Yehova Ni Kapekape Kabili Tapampamina pa Cintu Cimo
Yehova Ni Kapekape Kabili Tapampamina pa Cintu Cimo
“Yehova musuma kuli bonse, no luse lwakwe lwaba pali fyonse ifyo abumba.”—AMALU. 145:9.
KUTI MWALONDOLOLA SHANI?
Mibele nshi ibili iya kwa Yehova iyo twasambilila muli cino cipande?
Kuti twapashanya shani bukapekape bwa kwa Yehova?
Kuti twapashanya shani Yehova uushipampamina fye pa cintu cimo?
1, 2. Finshi tukatwalilila ukucita ku ciyayaya?
NKASHI uwe shina lya Monika, atile: “Napapita imyaka mupepi na 35 ukutula apo twaupanina. Ine na bena mwandi twalishibana bwino. Lelo nangu ca kutila napapita imyaka yonse iyi, tucili tuleishibana!” Ifi fine e fyo caba na ku baupana abengi na ku fibusa.
2 Tulatemwa sana ukwishiba bwino abantu twatemwa. Na lyo line, pa fibusa twingakwata tapengaba icibusa icacindama icingacila pali Yehova. Tatwakatale atwishiba fyonse pali Yehova. (Rom. 11:33) Tukatwalilila ukusambilila pa mibele yakwe ku ciyayaya, ne ci cikalenga tukeshibe bwino imibele yakwe no kuitemwa.—Luk. Mil. 3:11.
3. Finshi twalasambilila muli cino cipande?
3 Icipande cafumineko, calitwafwile ukwishiba bwino imibele ibili iya kwa Yehova. Twalisambilile ukuti taifinya no kuti taba na kapaatulula. Muli cino cipande twalasambilila pa mibele ya kwa Yehova na imbi ibili, e kutila bukapekape no kukanapampamina pa cintu cimo. Ici calatwafwa ukwishiba bwino ukuti “Yehova musuma kuli bonse, no luse lwakwe lwaba pali fyonse ifyo abumba.”—Amalu. 145:9.
YEHOVA NI KAPEKAPE
4. Bushe kapekape muntu wa musango nshi?
4 Bushe kapekape muntu wa musango nshi? Icasuko caba mu mashiwi Yesu alandile ayalembwa pa Imilimo 20:35, ayatila, “Mwaba insansa ishingi mu kupeela ukucila ishaba mu kupokelela.” Muli aya mashiwi Yesu alandile, alangile ifyo kapekape aba. Kapekape muntu uitemenwa ukubomfya inshita yakwe, amaka ne fintu akwata ku kwafwa bambi. Kanshi icilanga ukuti umuntu ni kapekape te bukulu bwa bupe alepeela, lelo nga ca kutila ilyo alepeela, alepeela no mutima wakwe onse. (Belengeni 2 Abena Korinti 9:7.) Takwaba uwaba na bukapekape ukucila Yehova, ‘Lesa wesu uwa nsansa.’—1 Tim. 1:11.
5. Bushe Yehova alanga shani ukuti ni kapekape?
5 Bushe Yehova alanga shani ukuti ni kapekape? Alapeela abantu bonse ifyo bakabila, ukubikako fye na bashimupepa. Ca cine, “Yehova musuma kuli bonse.” “Alenga akasuba ukubalikila ababifi na basuma kabili alenga imfula ukulokela pa balungama na pa bashalungama.” (Mat. 5:45) E mulandu wine ilyo umutumwa Paulo alelanda ku bashali Abena Kristu alandiile ukuti Yehova “acitile icisuma, pa kumupeela imfula ukufuma mu muulu ne nshita sha kutwala ifisabo, ukumupeela ifya kulya ifingi no kulenga imitima yenu ukusangalala.” (Imil. 14:17) Ukwabula no kutwishika, Yehova ni kapekape.—Luka 6:35.
6, 7. (a) Ni bani abo Yehova atemwa sana ukwafwa? (b) Landeni icacitike icilelanga ifyo Lesa afwa ababomfi bakwe aba cishinka.
6 Yehova alatemwa sana ukupeela bakapepa bakwe aba cishinka ifyo bakabila. Imfumu Davidi yatile: “Nali umulumendo, nomba ninkota, lelo nshatalamona uwalungama nalekeleshiwa, nelyo abana bakwe balelombelesha ifya kulya.” (Amalu. 37:25) Ababomfi ba kwa Yehova abengi balimona ifyo Yehova abasakamana. Natulande pa ca kumwenako cimo.
