Ukubombela Lesa E Muti Wakwe!

Ilyo bapainiya babili ku Kenya baingile mu ng’anda imo ifi, balipapile ifyo bamwene. Bamwene umuntu uwakwata utumolu utwipi sana no tumaboko nalaala pa busanshi. Ilyo balanshenye nankwe pa bulayo bwa kwa Lesa ubwa kuti “uwalemana amolu akacilauka nge nsebula,” uyu mwaume alitemenwe sana.—Esa. 35:6.

Bapainiya baishileishiba ukuti ba Onesmus, abali ne myaka nalimo 40, bafyelwe no bulwele ububi sana, amafupa yabo yalakontaika (osteogenesis imperfecta). Amafupa yabo yalinaka sana ica kuti icili conse nga cabatininkishako fye panono ninshi amafupa kutobeka. Apo takwaba umuti wa kuposha ubu bulwele, ba Onesmus balakalipwa sana umubili kabili te kuti baicitile icili conse, bekala fye pa ncinga ya kwendelapo.

Ba Onesmus balisumine ukulasambilila Baibolo. Lelo banyina balibakenye ukulaya mu kulongana pantu baletiina ukutila kuti baicena kabili umubili wakulakalipa sana. E ico bamunyinefwe balekopa amalyashi no kutwalila ba Onesmus ku ng’anda pa kuti balekutikako. Pa numa ya kusambilila Baibolo pa myeshi isano, ba Onesmus bapingwilepo ukulaya ku kulongana nangu ca kuti ukucita ifyo kwali no kubalenga ukulwalilako.

Bushe ukusangwa ku kulongana kwalilengele ukuti ba Onesmus balelwalilako? Awe nakalya. Ba Onesmus batile: “Nga ndi mu kulongana umubili taukalipa sana.” Bamwene ukuti icine balesambilila e calengele ukuti baleumfwako bwino. Banyina ba ba Onesmus balimwene ukuti abana babo balemoneka aba nsansa kabili balitemenwe ica kuti nabo balitendeke ukusambilila Baibolo. Batemenwe ukulanda ati: “Ukubombela Lesa e muti wa mwana wandi.”

Tapakokwele, ba Onesmus baishileba bakasabankanya abashabatishiwa. Mu kupita kwa nshita, balibatishiwe kabili pali ino nshita babomfi batumikila. Nangu ca kuti amolu no kuboko kumo tafibomba, ba Onesmus balafwaya ukubombesha mu mulimo wa kwa Yehova. Balefwaya ukubombako bupainiya bwa kwafwilisha nomba baleshimunuka ukulembesha. Mulandu nshi? Pantu balishibe ukuti lyonse pa kuya mu kushimikila bakalakabila uwa kubensha pa ncinga iyo bendelapo. Ilyo baebeleko aba bwananyina mu cilonganino, babebele ukuti bakalabomba nabo. Kabili ifi fine e fyo bacitile, balyafwile ba Onesmus ukubombako bupainiya bwa kwafwilisha.

E fyo cali na lintu ba Onesmus balefwaya ukutendeka ukubomba bupainiya bwa nshita yonse, balisakamene. Lelo bushiku bumo, ilembo lya bushiku lyalibakoseleshe icine cine. Lyafumine pa Amalumbo 34:8 apatila: “Sondeni no kumona ukuti Yehova musuma.” Pa numa ya kutontonkanya pali ili lembo, ba Onesmus bapingwilepo ukutendeka bupainiya. Pali ino nshita, bashimikila inshiku shine mu mulungu kabili balikwata na masambililo ya Baibolo ayalunduluka. Mu 2010, balisangilwe kwi Sukulu lya Bapainiya. Ba Onesmus balitemwe nga nshi pantu munyinefwe umo pali balya ababashimikile umuku wa kubalilapo e wali kafundisha wabo!

Pali ino nshita abafyashi ba ba Onesmus balifwa, lelo bamunyinefwe na bankashi e babasakamana. Balatasha nga nshi pa fyo bapaalwa, kabili balafwaisha ukwisaikala mu calo umo “takuli umwikashi uukatila: ‘Nindwala.’”—Esa. 33:24.