Mulepingulapo Bwino Ifya Kucita

“Tetekela Yehova no mutima obe onse kabili wishintilila pa mano yobe we mwine.” —AMAPI. 3:5.

KUTI MWAYASUKA SHANI?

Bushe calola mwi ukuba na mano ayatuntulu ilyo tulepingulapo ifya kucita?

Finshi fingatwafwa ukulapingulapo bwino ifya kucita?

Finshi fingatwafwa ukulacita filya fine tupingwilepo?

1, 2. Bushe mwalitemwa ukupingulapo pa fintu, kabili mutontonkanyapo shani pa fintu fimo ifyo mwapingwilepo ukucita kale?

CILA bushiku, tufwile ukupingulapo ukucita ifintu ifingi. Bushe mumfwa shani ilyo mulepingulapo ukucita fimo? Abantu bamo bafwaya ukulacita fye ifyo balefwaya. Batontonkanya ukuti balikwata insambu sha kucita ifyo balefwaya kabili tabafwaya bambi ukubebako ifya kucita. Bamo nabo balikwata umwenso wa kupingulapo ifyo bafwile ukucita. E lyo bambi pa kuti bapingulepo ifya kucita, babelenga mu fitabo nelyo ukuya kuli bampanda mano kabili limo balapoosa fye ne ndalama ishingi pa kuti fye babapandeko amano.

² Fwe bengi twalishiba ukuti nangu ca kuti kwaliba fimo ifyo twingapingulapo ukucita, kwaliba na fimbi ifyo tushakwatapo insambu sha kuipingwila. (Gal. 6:5) Na lyo line, twalishiba ukuti te fyonse ifyo tupingulapo ukucita ifiba bwino.

3. Finshi fingatwafwa pa kupingulapo ifya kucita, lelo limo bwafya nshi tukwata?

³ Fwe babomfi ba kwa Yehova, twaliba ne nsansa pantu Lesa alitweba fimo ifingatwafwa ilyo tulepingula pa fintu ifyacindama. Twalishiba ukuti nga twakonka ifyo Yehova atweba, kuti twapingulapo ukucita ifingalenga asekelela kabili ifingatuwamina. Lelo kwaliba fimo ifyo tufwile ukupingulapo ifyo Baibolo ishalandapo mu kulungatika. Nomba, kuti twacita shani pa kupingula pa fintu fya musango uyu? Ku ca kumwenako, twalishiba ukuti tatufwile ukwiba. (Efes. 4:28) Nomba bushe ukwiba e kucita cinshi? Pa kuti tutile umuntu naiba, bushe tufwile ukulolesha pa mutengo wa co asendele nelyo icacilenga ukuti asende? Kuti twaishiba shani ifya kucita ilyo bambi batila takwaba amafunde ya mu kulungatika ayalanda pali uyo mulandu? Finshi fingatwafwa ukwishiba ifya kucita?

 MULEBA NA MANO AYATUNTULU

4. Ilyo tulepingulapo ifya kucita, finshi limo abantu batweba ukuti e fyo tufwile ukucita?

⁴ Nga twaeba Umwina Kristu munensu ukuti kuli fimo ifyacindama ifyo tulingile ukupingulapo, nalimo kuti atweba ukuti tufwile ukutontonkanyapo bwino ilyo tatulapingulapo ifya kucita. Nga ca kuti ifi e fyo atweba, ninshi atupanda amano ayasuma. Baibolo ilatusoka ukukanasuswa ukucita ifintu. Itila: “Onse uususwa ukucita ifintu alola ku kubulwa.” (Amapi. 21:5) Lelo bushe ifi e fyo tufwile fye ukucita pa kuti tulepingula bwino pa fintu? Bushe tufwile fye ukutekanya, ukutontonkanya pa fyo tulefwaya ukucita, ukukanapampamina fye pa cintu cimo, no kwesha ukwishiba ifishinka fyonse ilyo tushilapingulapo? Ukucita ifi fyonse kwalicindama ilyo tulepingula pa fintu, lelo Baibolo ilanda no kuti tufwile ukuba na mano ayatuntulu. Bushe ukuba na mano ayatuntulu e kuti shani?—1 Pet. 4:7.

5. Mulandu nshi limo tufililwa ukupingulapo bwino ifya kucita?

⁵ Takwaba umuntu nangu umo uupingulapo bwino lyonse pa fintu. Mulandu nshi? Pantu bonse tuli babembu kabili tatwapwililika, kanshi imibili yesu na mano yesu tafyapwililika. (Amalu. 51:5; Rom. 3:23) Na kabili inshita imo Satana ‘alipofwishe’ amatontonkanyo yesu; tatwaishibe Yehova na mafunde yakwe ayalungama. (2 Kor. 4:4; Tito 3:3) Kanshi nangu twingatontonkanyapo sana pa fyo tulefwaya ukupingulapo kabili twapingulapo ukulingana ne fyo tulemona ukuti e filungeme, limo ifyo twingapingulapo ukucita te kuti fibe bwino.—Amapi. 14:12.