7 Imyaka imo iyapita, painiya umo ishina lyakwe Nancy alikwete ubwafya ubukalamba. Nancy atile: “Nalekabila indalama sha kulipila ku ng’anda ubushiku bwakonkelepo. Indalama shalefwaikwa madola 66 aya ku America (nalimo K350,000). Nshaishibe uko nali no kufumya ishi ndalama. Nalipepele kuli Lesa pali ubu bwafya, lyena naile ku ncito. Nalebomba mu cikuulwa bashitishamo ifya kulya. Nshale-enekela ukuti pali bulya bushiku abantu balafula aba kumpeelako indalama sha kuntasha pa mulimo momba uwa kupeela abantu ifya kulya pantu muli ulya mulungu abantu abaleisa mu kulya tabafulile. Lelo nalipapile ukuti abantu abaishile cilya cungulo bushiku balifulile sana. Ilyo nainwike, nalipendele indalama bampeele, kabili shafikile amadola 66.” Ba Nancy balicetekela ukuti Yehova alibapeele ifyo balekabila.—Mat. 6:33.
8. Bupe nshi ubwacindama sana ubo Yehova atupeela?
8 Ifwe bonse Yehova alitupeela icintu icacindamisha. Cinshi atupeela? Atupeela ilambo lya cilubula ilya Mwana wakwe. Yesu atile: “Lesa atemenwe nga nshi aba pano calo ica kuti apeele Umwana wakwe uwafyalwa eka, ukuti onse uumutetekela ekonaika lelo akabe no mweo wa muyayaya.” (Yoh. 3:16) Muli ili lembo, ishiwi lya kuti “icalo” lipilibula abantunse. Kanshi, Yehova alipeela abantu fye bonse ubupe ubwacindama. Bonse abacetekela ilambo lya cilubula ilya kwa Yesu bakaba no bumi bwa muyayaya! (Yoh. 10:10) Ubu bupe Lesa atupeela e bushininkisho ubukalamba nga nshi ubwa kuti Yehova ni kapekape.
MULEPASHANYA BUKAPEKAPE BWA KWA YEHOVA
9. Kuti twapashanya shani bukapekape bwa kwa Yehova?
9 Kuti twapashanya shani bukapekape bwa kwa Yehova? Yehova e “utupeela ifintu fyonse ifyo tuipakisha”; kanshi tufwile ukuba “abaiteyanya ukupako bambi,” ukucita ifi kukalenga bakabe sana ne nsansa. (1 Tim. 6:17-19) Tulaitemenwa ukupeelako abo twatemwa ifyo tukwete no kwafwa abalekabila ubwafwilisho. (Belengeni Amalango 15:7.) Cinshi icingatwafwa ukuba bakapekape? Abena Kristu bamo nga bapokelela ubupe, balafwaya ukuti nabo mpaka bakapeeleko bambi ubupe. Mu cilonganino ca Bena Kristu mwaliba bamunyinefwe na bankashi abengi bakapekape.
10. Ni nshila nshi iisuma iyo twingabelamo bakapekape?
10 Inshila imo iisuma iyo twingabelamo bakapekape kulabomfya inshita yesu na maka ku kwafwa bambi no kubakoselesha. (Gal. 6:10) Pa kuti twishibe nga tulacita ifi, tufwile ukuyipusha ukuti: ‘Bushe abantu balamona ukuti ndaitemenwa ukubafwa no kukutika nga balenjeba ifilebasakamika? Nga ca kutila bamo banomba ukuti mbafweko ukubomba imilimo imo nelyo mbacitileko fimo, bushe ndaitemenwa ukubafwa? Ni lilali nalekelesheko ukutasha lupwa wandi nelyo Umwina Kristu munandi?’ Nga ‘tulepeela,’ tukapalama sana kuli Yehova na ku fibusa fyesu.—Luka 6:38; Amapi. 19:17.
11. Ni nshila nshi shimo isho twingapeelelamo Yehova?
11 Tufwile ukuba bakapekape na kuli Yehova. Amalembo yatukoselesha ukuti: “Cindika Yehova ku fyuma fyobe.” (Amapi. 3:9) Pali ifi “ifyuma” paba inshita yesu, amaka, ne fyo twakwata ifyo twingabomfya mu mulimo wakwe. Abana abanono nabo kuti basambilila ukulapeela Yehova. Ba Jason batile: “Nga tulefwaya ukusangula indalama pa Ng’anda ya Bufumu, tuleka abana e babika indalama mu kabokoshi ka musangulo. Abana balatemwa sana pantu, abene batila, ‘ninshi balepeela Yehova.’” Nga ca kutila abana, ilyo bacili fye abanono, baishiba ukuti ukupeela Yehova kulabaletela insansa, na lintu bakakula bakatwalilila ukulamupeela.—Amapi. 22:6.
