Bushe Muleibukisha?

Bushe mwalibelenga bwino bwino bamagazini ba Ulupungu lwa kwa Kalinda aba nomba line? Moneni nga kuti mwayasuka ifipusho ifili pe samba:

Bushe kuti twacita shani pa kuti tulelama ululimi?

Tulingile ukubebeta umutima wesu. Mu nshita ya kulatwishika munyinefwe, tulingile ukutontonkanya pa co tulemutwishikila. Bushe ico tulemusuushisha ni pa kuti fye tumoneke kwati ifwe tatulufyenye? Ukutwishika bambi kuti kwalenga ifintu ukubipilako.—8/15, ibula 21.

Bushe Ifunde lyalangile shani ifyo Lesa amona abanakashi?

Abanakashi abena Israele balikwete ubuntungwa ne nsambu isha kusambilila. Balecindikwa kabili balecingililwa.—9/1, amabula 5-7.

Ilyo Ubushiku bwa kwa Yehova bulepalama, finshi fili no kucitika?

Kukaba ukubilisha ukuti: “Umutende no mutelelwe!” Inko shikasansa no konaula Babiloni Mukalamba. Abantu ba kwa Lesa bakabasansa. Icikakonkapo ni nkondo ya Armagedone, lyena Satana ne fibanda fyakwe bakabakaka.—9/15, ibula 4.

Busuma nshi bwaba mu kukanaishiba ilyo impela ikesa?

Ukukanaishiba ubushiku ilyo impela ikesa kulasokolola ifyaba mu mitima yesu. Kulatupeela ishuko lya kulenga umutima wa kwa Lesa ukusekelela. Kulatwafwa ukuba abaipeelesha no kucetekela sana Lesa ne Cebo cakwe. Na kabili amacushi ayatuponena yalakosha icitetekelo cesu.—9/15, amabula 24-25.

Bushe kuti twabomfya shani Ukutendeka 3:19 pa kulanshanya no muntu uwasumina ukuti Lesa aloca abantu mu mulilo?

Ilembo litila, Adamu aali no kubwelela kwi loba, talilanda ukuti aali no kuya ku mulilo wa pe.—10/1, ibula 13.

Pa Ukusokolola 1:16, 20 ni bani abo “intanda 7” mu lupi lwa ku kulyo ulwa kwa Yesu shimininako?

Shimininako baeluda abasubwa mu filonganino, e lyo na baeluda bonse aba mu filonganino.—10/15, ibula 14.

Bushe abaupana kuti bacita shani nga nabakwata inkongole?

Abaupana balingile ukulanshanya bwino mu mutekatima pa nkongole bakwete. Kuti cabafwa nga ca kuti bapituluka mu fyo balebomfya indalama pali iyo nshita. Bushe kuti bafwailapo indalama na shimbi nangu ukufumyapo fimo pa fyo bashita? Balingile ukusalapo inkongole isho bafwile ukubalilapo ukubwesha, nalimo kuti balanshanya nabo bakongolako. Nomba balingile ukuba abashikatala no kwishiba ifya kubomfya bwino indalama. (1 Tim. 6:8)—11/1, amabula 19-21.

Bushe Yesu alangile shani umutima wa kuicefya nga fintu Esaya 50:4, 5 ilanda?

Ifi ifikomo fitila, uo bapeela “ululimi lwa basambilila” ‘takafutukeko iyo.’ Yesu alilangile ukuti ali uwaicefya, kabili alibikile sana amano ku kumfwa ifyo Wishi alemusambilisha. Yesu alefwaisha sana ukusambilila kuli Yehova, alemona sana ifyo Wishi ali uwaicefya pa kulanga uluse abantu ababembu.—11/15 ibula 11.

Bushe stampa ya kutumina amakalata iyo abena Estonia bapangile ku kwibukishishapo abo balecusha, yalangile shani ukuti Inte sha kwa Yehova balikwata sana icitetekelo?

Mu 2007, akampani ka National Post Office kapangile stampa iyalelanga ifyo Stalin aipayaulwile abena Estonia. Pali stampa pali ne mpendwa 352, iya ba Nte na bana babo abo batamfiishe ku calo ca Russia ku nkambi ya kucushishamo abantu mu 1951.—12/1, amabula 27-28.