Ifingatwafwa Ukuba Abashipa Nga Twaba na Mafya
Ifingatwafwa Ukuba Abashipa Nga Twaba na Mafya
“Lesa e cubo cesu kabili e maka yesu, e utwafwa lyonse ilyo tuli na mafya.”—AMALU. 46:1.
KUTI MWAYASUKA SHANI?
Kuti twacita shani pa kuti amafya tayatunenwine?
Mulandu nshi tufwile ukubela abashipa?
Finshi Yehova atupeela ifitwafwa ukushipikisha amafya?
1, 2. Mafya nshi ayo abantu abengi bapitamo, lelo finshi ababomfi ba kwa Lesa bafwaya ukucita?
TWIKALA mu nshita iyayafya nga nshi. Amasanso yalifula sana muli cino calo. Abantu balicula ku finkukuma, ku mulilo, kuli bamulamba, ku kupuulika kwa mpili, kuli bakankugwe, ku fipuupu fya mwela ifikalamba e lyo na ku masanso ayabako pa mulandu na mabimbi ayakalamba. Na kabili, amafya mu ndupwa na mafya yambi yalilenga abantu ukuba no mwenso no bulanda. Ca cine, “inshita ya macushi ne fintu fyabula ukwenekela” ifikila ifwe bonse.—Luk. Mil. 9:11.
2 Ababomfi ba kwa Lesa balitwalilila ukumubombela nangu ca kutila balapita mu mafya yakakala aya musango yu. Lelo ifwe bonse tufwile ukuiteyanya pa kuti twingashipikisha amafya ayakesa ku ntanshi ilyo cino calo cileya ku mpela. Bushe tulingile ukucita shani pa kuti amafya ya musango yu tayatucimfishe? Finshi fingatwafwa ukuba abashipa ilyo tulepita mu mafya?
SAMBILILENI KU BANTU ABALI ABASHIPA
3. Ukulingana na Abena Roma 15:4, cinshi cingatusansamusha nga twakwata amafya?
3 Nangu ca kutila abantu abengi muno nshiku balakwata sana amafya, aya mafya ni kale yatendeke. Lekeni tumone ifyo twingasambilila ku babomfi ba kwa Lesa bamo aba kale abashipile ilyo balepita mu mafya.—Rom. 15:4.
4. Mafya nshi Davidi apitilemo, kabili cinshi camwafwile ukushipikisha?
4 Natulande pali Davidi uwapitile mu mafya ayengi nga nshi. Amafya yamo apitilemo ni aya: imfumu Shauli yalimupatile icine cine, abalwani balimusanshile, balimusendeele abakashi, abantu abo acetekele balimufutwike, kabili inshita imo ali sana no bulanda. (1 Sam. 18:8, 9; 30:1-5; 2 Sam. 17:1-3; 24:15, 17; Amalu. 38:4-8) Ifyo Baibolo yalanda pali Davidi filalanga apabuuta ukuti amafya akwete yalimulengele ukulaumfwa sana ububi. Lelo aya mafya tayamulengele ukutaluka kuli Lesa. Alitwalilile ukumucetekela, kabili atile: “Yehova e ucingilila umweo wandi. Nani ningatutuma?”—Amalu. 27:1; belengeni Amalumbo 27:5, 10.
5. Finshi fya-afwile Abrahamu na Sara ukushipikisha amafya?
5 Abrahamu na Sara baikele imyaka iingi mu matenti nga balebeshi mu fyalo fimbi. Limo imikalile yaleyafya. Lelo balishipikishe ifintu pamo nga ifipowe na mafya ayalefuma ku nko ishabashingulwike. (Ukute. 12:10; 14:14-16) Cinshi cabafwile ukushipikisha? Icebo ca kwa Lesa citweba ukuti Abrahamu “alelolela umusumba uwakwata imifula ine ine iya kukuulapo, uo kakuula kabili kalenga wa uko ni Lesa.” (Heb. 11:8-10) Abrahamu na Sara babikile amano ku fyali ku ntanshi, tabalekele amafya ya mu calo ukubanenuna.
6. Kuti twapashanya shani Yobo?
6 Yobo na o aliculile nga nshi. Elenganyeni ifyo aumfwile ilyo amwene kwati tapali nangu cimo icaweme mu bumi. (Yobo 3:3, 11) Ne cabipishe ca kuti, taishibe umulandu ifyabipa fyalemucitikila. Na lyo line, tanenwike. Alitwalilile uwa kaele no kucetekela Lesa. (Belengeni Yobo 27:5.) Ala mwandini Yobo alilinga ukumupashanya!