YEHOVA TAPAMPAMINA FYE PA CINTU CIMO
12. Bushe umuntu uushipampamina fye pa cintu cimo aba shani?
12 Imibele imbi iisuma iyo Yehova akwata, ya kukanapampamina fye pa cintu cimo. Bushe umuntu uushipampamina fye pa cintu cimo aba shani? (Tito 3:1, 2) Umuntu uushipampamina fye pa cintu cimo alomfwa ku fyo bambi balelanda. Tapampamina fye pa kukonka fyonse ifyo ifunde lyalanda. Te munkalwe, lelo alesha na maka ukuba uwanakilila kuli bambi, kabili alatontonkanya na pa fyo balepitamo. Alakutika na ku fyo bambi balelanda kabili ilyo calinga alacita ifyo balefwaya.
13, 14. (a) Bushe Yehova alanga shani ukuti tapampamina fye pa cintu cimo? (b) Finshi twingasambilila kuli Lesa pa fyo acitile kuli Lote?
13 Bushe Yehova alanga shani ukuti tapampamina fye pa cintu cimo? Alatontonkanya pa fyo ababomfi bakwe baleumfwa, kabili ilingi line alacita ifyo bamulomba. Ku ca kumwenako, tontonkanyeni pa fyo Yehova acitile kuli Lote umulungami. Ilyo Yehova afwaile ukonaula umusumba wa Sodomu na Gomora, aebele Lote ukufulumukila ku mpili. Lelo, Lote alombele ukuti afulumukile ku ncende imbi. Baleni tontonkanyeni, Lote alombele Yehova ukuti alule ifyo amwebele!—Belengeni Ukutendeka 19:17-20.
14 Bamo kuti batila icitetekelo ca kwa Lote cali icinono nelyo ukuti tali ne cumfwila. Pantu na kuba, Yehova nga alimucingilile konse fye uko aali no kuya, kanshi tapaali umulandu uwa kutiinina. Nangu cibe fyo, Lote ali no mwenso, kabili Yehova alicitile ifyo alombele. Alekele Lote afulumukila ku musumba uo alefwaya ukonaula. (Belengeni Ukutendeka 19:21, 22.) Ukwabula no kutwishika, Yehova tapampamina fye pa cintu cimo, alomfwa kuli bambi.
15, 16. Bushe Amafunde Lesa apeele Mose yalangile shani ukuti Yehova tapampamina fye pa cintu cimo? (Moneni icikope cili pa ntendekelo ya cino cipande.)
15 Amafunde ayo Yehova apeele abena Israele na yo yalanga ukuti tapampamina fye pa cintu cimo. Ku ca kumwenako, nga ca kuti umwina Israele mupiina ica kuti afilwa no kutuula impaanga nelyo imbushi, kuti atuula inkunda shibili nelyo ifipele fibili. Nomba caleba shani nga ca kutila umwina Israele mupiina sana ica kuti te kuti akwate ne fipele fibili ifya kutuula? Yehova alisuminishe abena Israele abapiina sana ukutuula ubuunga ubunono. Lelo ubuunga ubo aali no kutuula tabwali cikulu fye buunga, bwalingile ukuba “ubuunga ubwapeleka” ubusuma nga nshi nga bulya balepangila imikate ya beni abacindama. (Ukute. 18:6) Bushe ili funde lilanga shani ukuti Yehova tapampamina fye pa cintu cimo?—Belengeni Ubwina Lebi 5:7, 11.
16 Elenganyeni ukuti muli bena Israele kabili abapiina icine cine. Ilyo mwafika pa cikuulwa ca mushilo namusenda no buunga ubunono ubwa kutuula, mwamona abena Israele abakankaala baleleta inama isha kutuula ilambo. Nalimo kuti mwaumfwa insoni ukutuula umutuulo wa buunga uulemoneka kwati taucindeme. Lyena mwaibukisha ukuti Yehova alemona umutuulo wenu ukuti naucindama nga nshi. Mulandu nshi? Pantu Yehova atile mukatuule ubuunga bwapeleka ubusuma nga nshi. Cili kwati Yehova alemweba ati: ‘Ninjishiba ukuti te kuti ukumanishe ukutuula ifyo bambi baletuula, lelo ninjishiba no kuti apa pene e papelele amaka yobe.’ Cine cine, Yehova tapampamina fye pa cintu cimo. Tenekela ababomfi bakwe ukucita ifyo bashingakumanisha.—Amalu. 103:14.
