Ukubombela Yehova Ukwabula Ukulanguluka

“Nalilaba ifya ku numa no kukonkelela ifya ku ntanshi.”—FIL. 3:13.

IFISHINKA IFIKALAMBA IFYO TWASAMBILILA:

Cinshi ca-afwile umutumwa Paulo ukuleka ukulanguluka pa fyo acitile kale?

Cinshi Lesa atweba ukuti e co tufwile ukucita pa kuti tatulecula na matontonkanyo?

Cinshi cingatwafwa ukulabombela Lesa ukwabula ukulanguluka?

1-3. (a) Bushe ishiwi lya kuti ukulanguluka lyalola mwi, kabili ifyo twacitile kale kuti fyalenga tuleumfwa shani? (b) Finshi twingasambilila kuli Paulo pa fyo twingabombela Lesa ukwabula ukulanguluka?

KALEMBA wa mishikakulo, J. G. Whittier, alembele ukuti: “Amashiwi ayo umuntu alanda nelyo ukulemba ayalanga ukuti naumfwa sana ububi, mashiwi ya kuti: ‘Kanshi nga!’” Ico alelandapo ni filya limo tumfwa ukuti akulabwelelwa nga nshacitile filya. Ishiwi lya kuti “ukulanguluka” lipilibula ukukalipwa umutima, nelyo ukumfwa sana ububi pa fintu twacitile nelyo ifyo twafililwe ukucita. Ifwe bonse twalicitapo ifintu ifyo tulanguluka ukuti kanshi nga tatwacitile. Bushe kwaliba ifyo mulangulukapo?

² Abantu bamo balicita ifilubo ifyabipisha ne membu fye ishikalamba. Bambi tapaba nangu fimo ifyabipa sana ifyo baacita, lelo balalanguluka nampo nga fimo ifyo basalilepo ukucita fyali fye bwino. Bambi nabo balileka ukulanguluka pa fyabipa ifyo bacitile. E lyo bambi nabo baikalila fye ukulanguluka pa fyo bacitile kale batila, “kanshi nga nshacitile ifi.” (Amalu. 51:3) Inga imwe muyumfwa shani? Bushe kuti mwatemwa ukulabombela Lesa ukwabula ukulanguluka pa fyo mwacitile kale? Bushe Baibolo yalilandako pa muntu uo twingapashanya pa kuti tulebombela Lesa ukwabula ukulanguluka? Ee, yalilanda pa mutumwa Paulo.

³ Paulo alicitile ifilubo ifyabipisha kabili alisalilepo no kucita ifisuma. Alyumfwile sana ububi pa fyo acitile kale, lelo alisambilile no kubika amano ku kubomba umulimo wa kwa Lesa mu cishinka. Natumone ifyo twingasambilila ku fyo abombeele Lesa ukwabula ukulanguluka.

IFYO PAULO ACITILE KALE

4. Finshi ifyo umutumwa Paulo acitile kale ifyo alelangulukapo?

⁴ Ilyo Paulo ali umulumendo, balemwita ukuti Sauli  kabili ali muFarise, alicitile ifintu ifyo aishilelanguluka. Ku ca kumwenako, alecusha sana abasambi ba kwa Kristu. Baibolo ilondolola ukuti ilyo fye Stefani bamwipeye, “Sauli atendeke ukusansa icilonganino. Aleingila mu ng’anda ne ng’anda no kukululamo abaume na banakashi, no kubatwala ku cifungo.” (Imil. 8:3) Uwasoma umo Albert Barnes atile ishiwi lya ciGriki ilyo bapilibula ati “ukusansa” lilosha mu kuti [Sauli] alesansa icilonganino buluku buluku kwati “ciswango.” Apo Sauli ali muYuda uwacincila, aishibe ukuti Lesa alimupeele umulimo wa kukufya Abena Kristu. E ico, alecusha sana Abena Kristu, ‘alebatiinya kabili alefwaisha ukwipaya abaume na banakashi.’—Imil. 9:1, 2; 22:4. *

