Ifyo Twingatwalilila Ukuba Nga “Abalebeshi”
Ifyo Twingatwalilila Ukuba Nga “Abalebeshi”
“Apo muli beni kabili abalebeshi ndemukoselesha ukuti muletaluka ku lunkumbwa lwa fifwaya imitima yenu.”—1 PET. 2:11.
KUTI MWAYASUKA SHANI?
Mulandu nshi abasubwa babetila ukuti balebeshi?
Cinshi twingalandila ukuti “impaanga shimbi” balebeshi?
Finshi ifyo mulolela ukuti fikacitike ku ntanshi?
1, 2. Ni bani Petro alelandapo ilyo abomfeshe ishiwi lya kuti “abasalwa,” kabili mulandu nshi abetile ukuti “abalebeshi”?
ILYO papitile nalimo imyaka 30 ukutula apo Yesu ailile ku muulu, umutumwa Petro alembele kalata ku ‘balebeshi abasalanganine mu fyalo fya Ponte, Galatia, Kapadokia, Asia, na Bitunia, abali abasalwa.’ (1 Pet. 1:1) Ilyo Petro alandile ukuti “abasalwa,” alelanda pali bonse abasubilwe no mupashi wa mushilo nga ena kabili ‘abafyelwe cipya cipya no kukwata isubilo’ lya kuteka na Kristu ku muulu. (Belengeni 1 Petro 1:3, 4.) Nomba mulandu nshi pa numa aitile aba abasubwa ukuti “beni kabili balebeshi”? (1 Pet. 2:11) Kabili mulandu nshi twingafwaila ukwishiba ifingi pali ili lyashi apo ba Nte abatila balisubwa banono sana?
2 Mu nshita ya batumwa calilingile ukwita abasubwa ukuti “abalebeshi.” Abena Kristu basubwa tabakekale umuyayaya pano calo. Umutumwa Paulo, uwali na o mwi bumba lya basubwa ilya “mukuni unono,” alondolwele ukuti: “Lelo ifwe, ubwana calo bwesu bwa ku muulu, uko tulelolela no kufwaisha umupusushi, Shikulu Yesu Kristu.” (Luka 12:32; Fil. 3:20) Apo ‘ubwana calo bwa basubwa bwa ku muulu’ ilyo bafwa balapokelela ubumi ubwacilapo ukuwama ku muulu, e kutila umweo uushifwa. (Belengeni Abena Filipi 1:21-23.) Kanshi kuti twatila abasubwa, “balebeshi” muli cino calo ca kwa Satana.
3. Cipusho nshi twingepusha pa baba mwi bumba lya “mpaanga shimbi”?
3 Inga aba mwi bumba lya “mpaanga shimbi,” bushe nabo balebeshi? (Yoh. 10:16) Bushe Amalembo tayalanda ukuti bakekala pano calo umuyayaya? Ca cine, bakekala pano calo umuyayaya! Na lyo line, pali ino nshita kuti twatila balebeshi. Mulandu nshi twingalandila ifyo?
‘IFIBUMBWA FYONSE FILATETA’
4. Finshi ifyo abantu bafilwa ukucita?
4 Abantu bonse, ukubikako fye na Bena Kristu balitwalilila ukucula ukutula fye apo Satana apondokele Yehova. Ilembo lya Abena Roma 8:22 litila: “Twalishiba ukuti ifibumbwa fyonse fitetela capamo no kucululukila capamo ukufika kuli nomba.” Nangu ca kuti bakateka, basayantisiti, na bafwilisha abantu bambi balyesha ukufumyapo ukucula, balifilwa.
5. Ukutula mu 1914, finshi ifyo abantu abengi baacita, kabili mulandu nshi?
5 E mulandu wine ukutula mu 1914, abantu abengi nga nshi balisalapo ukuti Kristu Yesu, uo Lesa asala ukuba Imfumu e o alebateka. Tabafwaya ukuba ulubali lwa calo ca kwa Satana kabili balakaana ukutungilila icalo cakwe. Lelo balabombesha no kubomfya fyonse ifyo bakwata ku kutungilila Ubufumu bwa kwa Lesa.—Rom. 14:7, 8.
