Amasukulu ya Bulesa—Yalanga Ukuti Yehova Alitutemwa

YEHOVA ni ‘Kasambilisha wesu Uwapulamo.’ (Esa. 30:20) Ico Lesa atusambilishisha no kutukansha ni co alitutemwa. Ku ca kumwenako, pa mulandu wa kuti Yehova aliba sana no kutemwa, alalanga Yesu “fyonse ifyo acita.” (Yoh. 5:20) E lyo pa mulandu wa kuti alitutemwa, alatupeela “ululimi lwa basambilila,” sana sana nga tule-esha na maka ukumucindika no kwafwa bambi.—Esa. 50:4.

Ababa muli Komiti ya Kusambilisha iye Bumba Litungulula, nabo balapashanya Yehova uwaba no kutemwa. Balibikako amasukulu ya bulesa 10 aya kukansha abafwaya ukusangwako kabili abengaba na maka ya kusangwako. Bushe mwalishiba ukuti ico Yehova abikilako aya amasukulu ni co alitutemwa?

Belengeni ifilelanda pa masukulu ya bulesa ne fyo abakanshiwa muli aya masukulu balandapo. Lyena muipushe amuti, ‘Bushe kuti nacita shani pa kuti imone ubusuma bwaba muli aya masukulu?’

 UBUSUMA BWABA MU KUKANSHIWA NA LESA

Ico Yehova “Lesa wa kutemwa” atukanshisha, afwaya ukuti tulebomba bwino umulimo wakwe, no kuti tuleba ne nsansa, e lyo no kutwafwa ukwishiba ifya kucita nga twaba na mafya. (2 Kor. 13:11) Nga filya fine abasambi ba kubalilapo bali, na ifwe twalikanshiwa bwino ‘ukusambilisha abantu ukulakonka fyonse’ ifyo batweeba.—Mat. 28:20.

Nangu ca kutila te kuti tusangwe kuli aya masukulu yonse, kuti twasambilila ifingi nga twasangwako kuli limo nangu ukucilapo. Kabili kuti yatwafwa ukulakonka ifyo Baibolo isambilisha. Na kabili kuti twaishibilako ifya kubomba umulimo wa kushimikila nga tulebomba na babomfi ba kwa Yehova abakanshiwa bwino.

Muipushe amuti, ‘Bushe ninkwata amaka ya kusangwa kwi sukulu nangu fye limo pali aya?’

Bakapepa ba kwa Yehova, bamona ukuti lishuko ukukanshiwa no kwafwilishako muli aya masukulu ayacindama nga nshi. Shi lekeni ukuti ifyo musambilila muli aya masukulu filemupalamika sana kuli Lesa no kumwafwa ukulabomba bwino imilimo yakwe, maka maka umulimo wa kushimikila imbila nsuma.

[Akabokoshi ne Fikope pa mabula 13-17]

AMASUKULU YA BULESA

Isukulu lya Butumikishi Ilya Bulesa

Ico lyabelako: Kukansha bakasabankanya pa kuti baleshimikila no kusambilisha bwino.

Inshita lipoosa: Litwalilila fye.

Uko libela: Pa Ng’anda ya Bufumu. Abalingile ukusangwako: Abalongana ne Nte sha kwa Yehova lyonse, abasumina ifyo Baibolo isambilisha, kabili ababa ne mibele iisuma iya Bena Kristu.

Abalembesha: Abalefwaya ukulembwa muli ili isukulu balembesha kuli kangalila we sukulu.

Ba Sharon abalwala ubulebe batile: “Isukulu lya Butumikishi Ilya Bulesa lyalinsambilisha ifya kufwailisha ifyebo ne fya kulanda bwino. Nalisambilila ne fya kubika amano ku kwafwa abantu lwa ku mupashi ukucila ukulabika fye amano ku fyo ndefwaya.”

Ba Arnie, ababomba pa myaka iingi mu mulimo wa kwenda nabo batile: “Ukutula fye ku bwaice nalebulubusa, kabili calenkosela ukuloleshanya no muntu. Nomba isukulu lyalingafwa ukuba uwashipa no kulayumfwa ukuti na ine ndi muntu. Yehova alinkansha ukwishiba ifya kupeema pa kuti nshilepwilila. Ndatasha sana pe shuko nakwata ilya kulumbanya Lesa mu cilonganino e lyo na lintu ndeshimikila.”

 Isukulu lya Babombela pa Bethel

Ico libelako: Kwafwa abaya mu kubombela pa Bethel pa kuti balebomba bwino.

Inshita lipoosa: Amamineti 45 cila mulungu pa milungu 16.

Uko libela: Ku Bethel.

Abalingile ukusangwako: Umuntu afwile ukuba mu lupwa lwa pa Bethel nelyo uo basuminisha ukulabombela pa Bethel pa mwaka umo nelyo ukucilapo.