5. Londololeni icacitike pa kuti Sauli aleke ukucusha abasambi ba kwa Yesu no kutendeka ukulashimikila pali Kristu.

⁵ Ico Paulo alefwaila ukuyila ku Damaseke, kuyafumya abasambi ba kwa Yesu mu mayanda yabo no kubakululwila ku Yerusalemu ukuti bayekandwa mu cilye ca Sanhedrin. Lelo alifililwe, pantu alelwisha Yesu, Umutwe wa cilonganino. (Efes. 5:23) Ilyo Sauli aleya ku Damaseke, Yesu alimoneke kuli ena kabili alipofwile pa mulandu wa lubuuto ulwabyatile ukufuma ku muulu. Lyena Yesu aebele Sauli ukuti aye ku Damaseke uko ali no kuyalolela ukuti bakamwebe ifya kucita. Twalipwa no kwishiba ilyashi lyonse.—Imil. 9:3-22.

6, 7. Cinshi cilanga ukuti Paulo alishibe ukuti ifyo acitile kale fyalibipile sana?

⁶ Ilyo fye Paulo aishibe ukuti ifyo alecita fyalibipile, alyalwike no kuba Umwina Kristu. Alilekele ukucusha Abena Kristu no kutendeka ukushimikila sana pali Kristu. Nangu cali ifi, pa numa alembele ukuti: “Mwalyumfwile ifyo nali kale ilyo nalekonka ubuYuda, ukuti nalecusha nga nshi icilonganino ca kwa Lesa no kuconaula.” (Gal. 1:13) Na kabili, alilandile pa fyabipa ifyo acitile kale ilyo alembele kalata ku bena Korinti, ku bena Filipi, na kuli Timote. (Belengeni 1 Abena Korinti 15:9; Fil. 3:6; 1 Tim. 1:13) Ifi Paulo alembele pa fyo alecita kale te kutila aleumfwilapo icilumba, kabili talefwaya ukucita kwati tapali nangu fimo ifyabipa ifyo acitile. Alishibe ukuti alilufyenye sana.—Imil. 26:9-11.

⁷ Uwasoma ifya mu Baibolo Frederic W. Farrar, alandile pa fyo Sauli alecusha sana Abena Kristu. Farrar alandile no kuti nga “mwatontonkanya sana pa fyo Paulo alecusha Abena Kristu e lyo mwingomfwikisha ifyo aleumfwa ububi, ne fyo bambi balelanda pa fyabipa ifyo acitile kale.” Nalimo inshita shimo ilyo aleya mu kutandalila ifilonganino umuku wa kubalilapo, kwaleba bamo abalemweba ukuti, ‘Kanshi e iwe Paulo, e iwe waletucusha!’—Imil. 9:21.

8. Bushe Paulo aumfwile shani pa luse no kutemwa ifyo Yehova na Yesu bamulangile, kabili finshi twingasambililako?

⁸ Lelo Paulo alishibe ukuti icalengele ukuti alebomba umulimo wa kushimikila, ni co Lesa ali ne cikuuku sana kuli ena. Mu makalata 14 ayo alembele, alandile pa cikuuku ca kwa Lesa pa miku nalimo 90. Takwaba kalemba wa Baibolo uwalanda sana pa cikuuku ca kwa Lesa nga Paulo. (Belengeni 1 Abena Korinti 15:10.) Paulo aletasha nga nshi pa fyo Lesa amubelele uluse, kabili alefwaya ukubomba apapelele amaka yakwe pa kulanga ukuti aletasha pa cikuuku bamulangile. E ico ‘alibombeshe ukucila’ abatumwa bonse. Ifyacitile Paulo fitusambilisha ukuti nga twatumbula imembu shesu no kuleka ukucita ifyabipa, Yehova akatwelela ukubomfya  ilambo lya kwa Yesu. Ala ica kumwenako ca kwa Paulo cisuma sana kuli balya abamona kwati imembu bacita shikalamba sana ica kuti te kuti shelelwe ukubomfya ilambo lya kwa Kristu! (Belengeni 1 Timote 1:15, 16.) Nangu ca kuti Paulo alecusha sana Kristu, alembele ukuti: ‘Umwana wa kwa Lesa alintemenwe no kuipeela pa mulandu wa ine.’ (Gal. 2:20; Imil. 9:5) Paulo alisambilile ukubombesha mu mulimo wa kwa Lesa kabili talefwaya ukucita ifingalenga aisalanguluka ku ntanshi. Bushe na imwe e fyo mwasambilila ukucita?

