Bushe Muleibukisha?

Bushe mwalibelenga ba magazini ba Ulupungu lwa kwa Kalinda aba nomba line? Moneni nga kuti mwayasuka amepusho yakonkapo:

Bushe imishishi ya kwa Samsone e yalemupeela amaka?

Imishishi ya kwa Samsone te yalelenga ukuti akwate amaka. Apo ali mu Nasiri, imishishi yakwe yalelanga fye ukuti alikwete bucibusa bwaibela na Lesa. Ilyo Delila amubeyele imishishi, bucibusa bwakwe na Lesa bwalicepeleko.—4/15, ibula 9.

Fintu nshi fitatu ifingawamya umutima wesu, ifyo no mutima wesu uwa mampalanya ufwaya pa kuti ulebomba bwino?

(1) Ifya kulya. Filya fine imitima yesu ikabila ifya kulya ifisuma, na ifwe tulingile ukulalya ifya kulya fya ku mupashi ifyakumanina. (2) Ukutukusha umubili. Nga tuli abacincila mu kushimikila, kuti twalenga umutima wesu uwa mampalanya ukulabomba bwino. (3) Ubwikashi. Ilyo tuleampana na babwananyina abatubikako amano, amafya yalacepako.—4/15, ibula 16.

Umo mu cupo nga acita ubucende, finshi abaupana balingile ukucita pa kutila batendeke na kabili ukucetekelana?

Bafwile (1) ukuba abafumacumi; (2) ukulabombela pamo; (3) ukwalule mibele yabo; na (4) ukubelelana uluse pa kuti batendeke ukumfwana bwino bwino.—5/1, amabula 12-15.

Mulandu nshi uulelanda ilyashi lya cililo talingile ukulandila pe lembo lya Amalumbo 116:15 ukulosha ku muntu uufwile?

Ilembo litila: “Imfwa ya bantu bakwe aba cishinka yalyuma umutengo mu menso ya kwa Yehova.” Ili ilembo lipilibula ukuti Lesa amona ababomfi bakwe aba cishinka bonse ukuti ba mutengo sana kuli ena. E co takaleke abantu bakwe nge bumba ukuloba.—5/15, ibula 22.

Bushe bakolopota bali ni bani?

Ilyo umwaka wa 1931 ushilafika, bonse abalebomba bupainiya balebeta ukuti “bakolopota.”—5/15, ibula 31.

Fishinka nshi fimbi ifilanga ukuti Baibolo te buuku fye ilyalembelwe na bantu?

Mu Baibolo mwaliba amasesemo ayengi ayafikilishiwa. Ilanda pa malyashi ayacitike kale aya cine, tailanda pa nshimi. Ifyo yalanda pali sayansi filomfwana ne fyo ba sayantisti balanda. Kanshi ifyo yalanda fya cine.—6/1, amabula 4-8.

Bushe “aya mabufumu yonse” ayo Daniele 2:44 yalandapo yemininako finshi?

Aya mashiwi yalanda pa mabufumu nelyo amabuteko ayemininwako ne filundwa fyalekanalekana ifya cimpashanya ca cela ico Daniele alondolwele.—6/15, ibula 17.

Ni lilali Anglo America yaishileba Ubuteko bwa Calo Ubwakwatisha Amaka ubwalenga 7 mu busesemo bwa mu Baibolo?

Ubuteko bwa Britain na America bwaishileba ubuteko bwakwatisha maka ilyo batendeke ukubombela pamo lintu kwali Inkondo ya Calo iya Kubalilapo.—6/15, ibula 19.

Bushe Lesa eleela shani, kabili alabako shani ku membu sha bantu abalapila?

Yehova alaya bonse abo atemwa ukuti: ‘Nshakebukishe imembu shabo.’ (Yer. 31:34) Yehova alelela imembu pa mulandu wa cilubula. Nga aelela alalabako pantu takandila umuntu pa membu isho acitile kale.—7/1, ibula 18.

Mulandu nshi twingacetekelela mu fipesha amano ifyalembwa mu Baibolo?

Pantu ilingi line fyalecitwa pa cintubwingi. Takwaleba ifintu ifingi ifyo balecita pa kuti bacite ifipesha amano. Ico balecitila ifipesha amano kucindika Lesa te bantu iyo. Ifipesha mano fyali ifingi nga nshi kabili abalwani abamwene uko fyalecitika tabatwishike ukuti fyalicitike. Kanshi ifi kuti fyalenga twacetekela mu fipesha amano ifyalembwa mu Baibolo.—8/1, amabula 7-8.