Elisha Amwene Amaceleta ya Mulilo—Bushe na Imwe Mulayamona?

Imfumu ya ku Siria yalefwaya ukwikata Elisha kasesema wa kwa Lesa. Yaumfwile ukuti Elisha ali ku Dotani umusumba uwabelele pa lupili kabili uwakwete ne linga. Imfumu yatumine abashilika ba pali bakabalwe na maceleta ya nkondo ku Dotani. Ku maca abashilika bashingile umusumba.—2 Isha. 6:13, 14.

Ilyo umubomfi wa kwa Elisha abuukile no kulolesha pa nse, amwene abalwani abalefwaya ukwikata kasesema. Umubomfi wakwe atile: “Iye, mwe shikulu! Twalacita shani?” Elisha atile: “Witiina, pantu abali kuli ifwe bengi ukucila abali kuli bena.” Lyena kasesema Elisha apepele ati: “Mwe Yehova, isuleni amenso yakwe pa kuti amone.” Ilembo lyalanda no kuti: “Yehova ilyo line aiswile amenso ya mubomfi, na o alimwene; kabili moneni! mu citungu ca mpili monse mwali bakabalwe na maceleta ya nkondo aya mulilo ukushinguluka Elisha.” (2 Isha. 6:15-17) Finshi twingasambilila kuli ifi na kuli fimbi ifyacitikile Elisha?

Nangu ca kuti abashilika abena Siria balimushingulwike, Elisha tatiinine pantu alicetekele Yehova kabili alishibe ukuti alamucingilila. Tatwenekela Yehova ukutupususha mu cisungusho, lelo twalishiba ukuti alacingilila abantu bakwe bonse pamo. Caba kwati bakabalwe na maceleta ya mulilo fyalitushinguluka. Nga twacetekela ukuti Yehova alacingilila abantu bakwe kabili twatwalilila no kumucetekela, tukekala “umutelelwe” kabili akatupaala. (Amalu. 4:8) Natumone ifyo twingasambililako kuli Elisha.

ELISHA ABA UMUBOMFI WA KWA ELIYA

Bushiku bumo, ilyo Elisha ali mwi bala alelima ne ng’ombe, kasesema Eliya aile kuli ena kabili amuposeele ica kufwala cakwe icaibela. Ifi Eliya acitile ale-eba Elisha ukuti abe umubomfi wakwe. Alipangile umutebeto, alilaile bawishi na banyina, e lyo aile mu kubombela Eliya. (1 Isha. 19:16, 19-21) Apo Elisha ali-itemenwe ukubombela Lesa no mutima wakwe  onse, Yehova alimubomfeshe kabili mu kuya kwa nshita aishilepyana kasesema Eliya.

Elisha abombeele Eliya nalimo imyaka 6. Muli iyi myaka yonse, Elisha e “waleitulwila amenshi ku minwe ya kwa Eliya.” (2 Isha. 3:11) Kale, ilingi abantu baleliila fye ne minwe. Nga bapwisha ukulya, umubomfi aleitulwila amenshi ku minwe ya kwa shikulu wakwe pa kuti asambe. Kanshi imilimo imo iyo Elisha alebomba yalemoneka iyasuulwa. Lelo nangu cali ifi, alemona ukuti lishuko ukuba umubomfi wa kwa Eliya.

Na muno nshiku, Abena Kristu abengi balaitemenwa ukubomba imilimo iyalekanalekana mu mulimo wa nshita yonse. Icilenga balecita ifi mulandu wa kuti balitetekela Yehova kabili balafwaya ukubomfya amaka yabo yonse ku kumubombela. Imilimo babomba imo ilenga balebombela ukutali na ku mwabo pamo nga pa Bethel, mu makuule, ne milimo imbi, imilimo iyo nalimo abengi basuula. Tatufwile ukulamona imilimo ya musango uyu kuti tayacindama nelyo ukuti yalisuulwa pantu Yehova alicindamika imilimo yonse iyo ababomfi bakwe babomba.—Heb. 6:10.

