.’—2 KOR. 3:18.
BUSHE KUTI MWAYASUKA SHANI?
Mulandu nshi twingasosela ukutila kuti twabelebesha ubukata bwa kwa Yehova nangu ca kuti tatwapwililika?
Bushe ukupepa no kulongana kwa Bwina Kristu kutwafwa shani ukubelebesha ubukata bwa kwa Lesa?
Finshi fingatwafwa ukutwalilila ukucindika Yehova?
1, 2. Mulandu nshi twingalandila ukutila kuti twapashanya Yehova imibele?
IFWE bonse tulapalako abafyashi besu muli fimo. Kanshi te kuti tupape umuntu nga aeba kalume ati ‘Kwena walipala ba wiso.’ Umukashana na o kuti bamweba ati, ‘Nga nakumona, imona fye kwati namona banoko.’ Ilingi line, abana balapashanya ifyo abafyashi babo bacita. Inga ifwe? Bushe te kuti tulepashanya Shifwe wa ku muulu Yehova? Nangu ca kuti tatwamumonapo, kuti twaishiba imibele yakwe iisuma nga tulesambilila Icebo cakwe, nga tulemona ifyo abumba, nga tuletontonkanya pa Malembo e lyo no kutontonkanya sana pa fyo Yesu Kristu, Umwana wakwe alelanda no kucita. (Yoh. 1:18; Rom. 1:20) Kanshi na ifwe kuti twabelebesha ubukata bwa kwa Lesa.
2 Ilyo Lesa ashilabumba Adamu na Efa, alicetekele ukuti abantunse bakalacita ukufwaya kwakwe, bakalalanga imibele yakwe no kulamupeela umucinshi. (Belengeni Ukutendeka 1:26, 27.) Kanshi na ifwe ilyo tulebombela Lesa, tufwile ukulalanga imibele ya watubumbile. Nga tulecita ifi kuti tulebelebesha ubukata bwa kwa Lesa nangu tukwate inkulilo ya musango nshi e lyo nangu nga twalisambilila sana nelyo iyo. Mulandu nshi? Pantu “Lesa taba na kapaatulula, lelo umuntu uwa mu luko lonse uutiina Lesa no kucita icalungama alapokelelwa kuli ena.”—Imil. 10:34, 35.
3. Bushe tumfwa shani ilyo tulebombela Yehova?
3 Abena Kristu abasubwa balabelebesha ubukata bwa kwa Yehova. Umutumwa Paulo, uwasubilwe no mupashi wa mushilo alembele ati: “Kabili ifwe bonse, ilyo ubukata bwa kwa Yehova bulemonekela pa mpumi shesu ishafimbulwapo nga filya ifintu fimonekela mu filola, tulaaluka twasuka twaba mu cipasho cakwe mu bukata ubukulilako, uucita fyonse fi ni Yehova, Umupashi.” (2 Kor. 3:18) Ilyo kasesema Mose afumine ku Lupili lwa Sinai ninshi nakwata ifipapatu apali Amafunde 10, icinso cakwe calebengeshima pa mulandu wa kulanda na Yehova. (Ukufu. 34:29, 30) Nangu ca kuti ifi tafyatucitikilapo nga fintu cali kuli Mose, na ifwe ilyo tulesambilisha abantu pali Yehova, pa mibele yakwe e lyo na pa fisuma ifyo akacitila abantunse, abantu tushimikilako balamona ifyo tuba ne nsansa. E co nampo nga tuli Bena Kristu basubwa nelyo aba mpaanga shimbi, twaba kwati filola balepangila ne cela ifyalebengeshima. Tulabelebesha ubukata bwa kwa Yehova mu fyo tucita e lyo na mu fyo tubomba umulimo wakwe. (2 Kor. 4:1) Bushe imibele yenu ne fyo mucita ilyo muleshimikila filalanga ukuti mulabelebesha ubukata bwa kwa Yehova?
TULAFWAISHA UKUBELEBESHA UBUKATA BWA KWA YEHOVA
4, 5. (a) Nga filya cali kuli Paulo, bwafya nshi na ifwe twakwata? (b) Bushe ulubembu lwatukuma shani?
4 Fwe babomfi ba kwa Yehova tulafwaya ukucindika no kulumbanya Kabumba wesu muli fyonse ifyo tucita. Lelo ilingi line tatucita ifyo tufwaya. Ubu e bwafya na Paulo akwete. (Belengeni Abena Roma 7:21-25.) Paulo alilondololwele ico tufililwa ukucita ifyo tulefwaya. Atile: “Bonse babembu kabili balifilwa ukufika pa bukata bwa kwa Lesa.” (Rom. 3:23) Pa mulandu wa lubembu twapyana kuli Adamu, twaba kwati ‘twatekwa ku lubembu.’—Rom. 5:12; 6:12.