6. Mulandu nshi twingasosela ukuti Inte sha kwa Yehova beni?
6 Inte sha kwa Yehova ababa mu fyalo ukucila pali 200 balomfwila ababateka, na lyo line, baba nga beni mu calo bekala. Tabaitumpa mu mapolitiki nelyo ukucitako ifimfulunganya ifyo aba mu bwikashi bacita. Na pali ino ine nshita, baimona ukuti bekashi ba mu calo cipya ico Lesa alaya. Balatemwa ukumona uko inshita iya kuba abalebeshi mu calo ca kwa Satana ilepwa bwangu bwangu.
7. Finshi fikacitika pa kuti ababomfi ba kwa Lesa bakekale umuyayaya, kabili ni kwi bakekala?
7 Nomba line, Kristu ali no konaula icalo cabipa ica kwa Satana. Ubuteko bwa kwa Kristu ubwapwililika bukafumyapo ulubembu no bulanda. Bukafumyapo bonse abapondokela ukuteka kwa kwa Yehova. Lyena, ababomfi ba kwa Lesa aba cishinka bakekala umuyayaya mu Paradaise. (Belengeni Ukusokolola 21:1-5.) Pali ilya nshita ifibumbwa fyonse “fikalubuka ku busha bwa kubola no kuba abana ba kwa Lesa.”—Rom. 8:21.
MIBELE NSHI ABENA KRISTU BA CINE BAFWILE UKUKWATA?
8, 9. Londololeni umo Petro aloseshe ilyo atile, “muletaluka ku lunkumbwa lwa fifwaya imitima yenu.”
8 Petro alandile ifyo Abena Kristu bafwile ukulacita ilyo atile: “Mwe batemwikwa, apo muli beni kabili abalebeshi ndemukoselesha ukuti muletaluka ku lunkumbwa lwa fifwaya imitima yenu, ifi fine e fingalenga ukuti mwiba no mweo.” (1 Pet. 2:11) Nangu ca kuti alefunda Abena Kristu basubwa, uku kufunda kwalicindama na ku mpaanga shimbi isha kwa Yesu.
9 Fimo ifyo tufwaya tafyabipa kulila fye twafibomfya bwino ukulingana ne fyo Kabumba afwaya. Na kuba, filalenga tuleipakisha ubumi. Ku ca kumwenako, fimo ifyo tufwaya, kulya ifya kulya ifisuma no kunwa, ukwangala, no kuba pamo ne fibusa. Na kabili caliba fye bwino ku baupana ukwampana mu cupo. (1 Kor. 7:3-5) Nomba “ulunkumbwa lwa fifwaya imitima” ulo Petro alelandapo ni lulya ‘ulwingalenga ukuti twiba no mweo.’ E mulandu wine Baibolo ya Icipangano cipya yapilibwila aya mashiwi ukuti “ulunkumbwa lubi.” Kanshi, tatufwile ukucita ififwaya imitima yesu ifyo Yehova ashifwaya kabili ifingonaula bucibusa bwesu na ena. Pantu nga tulekonkelela imitima yesu kuti twaisafwa.
10. Finshi fimo ifyo Satana abomfya pa kufwaya Abena Kristu ukuba ulubali lwa cino calo?
10 Satana afwaya ukuti Abena Kristu ba cine bafilwe ukutwalilila ukulaikala nga “abalebeshi” muli cino calo. Satana alabomfya ifintu fyalekanalekana pa kuti atubeleleke, alafwaya twatemwa ifyuma, ubulalelale, ukufwaya ukulumbuka, bukaitemwe e lyo no kutemwisha icalo twabamo, lelo tufwile ukwishiba ukuti ifi fiteyo ifyo Satana abomfya. Nga twatwalilila ukukaana ifi fyabipa ifyo imitima yesu ifwaya ninshi tulelanga ukuti tatwaba ulubali lwa calo ca kwa Satana. Kabili ninshi tulelanga no kuti tuli abalebeshi muli cino calo. Ico tufwaisha, kwisaikala umuyayaya mu calo cipya ica kwa Lesa umukaba ubulungami.
IMIBELE IISUMA
11, 12. Bushe abantu abafuma ku fyalo fimbi limo babamona shani, kabili finshi bamo balanda pali ba Nte?
