Mwilabomfya Baibolo nge ca Kumucingilila ku Fyabipa

“ICEBO CA KWA LESA ca mweo.” (Heb. 4:12) Aya mashiwi umutumwa Paulo alandile yalanda pa fyo icebo ca kwa Lesa cakwata amaka ya kufika pa mutima e lyo no kwalula abantu.

Ilyo kwaimine ubusangu pa numa ya mfwa ya batumwa, abantu batendeke ukutontonkanya fimbi pa maka Baibolo yakwata. (2 Pet. 2:1-3) Mu kupita kwa nshita, bashimapepo batendeke ukusambilisha ukuti Baibolo yalikwata amaka ya kucita ifisungusho. Profesa Harry Y Gamble alembele pa fya kubomfya amalembo ya Bena Kristu ku fya malele. Atile, muli ba 200 C.E., Umupatili we shina lya Origen alandile ukuti, “ukulumbula fye amashiwi yamo aya mushilo kulafwa sana: nga ca kuti amashiwi ya maleele aya bantu fye yalakwata amaka kanshi amashiwi ya kwa Lesa ayaba mu malembo yena yalikwatisha amaka.” John Chrysostom uwaikeleko mu kupwa kwa ba 300 C.E. alembele ukuti, “nga mu ng’anda muli Baibolo, Satana Kaseebanya te kuti eshe no kupalama kuli iyo ng’anda.” Kabili alandile no kuti bamo balakobeka mu mukoshi utupimfya uto baputula mu Baibolo pa kuti tulebacingilila no kubaletela amashuko. Na kabili profesa Gamble alandile ukuti Katolika umo uwasambilila ifya mapepo Augustine atile, “caliba fye bwino nga naulwala umutwe ukubuula ibuuku lya Mbila Nsuma ya kwa Yohane no kubika pa nshi ya pilo”! Pa mulandu wa ifi abantu batendeke ukubomfya Baibolo kwati ya maleele. Bushe mumona ukuti Baibolo kuti yamucingilila nelyo kuti yamuletela amashuko?

Bamo balabomfya Baibolo mu nshila imbi: batila ukukupukula Baibolo pe bula ilili lyonse no kubelenga icikomo icili conse ico babalilapo ukumona kuti calenga baishiba ifya kucita. Ku ca kumwenako, ukulingana ne fyo profesa Gamble alandile, inshita imo ilyo Augustine aumfwile umwaice alelanda mu ng’anda yali mupepi ati, “bula no kubelenga, bula no kubelenga,” Augustine amwene kwati ni Lesa e ulemweba ukubula Baibolo no kubelenga ilembo ilyo alabalilapo ukumona nga kupukula.

Bushe mwalishibako bamo ababomfya Baibolo muli iyi nshila pa kuti bapwishe amafya bakwete? Nangu ca kuti ifyo bacita fyaliba fye bwino pantu bafwaya ukubomfya Baibolo pa kupwisha amafya yabo, lelo ifi te fyo Abena Kristu bafwile ukucita nga balefwaya Baibolo ibatungulule.

Yesu alaile abasambi bakwe ukuti akabatumina “kaafwa, umupashi wa mushilo.” Kabili atile: “Akamusambilisha fyonse no kumwibukisha fyonse ifyo namwebele.” (Yoh. 14:26) Kanshi pa kuti Baibolo itwafwe kano twabomfya ifyo twasambililamo te kukupukula fye pe bula ili lyonse no kubelenga icikomo twabalilapo ukumona.

Abantu abengi balabomfya Baibolo pa kuti ibafwe mu cisungusho e lyo no kubacingilila ku fyabipa. Lelo Icebo ca kwa Lesa calikaanya ukubuka. (Lebi 19:26; Amala. 18:9-12; Imil. 19:19) Nangu ca kuti “icebo ca kwa Lesa ca mweo kabili ca maka,” na lyo line, tufwile ukwishiba bwino ifya kucibomfya. Ukwishiba bwino Baibolo e kwingafwa abantu ukulaikala bwino te kuibomfya kwati yakucitilako amaleele. Ukwishiba Baibolo bwino kwalyafwa abantu abengi ukuleka ukucita ifyabipa, ukuba ne mibele iisuma, ukukosha indupwa, e lyo no kukwata bucibusa no watupeela Baibolo.