5 Bushe ulubembu ni cinshi? Ulubembu kucita ifyo Yehova apata no kukanakonka amafunde yakwe. Ulubembu lulonaula bucibusa twakwata na Lesa. Ulubembu lulalenga twacita ifyo Lesa ashifwaya nga filya fine fimo filenga uulasa umufwi afilwa ukulasa ico alefwaya. Tulabembuka ku mufulo e lyo limbi ni pa mulandu wa kukanapwililika. (Impe. 15:27-31) Ulubembu lwaliba muli ifwe kabili limo lulalenga twafilwa ukukwata bu cibusa na Kabumba wesu. (Amalu. 51:5; Esa. 59:2; Kol. 1:21) Ulubembu lulalenga twafilwa ukulaumfwana na Yehova kabili lulalenga twapanya ishuko lya kubelebesha ubukata bwakwe. Ukwabula no kutwishika ulubembu e bulema ubo abantu bonse bakwata.
6. Nangu ca kuti tuli babembu, kuti twabelebesha shani ubukata bwa kwa Lesa?
6 Nangu ca kuti tuli babembu, Yehova ‘alatupeela isubilo.’ (Rom. 15:13) Alitupayanishisha icilubula ca Mwana wakwe Yesu Kristu ku kufumyapo ulubembu. Nga tuli ne citetekelo mu cilubula, tatwakatwalilile ukuba “abasha ba lubembu,” lelo tukalabelebesha ubukata bwa kwa Yehova. (Rom. 5:19; 6:6; Yoh. 3:16) Nga twatwalilila ukuba ifibusa fya kwa Lesa kuti atupaala ino nshita e lyo kabili ku ntanshi tukaba abapwililika no kuba no mweo wa muyayaya. Nangu cingati tuli babembu, twaliba ne nsansa pantu Lesa alatumona ukuti tulabelebesha ubukata bwakwe.
IFYO TWINGABELEBESHA UBUKATA BWA KWA LESA
7. Finshi tufwile ukusumina pa kuti tulebelebesha ubukata bwa kwa Lesa?
7 Pa kuti tulebelebesha ubukata bwa kwa Lesa, tufwile ukusumina ukuti bonse tuli babembu. (2 Imila. 6:36) Ku ca kumwenako, nga twakwata icibelesho ca kutamba ifye shiku, tufwile ukweba baeluda pa kuti batwafwe. (Yako. 5:14, 15) Nga twacita ifi ninshi tulelanga ukuti tulefwaya ukucindika Lesa. Apo tuli bakapepa ba kwa Yehova, tufwile ukutwalilila ukuiceceeta no kumona nga tulekonka amafunde ya kwa Lesa ayalungama. (Amapi. 28:18; 1 Kor. 10:12) Nangu ca kuti tulacita imembu, tufwile ukubombesha ukuleka ukucita ifyo fintu pa kuti tulebelebesha ubukata bwa kwa Lesa.
8. Nangu ca kuti tuli babembu, finshi tufwile ukucita?
8 Yesu e muntu fye ushatalile afilwa ukucita ukufwaya kwa kwa Lesa no kubelebesha ubukata Bwakwe. Nangu ca kuti tatwapwililika nga filya Yesu ali, tufwile ukwesha na maka ukumupashanya. (1 Pet. 2:21) Yehova alamona ifyo tuibikilishako ku kufwaya ukucita icalungama no kumucindika kabili nga twacita ifi, alatupaala.
9. Bushe ifyo tusambilila mu Baibolo fyafwa shani Abena Kristu abalefwaya ukukonka amafunde ya kwa Lesa?
9 Icebo ca kwa Lesa cilatwafwa ukwishiba ifyo twingabelebesha bwino ubukata bwa kwa Lesa. Ukulabelenga sana Baibolo e lyo no kulatontonkanyapo kuti kwatwafwa icine cine. (Amalu. 1:1-3) Ukulabelenga Baibolo cila bushiku ku katwafwa ukwishiba umo tulingile ukuwamya. (Belengeni Yakobo 1:22-25.) Icitetekelo cesu cashimpwa pa fyo tusambilila mu Baibolo kabili filalenga twaba abakosa ukulwisha imembu ishabipisha kabili filatwafwa ukuti tulesekesha Yehova.—Amalu. 119:11, 47, 48.
