Ifisuma Ifyacitike Ilyo Kwali Kampeni

María Isabel ni kasabankanya wacaice uwikala mu musumba wa San Bernado ku Chile. María Isabel na bafyashi bakwe no mukalamba wakwe bena Mapuche. Ulu lupwa lwaleafwilisha sana amapekanyo ya kuti kukabe icilonganino icipya mu lulimi lwa Mapuche, ulo beta no kuti Mapudungun.

Ilyo babilishe ukuti kukaba ukulongana kwa Cibukisho ca mfwa ya kwa Kristu na mu ciMapudungun no kuti balipulinta utupepala 2,000 utwa kwitilapo abantu, María Isabel alitemenwe sana. Bushe acitile shani pa kuti na o abombeko? Atontonkenye pa fyacitile ba Nte bacaice bamo ababombele bwino ilyo bashimikile ku bana be sukulu banabo na kuli bakafundisha. Alandile na bafyashi bakwe kabili bamwebele ukuti atontonkanye pa fyo engacita pa kuti akapeeleko abana be sukulu banankwe utu tupepala. Bushe atontonkenye ukucita finshi?

Ica kubalilapo, María Isabel alombele ulusa ku bakalamba ba pa sukulu ukuti akakambatike akapepala ka kwitilapo abantu ku Cibukisho pa mwinshi uukalamba uo bonse bengililapo. Balimusuminishe kabili balimutashishe pa fyo alefwaya ukucita. Bushiku bumo ulucelo, ilyo bapwile ukwita amashina ya bana be sukulu, umukalamba we sukulu abilishe ukuti kuli utupepala twa kwitilapo abantu ku Cibukisho!

Lyena, María Isabel alombele ukuti apite mu ma kalasi yonse pa kuti apeele abana be sukulu utupepala. Ilyo bamusuminishe, María Isabel aleingila mwi kalasi limo na limo no kwipusha nga muli abana be sukulu abena Mapuche. Atile: “Nalemona kwati nalimo abena Mapuche kuti baba fye 10 nelyo 15 pe sukulu lyonse, lelo bali abengi ica kuti utupepala napeele abana be sukulu twalifikile 150!”

“BALEMONA KWATI UO BALABATWALAKO MUKALAMBA”

Umwanakashi umo uwamwene akapepala ka kwitilapo abantu ku Cibukisho ako bakambatike pa mwinshi we sukulu aipwishe uo engamona pa kuti bamulondolwele pali ici Cibukisho. Ala alipapile ilyo bamutungulwile ku mukashana uwali fye ne myaka 10. María Isabel uku ninshi namwentula, atile: “Balemona kwati uo balabatwalako mukalamba.” Ilyo María Isabel apeele uyu mwanakashi akapepala ka kumwitilapo ku Cibukisho no kumulondolwelako panono fimo fimo, amwipwishe uko ekala pa kuti ena na bafyashi bakwe bakayemutandalila no kulanshanya nankwe pa Bufumu bwa kwa Lesa. Bakasabankanya 20 ababombela muli ici cifulo ca balanda iciMapudungun balitemenwe ukumona yu mwanakashi pamo na bambi 26 abena Mapuche baisa ku Cibukisho. Ino nshita icilonganino calipangwa.

Nampo muli baice nelyo muli bakalamba, kuti mwaitako abo musambilila nabo nelyo abo mubomba nabo ku Cibukisho, ku lyashi lya ku cintubwingi, nangu ku kulongana kwa citungu. Mulebelengako amalyashi mu mpapulo ayalanda ifyo bamo bacita pa kwitako bambi ku kulongana pa kuti na imwe muketeko bamo. Na kabili, mulepepa kuli Yehova ukuti amupeele umupashi wakwe uwa mushilo pa kuti ulemwafwa ukuba abashipa pa kulanda kuli bambi. (Luka 11:13) Nga mwacita ifi, na imwe mukapapa ukumona ifisuma ifikafuma mu kubombesha kwenu ilyo mwapekanya bwino ukushimikilako bambi.