Lekeni Ee Wenu Abe Ee

“Lekeni Ee wenu abe Ee, na Iyo wenu abe Iyo.”—MAT. 5:37.

BUSHE KUTI MWAYASUKA IFI IFIPUSHO?

Finshi Yesu alandile pa kulapa imilapo?

Bushe Yesu alangile shani ukuti alecita ifyo alaya?

Ni muli finshi umo tulingile ukuleka Ee yesu ukuba Ee?

1. Finshi Yesu alandile pa kulapa imilapo, kabili cinshi alandiile ifi?

ABENA KRISTU ba cine ilingi line tabalapa imilapo. No mulandu wa kuti balomfwila amashiwi Yesu alandile aya kuti: “Lekeni Ee wenu abe Ee.” Muli aya mashiwi, Yesu alepilibula ukuti umuntu afwile ukucita ifyo alanda. Yesu abalilepo ukulanda amashiwi ya kuti: “Mwilalapa nakalya.” Icalengele ukuti alande aya mashiwi, alesuusha abantu abatemenwe ukulapa lelo abashalecita ifyo balanda. Umuntu nga alanda amashiwi ‘ayacilile’ pa mashiwi ya kuti Ee, nangu Iyo, ninshi alelanga ukuti tacetekelwa nangu panono kabili ninshi “umubifi” eumutungulula.—Belengeni Mateo 5:33-37.

2. Londololeni umulandu cishabipila limo limo ukulapa umulapo.

² Bushe Yesu aloseshe mu kuti lyonse fye calibipa ukulapa imilapo? Nge fyo twasambilile mu cipande cafumako, Yehova Lesa no mubomfi wakwe uwalungama Abrahamu balilapile imilapo pa fintu fimo ifyali ifyacindama. E lyo kabili Amafunde ya kwa Lesa yatile umuntu alingile ukulapa pa kupwisha imilandu imo. (Ukufu. 22:10, 11; Impe. 5:21, 22) Kanshi limo kuti caba fye bwino ku Mwina Kristu ukulapa ukuti alalanda icishinka nga ali mu cilye ca milandu. E lyo limo limo, Umwina Kristu kuti alapa pa kuti abantu bashininkishe ukuti akacita ifyo alanda, nelyo limbi kuti alapa ukuti alalanda icishinka pa kuti ubwafya bupwe. Na kuba, ilyo shimapepo mukalamba aebele Yesu ukuti alape, Yesu takeene ukulapa lelo alilandile icishinka ku cilye ca baYuda ica Sanhedrini. (Mat. 26:63, 64) Lelo kwena, Yesu talingile ukulalapa pa kuti abantu bashininkishe ukuti alelanda icishinka. Na lyo line, pa kuti abantu bashininkishe ukuti ifyo alelanda fya cine, ilingi line alebalilapo ukulanda amashiwi ya kuti: “Ndemweba icine cine.” (Yoh. 1:51; 13:16, 20, 21, 38) Lekeni nomba  tumone na fimbi ifyo twingasambilila kuli Yesu, kuli Paulo, na kuli bambi abalekele Ee yabo ukuba Ee.

YESU—ICA KUMWENAKO CESU ICISUMA

3. Bushe ilyo Yesu alepepa, finshi alaile Lesa, kabili Wishi wa ku muulu alandile shani?

³“Moneni! Naisa . . . ku kucita ukufwaya kwenu, mwe Lesa.” (Heb. 10:7) Aya mashiwi Yesu alandile yalelangilila ukuti aleituula kuli Lesa ku kucita fyonse ifyasobelwe pa Mwana uwalailwe, ifyasanshishemo no ‘kumusuma’ ku citende kuli Satana. (Ukute. 3:15) Takwatala akuba umuntunse nangu umo uwaipeelesha ukubomba uyu mulimo uushaikulila. Yehova alilandile ukufuma mu muulu ukuti alicetekele Umwana wakwe, lelo tamwebele ukuti alape pa kuti ashininkishe ukuti Yesu akacita ifyo alandile.—Luka 3:21, 22.

