Sambilileni ku Fyo Yehova na Yesu Batekanya

“Mulemona ukutekanya kwa kwa Shikulwifwe ukuti lipusukilo.”—2 PET. 3:15.

BUSHE KUTI MWAYASUKA SHANI?

Bushe Yehova alanga shani ukuti alitekanya?

Mulandu nshi Yesu atekanishishe pa nshita ntali?

Finshi tufwile ukucita pa kuti tube abatekanya nga Lesa?

1. Finshi ifyo bamunyinefwe bamo ababombela Lesa ne cishinka batwishika?

NKASHI uwabombela Lesa ne cishinka pa myaka iingi kabili uwashipikisha amafya ayengi aipwishe ati, “Bushe nkamonako uko icalo cikapwa?” Ifi fine e fyo na bambi ababombela Yehova pa myaka iingi batontonkanya. Tulafwaisha ukumona uko Lesa akalenga ifintu fyonse ukuba ifipya, no kufumyapo amafya ayatucusha. (Ukus. 21:5) Nangu ca kuti twalishininkisha ukuti icalo ca kwa Satana cili mupepi no kupwa, calyafya ukuba abatekanya ukulolela ubushiku bwa kwa Yehova.

2. Fipusho nshi pa fyo Lesa atekanya ifyo twalasambililapo?

² Baibolo itusambilisha ukuti, tulingile ukuba abatekanya. Nga tulepashanya ababomfi ba kwa Lesa aba kale, tukapokelela ifyo Lesa atulaya nga tuli ne citetekelo icakosa no kuba abatekanya ukulolela amalayo ya kwa Lesa. (Belengeni AbaHebere 6:11, 12.) Yehova ena alitekanya. Afwaya, nga kale sana afumyapo amacushi, lelo umwine alishiba inshita iisuma ilyo akayafumyapo. (Rom. 9:20-24) Bushe cinshi Lesa atekanishisha ifi? Bushe Yesu atulanga shani ica kumwenako ica kuba uwatekanya nga Lesa? Mulandu shi cingawamina ukusambilila ukutekanya nga filya Lesa aba? Ifyasuko kuli ifi fipusho kuti fyatwafwa ukuba abatekanya no kuba ne citetekelo icakosa, nangu cingamoneka kwati Yehova aleshingashinga.

CINSHI YEHOVA ATEKANISHISHA?

3, 4. (a) Cinshi ico Yehova atekanishisha ukubomba ifyo afwaya pano calo? (b)  Bushe Yehova acitile shani ilyo abantu bapondweke mu Edeni?

³ Yehova umwine alishiba ico atekanishisha. Yehova alikwata sana amaka pali fyonse ifyo abumba, lelo nangu cibe fyo, filya abantu bapondweke mu Edeni, calileta ifipusho ifyacindama nga nshi ifilingile ukwasukwa  pa kuti ifibumbwa fyonse mu muulu na pano calo fingamwenamo. Yehova alitekanya, pantu alishiba ukuti palingile ukupita inshita iikalamba pa kuti engasuka bwino sana ifi fipusho. Apo alishiba bwino sana ifyaba ifibumbwa fyakwe fyonse mu muulu na pano isonde, kanshi ifyo acita fya kutwafwa.—Heb. 4:13.

⁴ Ukufwaya kwa kwa Yehova kwali kwa kuti abana bonse aba kwa Adamu na Efa bakakumane pe sonde ponse. Ilyo Satana asembeleke Efa e lyo Adamu na o apula mwi funde lya kwa Lesa, Lesa talabile ku mifwaile yakwe. Na kabili tacamusakamike nangu ukufulunganishiwa ica kuti alekelesha na bantunse iyo. Alifwaileko inshila ya kubombelamo ifyo alefwaya ku bantu na kwi sonde. (Esa. 55:11) Pa kuti engabomba ifyo afwaya no kucindika bukateka bwakwe, Yehova aliyilama nga nshi kabili alitekanya, ica kuti pa kuti fimo ifyo afwaya fifikilishiwe mu nshila iisuma, alilolela pa myaka amakana ayengi.