6. Finshi fingatwafwa ukuba na mano ayatuntulu?

⁶ Nangu ca kutila tatwapwililika, Yehova, Shifwe wa ku muulu alipwililika muli fyonse. (Amala. 32:4) Alitupeela ifingatwafwa ukwalula amatontonkanyo yesu no kuba na mano ayatuntulu. (Belengeni 2 Timote 1:7.) Fwe Bena Kristu, tufwaya ukuti tuleba na mano ayatuntulu mu fyo tuletontonkanya na mu fyo tulecita. Kanshi tufwile ukulalama amatontonkanyo yesu no kulapashanya amatontonkanyo ya kwa Yehova ne fyo acita ifintu.

7, 8. Landeni icacitike icilelangilila ifyo twingapingula bwino pa fintu te mulandu ne fyo bambi bengatweba ukucita.

⁷ Natulande pa ca kumwenako cimo. Mu fyalo fimo mwaliba ulutambi lwa kuti abaupana nga bakuukila ku calo cimbi e lyo bakwata umwana, bafwile ukumutwala kuli balupwa ku calo uko bafuma pa kuti bakatwalilile ukubomba no kukwata indalama. * Umwanakashi umo uwakuukila ku calo cimbi alikwete umwana umwaume. Pali ilya ine nshita, alitendeke ukusambilila Baibolo kabili alelunduluka. Balupwa ne fibusa batampile ukupatikisha uyu mwanakashi no mwina mwakwe ukuti batwale umwana ku bafyashi ba mulume ku calo bafumine. Lelo ilyo alesambilila Baibolo, uyu mwanakashi aishileishiba ukuti apo e wali umufyashi wa mwana, Lesa alimupeele umulimo wa kukusha umwana wakwe. (Amalu. 127:3; Efes. 6:4) Bushe ali no kukonka ulutambi ulo abengi balemona ukuti lwali fye bwino? Nelyo bushe ali no kucita ifyo alesambilila muli Baibolo nangu ca kuti ici cali no kulenga ukuti elakwata indalama ishingi kabili na bantu ukulamupumya? Bushe amuba ni mwe, nga mwacitile shani?

⁸ Uyu mwanakashi alisakamene sana pa fyo abantu balemupatikisha. E ico apepele kuli Yehova, alimulondolwelele ifyo aleumfwa kabili amulombele ukuti amwafwe pa kuti eshibe ifya kucita. Ilyo alanshenye no walemusambilisha Baibolo e lyo na bambi mu cilonganino pali ubu  bwafya, atendeke ukumona ifyo Yehova alandapo. Na kabili atontonkenye na pa fyo umwana akalaumfwa nga akula ukwabula abafyashi bakwe. Pa numa ya kutontonkanya sana pa fyo Amalembo yalanda, apingwilepo ukukanatwala umwana ku bafyashi. Ilyo abena mwakwe bamwene ifyo aba mu cilonganino babafwile ne fyo umwana alekula bwino, balisumine ukusambilila Baibolo kabili nabo balitendeke ukulongana.

9, 10. Bushe calola mwi ukuba na mano ayatuntulu, kabili kuti twacita shani pa kuba na aya mano?

⁹ Ici ca kumwenako fye cimo pa fya kumwenako ifingi ifyo twakwata, lelo tulesambililako ukuti ukuba na mano ayatuntulu tacalola mu kuti tufwile ukucita fye ifyo fwe bene nelyo ifyo bambi baletontonkanya ukuti fili fye bwino atemwa e fyangwike ukucita. Amatontonkanyo yesu ayashapwililika no mutima kuti twafipashanya ku nkoloko iitangile nelyo iishalile. Nga ca kutila inkoloko ya musango uyu e yo tuleloleshapo, kuti twaba mu bwafya ubukalamba. (Yer. 17:9) Pa kuti tatuiletelele, tufwile ukuleka amatontonkanyo yesu no mutima ukulatungululwa na mafunde ya kwa Lesa.—Belengeni Esaya 55:8, 9.

¹⁰ E mulandu wine Baibolo itufundila ukuti: “Tetekela Yehova no mutima obe onse kabili wishintilila pa mano yobe we mwine. Uko konse wenda umwishibe, na o akatambalika inshila shobe.” (Amapi. 3:5, 6) Baibolo yatila “wishintilila pa mano yobe we mwine.” Yalanda no kuti “umwishibe [Yehova].” Yehova fye e wakwata amano ayapwililika. Kanshi lyonse ilyo tulefwaya ukupingula pa fintu, tufwile ukubelenga muli Baibolo pa kuti twishibe ifyo Lesa atontonkanyapo. Lyena tufwile ukupingulapo ukulingana ne fyo Baibolo ilanda. Nga twacita ifyo, ninshi tulebomfya amano ayatuntulu, e kutila tulepashanya ifyo Yehova atontonkanya.