BUSHE KWALIBA IFYO MWACITILE IFILENGA MULELANGULUKA?

9, 10. (a) Mulandu nshi ababomfi ba kwa Yehova bamo balangulukila? (b) Bubi nshi bwaba mu kutwalilila ukusakamana pa fyo twacitile kale?

⁹ Bushe kwaliba ifyo mwacitile ifyo mulanguluka? Bushe mumona ukuti fimo ifyo mwapooselepo inshita na maka yenu tafyacindama? Bushe kwaliba fimo ifyo mwacitile ifyalengele bambi ukuculilamo? Nelyo limbi mulomfwa ububi pali fimo ifyo mutontonkanya ukuti nga tamwacitile. Finshi mwingacita?

¹⁰ Abantu abengi balasakamana sana! Umuntu uutwalilila ukusakamana alaikalifya, alailetela amacushi, kabili alaicusha. Cilamulenga ukulunguluka sana. Bushe ukusakamana kuti kwalenga amafya ukupwa? Awe nakalya! Mu nshita ya kusakamana, mufwile ukucitapo fimo ukupwisha ubwafya ubulemusakamika. Nga mwalikalifya umo, mufwile ukulomba ubwelelo pa kuti muwikishanye. Tontonkanyeni pa calengele ukuti mukalifye uyo muntu pa kuti mwikabwekeshapo na kabili. Nomba limo mufwile fye ukushipikisha pantu tapali nangu fimo ifyo mwingacitapo. Lelo ukusakamana te kuti kutwafwe, kuti kwalenga fye twafilwa ukubombela Lesa bwino. Kabili mu kusakamana tamwaba ubusuma nangu bumo!

11. (a) Finshi tufwile ukucita pa kuti Yehova atubelele uluse? (b) Finshi Lesa atweba ukucita nga tatulefwaya ukulacula na matontonkanyo pa fyo twacitile kale?

 ¹¹ Bamo balatontonkanya pa filubo bacitile kale ica kuti balomfwa sana ububi no kumona kwati tabacindama kuli Lesa. Bamona kwati Lesa te kuti ababelele uluse, pantu nalimo balicitile imembu ishikalamba nelyo balalufyanya imiku iingi. Lelo icishinka ca kuti nangu balicitile imembu isha musango shani, kuti balapila, ba-aluka no kulomba Lesa ukuti ababelele uluse. (Imil. 3:19) Yehova kuti ababelela uluse nga filya fine abelela uluse abantu abengi. Yehova alabelela uluse umuntu uwaicefya, umufumacumi, kabili uwalapila ukufuma pa nshi ya mutima. Lesa alibelele Yobo uluse, uwatile: “Nalapila mu lukungu na mu mito.” (Yobo 42:6) Bonse tufwile ukucita ifyo Lesa atweba pa kuti tatulecula na matontonkanyo. Atweba ati: “Uufimba pa fibi ifyo acitile takashuke, lelo uufisokolola no kufileka akabelelwa uluse.” (Amapi. 28:13; Yako. 5:14-16) Kanshi, tufwile ukutumbula imembu shesu kuli Lesa, ukumulomba ukuti atwelele, no kucita ifilelanga ukuti natumfwa ububi pa fyo twacitile. (2 Kor. 7:10, 11) Nga twacita ifi, Yehova, ‘uwelela nga nshi,’ akatubelela uluse.—Esa. 55:7.

