Mulebombela Lesa Uupeela Ubuntungwa

“Uku e kutemwa Lesa, ukuti tulekonka amafunde yakwe; kabili amafunde yakwe taya-afya.”—1 YOH. 5:3.

BUSHE KUTI MWAYASUKA?

Bushe Satana alenga shani ukuti tulemona kwati amafunde ya kwa Lesa yalyafya?

Mulandu nshi tulingile ukubikilako sana amano ilyo tulesala ifibusa?

Cinshi cikatwafwa ukutwalilila aba cishinka kuli Lesa uutupeela ubuntungwa?

1. Bushe Yehova abomfya shani ubuntungwa, kabili alangile shani ifyo abomfya ubu buntungwa kuli Adamu na Efa?

YEHOVA e wakwatisha fye ubuntungwa. Nomba tabomfya ubuntungwa icibomfye bomfye, e lyo teba ababomfi bakwe ifyo bafwile ukucita na mu tuntu fye utunono. Lelo alibapeela ubuntungwa bwa kuisalila, ububafwa ukuitontonkanishisha no kucita ifyo balefwaya. Nga filya cali kuli Adamu na Efa, Lesa abakenye fye ukulya ku muti umo, “umuti wa kulenga ukwishiba ubusuma no bubi.” (Ukute. 2:17) Ala balikwete sana ubuntungwa ubwa kubomba ifyo Kabumba wabo alefwaya!

2. Cinshi calengele ukuti abafyashi besu aba kubalilapo balufye ubuntungwa ubo Lesa abapeele?

² Cinshi Lesa apeelele sana abafyashi besu aba kubalilapo ubuntungwa? Ababumbile mu cipasho cakwe, abapeela na kampingu pantu alishibe ukuti ukumutemwa, kukabafwa ukulacita icalungama. (Ukute. 1:27; Rom. 2:15) Ku ca bulanda, Adamu na Efa balifililwe ukumona ubusuma bwa kwa Kabumba Wabo no buntungwa ubo abapeele. Basalilepo ukukonka amano ya cimpelesha aya kwa Satana aya kuitungulula. Mu nshita yakukwata ubuntungwa, abafyashi besu aba kubalilapo bali-ishitishe mu busha bwa lubembu kumo na bana abo bali no kukwata, ne fya fuminemo fyali ifyabipa nga nshi.—Rom. 5:12.

3, 4. Bushe finshi Satana acita pa kuti tupule mu mafunde ya kwa Yehova?

³ Apo Satana alibeleleke abantu babili abapwililika na ba malaika abengi ukukaana ubutungulushi bwa kwa Lesa, ninshi na ifwe bene kuti atubeleleka. Imicenjelo ya kwa Satana yaba fye imo ine. Aleesha ukutubepa pa kuti tuletontonkanya ukuti amafunde ya kwa Lesa yalyafya, no kuti yalalenga twilaba ne nsansa. (1 Yoh. 5:3) Nga ca kuti tuleba na bantu abatontonkanya ifi, kuti na ifwe twalatontonkanya nga bena.  Nkashi umo uwa myaka 24 uwacitile ubulalelale atile, “Ukwangala na ba mibele yabipa kwalindetelele pantu naletiina ukuba uwapusanako na banandi.” Nalimo na imwe abanenu balimupatikishapo ukucita ifyabipa.

⁴ Ica bulanda ca kuti, limo limo mu cilonganino mulaba abasonga Abena Kristu banabo. Munyinefwe wacaice atile, “Nalishibako abacaice bamo abaishishanyapo na bantu abashipepa. Lelo mu kuya kwa nshiku, nalilwike ukuti ilyo naleangala sana nabo naleba fye nga bena. Natampile ukulabwelela sana pa nshi. Nga tuli pa kulongana nshaleipakisha amalyashi, e lyo nalilekele no kushimikila. E calengele ukuti ndeke ukwangala nabo!” Bushe mwalishiba ukutila abanenu kuti bamusonga ukucita ifyabipa? Natulande pa ca kumwenako cimo ica mu Baibolo.—Rom. 15:4.