7. Mafya nshi Paulo apitilemo ilyo alebombela Lesa, kabili cinshi camulengele ukukananenuka?
7 Tontonkanyeni na pa macushi yapitilemo umutumwa Paulo. ‘Alesanswa mu musumba, mu matololo, na pali bemba.’ Alandile ukuti ‘aleikala ne nsala ne cilaka, alecula ku mpepo na ku kusapula.’ Paulo alandile no kuti ‘umuku umo ali pali bemba akasuba no bushiku,’ nalimo ici cacitike ilyo ubwato aalimo bwabundile. (2 Kor. 11:23-27) Nangu ca kutila alipitile muli aya mafya yonse, umfweni ifyo alandile inshita imo ilyo apuswike kwempe pa mulandu wa kubombela Lesa, atile: “Ici cacitike pa kuti twi-icetekela fwe bene, lelo tucetekele Lesa uubuusha abafwa. Apo alitupokolwele ku cintu cabipa ifi, tatuletwishika ukuti akulatupokolola.” (2 Kor. 1:8-10) Te bengi abapita mu mafya nga yalya Paulo apitilemo. Lelo fwe bengi nalimo twalyumfwapo nga filya fine aumfwile kabili ifyo ashipikishe kuti fyatukosha.
MWILEKA AMAFYA YAMUNENUNE
8. Bushe amafya muno nshiku kuti yalenga twalaumfwa shani? Langilileni.
8 Muno nshiku amafya na masanso nayafula nga nshi, kabili abengi bamona kwati te kuti bashipikishe. Ifi fine e fyo na Bena Kristu bamo bamona. Ba Lani, * abaleipakisha ukubomba bupainiya na bena mwabo mu Australia balondolwele ukuti, ilyo babasangile no bulwele bwa kansa ya kwi bele, calibaputwile umusana. Batile, “Umuti balempeela walendwalika sana, kabili naleimona uushacindama.” Ukulunda pali ifi fyonse, baletensha na bena mwabo abo bacitile opareshoni ya mongololo. Bushe kuti twacita shani nga ca kuti ifya musango yu fyatucitikila?
9, 10. (a) Cinshi ico tushifwile ukuleka Satana ukucita kuli ifwe? (b) Cinshi cikatwafwa ukushipikisha amacushi ayo Imilimo 14:22 yalandapo?
9 Tufwile ukulaibukisha ukuti Satana afwaya ukonaula icitetekelo cesu ukubomfya amesho. Lelo tatufwile ukuleka Satana ukutupwishisha insansa sha kubombela Lesa. Amapinda 24:10 yatila: “Bushe ulanenuka mu bushiku bwa macushi? Awe ninshi amaka yobe yanono.” Ukulatontonkanya pa bantu abalembwa mu Baibolo, pamo nga aba twalandapo, kuti kwatwafwa ukuba abashipa nga twaba na mafya.
10 Na kabili calicindama ukulaibukisha ukuti te kuti tufumyepo amafya yonse. Na kuba, tufwile ukulayenekela. (2 Tim. 3:12) Imilimo 14:22 itila: “Pa kwingila mu bufumu bwa kwa Lesa, tuli no kupita mu macushi ayengi.” Kanshi mu nshita ya kulaumfwa sana ububi, kuti cawama ukulamona amafya nge shuko lya kulanga ukuti mwalishipa pantu mwalicetekela ukuti Lesa kuti amwafwa.
11. Kuti twacita shani pa kuti amafya tayatunenwine?
11 Tufwile ukulatontonkanya pa fintu ifisuma. Icebo ca kwa Lesa citweba ukuti: “Umutima wa nsansa ulenga pa menso ukusekelela, lelo umuntu alaba no bulanda pa mulandu wa kukalipwa umutima.” (Amapi. 15:13) Badokota basanga ukuti umulwele nga aletontonkanya ukuti akapola, alapola. Nga bamupeela utubulungwa utwapala umuti kabili aletontonkanya no kuti twalamuposha, ilingi line alapola. Lelo basanga no kuti umulwele alalwalilako nga ca kuti atwalilila fye ukulatontonkanya pa fyo badokota bamwebele ukuti umuti ukamulwalikilako. Ukwikalila fye ukulatontonkanya pa fintu ifyo tushingaalula kuti kwatunenuna. Icawama ca kuti Yehova alatwafwa sana. Nangu twaponenwa na mafya, alatwafwa ukubomfya Icebo cakwe na bamunyinefwe, kabili alatukosha ukubomfya umupashi wa mushilo. Ukulatontonkanya pa fyo atwafwa kukatukosha. Mu nshita ya kulatontonkanya fye pa mafya, mulecita ifingamwafwa ukushipikisha ubwafwa no kulatontonkanya pa fintu ifisuma.—Amapi. 17:22.
12, 13. (a) Finshi fyayafwile ababomfi ba kwa Lesa ukushipikisha ilyo kwacitike amasanso? Langilileni. (b) Bushe nga kwacitika amasanso, cishibikwa shani ifyo umuntu acindamika?