12. (a) Bushe ifyo Davidi acitile fitusambilisha finshi pa fyo tufwile ukucita nga tulecula na kampingu? (b) Bushe amashiwi ya kuti Yehova alilangulwike yalola mwi, kabili ukwishiba ifi kuti kwatwafwa shani? (Moneni akabokoshi.)

¹² Ipepo lyalicindama nga tulefwaya Lesa ukutwafwa. Davidi alipepele ipepo ilisuma ilyafumine pa nshi ya mutima ilyalelangilila ukuti ali ne citetekelo. Ili pepo lyaba mwi buuku lya Amalumbo. (Belengeni Amalumbo 32:1-5.) Davidi alisumine ukuti ukufwaya ukufisa ulubembu kwalengele ukuti alecula na kampingu! Ilyo afililwe ukutumbula imembu shakwe, aliculile sana na matontonkanyo, alesakamikwa kabili takwete insansa. Cinshi calengele ukuti Davidi bamwelele, no kuba ne nsansa? Ni co alitumbwile imembu shakwe kuli Lesa. Yehova alyaswike amapepo ya kwa Davidi kabili alimukoseshe pa kuti atwalilile ukucita ifisuma. Na imwe nga ca kuti mwapepa ukufuma pa nshi ya mutima, kuti mwacetekela ukuti Yehova akakutika ku mapepo yenu aya kupapaata. Nga ca kuti mulomfwa ububi pa fyo mwacitile kale, esheni na maka ukubombelapo kabili cetekeleni no kuti Yehova akamubelela uluse!—Amalu. 86:5.

MULETONTONKANYA PA FYA KU NTANSHI

13, 14. (a) Cinshi tufwile ukubikako sana amano pali ino nshita? (b) Mepusho nshi ayengatwafwa ukuibebeta pa fyo tulebomba mu mulimo wa kwa Lesa?

¹³ Ca cine ukutila kuti twasambililako ku fyacitike kale, lelo tatufwile ukutwalilila ukusakamikwa pa fyacitike. Mu nshita ya kulasakamikwa, tufwile ukubika amano ku fyo tulecita na ku fyo tukacita ku ntanshi. Bushe kuli ifyo tulecita pali  ino nshita nelyo ifyo tulefilwa ukucita ifikalenga tukalelanguluka ku ntanshi? Bushe tulabombela Lesa ne cishinka pa kuti ku ntanshi twikalalanguluka?

¹⁴ Ilyo ubucushi bukalamba bulepalama, tatulefwaya ukwisalanguluka ku ntanshi atuti: ‘Cinshi calengele ukukanabombesha mu mulimo wa kwa Lesa? Mulandu nshi nshabombeleko bupainiya ilyo nakwete ishuko? Cinshi calengele ukuti niba umubomfi utumikila? Bushe nalyeseshe apapelele amaka yandi ukufwala ubuntu bupya? Bushe Yehova akansuminisha ukwingila mu calo cakwe icipya?’ Mu nshita ya kuti aya mepusho yaletusakamika, yafwile ukutwafwa ukuibebeta no kushininkisha ukuti tulebombela Yehova na maka yesu yonse. Pantu nga tatucitile ifi, kuti twaisalanguluka sana ku ntanshi.—2 Tim. 2:15.

MWILALANGULUKA UKUTI MULABOMBELA LESA

15, 16. (a) Finshi bamo bacita pa kuti babike pa ntanshi umulimo wa kwa Lesa? (b) Mulandu nshi tushifwile ukulangulukila pa fyo twaipeelesha ukubika Ubufumu pa ntanshi?