BENI NA MANO YA KULEKANYA ICALUNGAMA NE CALUBANA

11. Finshi tufwile ukucita pa kuti tulepingula bwino pa fintu?

¹¹ Tacayanguka ukwishiba ifya kupingula bwino pa fintu no kucita ifyo fine twapingulapo. Abo cafya sana ukucita ifi, ni balya aba kuti e lyo fye babatishiwe nelyo  abatendeke ukucita ifyo balesambilila. Lelo aba bantu abo Baibolo ita ukuti abacece mu fya kwa Lesa kuti balunduluka sana. Tontonkanyeni pa fyo umwana umunono acita ilyo alesambilila ukwenda. Pa kuti eshibe ukwenda ukwabula ukupona, umwana alatampula ututampulo utunono, kabili alacita ifi lyonse pa kuti abeleshe. Ifi fine e fyo no mucece mu fya kwa Lesa afwile ukulacita ilyo alepingula pa fintu. Muleibukisha ukuti umutumwa Paulo alandile pa bantu abakalamba ukuti “abo ukupitila mu kubelesha balikwata amano aya kulekanya icalungama ne calubana.” Amashiwi ya kutila “ukupitila mu kubelesha” yalola mu kuti tufwile ukuibikilishako pa kuti tulepingulapo bwino pa fintu, kabili ifi fine e fyo abapya bafwile ukulacita.—Belengeni AbaHebere 5:13, 14.

12. Langilileni ifyo twingeshiba ifya kulekanya icalungama ne calubana?

¹² Nga fintu tulandilepo kale, cila bushiku tulapingulapo ukucita ifintu ifyalekanalekana, ifinono ne fikalamba. Abafwailisha pa fintu bamo batile, ifingi ifyo tucita tatutontonkanyapo no kutontonkanya lelo tuficita fye pantu twalibelesha ukuficita. Ku ca kumwenako, cila lucelo mufwile mulapingulapo ifyo mwalafwala. Nalimo kuti mwamona kwati ukusala ifyo mwalafwala te cintu icacindama ico mufwile no kutontonkanyapo, maka maka nga namupamfiwa. Lelo calicindama ukutontonkanya pa fyo mulefwala, nampo nga nafilinga ku mubomfi wa kwa Yehova nelyo iyo. (2 Kor. 6:3, 4) Ilyo muleshita ica kufwala, nalimo mutontonkanya fye pa fyo bacibila ne fyo cilemoneka, lelo bushe mulatontonkanya na pa mutengo nelyo nga ca kuti ico ca kufwala ca mucinshi? Nga tulepingulapo bwino pa fintu fya musango uyu cikatwafwa ukuba na mano ya kulekanya icalungama ne calubana, kabili tukalapingulapo bwino na pa fintu ifyacindama.—Luka 16:10; 1 Kor. 10:31.

MULEFWAISHA UKUCITA ICALUNGAMA

13. Cinshi cingatwafwa ukucita filya fine tupingwilepo ukucita?

¹³ Bonse twalishiba ukuti ukupingulapo ukucita fimo kwalipusana no kutwalilila ukucita ifyo fine. Ku ca kumwenako, abantu bamo abafwaya ukuleka ukupeepa fwaka balafilwa pantu tababa no mupampamina wa kuleka. Pa kuti baleke, bafwile ukulafwaisha ukucita ifyo fine bapingulapo. Nomba kuti twacita shani pa kuti tulefwaisha ukucita ifyo tupingwilepo? Tufwile ukushintilila pali Yehova.—Belengeni Abena Filipi 2:13.

14. Cinshi calengele ukuti Paulo abe na maka ya kucita ifyo aishibe ukuti e fyo alingile ukulacita?

¹⁴ Paulo alishibe ukuti tacayanguka ukucita icalungama. Atile: “Muli ine amaka ya kufwaya ukucita icisuma e mo yaba, lelo amaka ya kucicita e yashabamo.” Alishibe ifyo alingile ukucita lelo limo alefilwa ukuficita. Atile: “Mu mutima wandi mwena nalitemwisha amafunde ya kwa Lesa, lelo ine mona mu filundwa fyandi ifunde limbi lilelwa ne funde lya matontonkanyo yandi no kulantwala bunkole kwi funde lya lubembu ilili mu filundwa fyandi.” Bushe takwete isubilo? Alikwete, atile: “Ndetootela Lesa pantu akampususha muli Yesu Kristu Shikulwifwe!” (Rom. 7:18, 22-25) Alandile no kuti: “Muli fyonse ndi na maka pantu kuli uulenkosha.”—Fil. 4:13.

