Ifyo Yehova Atwibukishako Fyalicetekelwa

“Ifyo Yehova atwibukishako fyalicetekelwa, filenga uwapelwa mano ukuba na mano.”—AMALU. 19:7.

KUTI MWAYASUKA SHANI?

Fya kutwibukishako nshi ifyo Yehova atupeela muli Baibolo?

Bushe ifyo Yehova atwibukishako fyafwa shani Abena Kristu muno nshiku?

Mulandu nshi tulingile ukucetekela ifya kwibukishako fya kwa Yehova?

1. Malyashi nshi tusambililapo ilingi line, kabili busuma nshi bwaba mu kusambilila pali aya malyashi imiku iingi?

ILYO mulepekanya Isambililo lya Ulupungu lwa kwa Kalinda nalimo mwali-ipushapo ukuti, ‘Bushe ifi fyebo tatwafisambililapo kale?’ Nga ca kuti ni kale mwatendeke ukulongana ne Nte sha kwa Yehova, mufwile mwalimona ukuti amalyashi yamo tulayasambilila imiku iingi. Ilingi, tulasambilila pa Bufumu bwa kwa Lesa, pa cilubula, pa mulimo wa kupanga abasambi, na pa mibele pamo nga ukutemwa ne citetekelo. Ukusambilila pali aya malyashi imiku iingi kulakosha icitetekelo cesu kabili kulatwafwa ‘ukulacita ifyo icebo ca kwa Lesa cisosa, te kulaumfwa fye iyo.’—Yako. 1:22.

2. (a) Mu Baibolo, amashiwi ya kuti “ifya kutwibukishako” ilingi line yapilibula finshi? (b) Bushe amafunde ya kwa Lesa yapusana shani na ya bantu?

² Muli Baibolo, amashiwi ya kuti “ifya kutwibukishako” yapilibula amafunde ne fipope ifyo Lesa apeela abantu bakwe. Amafunde ya bantu yalipusana na ya kwa Yehova. Amafunde ya bantu yalaaluka lelo aya kwa Lesa yalipwililika kabili yalicetekelwa. Nangu ca kuti Lesa apeele abantu bakwe amafunde yamo pa kuti baleyakonka pa nshita imo, ayo fwe Bena Kristu tushikonka, tacipilibula ukuti yalya mafunde tayali bwino. Uwaimbile amalumbo atile: “Ifya kutwibukishako fyenu fyalilungama umuyayaya.”—Amalu. 119:144.

3, 4. (a) Mu fya kutwibukishako fya kwa Yehova mwaba na finshi? (b) Bushe abena Israele nga banonkelemo shani mu kumfwila amafunde ya kwa Lesa?

³ Nalimo mwalimona ukuti limo mu fyo Yehova atwibukishako mwaba na mashiwi ya kutusoka. Imiku iingi, Lesa alebomfya bakasesema bakwe ukusoka abena Israele. Ku ca kumwenako, ilyo abena Israele bali fye mupepi no kwingila mu Calo ca Bulayo, Mose  abasokele ukuti: “Cenjeleni ukuti imitima yenu ikabelelekwa, ica kuti mwafuma mu nshila mwalapepa na balesa bambi no kubakontamina, na Yehova aba no bukali pali imwe.” (Amala. 11:16, 17) Baibolo ilangilila ukuti Lesa alipeele abantu bakwe ifya kubacinkulako ifingi.

⁴ Pa miku iingi, Yehova ale-eba abena Israele ukulamutiina, ukulakutika kwi shiwi lyakwe no kulacindika ishina lyakwe. (Amala. 4:29-31; 5:28, 29) Nga balyumfwilile ifyo abebele, Lesa nga alibapaalile icine cine.—Lebi 26:3-6; Amala. 28:1-4.

BUSHE ABENA ISRAELE BALYUMFWILILE AMAFUNDE YA KWA LESA?