Abalembesha: Bonse fye abaya mu kubombela pa Bethel balabalemba muli ili isukulu.

Ba Demetrius abapwishishe ili isukulu muli ba 1980, batile: “Ili isukulu lyalengele ukuti njishibe ifyo ningile ukulacita pa kuti ndenonkelamo sana mwi sambililo lya pa lwandi. Lyalingafwile no kwishiba ifya kulabomba bwino pa Bethel. Ifyo abaletusambilisha baali, ifyo twalesambililapo, e lyo ne fyo baletukansha bwino fyalengele nshininkishe ukuti Yehova alintemwa kabili alefwaya ukuti ndebomba bwino pa Bethel.”

Ba Kaitlyn batile: “Isukulu lyalingafwile ukulabika sana amano ku fya ku mupashi. Lyalengele njishibe bwino Yehova, ukumutemwa, no kutemwa ing’anda yakwe, e lyo no kwishiba bwino ukuteyanya kwakwe.”

Isukulu lya Butumikishi bwa Bufumu

Ico libelako: Kukansha bakangalila benda na baeluda, na babomfi batumikila pa kuti balebomba bwino imilimo ya mu cilonganino e lyo no kulasakamana umukuni. (Imil. 20:28) Muli ili sukulu, basambilisha pa filecitika muno nshiku, e lyo ne fintu ififwaikwa sana mu filonganino. Ibumba Litungulula e lipekanya ukuti kube ili isukulu nga papita imyaka iinono.

Inshita lipoosa: Ino nshita, bakangalila benda basambilila inshiku shibili nelyo shibili na hafu, e lyo baeluda bushiku bumo na hafu, e lyo ababomfi batumikila bena bushiku fye bumo.

Uko libela: Ilingi line libela pa Ng’anda ya Bufumu nangu mu Cikuulwa ca Kulonganinamo Ukulongana Ukukalamba.

Abalingile ukusangwako: Ni bakangalila benda, baeluda, na babomfi batumikila.

Abalembesha: Baeluda na babomfi batumikila babeta fye kuli kangalila wa muputule. E lyo iofeshi lya musambo e lita bakangalila benda.

Ba Quinn batile: “Nangu ca kuti basambilila ifingi nga nshi mu nshita fye iinono, isukulu lilafwa baeluda ukutwalilila ne nsansa no ‘kuba abashipa nga baume’ mu mulimo wa kwa Yehova. Bonse fye baeluda aba kale na bapya balasambilila ifya kucema bwino umukuni no kuba abaikatana mu ‘kutontonkanya kumo kwine.’”

Ba Michael nabo batile: “Muli ili isukulu balitusambilishe ifya kumfwikisha Icebo ca kwa Lesa, balitusokele pa fingonaula bucibusa bwesu na Lesa, e lyo ne fya kucita pa kucema umukuni. Ala kwena Yehova alitutemwa nga nshi!”

 Isukulu lya Bapainiya

Ico libelako: Kwafwa bapainiya ‘ukubombesha mu mulimo wabo onse.’—2 Tim. 4:5.

Inshita lipoosa: Imilungu ibili.

Uko libela: Iofeshi lya musambo e lisala icifulo; ilingi line libela pa Ng’anda ya Bufumu.

Abalingile ukusangwako: Ababomba bupainiya bwa nshita yonse pa mwaka umo nelyo ukucilapo. *

Abalembesha: Kangalila wa muputule e wita bapainiya ababomba bwino ukuti basangweko.

Ba Lily batile: “Ili isukulu lyalingafwa ukwishiba ifya kucita na mafya nkwata e lyo na mafya yaba mu kushimikila. Ino nshita nalishiba ifya kusambilisha bwino, ukubomfya Baibolo e lyo ne fya kuisambilisha. Naliiteyanya no kwafwa bambi, ndatungilila baeluda, e lyo ndasangwilako na ku kulunduluka kwa cilonganino.”

Ba Brenda abasangwa kuli ili isukulu imiku ibili batile: “Lyalingafwa ukupoosa amano yonse ku fya kwa Lesa, lyalilenga kampingu yandi ukuba bwino, kabili lyalingafwa ukubika amano ku kwafwa abantu. Cine cine Yehova ni kapekape!”

[Futunoti]

Isukulu lya Baeluda

Ico libelako: Kwafwa baeluda ukwishiba ifya kubomba imilimo yabo iya mu cilonganino e lyo no kubalenga ukuba abaume abafikapo.

Inshita lipoosa: Inshiku shisano.

Uko libela: Iofeshi lya musambo e lisala; ilingi line libela pa Ng’anda ya Bufumu nelyo mu Cikuulwa ca Kulonganinamo Ukulongana Ukukalamba.