4. Bushe Yesu alekele shani Ee yakwe ukuba Ee?

⁴ Yesu aleleka Ee yakwe ukuba Ee pantu lyonse alecita ifyo alelanda. Talekele icintu nangu cimo ukumupumbula ku mulimo Wishi amupeele uwa kushimikila imbila nsuma iya Bufumu no kulenga abantu bonse abo Lesa akuliile kuli Yesu ukuba abasambi. (Yoh. 6:44) Baibolo ilondolola ukuti Yesu alifikilishe ubulayo bwakwe ubwa kucita ukufwaya kwa kwa Lesa, ilyo itila: “Amalayo ya kwa Lesa nelyo yafula shani, yaisaba Ee muli ena.” (2 Kor. 1:20) Ukwabula no kutwishika, Yesu alitushiila ica kumwenako icisuma pantu alifikilishe ifyo alaile Wishi. Lekeni nomba tulande pa muntu uwapashenye sana Yesu mu kuleka Ee yakwe ukuba Ee.

PAULO—ALECITA IFYO ALELANDA

5. Finshi umutumwa Paulo acitile ifyo twingamupashanya?

⁵“Ncite shani mwe Shikulu?” (Imil. 22:10) Uwalandile aya mashiwi ni Paulo, uo baleita pali ilya nshita ukuti Sauli. Aleyasuka Shikulu Yesu, uwapeelwa amaka kabili uwamoneke kuli ena mu cimonwa no kumweba ukuti aleke ukucusha abasambi bakwe. Ici cacitike calengele Sauli ukulapila, ukubatishiwa, kabili alisumine ukubomba umulimo waibela uwa kulashimikila ku bena fyalo pali Yesu. Ukutula ilya nshita, Paulo alitwalilile ukwita Yesu ukuti “Shikulu,” no kulacita ifyo alemweba mpaka fye ne mfwa yakwe. (Imil. 22:6-16; 2 Kor. 4:5; 2 Tim. 4:8) Paulo tali nga abantu abo Yesu aebele ukuti: “Cinshi munjitila ati, ‘Shikulu! Shikulu!’ lelo tamucita ifyo nsosa?” (Luka 6:46) Kanshi, Yesu afwaya bonse abamwita ukuti Shikulu ukulacita ifyo balaya, nge fyo umutumwa Paulo alecita.

6, 7. (a) Cinshi calengele ukuti Paulo eya ku Korinti pa nshita apekenye, kabili mulandu nshi cishawamine filya bamo balemulengulula? (b) Bushe tufwile ukumona shani abo Lesa asonta ukulatutungulula?

⁶ Paulo ali uwacincila sana mu kushimikila  imbila nsuma iya Bufumu mu Asia Minor monse na mu Bulaya, alepanga no kutandalila ifilonganino ifingi. Limo nga amona ukuti nacilinga, alelapa pa kuti abantu beshibe ukuti ifyo alembele fya cine. (Gal. 1:20) Ilyo abantu bamo mu Korinti balandile pali Paulo ukuti tacetekelwa, alembele ku kuipokolola ati: “Filya fine twingacetekela Lesa, e fyo na mashiwi yesu kuli imwe yashingaba Ee e lyo kabili yaisaba Iyo.” (2 Kor. 1:18) Paulo afumine ku Efese, kabili ilyo alembele aya mashiwi, ali mu Makedonia ninshi ali pa lwendo lwa kuya ku Korinti. Pa kubala, afwaile ukuya ku Korinti ilyo ashilaya ku Makedonia. (2 Kor. 1:15, 16) E fyo na bakangalila benda bacita muno nshiku. Limo mu nshita ya kuya ku cilonganino bapekenye, balaalula ifyo batantike no kuya ku cilonganino cimbi. Tabaalula ulwendo apabula no mulandu wine wine nelyo ukufwaya fye ukucita ifyo balefwaya. Lelo icilenga mulandu wa kuti kulaba fimo ififwile ukubombelwapo mu kampampa. Kwali umulandu uwacindama uwalengele ukuti Paulo eya ku Korinti nga fintu apekenye. Mulandu nshi uyo wine?

