“Mu Tunwa twa Bana Abanono” Mwafuma Amashiwi ya Kukoselesha

Mu December mu 2009, Icilye Cikalamba ica mu Russia calibindile Inte sha kwa Yehova mu Taganrog, ku Russia. Capokele Ing’anda ya Bufumu kabili calandile no kutila, impapulo shabo 34 shilaleta icimfulunganya mu calo. Ili lyashi lishaibipila balilibikile pa Intaneti pa adresi ya Nte sha kwa Yehova, kabili balibikilepo ne fikope fya ba bwananyina ne fya bana abanono aba ku Taganrog.

Pa numa ya myeshi iinono, aba pa maofeshi ya Nte sha kwa Yehova mu Russia bapokelele icibokoshi na kalata ukufuma ku lupwa lumo ulwa ku Queensland, mu Australia, ababelengele pa Intaneti ifyo icilye capingwilwe. Iyi kalata yatile: “Kuli bamunyinefwe, ilyo abana besu babili Cody na Larissa babelengele pa mafya abaice banabo ku Russia balepitamo, balyumfwile sana ububi lelo balitemenwe ukumona ifyo icitetekelo cabo cakosa. Nabalemba amakardi na makalata kabili natutuma ifya bupe ifyo twingatemwa ukuti mutumine abana ku Taganrog, pa kuti beshibe ukuti ku calo cimbi ica kutali nako kwaliba abaice banabo ababombela Yehova mu cishinka kabili abalebatontonkanyapo. Balebaposha icine cine kabili batila balibatemwa.”

Ilyo abana ba ku Taganrog bapokelele ifya bupe, balembeele ulupwa lwa ku Australia amakalata ya kubatasha ayo bayemfeshe. Ilyo munyinefwe umo uubombela pe ofeshi lya Nte sha kwa Yehova mu Russia abelengele amashiwi ya kukoselesha ayafumine “mu tunwa twa bana abanono” ne fya bupe ifyo batumine, alembele kalata kuli Cody na Larissa. Atile: “Abantu fye bonse, abakalamba na baice, balomfwa sana ububi nga ca kuti balebacushisha apabula umulandu. Bamunyinefwe mu Taganrog tabacita umulandu nangu umo, lelo balibapoka Ing’anda ya Bufumu. Ici calibaletela sana ubulanda. Nga bapokelela ifyo mubatumiine, bakakoseleshiwa nga nshi pantu bakeshiba ukuti ku calo cimbi icaba ukutali kwaliba ababatontonkanyapo. Tulemutasha nga nshi pali bukapekape bwenu ne fyo mwatemwa aba bwananyina!”—Amalu. 8:2.

Cine cine twaba mu lupwa lumo ulwa ba bwananyina ulwaba mwi sonde lyonse, kabili ukutemwa uko twatemwana kulatwafwa ukushipikisha amesho na mafya ayo tukwata. Nangu ca kuti aba mu cilye bacili balekansana pa lyashi lya mpapulo sha Nte sha kwa Yehova isho bamo batila shilalenga abantu ukupatana, abana ba Nte sha kwa Yehova bena balibika amano ku bacaice banabo te mulandu no kupusana kwa fyalo ne nkulilo, kabili balalanga ukuti amashiwi Yesu alandile ya cine, ayatila: “Nga muletemwana, e lyo bonse bakeshiba ukuti muli basambi bandi.”—Yoh. 13:35.

[Ifikope pe bula 32]

Abaice ba ku Russia (ku kuso) abapokelele ifya bupe ukufuma ku baice banabo aba ku Australia (ku kulyo)