AMEPUSHO UKUFUMA KU BABELENGA

Bushe kuti caba fye bwino abafyashi Abena Kristu ukwikala no mwana wabo uwatamfiwa pa kulongana?

▪ Umuntu uwatamfiwa kuti aikala apali ponse mu Ng’anda ya Bufumu, kanshi tatufwile ukusakamikwa nga aikala apali ponse. Ino magazini ilakoselesha sana abafyashi Abena Kristu ukwafwa umwana wabo uwatamfiwa uwikala nabo pa ng’anda nga nabamona ukutila cili fye bwino. Nga filya Ulupungu lwa kwa Kalinda ulwa November 15, 1988, amabula 19-20 lwalondolwele, abafyashi kuti balesambilila Baibolo no mwana wabo umunono uwatamfiwa uwikala nabo pa ng’anda. Nga balecita ifi nalimo kuti bamwafwa ukuwamya imibele yakwe.

Kuti caba fye bwino umwana uwatamfiwa ukwikala mu mutalalila na bafyashi bakwe mu Ng’anda ya Bufumu. Apo takwaba ifunde ililanda ukuti umuntu uwatamfiwa alingile ukwikala ku numa, kanshi umwana umunono uwatamfiwa kuti aikala na bafyashi bakwe ponse apo bekele. Ilyo abafyashi baleafwa umwana wabo ukuba cibusa wa kwa Lesa na kabili, bafwaya ukuti alenonkelamo sana ilyo balelongana. Kanshi ukwikala pamo no mwana wabo kuti kwalenga bamwafwa ukucila ukumuleka ukulaikala eka.

Nga ca kuti umwana uwatamfiwa tekala na bafyashi bakwe, bushe kuti aikala nabo mu Ng’anda ya Bufumu? Impapulo shesu shalilondolola bwino ifyo Abena Kristu bafwile ukucita kuli lupwa lwabo uwatamfiwa uo bashikala nankwe pa ng’anda. * Ukwikala no muntu uwatamfiwa ilyo bali pa kulongana nakupusana no kulafwaya ukuba nankwe pa kuti baleampana pamo nankwe. Nga ca kuti balupwa ba watamfiwa tabampana nankwe kabili balesha na maka ukukonka ifyo Amalembo yalanda pa kwampana no watamfiwa, ninshi tapali ico tufwile ukusakamana.—1 Kor. 5:11, 13; 2 Yoh. 11.

Tatufwile ukusakamikwa nampo uwatamfiwa ekele na balupwa nelyo uuli onse ilyo ali pa kulongana mu Ng’anda ya Bufumu, cikulu fye ekele mu mutalalila. Ukukaanya uwatamfiwa ukwikala apo alefwaya kuti kwaleta fye amafya yambi. Nga ca kutila bonse fye mu cilonganino, ukubikako na balupwa aba cishinka bale-esha na maka ukulakonka ukufunda kwa mu Baibolo pa fyo balingile ukulamona umuntu uwatamfiwa, kabili nga ca kutila ukwikala no watamfiwa takulepunwisha aba bwananyina, ninshi apo muntu uwatamfiwa aikala mu Ng’anda ya Bufumu taufwile ukuba mulandu wa kutusakamika.

[Futunoti]