ALYONGWELE IMITIMA YABO

5, 6. Bushe Abishalomu abepele shani abantu, e lyo bushe ubucenjeshi bwakwe bwalibombele?

⁵ Baibolo ilalanda pa bantu abasongele bambi ukucita ifyabipa. Ica kumwenako cimo ni Abishalomu, umwana wa Mfumu Davidi. Abishalomu ali uwayemba nga nshi. Nga filya Satana acitile, ulunkumbwa lwa kufwaya ukulumbuka lwalimwingilile nangu ca kuti tali pa mutande wa kupyana pa bufumu bwa kwa wishi. * Pa mulandu wa kufwaisha ubufumu, Abishalomu alengele abena Israele banankwe ukusumina ukuti imfumu tayalefwaya ukubafwa kano ena. Nga filya fine Kaseebanya acitile mu Edeni, Abishalomu alengele abantu baletontonkanya ukuti alefwaya ukubafwa e lyo pa nshita imo ine alibepele no bufi ubukalamba nga nshi pali wishi.—2 Sam. 15:1-5.

⁶ Bushe ubucenjeshi bwa kwa Abishalomu bwalibombele? Kwena bwalibombele panono, pantu Baibolo itila: “Abishalomu aleongola imitima ya bena Israele.” (2 Sam. 15:6) Lelo icilumba calengele ukuti Abishalomu bamucimfye kabili calengele ukuti afwe pamo na bantu abengi abalemukonka.—2 Sam. 18:7, 14-17.

7. Finshi twingasambilila ku lyashi lya kwa Abishalomu? (Moneni icikope pe bula 14.)

⁷ Cinshi calengele ukuti Abishalomu abepe abena Israele bamo ukwabula no kuti bakaneko? Nalimo balefwaya sana ifintu ifyo abalaile. E lyo nalimo balekonkelela imimonekele yakwe. Tatwaishiba bwino icalengele ukuti babelelekwe, lelo ico twaishiba ca kuti: Tabali aba cishinka kuli Yehova na ku mfumu iyo asontele. Na muno nshiku mwine, Satana alongole mitima ya babomfi ba kwa Yehova nga filya “Abishalomu acitile.” Limbi abantu kuti bamweba abati, ‘Amafunde ya kwa Yehova yalyafya. Mulemona ifyo abantu abashipepa Yehova baipakisha!’ Na imwe nga bamubepa muli uyu musango, bushe mukatwalilila ukuba ne cishinka kuli Lesa? Bushe mwalicetekela ukuti “amafunde ayapwililika” aya kwa Yehova, e kutila amafunde ya kwa Kristu e yengalenga mwaba abantungwa? (Yako. 1:25) Nga mwalicetekela, ninshi mulingile ukutemwa sana aya amafunde kabili tamulingile ukubomfya icibomfye bomfye ubuntungwa ubo mwakwata.—Belengeni 1 Petro 2:16.

8. Fya kumwenako nshi ifyo tulandilepo ifilelanga ukuti umuntu nga apula mwi funde lya kwa Yehova taba ne nsansa?

⁸ Satana alasansa sana abacaice. Munyinefwe uli nomba ne myaka 30 alandile pa nshita ilyo ali umupungwe ati: “Nalemona kwati amafunde ya kwa Yehova yalyafya kabili kwati te kuti yatucingilile.” Ici calengele ukuti acite ubulalelale lelo ifyo acitile tafyamulengele ukuti abe  ne nsansa. Alandile no kuti, “Pa myaka iingi naleumfwa sana ububi pa fyo nacitile.” Nkashi umo uwacitile ubulalelale ninshi ali umupungwe atile “Nga wacita ubulalelale, kulaba ukumfwa sana ububi. Pali ino nshita palipita imyaka 19, lelo ncili ndebukisha ifyo nacitile.” Nkashi umo atile: “Nga natontonkanya pa fyo ifyabipa nalecita fyalelenga abantu ukumfwa ububi, nalecula sana na matontonkanyo kabili naleumfwa ukuti nalelufyanya kuli Lesa. Ala taciwama nga ca kuti Lesa talekupaala.” Satana tafwaya umuntu ukutontonkanya pa fingafumamo nga ca kuti acita ifyabipa.