15. Mulandu nshi tulingile ukupampamina pa kucita ifisuma?

¹⁵ Pa kuti tusekeshe Lesa, tufwile ukupingulapo ukucita icalungama no kupampamina pa kucita ifyo fine. Ibukisheni amashiwi Eliya aebele bakapepa ba kwa Baali na bena Israele bacipondoka pa Lupili lwa Karmele. Atile: “Bushe kufika lilali mukaba aba mitima ibili? Nga Yehova e Lesa wa cine, mukonkeni; nga ni Baali, mukonkeni.” (1 Isha. 18:21) Abena Israele balishibe ifyo balingile ukucita, lelo bali  ne “mitima ibili.” Lelo Yoshua ena te fyo ali. Aebele abena Israele ukuti: “Nga tamulefwaya ukubombela Yehova, salenipo mwe bene lelo uo mwakulabombela . . . Lelo ine na ba mu ng’anda yandi twakulabombela Yehova.” (Yosh. 24:15) Mapaalo nshi ayafumine mu fyo acitile? Yoshua na bonse abatwalilile ukuba nankwe balibapeele Icalo ca Bulayo, umwali “umukaka no buci.”—Yosh. 5:6.

NGA MULEPINGULAPO BWINO PA FINTU, MUKAPAALWA

16, 17. Langilileni ubusuma bwaba mu kupingulapo ifintu ukulingana no kufwaya kwa kwa Lesa.

¹⁶ Natulande pali munyinefwe uwabatishiwe fye nomba line. Alyupa kabili alikwata na bana batatu. Bushiku bumo, uo alebomba nankwe amwebele ukuti bakayeingila incito ku kampani uko bakalafola indalama ishingi kabili bakalabapeela ifintu na fimbi ifisuma. Uyu munyinefwe alitontonkenyepo no kupepelapo pa fyo bamwebele. Icalengele ukuti engile incito kuli iyi kampani uko alefola indalama ishinono mulandu wa kuti talefwaya ukulabomba pa mpela ya mulungu pa kuti alekwata inshita ya kulongana e lyo no kulashimikila pamo no lupwa. Atontonkenye ukuti nga ayaingila incito ku kampani imbi nalimo takalekwata inshita ya kucita ifyacindama. Nga ni mwe nga mwacitile shani?

¹⁷ Pa numa ya kutontonkanya pa fyo incito yali no konaula bucibusa bwakwe na Yehova, uyu munyinefwe alikeene ukwingila iyi ncito. Bushe muletontonkanya ukuti alilangulwike pa fyo asalilepo ukucita? Awe nakalya. Alishibe ukuti icacindeme sana kuli ena na ku lupwa lwakwe kuba cibusa wa kwa Lesa, te ndalama ishingi isho ali no kulafola. Uyu munyinefwe no mwina mwakwe balitemenwe sana ilyo umwana wabo uuli ne myaka 10 abebele ukuti alibatemwa, alitemwa bamunyina na bankashi, kabili alitemwa sana Yehova. Abebele ukuti alefwaya ukuipeela kuli Yehova no kubatishiwa. Icamwafwile sana, alemona ifyo bawishi batemenwe ukubombela Yehova!

18. Mulandu nshi cacindamina ukuti tulepingulapo bwino ifya kucita cila bushiku?

¹⁸ Nga filya Mose atungulwile abena Israele mu matololo, Yesu Kristu na o alitungulula abantu ba kwa Lesa mu calo ca kwa Satana pa myaka iingi. Kabili nga filya Yoshua atungulwile abena Israele mu Calo ca Bulayo, Yesu ali no konaula cino calo cabipa no kwingisha abasambi bakwe mu calo cipya, umukaba ubulungami. (2 Pet. 3:13) Kanshi ino te nshita ya kubwelela ku mibele ya kale, ku matontonkanyo ya kale, ku fyo twacindamike sana nelyo ku fyo twalefwaisha ukucita. Ino ni nshita ya kwishiba bwino icaba ukufwaya kwa kwa Lesa. (Rom. 12:2; 2 Kor. 13:5) Lekeni ifyo mupingulapo ne fyo musalapo ukucita cila bushiku filelanga ukuti muli musango wa bantu abo Lesa akapaala ku ciyayaya.—Belengeni AbaHebere 10:38, 39.

[Futunoti]

[Ifipusho]

[Icikope pe bula 22]

[Icikope pe bula 24]

Nga tulepingula bwino pa fyo tucita cila bushiku, cikatwafwa ukulapingula bwino na pa fintu ifyacindama (Moneni paragrafu 11)

[Icikope pe bula 26]

Nga mulepingulapo bwino pa fintu mukalasekelela pamo na bantu ba kwa Lesa (Moneni paragrafu 18)