⁷ Ilyo Paulo apekenye ulwendo lwakwe ulwa kuya ku Korinti, apokelele ilyashi ilyabipa ilya kuti mu cilonganino ca ku Korinti mwali amalekano kabili balesuminisha na ba bulalelale. (1 Kor. 1:11; 5:1) Pa kupwisha ubu bwafya, Paulo alibakalipile ilyo alembele kalata wa ntanshi ku bena Korinti. Lyena, mu nshita ya kuti anine ubwato ukufuma ku Efese no kuya ku Korinti, Paulo asalilepo ukuti patale papiteko inshita iya kuti abena Korinti babombele pa fyo abafundile ica kuti ilyo akayako, akayebakoselesha fye. Paulo alembele muli kalata wa bubili ukuti uyu wali e mulandu ashailile bwangu ku Korinti. Atile: “Ndetila Lesa e nte yandi iya kunshinina ukuti ico nshaishila ku Korinti kukanafwaya ukumukalifya imitima.” (2 Kor. 1:23) Kanshi tatufwile ukuba nga balya abalesuusha Paulo; lelo natulecindika abo Lesa asonta ukulatutungulula. Tufwile ukupashanya Paulo nga filya fine na o alepashanya Kristu.—1 Kor. 11:1; Heb. 13:7.

BAMBI ABACITILE IFYO BALANDILE ABO TULINGILE UKUPASHANYA

8. Finshi Rebeka acitile ifyo twingamupashanya?

⁸“Ee ndeya nankwe.” (Ukute. 24:58) Rebeka e walandile aya mashiwi ilyo nyina na ndume yakwe bamwipwishe nga nasumina ukuba umukashi wa kwa Isaki, umwana wa kwa Abrahamu. Rebeka aali no kusha ulupwa lwakwe bulya bwine bushiku no kuya no muntu uo ashaishibe ku calo cimbi, apali amakilomita 800. (Ukute. 24:50-58) Ee yakwe yaishileba Ee. Rebeka aletiina Lesa kabili aishileba umukashi umusuma uwa kwa Isaki. Imyaka yonse iya mweo wakwe, aikele mu matenti ngo mulebeshi mu Calo ca Bulayo. Pa mulandu wa kuti ali uwa cishinka, Lesa alimulambwile ica kuti aishileba icikolwe ca Mwana walailwe, Yesu Kristu.—Heb. 11:9, 13.

9. Bushe Ruti alangile shani ukuti alicitile filya fine alandile?

⁹“Nakalya, tuleya fye nenu ku bantu benu.” (Ruti 1:10) Bamukamfwilwa babili abena Moabu, Ruti na Olipa bakoselepo fye ukweba Naomi, nafyalebo aya mashiwi. Naomi na o ali ni mukamfwilwa kabili ilyo balemweba aya mashiwi alefuma ku Moabu ukubwelelamo ku Betelehemu. Ilyo Naomi akoselepo ukubeba ukuti babwelelemo ku mwabo, Olipa alibwelelemo. Lelo Ruti ena tabwelelemo, Iyo yakwe yali ni Iyo. (Belengeni Ruti 1:16, 17.) Atwalilile uwa cishinka kuli Naomi kabili alikeene ukumusha. Ashile ulupwa lwakwe ne mipepele ya bufi iya ku Moabu. Alitwalilile ukupepa Yehova mu cishinka kabili Yehova alimulambwile ica kuti aba pa banakashi basano abalumbulwa muli Mateo ukuti fikolwe fya kwa Kristu.—Mat. 1:1, 3, 5, 6, 16.

10. Finshi Esaya acitile ifyo twingamupashanya?

¹⁰“E po ndi! Ntumeni.” (Esa. 6:8) Ilyo  Esaya ashilalanda aya mashiwi, atalile amona icimonwa ca bukata bwa kwa Yehova uwaikele pa cipuna cakwe icali pa muulu we tempele lya bena Israele. Ilyo Esaya alelolesha icimonwa ica bukata bwa kwa Lesa, aumfwile ishiwi lya kwa Yehova lileti: “Nani ndetuma, kabili nani akaba inkombe yesu?” Yehova alefwaya uwa kuyabila ubukombe ku bantu bakwe abapondweke. Esaya alicitile ifyo asosele, Ee yakwe yali ni Ee. Esaya alibombele umulimo wa kusesema ne cishinka ukucila pa myaka 46, alebila pa bupingushi ubo Lesa ali no kuleta, na pa bulayo ubusuma ubwa kuti ukupepa kwa cine kwali no kubweshiwa na kabili.