17. Bushe Yehova afwaya ukuti tulemubombela shani?
17 Tulasansamuka ukwishiba ukuti Yehova tapampamina fye pa cintu cimo no kuti alatemwa nga tulemubombela no mweo onse. (Kol. 3:23) Nkashi umo umukoloci, ishina lyakwe Constance, atile: “Nalitemwa sana ukwebako abantu bambi pali Kabumba. E mulandu wine nshilekela ukushimikila no kutungulula amasambililo ya Baibolo. Limo ndomfwa ububi pantu nshibombesha nge fyo nalebomba kale pantu ndalwalilila. Lelo nalishiba ukuti Yehova alishiba ifyo nshikumanisha ukucita no kuti alintemwa kabili alatasha pa fyo momba.”
MULEPASHANYA YEHOVA UUSHIPAMPAMINA FYE PA CINTU CIMO
18. Ni nshila nshi imo iyo abafyashi bengapashanyamo Yehova?
18 Kuti twapashanya shani Yehova uushipampamina fye pa cintu cimo? Tontonkanyeni na kabili pa fyo Yehova acitile kuli Lote. Yehova alikwete amaka ya kweba Lote uko alingile ukuya, lelo alikutike cikuuku cikuuku ilyo Lote alelondolola ifyo aletontonkanya, kabili alimusuminishe ukufulumukila ku ncende alefwaya. Nga ca kutila muli bafyashi, bushe kuti mwapashanya Yehova? Bushe mulakutika ku fyo abana balemulomba kabili nga cili fye bwino ukubaleka bacita ifyo balefwaya? Ulupungu lwa kwa Kalinda ulwa September 1, 2007, lwatile abafyashi bamo ilyo balepanga amafunde ayo ulupwa lulingile ukulakonka, balaleka abana balandapo. Ku ca kumwenako, tutile abafyashi balefwaya ukubikila abana inshita iyo bafwile ukulabwelela pa ng’anda. Nangu ca kuti abafyashi balikwata insambu sha kweba abana inshita balingile ukufika pa ng’anda, na lyo line, abafyashi Abena Kristu kuti bakutika na ku fyo abana balanda pa nshita balefwaya ukulabwelelapo. Limo kuti caba fye bwino abafyashi ukwalula inshita iyo abana bakalabwelelapo pa ng’anda. Nga ca kutila abafyashi balelanshanya na bana ilyo balepanga amafunde, abana bakeshiba bwino ico babikileko ayo mafunde kabili bakalaitemenwa ukuyakonka.
19. Bushe baeluda kuti bapashanya shani Yehova uushipampamina fye pa cintu cimo?
19 Baeluda balesha na maka ukupashanya Yehova uushipampamina fye pa cintu cimo, balatontonkanya pa fyo Abena Kristu banabo balepitamo. Ibukisheni ukuti Yehova alemona amalambo ayo abena Israele abali abapiina sana baletuula ukuti yali ayacindama. E fyo caba na kuli bamunyinefwe bamo, balafilwa ukubombesha mu mulimo pantu nalimo balalwalilila nelyo nabakota. Nga ca kutila aba bamunyinefwe balafuupulwa pantu tababombesha mu mulimo, bushe baeluda kuti babafwa shani? Baeluda kuti babafwa ukwishiba ukuti Yehova alibatemwa pantu balabomba apapelele amaka yabo.—Marko 12:41-44.
20. Bushe ukukanapampamina fye pa cintu cimo kwalola mu kuti tufwile ukulabombela Lesa buyefya buyefya? Londololeni.
20 Kwena, ukukanapampamina pa cintu cimo kwalipusana no kuleka ukubombesha mu mulimo wa kwa Lesa pa mulandu wa kufwaya fye ukuyumfwilako uluse. (Mat. 16:22) Tatulingile ukulabomba buyefya buyefya e lyo twalatila ico tubombela ifi mulandu wa kuti tatufwaya ukupampamina fye pa cintu cimo. Lelo tufwile ‘ukubombesha na maka’ mu mulimo wa Bufumu. (Luka 13:24) Tatufwaya ukulabomba buyefya buyefya kabili tatufwaya no kulapampamina fye pa cintu cimo. Lelo, twalishiba ukuti Yehova tatweba ukubomba ifyo tushingakumanisha. Alatemwa sana nga tulebomba apapelele amaka yesu. Bushe tatumfwa bwino ukubombela Shikulu uutasha kabili uushipampamina fye pa cintu cimo? Mu cipande cikonkelepo, tukasambilila pa mibele ya kwa Yehova na imbi ibili.—Amalu. 73:28.
[Ifipusho]
[Icikope pe bula 13]
Abena Israele babakoseleshe ukulapashanya bukapekape bwa kwa Yehova (Moneni paragrafu 9)
[Icikope pe bula 14]
“Cindika Yehova ku fyuma fyobe.”—Amapi. 3:9 (Moneni paragrafu 11)
[Icikope pe bula 14]
“Conse ico mulecita, mulebomba no mweo onse.”—Kol. 3:23 (Moneni paragrafu 17)