12 Imyaka fye iinono iyapita, mu fyalo fimo mwalicitike amasanso ayakalamba sana. Lelo bamunyinefwe abengi muli ifyo fyalo tabanenwike. Ici tacayangwike. Mu February 2010, icinkukuma icikalamba calicitike mu calo ca Chile kabili caletele ne bimbi ilikalamba. Amayanda ayengi ne fipe fya bamunyinefwe fyalyonaike, kabili bamo ne ncito shalipwile. Nangu ca kuti bamunyinefwe balisanshilwe muli uyu musango, balitwalilile abakosa lwa ku mupashi. Ba Samuel abo ing’anda yabo yaonaike nakalya nakalya, batile: “Na pali iyi yine nshita ilyo ifintu fyayafishe sana, tatwalekele ukulongana no kushimikila. Ukulongana no kushimikila e kwatwafwile ukutwalilila abakosa.” Ba Samuel na ba bwananyina bambi, tabalekele amafya ukubanenuna, balitwalilile ukubombela Yehova.
13 Mu September, 2009, ku Philippines kwalilokele imfula icine cine ica kuti incende iikalamba iya Manila yalibundile. Umwaume umo umukankaala uo ifintu ifingi fyaonaike atile, “Ilyeshi lyalengele kube umulinganya, abakankaala na bapiina baleculila fye mumo mwine.” Ici cacitike citwibukisha filya Yesu atufundile ukuti: “Mulelonganikila ifyuma ku muulu, uko icipelebesha ca bushiku nangu ni ndalawa tafyonaula, kabili uko abapuupu tabengila nangu ukwiba.” (Mat. 6:20) Ukubika sana amano ku fyuma, ifingonaika inshita iili yonse, ilingi line takwafwa umuntu. Kanshi icawama sana, kubika amano kuli bucibusa bwesu na Yehova pantu bwena te kuti bonaike nangu kwingacitika ica musango shani!—Belengeni AbaHebere 13:5, 6.
UMULANDU TULINGILE UKUBELA ABASHIPA
14. Mulandu nshi tulingile ukubela abashipa?
14 Yesu alishibe ukuti mu nshita ya kubapo kwakwe, mu calo mwali no kuba amafya, lelo atile: “Mwikatiina.” (Luka 21:9) Tulingile ukuba abashipa pantu Yesu Imfumu yesu, na Yehova Kabumba wa muulu ne sonde, balatwafwa. Paulo akoseleshe Timote ukuti: “Umupashi Lesa atupeele te wa bukuuwe, lelo wa maka kabili uwa kutemwa kabili uwa mano ayatuntulu.”—2 Tim. 1:7.
15. Landeni pa babomfi ba kwa Lesa abamucetekele, kabili londololeni ifyo twingabapashanya.
15 Umfweni ifyo ababomfi ba kwa Lesa bamo balandile ifyalangilile ukuti balicetekele sana Lesa. Davidi atile: “Yehova e maka yandi kabili e nkwela yandi. Umutima wandi walimutetekela, kabili nalyafwiwa, ica kuti umutima wandi ulaanga.” (Amalu. 28:7) Paulo na o alilangile ukuti alicetekele sana Lesa lintu alandile ukuti: “Muli ifi fyonse tulecimfya icine cine mu watutemenwe.” (Rom. 8:37) Ilyo bali mupepi no kumwikata ukuti bamwipaye, Yesu aebele abasambi bakwe amashiwi ayalangile ukuti ali na bucibusa ubwakosa na Lesa. Atile: “Nshili neka, pantu Tata ali na ine.” (Yoh. 16:32) Bushe ifi ababomfi ba kwa Lesa balandile filelanga cinshi? Filetulanga ukuti bonse balicetekele Yehova icine cine. Na ifwe nga twacetekela Lesa, kuti twaba abashipa ica kutila kuti twashipikisha amafya ayali yonse.—Belengeni Amalumbo 46:1-3.
TULEBOMFYA IFYO LESA ATUPEELA IFITWAFWA UKUBA ABASHIPA
16. Mulandu nshi cacindamina ukulasambilila Icebo ca kwa Lesa?
16 Icilenga fwe Bena Kristu ukushipa, te kuicetekela fwe bene, lelo kwishiba Lesa no kushintilila pali ena. Pa kuti tucite fi, tufwile ukulasambilila Icebo cakwe, Baibolo. Nkashi uwaba sana no bulanda alandile pa cimwafwa ukushipikisha, atile: “Kwaliba ifikomo fimo ifya mu Baibolo ifinsansamusha kabili ifi fine e fyo mbelenga sana.” Bushe tulakonka filya batweba ukuti tufwile ukulakwata amapepo ya lupwa lyonse? Ukucita ifi kukatwafwa ukuba ngo waimbile amalumbo uwatile: “Amafunde yenu naliyatemwa icine cine! Akasuba konse e yo ntontonkanyapo.”—Amalu. 119:97.