Abalingile ukusangwako: Ni baeluda.

Abalembesha: Iofeshi lya musambo e liita baeluda.

Umfweni ifyo bamo abali mwi kalasi lyalenga 92 ku America balandile pali ili isukulu:

“Isukulu lyalinonsha, lyalingafwa ukuibebeta ne mwine e lyo no kwishiba ifya kusunga impaanga sha kwa Yehova.”

“Ino nshita nalishiba bwino ifya kukoselesha abantu ukubomfya Amalembo no kukomaila pa fishinka.”

“Ifyo nasambilile muli ili isukulu nakulafikonka lyonse.”

Isukulu lya Bakangalila Benda na Bena Mwabo

Ico libelako: Kwafwa bakangalila ba muputule na ba citungu ukwishiba bwino bwino ifya kubombela ifilonganino, e lyo no ‘kubombesha mu kulanda na mu kusambilisha.’—1 Tim. 5:17; 1 Pet. 5:2, 3.

Inshita lipoosa: Imyeshi ibili.

Uko libela: Iofeshi lya musambo e lisala.

Abalingile ukusangwako: Ni bakangalila ba muputule na ba citungu.

Abalembesha: Iofeshi lya musambo e lyeba bakangalila benda na bena mwabo abalingile ukusangwako.

Ba Joel abali mu kalasi lya kubalilapo mu 1999, batile: “Twalishibilepo ifingi pa fyo Yesu uwaba umutwe wa cilonganino abomba. Twalimwene ifyo cacindama ukulakoselesha aba bwananyina, e lyo no kukosha aba mu filonganino ukuba abaikatana. Isukulu lyalengele twailuka ukuti, nangu ca kuti mu mulimo wa kwa kangalila wenda mwaba no kupanda amano no kulungika aba bwananyina umulefwaikwa, umulimo wakwe uukalamba wakulenga aba bwananyina ukwishiba ukuti Yehova alibatemwa.”

 Isukulu lya Bamunyina Abashimbe

Ico libelako: Kwafwa baeluda na babomfi batumikila abashimbe ifya kubomba imilimo na imbi iya mu kuteyanya kwa kwa Yehova. Abapwisha ili isukulu balabatuma ukuya mu kubombela ukwaba ukukabila. Bamo abaitemenwa kuti babatuma na mu fyalo fimbi. Bamo kuti babatuma nga bapainiya baibela pa myeshi iinono ku ncende sha mu mushi ukushaba aba kushimikila imbila nsuma pa kuti balundulule umulimo.

Inshita lipoosa: Imyeshi ibili.

Uko libela: Iofeshi lya musambo e lisala; ilingi line libela pa Ng’anda ya Bufumu nelyo mu Cikuulwa ca Kulonganinamo Ukulongana Ukukalamba.

Abalingile ukusangwako: Bamunyinefwe abashimbe abali ne myaka pa kati ka 23 na 62, abashilwalilila kabili abafwaya ukubombela konse ukwaba ukukabila kukalamba. (Marko 10:29, 30) Bafwile ukuba ni bapainiya wa nshita yonse pa myaka ibili nelyo ukucilapo, kabili apo basontelwa bueluda nelyo ubutumikila pafwile ukupita imyaka ibili.

Abalembesha: Abalefwaya ukusangwako balakumana nga kuli ukulongana kwa muputule apo babeba ififwaikwa.

Ba Rick abali mwi kalasi lyalenga 23 ku America batile: “Ukupooseshako amano ilyo twalesambilila kwalengele ukuti umupashi wa kwa Yehova unjalule. Yehova nga apeela umuntu umulimo, alamupeela na maka ya kubomba. Nasambilile ukuti nga nabika sana amano ku kucita ukufwaya kwa kwa Lesa, akankosha.”

Ba Andreas ababombela mu Germany batile: “Nalisambilila ifingi pa fyo ukuteyanya kwa kwa Yehova kubomba kabili caba kwati cipapwa kuli ine. Ifyo nasambilile fyalengele ukuti njipekanye ukubomba imilimo na imbi ku ntanshi. E lyo ifya kumwenako ifingi ifya mu Baibolo fyansambilishe ukuti ukubombela Yehova na ba bwananyina e kuleta insansa sha cine cine.”

Isukulu lya Bena Kristu Abaupana

Ico libelako: Kukansha abaupana pa kuti bengabomfiwa sana na Yehova no kuteyanya kwakwe. Abapwisha ili isukulu balabatuma ukuya mu kubombela ukwaba sana ukukabila. Bamo kuti babatuma ukuya mu kubombela ku calo cimbi. Bamo kuti babatuma pa myeshi iinono nga bapainiya baibela ku ncende sha mu mushi ukushaba aba kushimikila imbila nsuma pa kuti bengalundulula umulimo wa kushimikila.