5. Mulandu nshi Yehova alwilileko Imfumu Hisekia?

⁵ Lyonse Lesa alefikilisha amalayo alaile abena Israele. Ku ca kumwenako, ilyo Imfumu ya bena Asiria Sankeribu aishile no kwingilila icalo ca Yuda kabili alefwaya no kufumya Hisekia pa Bufumu, Yehova atumine malaika ku kwafwa abantu bakwe. Mu bushiku fye bumo, malaika wa kwa Lesa aipeye mu bashilika ba bena Asiria “umwaume onse uwakosa kabili impalume,” ica kuti Sankeribu abwelele ku calo cakwe ninshi naseebana. (2 Imila. 32:21; 2 Isha. 19:35) Mulandu nshi Lesa alwilileko Imfumu Hisekia? Pantu Hisekia “alambatile pe kuli Yehova. Talekele ukumukonka, lelo alesunga amafunde yakwe.”—2 Isha. 18:1, 5, 6.

6. Bushe Imfumu Yoshia yalangile shani ukuti yalicetekele Yehova?

⁶ Umuntu umbi uwaumfwilile amafunde ya kwa Yehova ni Mfumu Yoshia. Ukutula fye ilyo ali ne myaka 8, “acitile ifyalungama mu menso ya kwa Yehova . . . tayalukile ku kwa kulyo nangu ku kwa kuso.” (2 Imila. 34:1, 2) Yoshia alangile ukuti alicetekele Yehova ilyo aonawile ifimpashanya ifyabaswa kabili ayafwile abantu ukutendeka ukupepa Yehova na kabili. Ifi acitile fyalengele ukuti Yehova amupaale no kupaala uluko lonse.—Belengeni 2 Imilandu 34:31-33.

7.. Finshi fyalecitika abena Israele nga basuula ifyo Yehova alebacinkulako?

⁷ Lelo icabipile ca kuti abantu ba kwa Lesa limo tabaleumfwila ifyo Yehova alebacinkulako. Pa myaka iingi, limo balemumfwila e lyo limo tabalemumfwila. Icitetekelo cabo nga canaka, ilingi line balecita nga filya umutumwa Paulo alandile, e kutila ‘baletwalwa uku no ku, ku mwela onse uwe sambilisho.’ (Efes. 4:13, 14) Kabili nga filya Lesa abebele, nga bakaana ukumumfwila, balecula.—Lebi 26:23-25; Yer. 5:23-25.

8.. Finshi twingasambililako ku fyo abena Israele bacitile?

 ⁸ Finshi twingasambililako ku fyacitile abena Israele? Nga filya fine Lesa alecita ku bena Israele, na muno nshiku mwine alafunda ababomfi bakwe no kubasalapula. (2 Pet. 1:12) Lyonse ilyo tulebelenga Icebo ca kwa Lesa, cilatwibukishako amafunde yakwe. Apo twalikwata insambu sha kuisalila, kuti twasalapo ukumfwila ifyo Yehova aletweba nelyo ukucita ifyo tulemona ukuti e fyalungama. (Amapi. 14:12) Natulande pa milandu tulingile ukucetekela ifyo Yehova atucinkulako no busuma tusangamo.

MULEUMFWILA LESA PA KUTI MUKABE NO MWEO

9. Ilyo abena Israele bali mu matololo, bushe Yehova alangile shani ukuti alebatungilila?

⁹ Ilyo abena Israele batendeke ulwendo lwa mu matololo umo bali no kwenda imyaka 40, Yehova tabebele ifyo ali no kubatungulula, ukubacingilila no kubasakamana. Na lyo line, lyonse alecita ifyali no kulenga bamucetekele no kucetekela ifyo alebeba. Ifi alebatungulula ukubomfya intumba ye kumbi akasuba ne ntumba ya mulilo ubushiku, Yehova alecinkulako abena Israele ukuti alebatungilila muli lulya lwendo ulwali ulwayafya. (Amala. 1:19; Ukufu. 40:36-38) Na kabili, alebapeela fyonse ifyo balekabila. “Ifya kufwala fyabo tafyaonaike, na makasa yabo tayafimbile.” Cine cine, “tababulilwe akantu” nangu kamo.—Nehe. 9:19-21.