5. Cinshi tulingile ukutekanishisha no kulalolela Yehova?

⁵ Na cimbi icalenga ukuti Yehova atekanye, ni co afwaya ukuti abantu abengi bakapusuke. Pali ino nshita alepekanya ukupususha “ibumba ilikalamba.” (Ukus. 7:9, 14; 14:6) Yehova alafwa abantu ukupitila mu mbila nsuma iyo tushimikila, alabeta ukwisa mu kusambilila pa Bufumu bwakwe na pa mafunde yakwe ayalungama. Ubukombe bwa Bufumu e mbila iishaiwamina iyo abantu balingile ukumfwa, ukwabula no kutwishika ni “mbila nsuma.” (Mat. 24:14) Abantu bonse abo Yehova akulila kuli ena balaba mu cilonganino ca bantu bakwe abacita ifyo afwaya mwi sonde lyonse. (Yoh. 6:44-47) Lesa wesu uwatutemwa alafwa abantu ba musango yu pa kuti alebapaala. Na kabili alitwalilila ukusala abantu pe sonde aba kuteka mu bufumu bwakwe ubwa ku muulu. Nga batampa ukuteka mu muulu, bakalayafwa abantu pe sonde pa kuti bakapwililike no kuba no bumi bwa muyayaya. Yehova alitwalilila ukulolela kabili alitwalilila no kubomba pa kuti akafikilishe ifyo afwaya pa kuti twinganonkelamo.

6. (a) Ni mu nshila nshi umo Lesa alangiile ukutekanya mu nshiku sha kwa Noa? (b) Bushe muno nshiku Yehova alanga shani ukutekanya?

⁶ Yehova alitekanya nangu abantu bamulufyanye shani, twalimona ifyo ali uwatekanya ilyo abantu balecita ifyabipa ninshi Ilyeshi talilaisa. Abantu pa calo balicililemo ukucita ifyabipa ica kuti Yehova alyumfwile “ubulanda mu mutima wakwe” pa mulandu wa kuti lyonse abantu baletontonkanya pa fyabipa. (Ukute. 6:2-8) Yehova talekele ukuti abantu batwalilile ukucita ifyabipa, e co aliletele ilyeshi ku konaula abantu abashaleumfwa. Baibolo itila, “mu nshiku sha kwa Noa, lilya Lesa atekele umutima” Yehova alifwaile inshila ya kupusushishamo Noa no lupwa lwakwe. (1 Pet. 3:20) Ilyo inshita yafikile, Yehova alyebele Noa ifyo ali no kucita kabili amupeele incito ya kupanga icibwato. (Ukute. 6:14-22) Ukulunda pa mulimo wa kukuula icibwato, Noa alikwete no mulimo wa ‘kushimikila abantu pa fyalungama,’ no kulabasoka pa lwa bonaushi ubwali mupepi no kwisa. (2 Pet. 2:5) Yesu atile inshiku shesu shalilingana ne nshiku sha kwa Noa. Yehova alisala ubushiku ilyo akonaula cino calo cabipa. Takwaba umuntu nangu umo uwaishiba “ubushiku bulya ne nshita” ilyo Lesa akonaula icalo. (Mat. 24:36) Pali ino nshita Lesa alitupeela umulimo wa kusoka abantu no kubasambilisha ifyo bengesapusuka.

7. Bushe Yehova alashingashinga ukufikilisha amalayo yakwe? Londololeni.

⁷ Ukulanda ukuti Yehova alitekanya tacipilibula ukuti, alolela fye ukuti inshita ipitepo. Tatulingile ukulamona kwati ifi atekanya ninshi cimo fye no kuti tabikako amano nangu ukuti tafwaya ukucitapo  cimo! Lelo kwena ukulanda fye icishinka, pa mulandu wa kukota no kucula muli cino calo cabipa kuti limbi twalatontonkanya ukuti Lesa tatubikako amano. Limbi kuti twafuupuka nangu ukulatontonkanya ukuti Lesa alecelwa ukufikilisha amalayo yakwe. (Heb. 10:36) Tatulingile ukulaba ukuti alishiba bwino umwine ico atekanishisha no kuti ico alekela iyi nshita ukulapita ni co alafwaya ababomfi bakwe ukunonkelamo. (2 Pet. 2:3; 3:9) Natulande nomba pa fyo Yesu ali uwatekanya nga filya Lesa aba.

