Mwinenuka!

Bushe muli Nte ya kwa Yehova kabili mwalibombela Lesa pa myaka iingi e lyo mulafwaya sana ukuti abena mwenu bakabe Inte ya kwa Yehova?

Nelyo bushe mwalifuupuka pantu umusambi wenu uwa Baibolo uwalemoneka ukutemwa sana icine alileka ukusambilila Baibolo?

 Ifyacitikile bamunyinefwe bamo ku Britain fyalamwafwa ukwishiba umulandu mushilingile ukunenukila. Na kabili fyalamwafwa ukwishiba ifyo ‘mwingapoosa ifya kulya fyenu pa menshi,’ pa kuti mwingafwa abantu abashilapingulapo ukuba Inte sha kwa Yehova.—Luk. Mil. 11:1.

UKUTWALILILA UKUPEPA YEHOVA KWALICINDAMA

Cimo icacindama ico mulingile ukucita ca kuti mufwile ukutwalilila ukupepa Lesa. Mufwile ukutwalilila ukuba mu cine no kulambatila kuli Yehova. (Amala. 10:20) Ifi fine e fyacitile ba Georgina. Ilyo batendeke ukusambilila Baibolo ne Nte sha kwa Yehova mu 1970, abena mwabo ba Kyriacos balifulilwe sana. Balyeseshe ukubalesha ukusambilila Baibolo, kabili tabalesuminisha ba Nte ukwingila mu ng’anda. Kabili nga basanga impapulo sha Nte sha kwa Yehova baleshipoosa.

Ilyo ba Georgina batendeke ukulongana, e lyo ba Kyriacos bacililemo ukufulwa. Bushiku bumo baile ku Ng’anda ya Bufumu pa kuti baye babuushe ifyongo. Ilyo nkashi umo aumfwile ukuti ba Kyriacos baishiba sana iciGriki ukucila iciNgeleshi, atumine foni kuli munyinefwe umuGriki uwa mu cilonganino cimbi pa kuti ese abafweko ukukalulula umulandu. Ba Kyriacos balitemenwe ifyo uyu munyinefwe alandile nabo cikuuku cikuuku, kabili balitendeke no kusambilila Baibolo. Lelo ilyo papitile imyeshi iinono ba Kyriacos balilekele ukusambilila.

Ba Kyriacos balitwalilile ukukaanya ba Georgina ukusambilila Baibolo pa myaka na imbi itatu. Babebele ukuti ubushiku bakabatishiwa e bushiku ne cupo cikapwa. Ubushiku ba Georgina baleya mu kubatishiwa, balipepele sana kuli Yehova ukuti ba Kyriacos bebaleka. Ilyo ba Nte bafikile pa ng’anda pa ba Georgina ukuti babasende ukuya mu kulongana, ba Kyriacos babebele ukuti: “Tangileniko, twalaisa na motoka yesu.” Balilongeneko iciputulwa ca lucelo no kumonako uko abena mwabo balebatishiwa!

Mu kupita kwa nshita, ba Kyriacos balilekele ukucusha sana abena mwabo, kabili batendeke no kwaluka. Ba Georgina balitemenwe ukumona uko abena mwabo babatishiwe ninshi palipita ne myaka nalimo 40 ukutula apo ba Nte bashimikile ba Georgina! Cinshi calengele ba Kyriacos ukwaluka? Batile: “Nalitemenwe ifyo Georgina apampamine fye pa kupepa Yehova.” Ba Georgina batile: “Nangu ca kuti abena mwandi balenkaanya ukupepa, nalipangile ukuti nshakaleke ukupepa Lesa wandi. Lyonse nalepepa kuli Yehova, kabili nshanenwike.”