9. (a) Fipusho nshi ifingatwafwa ukwishiba Yehova na mafunde yakwe. (b) Mulandu nshi cawamina ukwishiba Lesa bwino?

⁹ Ca bulanda nga nshi pantu pa numa ya kubembuka e lyo ababwananyina bamo abacaice na bakalamba bailwike ukuti cibi sana ukucita ifintu fya musango uyu. (Gal. 6:7, 8) E co yipusheni amuti: ‘Bushe nalishiba imicenjelo ya kwa Satana iyo alufishamo abantu? Bushe imona Yehova ukuti e cibusa wandi sana, uunjeba icine lyonse kabili uumfwaila ubusuma? Bushe nalishininkisha ukuti takatale antana ifisuma kabili nga nacita ifyo afwaya nkaba ne nsansa icine cine?’ (Belengeni Esaya 48:17, 18.) Pa kuti mwingasuka bwino ifi fipusho, mulingile ukwishiba bwino Yehova. Mulingile ukumwishiba bwino no kwishiba ukuti amafunde ayaba mu Baibolo yalanga fye ifyo Yehova amutemwa no kuti tafwaya mwaba abasha.—Amalu. 25:14.

MULELOMBA UMUTIMA WA CUMFWILA KABILI UWA MANO

10. Mulandu nshi tulingile ukupashanishisha Imfumu yacaice Solomone?

¹⁰ Ilyo Solomone ali umulumendo alipepele kuli Lesa ati: “Ine ndi mwaice.  Nshaishiba ifya kuteka.” Lyena alombele ukuti Lesa amupeele umutima wa mano kabili uwa cumfwila. (1 Isha. 3:7-9, 12) Yehova alyaswike ipepo lya kwa Solomone, na imwe akamwasuka nangu nga muli baice nelyo abakalamba. Lelo kwena Yehova takamupeele amano no kushilimuka mu cisungusho. Akamupeela amano nga mulesambilila Icebo cakwe no kulomba umupashi wakwe uwa mushilo e lyo no kulakonka ifyo musambilila mu kulongana kwa Bwina Kristu. (Yako. 1:5) Ca cine ukupitila muli ifi, Yehova alalenga ababomfi bakwe nangu bacaice ukuba sana na mano ukucila bonse abashikonka amafunde yakwe abo cino calo cimona kwati ‘ba mano kabili abacenjela.’—Luka 10:21; belengeni Amalumbo 119:98-100.

11-13. (a) Masambililo nshi ayacindama ayo twingasambilila pa Amalumbo 26:4 na pa Amapinda 13:20 e lyo na pali 1 Abena Korinti 15:33? (b) Kuti mwakonka shani aya amafunde aya mu Baibolo?

¹¹ Pa kuti twishibe bwino ifyo cacindama ukusambilila Baibolo e lyo no kutontonkanya pa fyo twasambilila na pa kuti twingeshiba bwino Yehova, tulingile ukubelenga amalembo ayakonkapo. Muli aya amalembo muli ifyo twingakonka pa kusala fibusa. Ku ca kumwenako, pa Amalumbo 26:4 patila: “Nshaikala pamo na ba bufi; Kabili nshendela pamo na ba bumbimunda.” Pa Amapinda 13:20 patila: “Uule-enda na ba mano akaba uwa mano, lelo uwangala na bawelewele akacula.” E lyo pa 1 Abena Korinti 15:33 patila: “Mwilufiwa. Ukwampana pamo na babi kulonaula imibele isuma.”