FINSHI TWINGASAMBILILA KULI YESU PA KUTEKANYA?

8. Bushe ifintu fyali shani ilyo Yesu alangile ukutekanya?

⁸ Yesu alabomba umulimo wa kwa Lesa kabili alibomba pa myaka iminshipendwa. Ilyo Satana apondweke, Yehova asalilepo ukuti Umwana wakwe akese pe sonde no kwisaba Mesia. Tontonkanyeni umo calolele, Yesu ali no kulolela pa myaka amakana ayengi mpaka ilyo inshita yali no kufika. (Belengeni Abena Galatia 4:4.) Taikele fye alelolela, lelo alebomba umulimo uo Wishi amupeele. Ilyo aishile pe sonde, alishibe ukuti Satana akalenga bakamwipaye pantu e fyo casobelwe. (Ukute. 3:15; Mat. 16:21) Aliipeleshe mu kubomba umulimo wa kwa Lesa nangu ca kuti ali no kucula nga nshi. Ukuipeela aipeele kwali ukwaibela nga nshi. Tabikile sana amano ku mwine nangu ku cifulo cakwe, kanshi na ifwe kuti twasambililako.—Heb. 5:8, 9.

9, 10. (a) Finshi ifyo Yesu acita ilyo alolela inshita ya kwa Yehova? (b) Bushe tulingile ukumona shani inshita ya kwa Yehova?

⁹ Ilyo Yesu abuukile ku bafwa, alipeelwe amaka mu muulu na pano isonde. (Mat. 28:18) Alabomfya amaka ayo apeelwa ku kubomba ifyo Yehova afwaya ukulingana ne nshita iyo Lesa aimika. Yesu alilolelele ku kuboko kwa kwa Lesa ukwa ku kulyo mpaka mu 1914 ilyo abalwani bakwe baishileba nga akapuna ka kunyantapo amakasa yakwe. (Amalu. 110:1, 2; Heb. 10:12, 13) Nomba line ali no kuswangana ku konaula icalo ca kwa Satana. Nomba pali ino nshita, Yesu alitekanya kabili abomba na bantu no kubatungulula ku “menshi ya mweo.”—Ukus. 7:17.

¹⁰ Bushe twamona ifyo twingasambilila kuli Yesu pa fyo tulingile ukulamona inshita ya kwa Yehova? Yesu ali uwaipeelesha ukucita fyonse ifyo Wishi amwebele, na lyo line aliitemenwe ukulolela inshita ya kwa Lesa. Ilyo tulelolela ukupwa kwa calo ca kwa Satana, tulingile ukuba abatekanya, tatulingile ukutangilila Lesa, e lyo tatufwile ukubwelela pa nshi pa mulandu wa kufuupulwa. Kuti twacita shani pa kuti tulepashanya Lesa ukutekanya?

KUTI TWABA SHANI ABATEKANYA NGA FILYA LESA ABA?

11. (a) Bushe icitetekelo no kutekanya fyayampana shani? (b) Cinshi ico tulingile ukukwatila icitetekelo icakosa?