10. Bushe ipepo kuti lyatwafwa shani ukubombela Yehova no mutima onse?
10 Pa kuti tulebelebesha ubukata bwa kwa Lesa tufwile ukuba no “mute wa kupepa.” (Rom. 12:12) Tulingile ukulalomba Yehova ukutwafwa pa kuti tulemubombela ukulingana ne fyo afwaya. E co tufwile ukulalomba umupashi wa mushilo, ukutulundilako icitetekelo, ukutupeela amaka aya kulwisha amatunko e lyo no kutwafwa “ukulungika pa kusambilisha icebo ca cine.” (2 Tim. 2:15; Mat. 6:13; Luka 11:13; 17:5) Nga filya umwana ashintilila pali ba wishi ukumwafwa e fyo na ifwe tufwile ukushintilila pali Shifwe wa ku muulu, Yehova. Tulingile ukucetekela ukuti nga twamulomba, akatwafwa. Tatufwile ukumfwa ukuti tulemucusha. Lelo ilyo tulepepa tulingile ukumulumbanya, ukumutasha, ukumulomba ukuti atwafwe ilyo tuli na mafya kabili tufwile ukumulomba ukuti atwafwe tulemubombela mu nshila iicindika ishina lyakwe.—Amalu. 86:12; Yako. 1:5-7.
11. Bushe ukulongana kutwafwa shani ukubelebesha ubukata bwa kwa Lesa?
11 Lesa apeela “umusha wa cishinka kabili uwashilimuka” umulimo uwa kusakamana impanga shakwe. (Mat. 24:45-47; Amalu. 100:3) Umusha wa cishinka alafwaya sana ukuti bakapepa banensu balebelebesha ubukata bwa kwa Yehova. Tulawamyako imibele yesu iya Bwina Kristu ilyo tuli pa kulongana nga filya fine ababila ifya kufwala bacefya no ku kusha ifya kufwala pa kuti tulemoneka bwino. (Heb. 10:24, 25) Kanshi twilacelwa ku kulongana pantu nga tulecelwa lyonse, te kuti tulenonkelamo muli fyonse ifyo batupekanishishe pa kuti tulewamyako imibele yesu.
NATULEPASHANYA LESA
12. Bushe kuti twapashanya shani Lesa?
12 Nga tulefwaya ukubelebesha ubukata bwa kwa Lesa tulingile “ukulapashanya Lesa.” (Efes. 5:1) Inshila imo iyo twingapashanyamo Yehova kulamona ifintu ukulingana ne fyo afimona. Nga tulecita ifintu mu nshila iyapusanako ninshi tatulemucindika kabili kuti twakwata amafya. Apo icalo twaikalamo citungululwa na Satana Kasebanya, tulingile ukubombesha ukupata ifyo Yehova apata no kutemwa ifyo atemwa. (Amalu. 97:10; 1 Yoh. 5:19) Tufwile ukwishiba ukuti pa kuti tubombele Lesa bwino tulingile ukucita fyonse ku kulumbanya ishina lyakwe.—Belengeni 1 Abena Korinti 10:31.
13. Cinshi tulingile ukupatila ulubembu, kabili ici cikalenga tukacite finshi?
13 Yehova alipata ulubembu kanshi na ifwe tulingile ukulupata. Tatufwile ukuleka icili conse ukutulenga ukubembuka. Ku ca kumwenako, tulingile ukutaluka ku busangu pantu lubembu ulwingalenga twafilwa ukulabelebesha ubukata bwa kwa Lesa. (Amala. 13:6-9) Kanshi tatufwile ukula-ampana na basangu nangu panono nelyo uuli onse uwitwa uwa bwananyina lelo uushikonka amafunde ya kwa Lesa. (1 Kor. 5:11) Tatunonkelamo nangu fimo nga tuleumfwa ku fyo abasangu balanda nangu ukumfwa ku basuusha ukuteyanya kwa kwa Yehova. Na kuba ukucita ifi kuti kwaonaula bumupashi bwesu kabili te cisuma ukulabelenga ifyebo balemba nangu ukufibelenga pa intaneti.—Belengeni Esaya 5:20; Mateo 7:6.
14. Ilyo tule-esha ukubelebesha ubukata bwa kwa Lesa, mibele nshi iyo tufwile ukulanga sana kabili mulandu nshi?
14 Ukulanga ukutemwa kuli bambi ni nshila isuma sana iya kupashanishishamo Shifwe wa ku muulu Yehova. Na ifwe tulingile ukutemwa bambi nga filya Yehova acita. (1 Yoh. 4:16-19) Na kuba, ifyo twatemwana na Bena Kristu banensu filanga ukuti tuli basambi ba kwa Yesu kabili tuli babomfi ba kwa Yehova. (Yoh. 13:34, 35) Apo tatwapwililika, limo tulafilwa ukulanga ukutemwa kuli bambi lelo tufwile ukulaesha ukubatemwa lyonse. Ukukwata ukutemwa ne mibele imbi iya Bwina Kristu kukatwafwa ukukanabembuka no kucita ifyabipa kuli bambi.—2 Pet. 1:5-7.
