BUSHE KUTI MWA-ASUKA SHANI ICI CIPUSHO?
BUSHE KUTI MWA-ASUKA SHANI ICI CIPUSHO?
Bushe itempele lya mu Yerusalemu lyalikuulilwe na kabili pa numa ya 70 C.E.?
YESU atile pe tempele lya kwa Yehova tapakabe ilibwe ilikashala pa muulu wa libiye. Uku kusesema kwalifikilishiwe ilyo Mushika umwina Roma Titus aonawile Yerusalemu mu 70 C.E. (Mat. 24:2) Pa numa, Kateka Julian apekenye ukukuula itempele cipya cipya.
Caishibikwa ukuti Julian e wali kateka wa kulekeleshako umusenshi mu Roma. Julian ali mwana wa kwa munyina wa kwa Konstantino Mukalamba kabili abamusambilishe bantu abaletila Bena Kristu. Lelo ilyo aishileba kateka mu 361 C.E., alikeene ifyo bamusambilishe. Mu fitabo ifilanda pa lyashi lya kale, bamwita ukuti Julian Umusangu pantu alipondokele icalici.
Julian alipatile sana Abena Kristu. Nalimo cimo icalengele ca kuti ilyo ali ne myaka 6 alimweneko uko Abena Kristu baipeye bawishi na balupwa wabo abaume. Abalemba pa malyashi ya kale aya fya mapepo balandile ukuti, Julian akoseleshe abaYuda ukukuula itempele lyabo na kabili, aleti ukucita ifi kukashinina ukuti Yesu ni kasesema wa bufi. *
Cishinka ukuti Julian alefwaya ukukuula itempele cipya cipya. Bakalemba wa lyashi lya kale balatwishika nga ca kutila alitendeke ukukuula, kabili nga e fyo cali tabaishiba icalengele ukuti aleke. Nampo nga alitendeke ukukuula nelyo iyo, Julian balimwipeye ninshi talakumanya ne myaka ibili pa bufumu kabili ne tempele talyatalile alikuulwa.
[Futunoti]
^ para. 5 Yesu tatile itempele talyakatale ailikuulwa lelo atile likonaulwa, kabili ifi e fyacitike mu 70 C.E.
[Icikope pe bula 32]
Nalimo ifi e fyo itempele lyalemoneka ilyo Yesu ali pano calo
[Icikope]
Pa lupili apali itempele ino nshita paba fye ulufuba
[Abatusuminishe]
Photo: Todd Bolen/BiblePlaces.com
