“Ifi Fine e fyo Nalefwaya”

Palipita imyaka 15 ukutula apo ba Emilia balekela ukubomba bupainiya bwa nshita yonse. Pa myaka iyapitapo, balatontonkanya pa fyo balebomba bwino bupainiya kabili balefwaya ukutendeka bupainiya na kabili.

Ba Emilia tabalekwata sana insansa pantu balepoosa sana inshita iikalamba ku ncito. Bushiku bumo ilyo bali nabo balebomba nabo baliilishenye abati: “Kuti natemwa sana nga ndebomba fye amaawala ayanono!” Ilyo umukalamba wa ncito aumfwile ifyo ba Emilia balandile, alibepwishe nga ca cine balefwaya ukulabomba fye amaawala ayanono. Ba Emilia balisumine. Lelo umukalamba wa kampani e walingile ukubasuminisha pantu ifunde lya kampani lyali lya kuti ababomfi bonse balingile ukubomba amaawala ayakumanina. Ba Emilia bali-ipekenye ukuyamonana no mukalamba wa kampani, balipepele pa kuti bashipe na pa kuti bengalanshanya nankwe bwino.

Ilyo ba Emilia balelanshanya no mukalamba wa kampani balishipile lelo balilandile nankwe bwino bwino ukuti abafumisheko amaawala yamo aya kubomba incito. Ba Emilia batile: “Ndi Nte ya kwa Yehova, e co kampani nga yatupeelako inshita ya kutuusha, ndaya mu kusambilisha abantu Icebo ca kwa Lesa. Muno nshiku imibele ya bantu abengi naibipa e co ukubasambilisha amafunde ayaba mu Baibolo kwalicindama. Nshilefwaya ukuti imilimo iyo momba pa numa ya kwinuka ilenenga ukukanabomba bwino incito ya pa kampani, lelo kuti nafwaya ukukwata inshita iikalamba iya kwafwa abantu. E co ndefwaila ukulabomba amaawala ayanono.”

Umukalamba wa kampani alyumfwile ifyo balandile kabili atile, na o inshita imo alefwaya ukubomba umulimo wa kwafwa abantu. Lyena atile: “Ukulingana ne fyo walanda, ningile ukukusuminisha. Nomba, bushe nawishiba ukuti ukalafola indalama ishinono?” Ba Emilia balisumine kabili batile bakeshiba ifya kucita pa kuti bakaleikala fye bwino. Na kabili batile: “Ico mfwaisha ukucita, kwafwa sana abantu.” Umukalamba wa kampani atile: “Ndatemwa sana abantu abafwaya ukwafwa abantu banabo.”

Takwaba nangu umo pa kampani uo basuminishapo ukubomba amaawala ayanono. Ba Emilia nomba balibasuminisha ukubomba fye inshiku shine mu mulungu umo. Ba Emilia balipapile pantu tababafumisheko indalama, balefola fye shilya shine balefola lyonse! Batile: “Ifi fine e fyo nalefwaya, nomba kuti natampa bupainiya na kabili!”

Bushe mwalitontonkanyapo nga kuti mwabombako bupainiya nangu nga mwalileka, bushe kuti mwatampa na kabili?

[Amashiwi pe bula 32]

Umukalamba wa ncito aebele ba Emilia ati: “Ndatemwa sana abantu abafwaya ukwafwa abantu banabo”