10. Bushe Yehova atungulula shani abantu bakwe muno nshiku?

¹⁰ Muno nshiku ababomfi ba kwa Lesa bali fye mupepi no kwingila mu calo cipya icalungama. Bushe twalicetekela ukuti Yehova alatupeela fyonse ifyo tukabila pa kuti tukapusuke “ubucushi bukalamba”? (Mat. 24:21, 22; Amalu. 119:40, 41) Ca cine ukuti Yehova tabomfya intumba ye kumbi nelyo iya mulilo ukututungulula ku calo cipya. Lelo abomfya icilonganino cakwe ukututungulula. Ku ca kumwenako, lyonse balatukoselesha ukulakosha bucibusa bwesu na Yehova ukupitila mu kubelenga Baibolo, Amapepo ya Lupwa, ukulongana lyonse e lyo no kushimikila. Bushe twalyaluka muli fimo pa kuti tulecita ifi batweba? Ukucita ifi kukatwafwa ukuba ne citetekelo cakosa pa kuti tukengile mu calo cipya.

11. Finshi ifilanga ukuti Lesa alatusakamana?

¹¹ Na kabili, ifyo icilonganino ca kwa Lesa citusambilisha filatwafwa ukupingula bwino pa fintu. Fimo ifyo tusambilila fitwafwa ukukanasakamikwa, ukukanatemwisha ifyuma no kuba ne linso ililolesha fye pa cintu cimo. Na kabili balatucinkulako pa mifwalile no kuipempenkanya, pa kusala ifya kuleseshamo icitendwe ifisuma, na pa masambililo. Kabili tontonkanyeni pa fyo batucinkulako pa fyo tufwile ukusunga bwino amayanda, imyotoka na Amayanda ya Bufumu pa kuti tafiletele ubusanso, na pa fyo tufwile ukuipekanya ku tuyofi utwingacitika. Ifi batufunda filanga ukuti Lesa alatusakamana, afwaya ukuti tube no bumi ubusuma no kuba ne nsansa.

IFYO LESA ATWIBUKISHAKO FYALYAFWILE ABENA KRISTU BA KUBALILAPO UKUBA ABA CISHINKA

12. (a) Lyashi nshi ilyo Yesu alelandapo libili libili ku basambi bakwe? (b) Lisambililo nshi ilyacindama pa kuicefya ilyo Petro ashalabile, kabili cinshi twingasambililako?

¹² Mu nshita ya batumwa, abantu ba kwa Lesa lyonse balepeelwa ifya kucinkulako. Yesu ilingi line ale-eba abasambi bakwe ukuti balingile ukuba abaicefya. Tapelele fye pa kubeba ukuti balingile ukuba abaicefya, lelo alibalangile ifyo bafwile ukucita. Pa bushiku bwa kulekeleshako ukuba pano isonde, Yesu alonganike abatumwa bakwe ku kusefya Ica Kucilila. Ilyo abatumwa bakwe  balelya, Yesu alimine no kusamba amakasa yabo. Ilingi line abalebomba uyu mulimo, basha. (Yoh. 13:1-17) Ifi Yesu acitile fyalisambilishe abasambi bakwe isambililo ilyacindama ilyo bashatalile abalaba. Ilyo papitile imyaka nalimo 30, umutumwa Petro na o uwalipo ilyo balelya umulaalilo, afundile Abena Kristu banankwe ukuba abaicefya. (1 Pet. 5:5) Ifyo Yesu acitile fifwile ukulenga ifwe bonse ukuba abaicefya.—Fil. 2:5-8.