¹¹ Ilyo Yesu talaisa pano calo, bakasesema na babomfi bambi aba cishinka balilangile ukuti nangu fye bantu abashapwililika kuti batwalilila ukushipikisha no kuba abatekanya. Icitetekelo cabo calyampene ne fyo bali abatekanya. (Belengeni Yakobo 5:10, 11.) Bushe nga ca kuti tabacetekele ifyo Yehova abebele, nangu nga ca kuti tabakwete icitetekelo, bushe nga balitekenye ukulolela ukuti amalayo ya kwa Lesa yafikilishiwe? Libili libili balekwata amafya na mesho, lelo balicetekele ukuti Lesa akafikilisha ifyo abalaya. (Heb. 11:13, 35-40) Pali ino nshita tulingile ukukwata sana icitetekelo pantu nomba Yesu ‘alalenga icitetekelo cesu ukupwililika.’ (Heb. 12:2) Alifikilishe amasesemo kabili alitwafwa ukumfwikisha imifwaile ya kwa Lesa.

12. Finshi tulingile ukucita pa kuti tukoshe icitetekelo cesu?

¹² Fintu nshi ifyacindama ifyo tulingile  ukucita ifingakosha icitetekelo cesu no kulenga twaba sana abatekanya? Cimo icacindama icingatwafwa kukonka ifyo Lesa atufunda. Ku ca kumwenako, kuti cawama ukulatontonkanya sana pa milandu mulingile ukubikila Ubufumu pa ntanshi mu bumi bwenu. Bushe kuti mwacita shani pa kuti mukonke ukufunda kwaba pali Mateo 6:33? Mulingile ukulabombesha mu mulimo wa kushimikila no kucefyako imitabotabo. Mufwile ukulatontonkanya na pa fyo Yehova amupaala. Nalimo alilenga mwasanga aba kusambilila nabo Baibolo nelyo alilenga mwakwata “umutende wa kwa Lesa uwacila amatontonkanyo yonse.” (Belengeni Abena Filipi 4:7.) Ukulatontonkanya sana pa busuma mwasanga mu kukonka ukufunda kwa kwa Yehova, kukalenga mukamone ukuti ukutekanya kusuma sana.—Amalu. 34:8.

13. Kuti twalangilila shani ifyo twingakosha icitetekelo cesu e lyo ne fyo twingasambilila ukuba abatekanya?

¹³ Ifyo mulingile ukucita pa kuti icitetekelo cenu cikose filingile ukuba nga filya umulimi acita. Alalima, alabyala imbuto, e lyo na pa numa alasombola. Nga asombola bwino alatemwa sana ica kuti alapanga no kwisabyala imbuto na shimbi umwaka ukonkelepo. Nalimo umwaka uukonkelepo kuti alima ukucila na pa fyo alimine umwaka wafumineko, lelo nga abyala alatekanya, alalolela inshita ya kusombola. Alenekela ukuti akasombola. Na ifwe nga twasambilila ifyo Yehova afwaya no kufikonka kabili mwafuma ne fisuma, fikalenga tukashintilile sana pali Yehova. Icitetekelo cesu na co cikakoselako kabili cikalenga tukabe abatekanya ukulalolela ifyo Yehova atulaya.—Belengeni Yakobo 5:7, 8.

14, 15. Bushe tulingile ukulamona shani ifi abantu bacula?

¹⁴ Icintu na cimbi icingatwafwa ukuba abatekanya sana kulapashanya Yehova pa fyo amona icalo ne fyo omfwa nga  tulecula. Ku ca kumwenako, tontonkanyeni pa fyo amona abantu nga balecula. Pa nshita ntali Yehova alyumfwa ububi ukumona uko abantu balecula; lelo tacalenga afilwa ukucita icalungama. Atumine Umwana wakwe uwafyalwa eka ku ‘kwisaonaula imilimo ya kwa Satana Kaseebanya’ no kufumyapo ifyabipa ifyo Satana aleta pa bantunse. (1 Yoh. 3:8) Kanshi kuti twatila abantu bakacula fye pa nshita inono, lyena Lesa akabacitila ifintu ifisuma ku ciyayaya. Mu nshita ya kuleka ifintu fya muli cino calo ica kwa Satana ukutufuupula nelyo ukutulenga ukufilwa ukulolela mpaka ilyo icalo cikapwa, tulingile ukubika amano ku fintu ifishilamoneka ifikabako umuyayaya. Yehova alishiba ilyo akafumyapo ifyabipa kabili inshita yakwe nga yafika akafifumyapo.—Esa. 46:13; Nahu. 1:9.