11 Petro akonkenyepo ukulondolola na fimbi ififwaikwa ku Bena Kristu abekala nga “abalebeshi,” mu cikomo 12 atile: “Mube ne myendele iisuma mu bena fyalo, e pa kuti nelyo balemupontela kwati mulacita ifyabipa, bakesecindika Lesa pa bushiku bwa cipempu cakwe pa kumona imilimo yenu iisuma.” Limo abantu balalanda ifyabipa pa bantu abafuma ku calo cimbi pa mulandu wa kuti balapusanako na bana calo. Kabili limo babamona ukuti balacita ifyabipa. Nalimo imilandile yabo, imicitile, imifwalile, nangu fye mimonekele yabo ilapusana ne ya bana calo. Lelo nga ca kuti baliba ne mibele iisuma, cilenga aba muli ico calo ukwishiba ukuti bantu abasuma.
12 Na Bena Kristu ba cine nabo balipusanako ku ba muli ici calo muli fimo fimo, pamo nga mu milandile nelyo mu fyo basala ifya kuleseshamo icitendwe. Imifwalile yabo ne mimonekele yalipusanako ne ya bantu abengi aba mu calo. Ifi bapusanako kuli bambi, cilenga bamo balebabepesha ukuti balacita ifyabipa. Lelo imibele yabo iisuma ilalenga bambi ukubatasha.
13, 14. Bushe ‘ifyalungama ifyo umuntu acita filanga shani ukuti wa mano’? Langilileni.
13 Kanshi imibele yesu iisuma ilalenga abantu ukwishiba ukuti ifyo bambi balanda pali ifwe fya bufi. Nangu fye ni Yesu uwali uwa cishinka sana kuli Lesa balimubepeshe ubufi. Bamo balemwita abati, “muliili kabili alitemwisha umwangashi, kabili ni cibusa wa bakasonkesha ba misonko na babembu.” Icishinka ca kuti ifyalungama ifyo alecita pa kubombela Lesa fyalelanga ukuti ali muntu umusuma. Yesu atile: “Ifyalungama ifyo umuntu acita e filanga ukuti wa mano.” (Mat. 11:19) E fyo caba na muno nshiku. Ku ca kumwenako, abantu bamo abekala mupepi na maofeshi ya Nte sha kwa Yehova mu Selters ku Germany, bamona ukuti imikalile ya baba pa Bethel yalipusana ne fyo abantu bafwile ukwikala. Lelo umulashi wa buteko uwa ku Selters alandiileko ba Nte ukuti: “Imikalile ya ba Nte ababombela pa Bethel yalipusanako ne fyo abantu baikala, lelo tabapumfyanya abantu bambi.”
14 E fyo cali na kuli ba Nte ba ku Moscow, ku Russia, nabo balibabepeshe ukuti balacita ifyabipa ifingi. Lyena mu June, mu 2010, Icilye ca European Court of Human Rights mu Strasbourg, ku France, capingwile ukuti: “Icilye cisangile ukuti [aba mu musumba wa Moscow] balilufyenye pa kukaanya ba Nte ukulalongana kabili tabakwete ne nsambu sha kubalesha. Icilye ca mu Moscow tacakwete ifishinka fya kushinina ba Nte pa milandu iyo bababepeshe,” pamo nge ya kuti balalekanya indupwa, balalenga abantu ukuipaya, kabili balakaana ukundapwa mu fipatala. Kanshi, “ifyo ifilye fya ku Moscow fyapingwile fyalibipile sana kabili pa kupingula babomfeshe bubi bubi amafunde pa kuti batitikishe ba Nte.”
ABO TULINGILE UKUNAKILA
15. Lifunde nshi ilyo Abena Kristu ba cine icalo fye conse bakonka?
15 Inte sha kwa Yehova mu Moscow, ukusanshako na bamunyinefwe isonde lyonse, balakonka ifunde na limbi ilyo Petro alandilepo ilyo alembele ukuti: “Pa mulandu wa kwa Shikulu, mulenakila umuntu onse: nampo nga ni mfumu pantu e mukalamba pali bonse.” (1 Pet. 2:13, 14) Nangu ca kutila Abena Kristu ba cine tababa ulubali lwa ici calo cabipa, balakonka amashiwi Paulo alandile aya kuti bafwile ukulanakila bakateka abo Lesa asuminisha ukulateka.—Belengeni Abena Roma 13:1, 5-7.
16, 17. (a) Finshi filanga ukuti tatusuusha amabuteko? (b) Finshi ifyo bakateka bamo balandapo pali ba Nte?