¹² Masambililo nshi ayacindama ayo twingasambilila muli aya malembo? Kuti twasambililamo ukuti, (1) Yehova afwaya ukuti tulesala bwino ifibusa. Afwaya ukuti tutwalilile ukukwata imibele iisuma e lyo alatucingilila na lwa ku mupashi. (2) Nangu tatulefwaya, nangu tatulefwaya, abo twangala nabo kuti batulenga ukuba abantu abasuma nelyo ababipa. Ifyo amashiwi yali mu malembo ayali pa muulu yalembelwe, yaletulanga fye ukuti Yehova alafwaya ukutwafwa. Kuti atwafwa shani? Muli ifi fikomo tamuli amashiwi ayali kwati mafunde pamo nga “tamulingile . . . “ Lelo fishinka. Kanshi Yehova aletweba fye ukuti ifi e fyo cilingile ukuba. Bushe muli no kukonka ifyo mwasambilila? Muletipo shani?

¹³ Apo amashiwi ayali muli ifi ifikomo fitatu fishinka, kuti fyatwafwa inshita fye yonse e lyo kabili kuti twafibomfya mu nshila ishalekanalekana. Katulangilile, yipusheni amuti: Kuti nacita shani pa kuti nshileangala na bantu “abafisa ifyo baba”? (Amapi. 3:32; 6:12) Bushe “aba mano” abo Yehova afwaya ukuti ndeangala nabo ni bani? Inga “abawelewele” abo nshifwile ukula-angala nabo ni bani? (Amalu. 111:10; 112:1; Amapi. 1:7) “Mibele iisuma” nshi ningonaula nga ndeangala na babipa? Bushe bantu fye abashipepa Lesa ebengaba ifibusa fyabipa? (2 Pet. 2:1-3) Kuti mwayasuka shani aya mepusho?

14. Kuti mwalenga shani Amapepo ya Lupwa ukuwaminako?

¹⁴ Apo natutontonkanyapo pa Malembo, bushe te kuti ciwame nga twamonako ne fyo Amalembo yambi yalanda pa fyo Lesa amona ifintu ifimukuma no lupwa lwenu? * Abafyashi balingile ukulalanshanya amalyashi ya musango uyu pa Mapepo ya Lupwa. Ilyo mulelanshanya, mulingile ukwishiba ukuti mulefwaya ukwafwa ulupwa lwenu ukwishiba sana ifyo Lesa amutemwa nga fintu amafunde yalanda. (Amalu. 119:72) Ukukwata amasambililo ya musango uyu  kuti yalenga twaikatana mu lupwa e lyo kuti twapalama sana na kuli Yehova.

15. Kuti mwaishiba shani ukuti namukwata umutima wa mano kabili uwa cumfwila?

¹⁵ Kuti mwaishiba shani nga namukwata umutima wa mano kabili uwa cumfwila? Cimo ico mwingeshibilako kulinganya ifyo mutontonkanya ku fyo ababomfi ba cishinka aba kale baletontonkanya pamo nga Davidi, uwatile: “Ku kucita ukufwaya kwenu, mwe Lesa wandi, e ko natemwa, na mafunde yenu yaba mu mutima wandi.” (Amalu. 40:8) Na kabili, uwalembele Amalumbo 119 na o atile: “Amafunde yenu naliyatemwa icine cine! Akasuba konse e yo ntontonkanyapo.” (Amalu. 119:97) Ukutemwa kwa musango uyu takuishila fye ukwine. Lelo ukusambilila sana Baibolo, ukupepa, ukutontonkanya pa fyo tusambilila no kumona ifyo Lesa atupaala pa mulandu wa kukonka amafunde yakwe, e filenga ukuti tukwate ukutemwa.—Amalu. 34:8.