15. Bushe ukutemwa kulenga twalacita finshi kuli bambi?
15 Nga tuli no kutemwa tukalafwaya ukucitila bambi ifisuma. (Rom. 13:8-10) Ku ca kumwenako, nga natutemwa abena mwesu, tukaba abacishinka kuli bena. Ukutemwa baeluda no kucindika umulimo babomba kukatwafwa ukuba aba cumfwila kuli bena no kubanakila ilyo baletutungulula. Abana abatemwa abafyashi babo balabomfwila no kubapeela umucinshi kabili tabalanda ifyabipa pali bena. Nga twalitemwa abantu banensu, tatwakulabamona ukuti tabacindama nangu ukulanda kuli bena ukwabula umucinshi. (Yako. 3:9) Baeluda nabo bafwile ukutemwa impaanga sha kwa Lesa no kushisunga bwino.—Imil. 20:28, 29.
16. Ukulanga ukutemwa kuli bambi kutwafwa shani ilyo tuleshimikila?
16 Na lintu tuleshimikila, tulingile ukulanga sana ukutemwa kubo tuleshimikilako. Apo twalitemwa sana Yehova, tatwakaleke ifyo bambi bankulako ku mbila nsuma ukutulenga ukulanda nabo ukwabula umucinshi nangu ukuleka ukushimikila. Ukutemwa kuti kwalenga tulepekanya sana pa kuti tuleshimikila bwino. Nga twalitemwa Lesa no mutima wesu onse e lyo na banensu, tatwakulashimikila fye pantu tufwile ukushimikila lelo tukalamona ukushimikila ukuti lishuko ilyaibela kabili tukalaba ne nsansa ilyo tuleshimikila.—Mat. 10:7.
TWALILILENI UKUCINDIKA YEHOVA
17. Bushe tunonkelamo shani nga twasumina ukuti tuli babembu?
17 Abantu tabamona ukuti ulubembu lubi sana lelo ifwe twalishiba ukuti lwalibipa. Ici cilenga twaishiba ukuti tulingile ukulwisha ukukanacita ifingalenga twabembuka. Ukusumina ukuti tuli babembu kulalenga twalasambilisha kampingu yesu pa kuti iletwafwa ukwishiba bwino ifya kucita ilyo twatunkwa ukucita ifyabipa. (Rom. 7:22, 23) Inshita shimo kuti twalufyanya lelo Yehova kuti atwafwa ukucita icalungama inshita yonse.—2 Kor. 12:10.
18, 19. (a) Cinshi citwafwa ukulwisha imipashi yabipa? (b) Finshi tulepanga ukucita?
18 Ilyo tulecindika Yehova, tufwile no kulwisha imipashi yabipa. Ifya kufwala fya bulwi ifya kwa Lesa, filatwafwa ukucimfya imipashi yabipa. (Efes. 6:11-13) Satana atwalilila ukutunka abantu pa kuti belapeela Yehova umucinshi uo ena eka alingile ukupeelwa. Na kabili, Kasebanya aleesha na maka ukonaula bucibusa bwesu na Yehova. Lelo Satana alalengwa isoni ilyo ifwe fwe bashapwililika abaume, abanakashi na baice tuletwalilila kucindika Yehova no kuba aba cishinka kuli ena. Kanshi natutwalilile ukutasha Yehova nga filya ba malaika bamutasha ukuti: “Mwalilinga, mwe Yehova, mwe Lesa wesu, ukupokelela ubukata no mucinshi na maka, pantu ni mwe mwabumbile ifintu fyonse, kabili ni pa mulandu wa kufwaya kwenu fyabeleleko no kubumbwa.”—Ukus. 4:11.
19 Shi natutwalilile ukucindika Yehova te mulandu ne fingacitika. Alatemwa ukumona ababomfi bakwe aba cishinka bale-esha ukumupashanya no kulabelebesha ubukata bwakwe. (Amapi. 27:11) Natulelumbanya Yehova nga filya Davidi aimbile ilyo atile: “Ndemulumbanya, mwe Yehova Lesa wandi, no mutima wandi onse, kabili nakulacindika ishina lyenu umuyayaya.” (Amalu. 86:12) Ala cikawama nga nshi ilyo tukalabelebesha ubukata bwa kwa Yehova mu kupwililika no kumulumbanya umuyayaya! Ifi e fyo abantu bacumfwila bali no kutendeka ukulacita. Bushe mulabelebesha ubukata bwa kwa Yehova pali nomba kabili bushe mulafwaya ukucite ifi umuyayaya?
[Ifipusho]
[Ifikope pe bula 27]
Bushe mulabelebesha ubukata bwa kwa Yehova muli ifi fintu?