ELISHA ALITWALILILE UKUBOMBA UMULIMO BAMUPEELE

Ilyo Lesa ‘ashilasenda Eliya mu cikuuku ca mwela ukuya mu muulu,’ amwebele ukuti afume mu Gilgali aye ku Betele. Eliya aebele Elisha ukuti ashale, lelo Elisha atile: “Nshalekane na imwe.” Ilyo baleya, pa miku ibili Eliya aebele Elisha ukuti ashale, lelo alikeene. (2 Isha. 2:1-6) Nga filya Ruti akeene ukusha Naomi, na Elisha alikeene ukusha Eliya. (Ruti 1:8, 16, 17) Mulandu nshi? Pantu Elisha alitemenwe sana umulimo Lesa amupeele uwa kuba umubomfi wa kwa Eliya.

Elisha aba ca kumwenako icisuma kuli ifwe. Te mulandu no mulimo twapeelwa mu cilonganino ca kwa Lesa, tukaumona ukuti walicindama nga tuleibukisha ukuti ni Yehova e o tulebombela. Takwaba icacindama ukucila pa kubombela Yehova.—Amalu. 65:4; 84:10.

“LOMBA IFYO ULEFWAYA NKUCITILE”

Eliya aebele Elisha ilyo bali pa lwendo ukuti: “Lomba ifyo ulefwaya nkucitile ilyo nshilasendwa ukufuma pali iwe.” Nga filya Solomone alombele, ilyo papitile imyaka, Elisha na o alombele ifya kumwafwa ukulabombela Yehova bwino. Alombele ukuti: “Lekeni ifiputulwa fibili ifya mupashi wenu fise pali ine.” (1 Isha. 3:5, 9; 2 Isha. 2:9) Mu Israele, umwana umwaume ibeli balemupeela ifiputulwa fibili ifya bupyani. (Amala. 21:15-17) Kanshi Elisha alelomba ukuti e o akapyane Eliya. Na kabili, alefwaya ukuti abe uwashipa nga filya fine Eliya aali, ‘uwaumfwilile Yehova ubufuba.’—1 Isha. 19:13, 14.

Bushe Eliya acitilepo shani pa fyo umubomfi wakwe alombele? Kasesema Eliya alandile ukuti: “Cayafya ico walomba. Nga walamonako uko ndesendwa ukufuma pali iwe, ninshi calaba ifyo fine; nomba nga tawamoneko, ninshi te fyo cileba.” (2 Isha. 2:10) Icasuko ico Eliya a-aswike calepilibula ifintu fibili. Ica kubalilapo, Lesa fye e wali no kupingulapo ukupeela Elisha ifyo alombele nelyo iyo. Ica bubili, pa kuti Elisha bamupeele ifyo alombele, alingile ukutwalilila ukuba na Eliya nangu ifintu fyafye shani.

IFYO ELISHA AMWENE

Bushe Lesa alipeele Elisha ifyo alombele? Baibolo itila: “Ilyo bale-enda uku ninshi balelanda, moneni! kwaishile iceleta lya nkondo ilya mulilo na bakabalwe ba mulilo, kabili bapaatukenye balya babili; na Eliya asendelwe muli kankungwe mu muulu. Elisha alemona fyonse ifi.” * Ifi e fyo Yehova ayaswike Elisha. Elisha alimweneko uko Eliya bamusendele, balimupeele ifiputulwa fibili ifya mupashi wa kwa Eliya, kabili aishilepyana kasesema Eliya.—2 Isha. 2:11-14.

Elisha alitolele ica kufwala caibela ico Eliya aponeshe kabili alifwele. Ici ca kufwala calengele Elisha eshibikwe ukuti ni kasesema wa kwa Lesa. Cimbi icalangilile ukuti Elisha ni kasesema wa kwa Lesa cipesha mano acitile ilyo apaatukenye amenshi ya mu Mumana wa Yordani.