BOMBESHENI PA KUTI MUKWATE UBUNTUNGWA BWINE BWINE!

16. Finshi tufwile ukwishiba pa kuti tucimfye no kukwata ubuntungwa bwine bwine?

¹⁶ Ukutula fye na kale, ifyalo ifingi filalwa inkondo pa kuti fipoke ubuntungwa. Kanshi na ifwe tulingile ukucilapo ukulwa ubulwi bwa ku mupashi pa kuti twingaba abantungwa. E co tufwile ukwishiba ukuti tatulwishanya fye na Satana ne calo no mupashi wa calo, lelo tulalwishanya no kukanapwililika e lyo ne mitima yesu iya bucenjeshi. (Yer. 17:9; Efes. 2:3) Lelo Yehova kuti atwafwa ukucimfya. Icacilapo ukuwama ca kuti mulafuma ifisuma fibili nga twacimfya mu fintu ifikalamba nelyo ifinono. Ica kubalilapo, tulalenga umutima wa kwa Yehova ukusekelela. (Amapi. 27:11) Icalenga bubili ca kuti, ilyo tulemona ifyo Lesa alebomfya “amafunde ayapwililika ayatulenga ukuba abantungwa” ku kutwafwa, tukacilapo ukufwaisha ukulaenda mu ‘musebo uwacepa’ uutwala ku bumi bwa muyayaya. Mu kupita kwa nshita, tukalaipakisha ubuntungwa bwine bwine ubo Yehova alaya aba cishinka.—Yako. 1:25; Mat. 7:13, 14.

17. Mulandu nshi tushifwile ukumfwila sana ubulanda nga tulelufyanya, kabili Yehova atwafwa shani?

¹⁷ Inshita shimo bonse tulalufyanya. (Luk. Mil. 7:20) Nga twalufyanya, tatulingile ukumfwa sana ubulanda nelyo ukufuupulwa. Nga twalufyanya, tulingile ukweba baeluda pa kuti batwafwa. Yakobo atile “umulwele akapola pantu abamupepelako bali ne citetekelo, na Yehova akamwimya. Kabili, nga alicita imembu, imembu shakwe shikelelwa.” (Yako. 5:15) Mulingile ukulaibukisha ukuti Lesa alikwatisha inkumbu kabili alimukulile ukuba mu cilonganino pantu alimwene kuti mwalikwete umutima wa kumubombela. (Belengeni Amalumbo 103:8, 9.) E co nga twatwalilila ukubombela Yehova no mutima onse, takatulekeleshe.—1 Imila. 28:9.

18. Kuti twacita shani pa kuti Yehova aletucingilila ukulingana ne fyo Yesu apepele ifyaba pali Yohane 17:15?

¹⁸ Ilyo alepepa pa bushiku bwa kulekelesha ninshi ali na batumwa bakwe 11 aba cishinka, Yesu alibapepeleko ati: “Mulebacingilila ku mubifi.” (Yoh. 17:15) Yesu tapepele fye abatumwa bakwe 11 lelo alipepeleko na bonse aba mukonka. Ilyo tuleikala muli shino nshiku sha kulekelesha, kuti twacetekela ukuti Yehova alasuka ipepo lya kwa Yesu ilya kuti Yehova aletucingilila ku mubifi. Baibolo itila: “[Yehova] ni nkwela . . . alinda umwenda aba cishinka bakwe.” (Amapi. 2:7, 8) Twalishiba ukuti mu nshila umwenda aba cishinka mwaliba amafya, lelo e nshila fye yeka itungulula ku buntungwa bwine bwine na ku mweo wa muyayaya. (Rom. 8:21) Mwikaleka nangu umo ukumufumya muli iyi inshila!

[Amafutunoti]

[Ifipusho]

[Ifikope pe bula 14]

Kuti twaishiba shani abantu ababa nga Abishalomu kabili kuti twaibaka shani kuli bena?