Icikuuku Capwisha Ubulanda

ILYO ba Nte babili aba ku Netherlands ba George na ba Manon batandalile ba Rie aba cikalamba pa kuti babashimikileko imbila nsuma, tababapokelele bwino ne calengele ni co ba Rie balifwililwe abena mwabo babili no mwana kabili balilwele ubulwele ubwa kufimba amajointi. Nangu ca kuti ilyo balelanda nabo balimoneke ukubweshamo umutima, nalyo line tabatemenwe.

Ba George baebele ba Manon ukuti kuti cawama babwela inshita imbi pa kuti bakabaleteleko amaluba pantu balemoneka ukuti balitalalilwe kabili bali no bulanda. Ilyo babwelelemo mu kubamona ba Rie balipapile kabili balitemenwe. Lelo pali iyi nshita, paali ifyo balecita e co babebele ukubwelako ubushiku bumbi. Ilyo ba George na ba Manon babweleleko pa nshita bapangene, tababasangilepo. Balibweleleko na kabili imiku iingi lelo tabalebasanga. Batendeke ukumona kwati ba Rie tabalefwaya ukulanda nabo.

Bushiku bumo ba George basukile basanga ba Rie. Ba Rie balyumfwile ububi pantu ubushiku bapangene tabali pa ng’anda kabili balilondolwele ukuti ico bashabasangiile ni co bali mu cipatala. Ba Rie batile, “Ala ilyo mwafuminepo bulya bwine ubushiku natendeke ukubelenga Baibolo!” Balilanshenye bwino ica kuti balitendeke ne sambililo lya Baibolo.

Ilyo ba Rie basambilile Baibolo ubulanda bwalipwile kabili bali aba nsansa ne cikuku. Nangu ca kuti baleikala fye mu ng’anda, ba Rie batendeke ukusambilishako bonse abalebatandalila ifyo basambilile mu Baibolo. Apo balelwala, tabaleya lyonse mu kulongana lelo baletemwa bamunyinefwe nga babatandalila. Ilyo bali ne myaka 82, balile mu kulongana kwa muputule kabili balibatishiwe ukulanga ukuti bali-ipeele kuli Lesa.

Ilyo papitile fye imyeshi inono ukutula apo ba Rie bafwilile, balisangile umushikakulo uo balembele. Muli uyu mushikakulo balondolwele ukuti calibipa sana ukutalalilwa umuntu nga nakota e lyo balandile na pa busuma bwa kuba ne cikuuku. Ba Manon batile “Ukubelenga uyu umushikakulo kwalimfikile pa mutima kabili nintemwa ukuti Yehova alitwafwile ukulanga icikuuku kuli bena.”

Ifyo Yehova atutemwa no kutulanga icikuuku filalenga na ifwe tulelanga icikuku no kutemwa kuli bambi. (Efes. 5:1, 2) Tukabomba bwino ilyo tuleshimikila nga ‘tulelanga ukuti tuli babomfi ba kwa Lesa . . . pa kuba ne cikuuku.’—2 Kor. 6:4, 6.