16 Ifi Inte sha kwa Yehova baba “abalebeshi” muli cino calo, tacalola mu kuti ico bacitila ifi bafwaya ukulasuusha ubuteko. Kabili tabakaanya abaitumpa mu mapolitiki nelyo ukukaanya ifyo abantu mu bwikashi balemona ukuti e fyo bengacita pa kupwisha amafya yabo. Inte sha kwa Yehova tabaitumpa mu mapolitiki nga filya aba mipepele imbi bacita. Tabeba bakateka ifyo bafwile ukulateka, kabili tabatontonkanya na pa kucita ifimfulunganya nelyo ukupondokela ubuteko!
17 Abena Kristu nga baleumfwila no kucindika ababa mu bulashi ninshi balekonka ukufunda kwa kwa Petro ukwa kuti “mulecindika imfumu.” (1 Pet. 2:17) Inshita shimo, aba mu bulashi balasumina ukuti ba Nte bantu abasuma. Ku ca kumwenako, uwali cilolo wa buteko mu citungu ca Brandenburg, ku Germany, kabili uwaishileba cilolo wa mu ng’anda ya mafunde atile: “Ilyo ba Nte bali mu nkambi umo balebacusha na mu fifungo, batwalilile fye ukuba ne mibele iisuma, iyi mibele yalicindama nga filya fine yacindeme kale. Imibele iisuma iyo bakwete pamo nga: ukwafwilisha abafungwa banabo no kukonka ifyo basuminemo te mulandu ne fyo ubuteko bwa SS bwalebacusha ilafwaikwa sana mu calo cesu ica Germany maka maka ifi abantu bali abankalwe ku bantu abafuma ku fyalo fimbi, na ku baba mu tubungwe tumbi utwa mapolitiki nelyo imipepele.”
MULETEMWA ABA BWANANYINA
18. (a) Mulandu nshi twatemenwa bamunyinefwe ababa mwi sonde lyonse? (b) Finshi ifyo abashili ba Nte balanda pa Nte sha kwa Yehova?
18 Umutumwa Petro alembele ukuti: “Muletemwa aba bwananyina bonse, muleba na katiina kuli Lesa.” (1 Pet. 2:17) Inte sha kwa Yehova baliba na katiina, tabafwaya ukufulwisha Lesa, ne ci cilenga ukuti balefwaisha ukulacita ukufwaya kwakwe. Balatemwa ukubombela pamo na bamunyinabo aba mwi sonde lyonse nabo abafwaya ukubombela Yehova. E mulandu wine kanshi ‘batemenwa aba bwananyina bonse.’ Apo abantu mu calo tabatemwana, abashili ba Nte balapapa ilyo bamona ifyo twatemwana. Ku ca kumwenako, umwanakashi umo uutandasha abeni ku Germany, uubomba ku kampani ka American travel agency alipapile ukumona ifyo ba Nte abena Germany balangile ukutemwa ne fyo bayafwilishe ba Nte banabo abafumine ku fyalo fimbi abaile ku kulongana kwa fyalo ifingi ukwaliko mu 2009, ukwabelele ku Germany. Atile, pa myaka yonse iyo abombele umulimo wa kutandasha abantu, tatalile amonapo abantu abatemwana ifi. Nte umo uwali pabo atandeshe atile: “Ilyo uyu mwanakashi alelanda pali ifwe, ali ne nsansa kabili calimoneke ukuti ifyo amwene fyalimupeseshe amano.” Pa kulongana kwa citungu uko mwasangwako, bushe mwalyumfwapo uko abantu balanda ifyapala ifi pa numa ya kumona ifyo ba Nte batemwana?
19. Finshi tulingile ukupampaminapo ukucita, kabili mulandu nshi?
19 Nga fintu twasambilila, Inte sha kwa Yehova balalanga mu nshila ishingi ukuti “balebeshi” muli cino calo ca kwa Satana. Baliba ne nsansa ukuti balebeshi kabili balafwaya ukutwalilila nga balebeshi. Balishininkisha ukuti bakekala umuyayaya mu calo cipya ica kwa Lesa umukaba ubulungami. Bushe na imwe te fyo mufwaya ukuti mukekale mu calo cipya?
[Ifipusho]
[Icikope pe bula 20]
Tulakaana ukutungilila icalo ca kwa Satana
[Icikope pe bula 20]
Tutungilila icalo cipya ica kwa Lesa
[Icikope pe bula 22]
Icine ca mu Baibolo calilenga ulu lupwa lwa ku Russia ukwikatana