13. Bushe mibele nshi iyacindama iyo Yesu asambilishe abasambi bakwe ukukwata?

¹³ Ilyashi limbi ilyo Yesu alesambilishapo abasambi bakwe libili libili, lya kuba ne citetekelo icakosa. Ilyo bafililwe ukufumya icibanda mu mulumendo, abasambi baipwishe Yesu ukuti: “Cinshi ico ifwe twacifililwa ukucifumya?” Yesu abaswike ukuti: “Ni pa mulandu wa citetekelo cenu icinono. Pantu ndemweba icine cine nati, Nga mwakwata icitetekelo icilingene no luseke lwa lubanga, . . . takuli ico mwingafilwa ukucita.” (Mat. 17:14-20) Ilyo Yesu alebomba umulimo wakwe pano isonde, asambilishe abasambi bakwe ukuti calicindama nga nshi ukuba ne citetekelo. (Belengeni Mateo 21:18-22.) Bushe tulabomfya ifyo batusambilisha pa kulongana kwa citungu, ukwa muputule, ukwaibela no kulongana kwa pa cilonganino ku kukosha icitetekelo cesu? Pali uku kulongana tatuba fye ne nsansa, lelo tulalanga no kuti twalicetekela Yehova.

14. Mulandu nshi cacindamina ukukwata ukutemwa kulya Kristu akweteko?

¹⁴ Mu Malembo ya Bwina Kristu aya ciGriki mwaliba sana ifya kutwibukishako pa fyo tufwile ukutemwana. Yesu atile ifunde lya bubili ilikalamba lya kuti, “uletemwa umunobe nge fyo waitemwa we mwine.” (Mat. 22:39) Yakobo munyina kwa Yesu aitile ukutemwa ukuti “ifunde lya mfumu.” (Yako. 2:8) Umutumwa Yohane atile: “Mwe batemwikwa, ifunde ndemulembela te lipya, ni lilya line ilya kale ilyo mwakwata ukufuma ku kutendeka.” (1 Yoh. 2:7, 8) Finshi ifyo Yohane alelandapo ilyo atile ‘ifunde lya kale’? Alelanda pe funde lya kutemwa. Ili funde lyali lya “kale” pantu Yesu alililandilepo imyaka iingi mu kubangilila, “ukufuma ku kutendeka.” Lelo lyali “ilipya” pantu abasambi bali no kutemwa bambi ukucila ifyo baitemenwe na lintu ifintu fyayaluka. Apo tuli basambi ba kwa Kristu, bushe tulatasha pa kusoka tupokelela ukutwafwa ukukanaba na bukaitemwe?

15. Mulimo nshi uo Yesu abikileko sana amano ilyo ali pano isonde?

¹⁵ Yesu alebika amano ku bantu. Alilangile ifi ilyo aleundapa abalwele no kuposha abalemana na lintu alebuusha abafwa.  Lelo, uyu te mulimo Yesu abikileko sana amano. Umulimo wakwe uwa kushimikila no kusambilisha e wayafwile sana abantu. Mulandu nshi? Twalishiba ukuti abo Yesu aundepe na bo abuushishe ku bafwa pali ilya nshita, balikotele kabili balifwile, lelo abaumfwile ku bukombe alebilisha bakapokelela umweo wa muyayaya.—Yoh. 11:25, 26.

16. Bushe Inte sha kwa Yehova balanga shani ukuti balomfwila ifunde lya kwa Yesu ilya kupanga abasambi?

¹⁶ Umulimo wa kushimikila uo Yesu atendeke, nomba uleshimikilwa mu calo conse. Yesu aebele abasambi bakwe ukuti: “E ico kabiyeni, kalengeni aba nko shonse ukuba abasambi.” (Mat. 28:19) Ukwabula no kutwishika, ifi fine e fyo abasambi bacitile, na ifwe e fyo tucita! Inte sha kwa Yehova ukucila pali 7 milioni balebombesha ukushimikila pa Bufumu bwa kwa Lesa mu fyalo ukucila pali 230 kabili balasambilisha abantu abengi Baibolo. Uyu mulimo wa kushimikila ulangilila kuti tuleikala mu nshiku sha kulekelesha.