Ukwabula no kutwishika, ifyo Elisha amwene ilyo Eliya asendelwe muli kankungwe mu muulu fyalimukoseshe sana. Kwena, umuntu fye onse kuti apapa ukumona iceleta lya nkondo ilya mulilo na bakabalwe ba mulilo! Ifi Elisha amwene, fyali cilangililo ca kuti Yehova alimupeele ifyo alombele. Lesa nga a-asuka amapepo yesu, tatumona ifimonwa fya maceleta ya nkondo aya mulilo na bakabalwe aba  mulilo. Lelo tuleluka ukuti Lesa alabomfya amaka yakwe ayakalamba ku kutwafwa no kuti ukufwaya kwakwe kucitike. Kabili nga twamona ifyo Yehova alepaala icilonganino cakwe ica pano isonde, ciba kwati tulemona iceleta lyakwe lile-enda.—Esek. 10:9-13.

Kwali ifingi ifyacitikile Elisha ifyalengele ukuti ashininkishe ukuti Yehova alikwatisha amaka. Na kuba, umupashi wa mushilo uwa kwa Lesa walengele Elisha ukucita ifipesha amano 16. Eliya ena acitile fye ifipesha amano 8. * Umuku walenga bubili uo Elisha amwene bakabalwe na maceleta ya nkondo aya mulilo ni lilya abena Siria abashilika bamushingulwike ilyo aali mu Dotani.

ELISHA ALITETEKELE YEHOVA

Nangu ca kutila abalwani balimushingulwike ilyo ali ku Dotani, Elisha tatiinine. Mulandu nshi? Pantu alitetekele sana Yehova. Na ifwe tufwile ukuba ne citetekelo icakosa. E ico, natulepepela umupashi wa mushilo uwa kwa Lesa pa kuti tube ne citetekelo e lyo ne fisabo fimbi ifya mupashi.—Luka 11:13; Gal. 5:22, 23.

Ifyacitike ku Dotani fifwile fyalengele Elisha ukucetekela sana Yehova na bamalaika bakwe. Kasesema Elisha alishibe ukuti Lesa atumine bamalaika bakwe ukushinguluka umusumba pa kuti bamucingilile ku balwani. Lesa apofwishe abalwani no kupususha Elisha no mubomfi wakwe mu cipesha amano. (2 Isha. 6:17-23) Nga fintu alecita lyonse, na pali iyi ine nshita, Elisha alitetekele Yehova kabili alimucetekele umupwilapo.

Natuletetekela Yehova Lesa nga Elisha. (Amapi. 3:5, 6) Nga twamutetekela, “Lesa akaba na ifwe no kutupaala.” (Amalu. 67:1) Ca cine ukuti bakabalwe ba mulilo na maceleta ya nkondo tayatushinguluka. Lelo mu “bucushi bukalamba” ubuleisa, Yehova akacingilila ababomfi bakwe mwi sonde fye lyonse. (Mat. 24:21; Ukus. 7:9, 14) E ico, natuleibukisha ukuti “Lesa e cubo cesu.”—Amalu. 62:8.

[Amafutunoti]

[Akabokoshi pe bula 30]

IMILANDU IMO IYO BA NTE BAWININE MU MYAKA YA NOMBA LINE

243 Imilandu iyo Inte sha kwa Yehova bawina mu filye ifikalamba mu calo conse

France Yabwesesha ba Nte Indalama

Indalama 8.2 milioni amadola ya ku America e sho ubuteko bwa France bwabweseeshe ba Nte pa 11 December, 2012, pa numa ya kulubulula pa myaka 15

Icilye Cikalamba mu Greece

Icilye Cikalamba, pa 2 November capingwile ukuti Inte sha kwa Yehova, imipepele iyaishibikwa ukuti Bena Kristu, balikwata insambu sha kukwata amayanda aya kupepelamo

20 Imilandu iyo ba Nte bawina mu European Court of Human Rights ukutula mu April 2000

South Korea — Ifyo Komiti ya U.N. Human Rights Yapingwile

Pa 25 October, 2012 - icalo ca South Korea balicipingwile ukulipila ba Nte 388 abo baikele pa nsambu shabo pantu balikeene ukwingila ubushilika pa mulandu wa fyo basuminamo