¹⁵ Bushe mulebombela Yehova umulimo wa nshita yonse? Nalimo mwalilekele incito mwalebomba iisuma nelyo mwalilekele amakwebo ayalemupeela indalama ishingi no kwangusha imikalile pa kuti mulekwata inshita iikalamba iya kubomba imilimo ya Bufumu. E lyo nalimo mwapingwilepo ukutwalilila ukuba abashimbe nelyo nga mwalyupa nelyo ukuupwa mwasalilepo ukukanakwata abana pa kuti mubombeko pa Bethel, umulimo wa makuule mu fyalo fimbi, umulimo wa kutandalila ifilonganino, nelyo ukuba bamishonari. Ifi mwile mulekula, bushe mufwile ukulanguluka pa fyo mwasalilepo ukubombela Yehova mu mulimo wa nshita yonse? Bushe mufwile ukutontonkanya ukuti ifi mwasalilepo ukucita mwalilufyenye? Awe nakalya!

¹⁶ Icalengele ukuti mupingulepo ukucita ifi, mulandu wa kuti mwalitemwa sana Yehova kabili mwalefwaisha ukwafwa bambi ukumubombela. Tamufwile ukulatontonkanya ukuti amusalapo ukukanabombela Yehova mu mulimo wa nshita yonse imikalile yenu nga yaliwama sana. Nga mwaishiba ukuti ifi mwacitile fyali bwino sana, mukaba ne nsansa icine cine. Mufwile ukusekelela pantu mwalibombela Yehova na maka yenu yonse. Yehova takalabe ifyo mwaipeeleshe ukumubombela. Kabili amapaalo mukapokelela ku ntanshi yakacila na pa yo mutontonkanyapo.—Amalu. 145:16; 1 Tim. 6:19.

IFYO MWINGABOMBELA LESA UKWABULA UKULANGULUKA

17, 18. (a) Cinshi ca-afwile Paulo ukulabombela Lesa ukwabula ukulanguluka? (b) Kuti twapashanya shani Paulo?

¹⁷ Cinshi ca-afwile Paulo ukubombela Lesa ukwabula ukulanguluka? Paulo alilabile ifya ku numa no kukonkelela ifya ku ntanshi. (Belengeni Abena Filipi 3:13, 14.) Paulo taletontonkanya pa fyabipa ifyo acitile ilyo ali mu mipepele ya buYuda. Lelo alebombesha pa kuti akapoke icilambu ca mweo wa muyayaya ku ntanshi.

¹⁸ Ifwe bonse kuti twasambililako ku fyo Paulo alandile. Mu nshita ya kulasakamikwa pa fya ku numa ifyo tushingaalula, tufwile ukubika amano ku fyo tulingile ukulacita pali ino nshita pa kuti tukapokelele amapaalo. Kwena, te kuti tulabe ku filubo fyonse ifyo twacitile kale, lelo tatufwile ukutwalilila ukulaumfwa ububi pa fyo twacitile. Tufwile ukwesha na maka ukulabako ku fyacitike kale. Kabili natulebombela Lesa na maka yesu yonse e lyo no kulatontonkanya pa fisuma ifili ku ntanshi!

[Futunoti]

[Ifipusho]

[Akabokoshi pe bula 25]

BUSHE AMASHIWI YA KUTI YEHOVA ALILANGULWIKE YALOLA MWI?

Imiku iingi Baibolo yalilandapo ukuti Yehova ‘alilangulwike.’ (Yona 3:10; Ukute. 6:6, 7; Abapi. 2:18; 1 Sam. 15:11) Aya mashiwi tayalola mu kuti Lesa alalufyanya, pantu imilimo yakwe yonse yalifikapo. (Impe. 23:19; Amala. 32:4) Lelo, ishiwi lya ciHebere ilyo bapilibula ukuti ukulanguluka lipilibula ukwaluka mu fyo umo aletontonkanya nelyo ifyo alefwaya ukucita. Ku ca kumwenako, apo Yehova wa mutembo, taumina kumo, wa luse, alaitemenwa ukwaluka mu fyo alefwaya ukucita nga ca kutila umo alapila no kwalula imibele yakwe.—Yer. 18:7-10.

[Icikope pe bula 24]

Paulo alisambilile ukubombela Lesa ukwabula ukulanguluka