¹⁵ Muli shino nshiku sha kulekelesha ishayafya nalimo kuti twapita mu mesho ayakalamba ayengonaula icitetekelo cesu. Mu nshita ya kukalipa nga baletucusha nelyo balupwa wesu nga balecula, tulingile ukucetekela ukuti Yehova alatwafwa. Apo tuli bantunse nalimo kuti catwafya ukucetekela Yehova, lelo ibukisheni ifyo Yesu acitile ifyaba pali Mateo 26:39.—Belengeni.

16. Ilyo tulelola impela, finshi ifyo tushilingile ukucita?

¹⁶ Cimo icingalenga twafilwa ukuba abatekanya, kutwishika nga ca kuti impela ikesa. Bushe umuntu uutwishika acita shani? Alatendeka ukupekanishisha libela ifyo akacita nga ca kuti ifyo Yehova alaya tafifikilishiwe. Mu nshila imbi ciba kwati aleti, ‘Nkalolela nkamone nga ca kuti Yehova akafikilisha ifyo alaya.’ Nalimo kuti alafwaisha ukulumbuka, ukufwaya ukukwata sana indalama mu nshita ya kubika Ubufumu bwa kwa Lesa pa ntanshi, nelyo ukuti afwaya ukusambilila sana pa kuti akekale bwino. Bushe umuntu wa musango yu ninshi nakwata icitetekelo? Ibukisheni ukuti Paulo atukoseleshe ukuti tulepashanya abali ne citetekelo abapokelele ifyo Yehova abalaile “pantu balitetekele kabili balitekenye.” (Heb. 6:12) Yehova takaleke cino calo cabipa ukutwalilila fye ifi fine. (Haba. 2:3) Ilyo Yehova talaonaula cino calo cabipa, tatulingile ukuba abanang’ani mu mulimo wa kwa Yehova. Lelo tulingile ukutwalilila ukuba abalola kabili tulingile ukulabombesha mu mulimo wa kushimikila imbila nsuma iilenga twaba sana ne nsansa.—Luka 21:36.

MAPAALO NSHI YABA MU KUBA ABATEKANYA?

17, 18. (a) Lishuko nshi tukwata nga tuli abatekanya? (b) Mapaalo nshi tukakwata nga twaba abatekanya?

¹⁷ Nga e lyo fye tutendeke ukubombela Lesa nelyo nga twalimubombela pa myaka iingi, tufwaya ukuti tukatwalilile fye ukumubombela umuyayaya. Ukutekanya kulatwafwa ukushipikisha mpaka tukapusuke te mulandu ne nshita isheleko iya kuti cino calo conaulwe. Ino nshita Yehova alitupeela ishuko lya kulanga ukuti twalicetekela ifyo atweba, ne shuko lya kutwalilila ukuba aba cishinka kuli ena nangu tucule shani. (1 Pet. 4:13, 14) Kabili Lesa aletusambilisha ifya kuba abatekanya pa kuti tukapusuke.—1 Pet. 5:10.

¹⁸ Yesu alipeelwa amaka yonse mu muulu na pano calo, kanshi tapali icingatufumya kuli ena kano fye nga ni fwe tulefwaya ukufumako. (Yoh. 10:28, 29) Tatulingile ukulatiina ifikacitika ku ntanshi nangu fye ni mfwa. Bonse abakashipikisha ukufika na ku mpela bakapusuka. E co tulingile ukwesha na maka pa kuti tatubelelekwe ne calo ica kuti twaleka no kushintilila pali Yehova. Lelo tufwile ukulakosha icitetekelo cesu no kulabomfya bwino inshita isheleko ilyo Lesa talaleta impela.—Mat. 24:13; belengeni 2 Petro 3:17, 18.

[Ifipusho]

[Icikope pe bula 21]

Ukutekanya kukamwafwa ukubika sana amano ku fya Bufumu kabili mukafuma amapaalo!