11. (a) Mulandu nshi cacindamina ukucita ifyo twalanda? (b) Ni bani bamo abashali ne cishinka abo tushilingile ukupashanya?

¹¹ Mulandu nshi Yehova alekele ukuti aya malyashi yalembwe mu Cebo cakwe? Kabili bushe ukuleka Ee yesu ukuba Ee kwacindama shani? Baibolo itusoka ukuti “abashifisha amalayo” baba pa bantu “abalingile fye ukufwa.” (Rom. 1:31, 32) Pa bantu abalembwa mu Baibolo abashacitile ifyo balandile paba na Farao uwa ku Egupti, Sidekia Imfumu ya Yuda, e lyo na Anania na Safira. Ifyafumine mu fyo bacitile fyalibipile, kabili tulingile ukusambililako ku fyo balufyenye.—Ukufu. 9:27, 28, 34, 35; Esek. 17:13-15, 19, 20; Imil. 5:1-10.

12. Finshi fikatwafwa ukulacita ifyo twalanda?

¹² Twikala mu “nshiku sha kulekelesha” umo abantu “bashaba na cishinka,” kabili “abamoneka kwati ni bakapepa lelo abakaana amaka ya bukapepa.” (2 Tim. 3:1-5) Tulingile ukulaesha na maka ukukana-ampana na bantu ba musango yu. Lelo tufwile lyonse ukulaba pamo na bantu abesha na maka ukulacita ifyo balanda.—Heb. 10:24, 25.

EE IYACINDAMA SANA IYO MWALANDILE

13. Bushe ni lilali umusambi wa kwa Yesu Kristu alanda Ee iyacindama sana?

¹³ Ubulayo bwacindama nga nshi ubo umuntu alaya bwa kuipeela kuli Lesa. Pa nshita shitatu ishalekanalekana, umuntu onse uulefwaya ukuikaana no kuba umusambi wa kwa Yesu, alasuka ukuti Ee ku mepusho ayo bamwipusha nga alefwaya ukulacita ukufwaya kwa kwa Lesa. (Mat. 16:24) Baeluda babili nga balelanshanya no muntu uulefwaya ukuba kasabankanya uushabatishiwa, balamwipusha ukuti, “Bushe cine cine mulefwaya ukuba Inte ya kwa Yehova?” Pa numa, umuntu nga aishibilapo na fimbi ifya kwa Lesa kabili alefwaya ukubatishiwa, baeluda balalanshanya nankwe na kabili no kumwipusha ukuti, “Bushe mwalipepa kuli Yehova ukuti namuipeela?” Na pa kulekelesha, pa bushiku umuntu alebatishiwa, balamwipusha na kabili ukuti, “Pa mulandu we lambo lya cilubula ilya kwa Yesu Kristu, bushe namulapila ku membu shenu no kuipeela ku kucita ukufwaya kwa kwa Yehova?” Abalefwaya ukubatishiwa balasuka pa cintubwingi ukuti  Ee, ukulanga ukuti nabalaya ukulabombela Lesa umuyayaya.

14. Mepusho nshi tulingile ukulayipusha pa kuti tuiceeceete?

¹⁴ Nga ca kutila e lyo mwabatishiwe fye nelyo mwalibombela Lesa pa myaka iingi, mulingile ukulaiceeceeta mu nshita mu nshita no kulayipusha amepusho pamo nga: ‘Bushe nalitwalilila ukulacita filya fine nalaile nga filya Yesu Kristu acitile? Bushe na ino nshita ndabika sana amano ku kumfwila ifunde lya kwa Yesu ilya kulashimikila no kulenga abantu ukuba abasambi?’—Belengeni 2 Abena Korinti 13:5.

