Mulandu Nshi Kwabela Ulupungu lwa kwa Kalinda mu CiNgeleshi Icayanguka?

PA MYAKA iingi, abaume na banakashi isonde fye lyonse balitemwa kabili balanonkelamo mu kubelenga Ulupungu lwa kwa Kalinda. Mu July 2011, magazini ya fipande fya kusambililamo iya ciNgeleshi icayanguka yalifumine pa muku wa kubalilapo. Muli iyi magazini batile: “Iyi magazini ya ciNgeleshi cayanguka ikalafuma cila mweshi pa mwaka fye umo, kabili nga ca kuti ikaafwa abantu abengi ninshi ikalafuma cila mweshi.”

E ico, tuli aba nsansa ukumwishibisha ukuti tuli no kutwalilila ukulalemba iyi magazini. Na kabili iyi magazini ikalafuma na mu ciFrench, iciPortuguese, e lyo na mu ciSpanish.

UMULANDU ABANTU BAITEMENWA

Pa numa ya kupokelela iyi magazini ya ciNgeleshi cayanguka, abantu abengi aba ku South Pacific balandile ukuti: “Nomba bamunyinefwe baleumfwikisha sana Ulupungu lwa kwa Kalinda.” Kalata imbi nayo yatile: “Inshita abantu balepoosa ukulafwaya umo amashiwi yalola nomba balepoosa iyi nshita ku kumfwikisha amalembo ayalimo ne fyo yaleumfwana ne fyebo fili mwi sambililo.”

Uwapwisha amasambililo yakwe pa koleji ku United States atile: “Napoose imyaka 18 ukulalanda no kulemba ifya kuti abasambilila sana e bengomfwa fye. Ici calengele ukuti ndelanda  no kutontonkanya ifyo bambi balefilwa ukumfwikisha. Naishileiluka ukuti nalekabila ukwaluka mu fyo naletontonkanya na mu fyo nalelanda.” Ino nshita uyu nkashi ni kasabankanya uwacincila. Alembele ukuti: “Ulupungu lwa kwa Kalinda ulwa ciNgeleshi cayanguka lwalingafwa icine cine. Amashiwi yabamo yalinsambilisha ifya kulemba ifyayanguka.”

Nkashi uwabatishiwe mu 1972 uwikala ku England, alandile pali iyi magazini ukuti: “Ilyo nabelengele fye Ulupungu lwa kwa Kalinda ulwa kubalilapo mu ciNgeleshi cayanguka, naumfwile kwati Yehova ekele na ine, nanjikata na pa cipeya kabili tulebelengela pamo iyi magazini. Cali kwati mufyashi alebelengela umwana wakwe ilyashi ilyo ashilamulalikisha.”

Nkashi uubombela pa maofeshi ya Nte sha kwa Yehova ku United States uwabatishiwe akale apapita nomba ne myaka 40 atile, iyi magazini ilamwafwa ukumfwikisha icine. Ku ca kumwenako, muli magazini ya September 15, 2011 pa kabokoshi akatila “Some Expressions Explained” (Amashiwi Yamo Ayo Balondolwele) yalondolwele umwalola amashiwi ya kuti “ikumbi lya nte” ayaba pa AbaHebere 12:1 ukuti: “Bali abengi ica kuti te kuti bapendwe.” Uyu nkashi atile: “Ici calengele ing’umfwikishe umwalola amashiwi ya pali ici cikomo.” Ilyo alelanda pa kulongana kubako mu kati ka mulungu, atile: “Nangu ca kuti umwaice abelenga fye icasuko muli magazini ya ciNgeleshi cayanguka, amashiwi tayomfwika nga filya yengomfwika nga ca kuti umwaice abelenga fye icasuko mu Ulupungu lwa kwa Kalinda ulwa lyonse. Kanshi amasuko abaice basuka yalomfwika bwino.”

Nkashi na umbi uubombela pa Bethel atile: Lyonse ndafwaisha ukuyakutika ku fyasuko abaice mu cilonganino basuka. Ulupungu lwa kwa Kalinda ulwa ciNgeleshi cayanguka lwalyafwa  abaice ukwasuka ukufuma pa nshi ya mutima. Ifyo basuka filankoselesha.”

Nkashi uwabatishiwe mu 1984 atile: “Ng’umfwa kwati nine fye balembele. Ilalenga canyangukila ukumfwikisha ifyo ndebelenga. Nomba ndaicetekela ilyo ndeyasukapo pe Sambililo lya Ulupungu lwa kwa Kalinda.”

ILAFWA ABAFYASHI

Nkashi uwakwata umwana umwaume uwa myaka 7 atile: “Ukulalondolwela umwana amashiwi ayengi ilyo tulepekanya Ulupungu lwa kwa Kalinda ulwa lyonse kwalenasha kabili twalekokola pa kupwisha.” Nomba magazini ya ciNgeleshi cayanguka, yabafwa shani? Atile: “Calimpapusha ukuti alabelengako amaparagrafu kabili alomfwikisha ne fyo alebelenga. Apo amashiwi tayakosa kabili amasentensi yepi, alomfwa bwino ukubelenga. Alitendeka ukuipekanishisha ifya kuya-asuka pa kulongana ukwabula ukuti imwafwe, kabili apoosa fye amano pali magazini ilyo tulesambilila.”

Nkashi uwakwata umwana umwanakashi uuli ne myaka 9 atile: “Ilyo iyi magazini ishilatendeka ukufuma, twaleafwa umwana ukupekanya ifya kwasuka. Nomba alaipekanishisha. Te lingi tupoosa inshita ukulamulondolwela amashiwi. Pa mulandu wa kuti alomfwa ifyo alebelenga, alasukapo sana pe Sambililo lya Ulupungu lwa kwa Kalinda.”

BUSHE ABANA BOMFWA SHANI?

Abana abengi bamona kwati Ulupungu lwa kwa Kalinda ulwa ciNgeleshi cayanguka ebo balembela. Rebecca uuli ne myaka 12 atile: “Mukatwalilile ukupulinta iyi magazini!” Kabili atile: “Nalitemwa ifi mwaba icipande icitila, ‘Amashiwi Yamo Ayo Balondolwele.’ Calyanguka ku baice ukumfwa.”

Nicolette uuli ne myaka 7 alandile na o ukuti: “Kale Ulupungu lwa kwa Kalinda lwalenkosela ukumfwa. Nomba ndasukapo imiku iingi ne mwine.” Emma uuli ne myaka 9 atile: “Iyi magazini ilangafwa sana pamo no mwaice wandi uuli ne myaka 6. Nomba tulomfwikisha sana! Natotela!”

Nga fintu twamona, abantu abengi balenonkelamo sana muli ulu Ulupungu lwa kwa Kalinda umwaba amashiwi ayayanguka ukumfwa. Iyi magazini ya mu ciNgeleshi cayanguka ileafwa abengi ukufwikisha icine kabili ikatwalilila ukupulintwa pamo pene na Ulupungu lwa kwa Kalinda ulwa lyonse, ulwayafwa abantu abengi ukutula mu 1879.

[Amashiwi pe bula 30]

“Inshita abantu balepoosa ukulafwaya umo amashiwi yalola nomba balepoosa iyi nshita ku kumfwikisha amalembo ayalimo ne fyo yaleumfwana ne fyebo fili mwi sambililo”

[Amashiwi pe bula 31]

“Calimpapusha ukuti alabelengako amaparagrafu kabili alomfwikisha ne fyo alebelenga”