UKUBA NE MIBELE YA BWINA KRISTU KWALICINDAMA

Cimbi ico mwingacita pa kwafwa abena mwenu ukwaluka, kuba ne mibele ya Bwina Kristu. Umutumwa Petro afundile Abena Kristu abaupwa, ukuti: “Mulenakila abalume benu, pa kutila na balya abakaana ukumfwila icebo ca kwa Lesa, banashiwe apabula ishiwi nangu limo ilyo balemona imibele isuma iya bakashi babo.” (1 Pet. 3:1) Ifi fine e fyacitile ba Christine. Nangu ca kuti palipitile imyaka iingi pa kuti ba Christine banashe abena mwabo, balitwalilile ukukonka uku kufunda. Ilyo ba Christine babele Inte ya kwa Yehova imyaka ukucila pali 20 iyapita, abena mwabo ba John tabasumine ukuti Lesa e ko aba. Ba John tabalefwaya ifili fyonse ifyakumine imipepele, na lyo line balimwene ukuti abena mwabo balicindamike sana imipepele yabo iipya. Batile: “Nalimwene ukuti imipepele ya kwa Christine yalemulenga ukuba ne nsansa. Aishileba uwashipa kabili uwacetekelwa, kabili ici calengele ukuti ndeshipikisha amafya ayengi.”

Ba Christine tabalepatikisha abena mwabo ukuba ba Nte. Ba John batile: “Ukutula fye lintu atendeke ukusambilila Baibolo, Christine alilwike ukuti nshifwaya ukulanda pa fya mipepele, kanshi talelanda na ine pa fya mu Baibolo, kabili talempatikisha ukuti ndesambilila Baibolo.” Ba Christine nga basanga icipande cimo mu Ulupungu lwa kwa Kalinda nelyo muli Loleni! ico bamona ukuti abena mwabo kuti batemwa ukucibelenga, maka maka ifipande ifyalelanda pali sayansi na pa bubumbo, balelanga abena mwabo no kubeba ati, “Nalimo kuti mwatemwa ukubelengako ili lyashi.”

Mu kuya kwa nshita, ba John balipokele penshoni kabili batendeke ukulima umusalu na maluba. Apo nomba balekwatako inshita, batendeke ukutontonkanya pa mepusho ayacindama nga nshi, pamo nga ya kuti, ‘Bushe fwe bantu twasangwike fye, nelyo bushe kwaliba umulandu batubumbile?’ Bushiku bumo, munyinefwe umo uwatemenwe ukulanshanya na ba John abepwishe ukuti: “Bushe kuti mwatemwa ukusambilila Baibolo?” Ba John batile: “Apo nalitendeke ukusumina ukuti Lesa e ko aba, nalisumine ukulasambilila Baibolo.”

Kanshi caliweme filya ba Christine bashanenwike! Pa numa ya kupepa pa myaka 20 ukuti ba John bakasambilile icine, ba John basukile babatishiwa. Ino nshita, bonse babili balicincila ukubombela Yehova pamo. Ba John batile: “Ifintu fibili e fyalengele ukuti njaluke. Ba Nte bali ne cikuuku kabili tabali abaifinya. Kabili umwina mobe nga ni Nte, ninshi wamushukila pantu ba Nte ba cishinka, balicetekelwa kabili tabaitemwa.”  Ukwabula no kutwishika, ba Christine balikonkele ukufunda kwa kwa Petro ukwaba pali 1 Petro 3:1, kabili mwalifumine ifisuma!

PALAPITA IMYAKA IINGI PA KUTI BALUNDULUKE

Kuti mwacita shani nga ca kuti umusambi wenu aleka ukusambilila Baibolo? Imfumu Solomone yalembele ukuti: “Ulucelo tanda imbuto shobe ukufika icungulo wileka ukuboko kobe kutuushe; pantu tawishibe ishikamena, ishi napamo shilya, nangu nga shonse shikaba ishisuma.” (Luk. Mil. 11:6) Limo palapita imyaka iingi pa kuti abalesambilila Baibolo batemwe icine. Na lyo line, mu kupita kwa nshita baleluka ukuti calicindama ukupalama kuli Lesa. (Yako. 4:8) Ca cine, bushiku bumo kuti mwatemwa sana nga mwaumfwa ukuti umusambi wenu uwalekele ukusambilila nalunduluka.

Tontonkanyeni pa fyacitikile ba Alice, abafumine ku India no kukuukila ku England. Mu 1974 batendeke ukusambilila Baibolo. Ba Alice balelanda iciHindi lelo balefwaya ukwishiba sana iciNgeleshi. Balitwalilile ukusambilila Baibolo pa myaka iinono kabili balesangwako na mu kulongana mu cilonganino balebomfya iciNgeleshi. Balishibe ukuti ifyo balesambilila e cine, lelo tabalefimona ukuti fyalicindama. E lyo kabili balitemenwe indalama no kuya ku maparte. Ba Alice basukile baleka no kusambilila Baibolo.