17. (a) Finshi twakwata ifingatwafwa ukushipikisha amafya? (b) Landeni pa lyashi ilyo mwabelengele mu mpapulo shesu ilyamukoseleshe.
17 Ica bubili ca kuti, twalikwata impapulo ishilanda pa fyaba mu Baibolo ishilenga twacetekela sana Yehova. Bamunyinefwe abengi basanga ukutila amalyashi ayaba mu Ulupungu lwa kwa Kalinda na Loleni! ayalanda pa fyo aba bwananyina bamo bapitamo yalabakoselesha sana. Nkashi umo uwa ku Asia uwalwala ubulwele bwa kuli bongobongo ubo beta ukuti bipolar mood disorder alitemenwe sana ilyo abelengele ilyashi lya kwa munyinefwe uwali kale mishonari uwalwele ubulwele bumo bwine lelo uwashipikishe. Uyu nkashi alembele ukuti: “Ili lyashi lyalingafwile ukwishiba bwino ubulwele bwandi kabili lyalingafwile ukuba ne subilo.”
18. Mulandu nshi tulingile ukulapepela lyonse?
18 Ica butatu icitwafwa ukuba abashipa, lipepo. Ipepo kuti lyatwafwa mu mafya yonse ayo twingakwata. Umutumwa Paulo alilandile pa fyo ipepo lyacindama, atile: “Mwisakamikwa nangu kamo, lelo muli fyonse lekeni ifyo mulelomba fishibikwe kuli Lesa mu kupepa no kupapaata pamo no kutootela; no mutende wa kwa Lesa uwacila amatontonkanyo yonse ukalinda imitima yenu na matontonkanyo yenu muli Kristu Yesu.” (Fil. 4:6, 7) Bushe tulapepa lyonse pa kuti tube abashipa ilyo twaba na mafya? Ba Alex aba ku Britain abacula na masakamika pa nshita iitali batile: “Ukupepa kuli Yehova no kukutika ku fyo alanda ilyo ndebelenga Icebo cakwe kwalingafwa ukushipikisha.”
19. Bushe tulingile ukulamona shani ukulongana?
19 Icalenga bune ico Yehova atupeela icitwafwa ukuba abashipa, kulongana. Uwaimbile amalumbo atile: “Umweo wandi wafuluka kabili wanaka nga nshi ku kufwaya imansa sha kwa Yehova.” (Amalu. 84:2) Bushe ifi e fyo na ifwe tumfwa? Ba Lani abo tulandilepo, balandile pa fyo bamona ukulongana, ukuti: “Ukulongana wali e mwata wandi. Nalishibe ukuti mfwile ukulalongana lyonse pa kuti Yehova alengafwa ukushipikisha.”
20. Bushe ukushimikila kuti kwatwafwa shani?
20 Icalenga busano icitwafwa ukushipa, kulashimikila sana imbila nsuma iya Bufumu. (1 Tim. 4:16) Nkashi umo uwa ku Australia uwakwata amafya ayengi nga nshi atile: “Nshalefwaya ukulashimikila, lelo eluda umo anjebele ukuti tuye nankwe mu kushimikila. Nali-ile. Yehova alengafwa sana, pantu lyonse nga naya mu kushimikila, naleba ne nsansa nga nshi.” (Amapi. 16:20) Abengi balisanga ukutila ilyo balekoselesha bambi ukucetekela Yehova, nabo bene icitetekelo cabo cilakoselako. Ilyo balekoselesha bambi, tabatontonkanya sana pa mafya yabo lelo batontonkanya pa fintu ifyacilapo ukucindama.—Fil. 1:10, 11.
21. Mulandu nshi twingacetekelela ukutila kuti twashipa nga twaba na mafya?
21 Yehova alitupeela ifintu ifingi ifitwafwa ukuba abashipa ilyo tulepita mu mafya. Nga tulebomfya ifi fyonse no kulatontonkanya pa babomfi ba kwa Lesa abashipa no kulabapashanya, ninshi na ifwe bene kuti twashipikisha nga twaba na mafya. Nangu ca kutila ifyabipa ifingi fili no kucitika ilyo cino calo cishilapwa, kuti twaba ne subilo nga lilya Paulo akwete, uwatile: ‘Balatupoosa pa nshi, lelo tatonaika. . . . Tatunenuka.’ (2 Kor. 4:9, 16) Kanshi Yehova kuti atwafwa ukuba abashipa no kushipikisha amafya.—Belengeni 2 Abena Korinti 4:17, 18.
[Futunoti]
^ para. 8 Bamo te mashina yabo.
[Ifipusho]
[Ifikope pe bula 10, 11]
Nga mwakwata amafya, mulebomfya ifyo Yehova atupeela ifya kutwafwa