CETEKELENI YEHOVA

17. Kufunda nshi uko Paulo na Petro baebele Abena Kristu banabo?

¹⁷ Ukwabula no kutwishika, ifyo Lesa atwibukishako fyalyafwile Abena Kristu ba kubalilapo ukuba ne citetekelo icakosa. Timote afwile alikoseleshiwe sana ilyo umutumwa Paulo uwali mu cifungo mu Roma amwebele ukuti: “Uleikatisha icipasho ca mashiwi ayatuntulu ayo waumfwile kuli ine.” (2 Tim. 1:13) Pa numa ya kukoselesha Abena Kristu banankwe ukuti bafwile ukuba ne mibele pamo nga ukushipikisha, ukutemwa aba bwananyina, no kuilama, umutumwa Petro atile: “Nakulabika umutima lyonse pa kumwibukishako ifi fintu, nangu ca kutila mwalifishiba kabili mwalikosa mu cine.”—2 Pet. 1:5-8, 12.

18. Bushe Abena Kristu mu nshita ya batumwa baleumfwa shani nga babeba ifya kucita?

¹⁸ Ca cine ukuti mu makalata Paulo na Petro balembele mwali “amashiwi ayalandilwe kale kuli bakasesema ba mushilo.” (2 Pet. 3:2) Bushe Abena Kristu ba mu nshita ya batumwa balefulwa nga ca kuti abalebatungulula babeba ifya kucita? Awe, balishibe ukuti Yehova e walebatungulula pantu alibatemenwe kabili alefwaya ukubafwa ‘ukukulilako mu cikuuku na mu mano ya kwishiba Shikulwifwe kabili Umupusushi wesu Yesu Kristu.’—2 Pet. 3:18.

19, 20. Mulandu nshi tulingile ukucetekela ifyo Yehova atwibukishako, kabili tunonkelamo shani?

¹⁹ Muno nshiku twalikwata ifingi ifingalenga twacetekela ifya kwibukisha fya kwa Yehova ifyaba mu Cebo cakwe, Baibolo. (Belengeni Yoshua 23:14.) Baibolo yalilanda pa fyo Lesa abombele na bantu abashapwililika pa myaka iingi. Aya malyashi ya fyalecitika kale yalembelwe ukuti tulesambililako. (Rom. 15:4; 1 Kor. 10:11) Twalimona uko ifyo ukusesema kwaba mu Baibolo kufikilishiwa. Ukusesema kwaba mu Baibolo kuti twakupashanya ku fya kutwibukishako ifyalandilwe kale. Ku ca kumwenako, abengi balisa ku kupepa ukwasanguluka ukwa kwa Yehova, nga fintu casobelwe ukuti cikacitika “mu nshiku sha ku mpela.” (Esa. 2:2, 3) Ne fyabipa ifilecitika mu calo fyalisobelwe mu Baibolo. Kabili nga fintu tulandile, umulimo wa kushimikila uulebombwa mu calo conse na o ulefikilisha amashiwi ya kwa Yesu aya kusesema.—Mat. 24:14.

²⁰ Kabumba wesu alicita ifintu ifingi ifingalenga twamucetekela. Bushe tulanonkelamo mu ifyo atwibukishako? Tulingile ukucetekela ifyo atwibukishako. Ifi e fyo ba Rosellen bacitile. Batile: “Ilyo natendeke ukucetekela sana Yehova, e lyo natampile ukumona ukuti alangafwa no kunkosha.” Na ifwe natutwalilile ukulabika amano ku fyo Yehova atwibukishako.

[Ifipusho]

[Icikope pe bula 7]

[Icikope pe bula 8]

Ifya kwibukishako fya kwa Yehova e fyalengele Yoshia ukutungilila ukupepa kwa cine (Moneni paragrafu 6)

[Icikope pe bula 10]

Ukumfwila ifya kwibukishako fya kwa Yehova kukalenga tulesunga bwino Amayanda ya Bufumu pa kuti tayaletele ubusanso (Moneni paragrafu 11)