Ilyo papitile imyaka nalimo 30, ba Stella abalesambilisha ba Alice Baibolo balipokelele kalata ukufuma kuli ba Alice. Muli iyi kalata balembelemo ukuti: “Mufwile mwalatemwa sana ukwishiba ukuti umuntu mwalesambilisha Baibolo ukutula mu 1974 aalibatishiwa pa kulongana kwa citungu ukwapwile. Ala mwalibomba icine cine. Mwalibyele imbuto sha cine mu mutima wandi, kabili nangu ca kutila nshaipeele kuli Lesa, nshalabile icine ico mwansambilishe.”

Cinshi cacitike kuli ba Alice? Ba Alice balondolwele ukuti ilyo abalume babo bafwile mu 1997, bali no bulanda sana. Balipepele kuli Lesa. Ilyo papitile fye nalimo amamineti 10, ba Nte babili abalelanda iciPunjabi balishile pa ng’anda pali ba Alice no kubashiila trakiti iitila Lisubilo Nshi Ilya Batemwikwa Besu Abafwa? Ba Alice bamwene ukuti Lesa na-asuka ipepo lyabo kabili bapingwilepo ukuti bafwile ukutendeka ukulongana ne Nte sha kwa Yehova. Nomba baali no kubasanga kwi? Baishilesanga ibuuku umo ba Stella babalembeele adresi ya cilonganino ca ciPunjabi. Ba Alice baliile ku Ng’anda ya Bufumu kabili bamunyinefwe na bankashi balibapokelele bwino. Ba Alice batile: “Na lintu nabwelelemo ku ng’anda naletontonkanya fye pa kutemwa uko ba Nte banangile kabili ici calingafwile ukukanaba sana no bulanda.”

Balitendeke ukulalongana lyonse no kutendeka ukusambilila Baibolo na kabili. Balisambilile ukulanda no kubelenga bwino iciPunjabi. Mu 2003 balibatishiwe. Muli kalata balembeele ba Stella, basondwelele na mashiwi ya kuti, “Ndemutasha sana pa mbuto mwabyele mu mutima wandi imyaka 29 iyapita na pa mibele yenu iisuma iyo mfwile ukupashanya.”

Finshi mwingasambilila kuli ifi fya kumwenako twalandapo? Nalimo kuti papita imyaka iingi pa kuti umuntu atemwe icine, lelo nga ca kuti alafwaya ukwishiba Lesa, wa bufumacumi, kabili ali-icefya, Yehova kuti amwafwa ukwishiba icine e lyo no kucitemwa. Ibukisheni amashiwi Yesu alandile mu cilangililo cimo, umo atile: “Imbuto shapuuka no kukula, na o [katanda] teshiba ne fyo shimena. Umushili uwine weka e umesha ifisabo panono panono, umusonga e ubalilapo, e lyo pakonka umutwe, na pa kulekelesha inseke ishituntulu mu mutwe.” (Marko 4:27, 28) Uku kukula kucitika panono panono kabili kucitika fye ‘ukwine kweka.’ E ico ilyo tulesambilisha abantu Baibolo tatwishiba ifyo imbuto shikula mu mitima yabo. Kanshi twalilileni ukutanda imbuto ishingi, e lyo nalimo mwingaseepa ifingi.

Na kabili muleibukisha ukuti ukupepa kwalicindama sana. Ba Georgina na ba Christine tabalekele ukupepa kuli Yehova. Nga muli “no mute wa kupepa” kabili nga tamunenwike, ‘ilyo pakapita inshiku ishingi,’ “ifya kulya” ifyo mwapoosele pa menshi mukafisanga na kabili.—Rom. 12:12; Luk. Mil. 11:1.

“Ndemutasha sana pa mbuto mwabyele mu mutima wandi imyaka 29 iyapita na pa mibele yenu iisuma iyo mfwile ukupashanya.”—Alice