15. Ni muli finshi ifyacindama umo tufwile ukuleka Ee yesu ukuba Ee?

¹⁵ Ukucita ifyo twalaile ilyo twaipeele kuli Lesa kupilibula no kuba aba cishinka na mu fintu fimbi ifyacindama. Ku ca kumwenako: Bushe mwalyupa nelyo ukuupwa? Ninshi twalilileni ukucindika umulapo wacindama uo mwalapile uwa kutemwa no kusunga bwino abena mwenu. Bushe mwalisainishanya na bamo ukulacita amakwebo? Ninshi mufwile ukucita filya fine mwapangene. Bushe mwalisaina amaformu ya kwipusha ukubombako imilimo imo iya kwa Lesa? Ninshi mufwile ukucita ifyo mwalaile. Nga ca kuti mwalisumina ukuya ku ng’anda ya muntu umupiina uwamwitile ku ca kulya, tamufwile ukukaana ukuyako pa mulandu fye wa kuti kuli umuntu umbi uumwitile uulemoneka umukankaala. E lyo nga ca kuti ilyo mwaleshimikila ku ng’anda ne ng’anda mwalilaile umuntu ukuti mukabwelelako, ninshi mufwile ukwesha na maka ukubwelelako pa kuti Ee yenu ikabe Ee, kabili Yehova akamupaala.—Belengeni Luka 16:10.

SHIMAPEPO WESU UMUKALAMBA KABILI IMFUMU KUTI ATWAFWA

16. Finshi tulingile ukucita nga twafilwa ukufikilisha ifyo twalaile?

¹⁶ Baibolo itila apo tuli babembu, “tulaipununa imiku iingi,” maka maka mu fyo tulanda. (Yako. 3:2) Finshi tulingile ukucita nga twailuka ukuti tatucitile ifyo twalaile? Mu Mafunde Lesa apeele abena Israele, alilandile ifyo umuntu uwasangwa no mulandu wa ‘kusosa icisosesose,’ alingile ukucita pa kuti abelelwe uluse. (Lebi 5:4-7, 11) Na muno nshiku mwine, Umwina Kristu nga afilwa ukufisha ifyo alaile, Lesa kuti amwelela. Nga ca kuti twatumbula ulubembu kuli Yehova, kuti atubelela uluse ukubomfya Shimapepo wesu Umukalamba, Yesu Kristu. (1 Yoh. 2:1, 2) Lelo nga tulefwaya Lesa atwalilile ukutupaala, tufwile ukulacita ifintu ifilelanga ukuti natulapila. Tulingile ukwesha na maka ukukanabwekeshapo ukusosa amashiwi ya cisosesose kabili tulingile ukucitapo fimo pa kuti tupwishe ubwafya twaletele pa mulandu wa kukanafikilisha ifyo twalaile. (Amapi. 6:2, 3) Lelo calicindama sana ukutontonkanyapo ilyo tushilalaya pa kuti tatulandile ico tushingafikilisha.—Belengeni Lukala Milandu 5:2.

17, 18. Mapaalo nshi ayo abaleka Ee yabo ukuba Ee bakaipakisha ku ntanshi?

¹⁷ Yehova akalambula bonse abamupepa abesha na maka ukuleka Ee yabo ukuba Ee! Ba 144,000 abasubwa no mupashi, bakaba no bumi ubushingafwa ku muulu, uko “bakateka pamo [na Yesu] imyaka 1,000,” mu Bufumu bwakwe. (Ukus. 20:6) Abantu iminshipendwa bakekala mu paradaise pano pene pe sonde ilyo Kristu akalateka kabili bakabafwa ukuba abapwililika muli fyonse.—Ukus. 21:3-5.

¹⁸ Pa numa ya myaka 1,000 iya kuteka kwa kwa Yesu, kukaba ubwesho ubwa kupelekeshako. Abakacimfya ubu bwesho e bakatwalilila ukwikala mu paradaise kabili pali iyi nshita takwakabe ukutwishika ifyo abantu bambi bakalalanda. (Ukus. 20:7-10) Abantu bonse bakalalanda icishinka, lyonse fye Ee yabo ikalaba ni Ee na Iyo yabo ikalaba ni Iyo. Bonse bakalapashanya bwino bwino Shifwe wa ku muulu uwakwata ukutemwa, Yehova, “Lesa wa cishinka.”—Amalu. 31:5.

[Ifipusho]

[Icikope pe bula 28]

Ukufuma apo Yesu abatishiwilwe mpaka fye na lintu afwile, alecita ifyo alaile Wishi

[Icikope pe bula 30]

Bushe mulecita ifyo mwalaile ilyo mwalandile Ee yenu iyacindama sana?