Inshita lipoosa: Imyeshi ibili.

Uko libela: Mu fyalo fimo fimo umwaba imisambo, ilingi line libeela pa Ng’anda ya Bufumu nelyo mu Cikuulwa ca Kulonganinamo Ukulongana Ukukalamba.

Abalingile ukusangwako: Abaupana abali ne myaka pa kati ka 25 na 50, abashilwalilila abengabombela konse ukwaba sana ukukabila kabili abengatila: “E po ndi! Ntumeni.” (Esa. 6:8) Apo baupanina pafwile ukupita imyaka ibili, e lyo apo babeela bapainiya napo pafwile ukupita imyaka ibili. Munyinefwe afwile ukubomba bueluda nelyo ubutumikila pa myaka ibili ukwabula ukulekapo.

Abalembesha: Abalefwaya ukusangwako balakumana nga kuli ukulongana kwa citungu apo babeba ififwaikwa. Pa kulongana kwa citungu nga tapali uku kukumana, e lyo mulefwaya ukusangwako, kuti mwalembela iofeshi lya musambo pa kuti mwishibe ifyo mwingacita.

Ba Eric na ba Corina abali mwi kalasi lya kubalilapo mu 2011 batile: “Ala ili isukulu lya milungu 8 lyalyalwile ubumi bwesu icine cine, kabili lishuko ku baupana abalefwaya ukubomba imilimo iingi mu kuteyanya kwa kwa Lesa! Twakulaesha na maka yesu yonse ukubomfya bwino inshita.”

Isukulu lya Gileadi

Ico libelako: Kukansha abasambi ukuba bamishonari abo batuma mu filonganino mu ncende umwaba sana abantu, bambi babatuma nga bakangalila benda, e lyo bambi nabo babombela pa misambo. Ico babasambilishisha kulashimikila sana e lyo no kukosha imisambo.

Inshita lipoosa: Imyeshi isano.

Uko libeela: Ni pa Watchtower Educational Center, ku Patterson, mu New York, ku America.

Abalingile ukusangwako: Abaupana ababa kale mu mulimo waibela uwa nshita yonse pamo nga bamishonari abashapita muli ili isukulu, bapainiya baibela, bakangalila benda, nelyo ababombela pa musambo. Bonse bafwile ukubomba pa myaka itatu nelyo ukucilapo mu mulimo waibela ukwabula ukulekapo. Bafwile ukwishiba ukulemba, ukulanda, e lyo no kubelenga iciNgeleshi bwino bwino.

Abalembesha: Limo Komiti ya Musambo ileba abaupana ukuti balembeshe.

Ba Lade na ba Monique abafuma ku America babombela mu Africa. Ba Lade batile: “Isukulu lya Gileadi lyalilenga tuipekanye ukubombela ku calo icili conse, kabili twaliipekanya ukubombela capamo na ba bwananyina.”

Ba Monique nabo batile: “Nga ndekonka ifyo nasambilila mu cebo ca kwa Lesa, ndaba sana ne nsansa mu mulimo momba. Nalimona ukuti ukuba ne nsansa bushininkisho na bumbi ubulanga ukuti Yehova alintemwa.”

Isukulu lya Baba Muli Komiti ya Musambo na Bena Mwabo

Ico libelako: Kwafwa ababa muli Komiti ya Musambo ukwishiba bwino ifya kutungulula imilimo pa misambo, ifilonganino, no kwangalila imiputule ne fitungu. Balasambilila na pa fya kupilibula impapulo, ukupulinta, no kushituma.

Inshita lipoosa: Imyeshi ibili.

Uko libela: Ni pa Watchtower Educational Center, ku Patterson, mu New York, ku America.

Abalingile ukusangwako: Bantu ababa muli Komiti ya Musambo nelyo muli Komiti ya Calo nelyo abo bapeela imilimo ya musango yu.

Abalembesha: Ibumba Litungulula e lisala bamunyinefwe na bena mwabo abalingile ukusangwako.

Ba Lowell na ba Cara bali mwi kalasi lyalenga 25 kabili babombela mu Nigeria. Ba Lowell batile: “Nasambilile ukuti nangu ningapamfiwa shani nangu ukukwata imilimo ya musango shani, icacindama sana icilenga Yehova ukusekelela, kuba na bucibusa bwakosa na Yehova. Na kabili balikomaile sana pa kulanga ukutemwa nge fyo Yehova alanga ukutemwa ku babomfi bakwe.”

Ba Cara nabo batile: “Icishinka cimo ico nshalaba ico nasambilile ca kutila, nga ca kuti te kuti nondolole icishinka cimo mu nshila yayanguka, ninshi ningile ukusambilila sana pali ilyo lyashi ilyo nshilaya mu kusambilisha bambi.”