BUSHE MULEIBUKISHA?

Bushe mwalibelenga bwino bwino bamagazini ba Ulupungu lwa kwa Kalinda aba nomba line? Moneni nga kuti mwayasuka ifipusho ifili pe samba:

Ni lilali Yesu ‘abilile ku mipashi iyaba mu cifungo’? (1 Pet. 3:19)

Cimoneka kwati ilyo Yesu abuushiwe, e lyo abilile kuli iyi mipashi yabipa ukuti yali no kukandwa.—6/15, ibula 23.

Fintu nshi fitatu ifingafwa abaingila mu cupo na kabili ukulaikala bwino?

Fintu pamo nga: ukukanaleka icupo ca pa kubala ukuleta amafya mu cupo cenu; ukulaba pamo ne fibusa fya kale abashaishiba abena mwenu abo muli nabo nomba; ukucetekela abena mwenu nangu ca kutila abaali abena mwenu tabaali ne cishinka.—7/1, amabula 9-10.

Ni lilali Yesu akapingula abantu ukuti ni mpaanga nelyo imbushi? (Mat. 25:32)

Ilyo akesa mu kupingula abantu mu bucushi bukalamba, pa numa ya konaulwa kwa mipepele ya bufi.—7/15, ibula 6.

Ni lilali bampulamafunde abalandwapo mu cilangililo ca ngano ne fyani bakalila no kusumanya ameno? (Mat. 13:36, 41, 42)

Ni mu bucushi bukalamba ilyo bakeshiba ukuti tabapusuke ubonaushi.—7/15, ibula 13.

Bushe amashiwi Yesu alandile pa musha wa cishinka kabili uwashilimuka yafikilishiwe lilali? (Mat. 24:45-47)

Aya mashiwi yatendeke ukufikilishiwa pa numa ya 1914, te pa Pentekoste mu 33 C.E. Mu 1919, umusha balimusontele ukuba kangalila pa fyuma, apaba na Bena Kristu bonse abo bapekanishisha ifya kulya fya ku mupashi.—7/15, amabula 21-23.

Ni lilali Yesu akasonta umusha pa fyuma fyakwe fyonse?

Ni ku ntanshi mu bucushi bukalamba ilyo umusha wa cishinka akapokelela icilambu mu muulu.—7/15, ibula 25.

Bushe abo bashalumbula amashina mu Baibolo baali ne mibele yabipa nelyo tabaali abacindama sana?

Iyo. Baibolo tayalumbula amashina ya bantu bamo abali abasuma na bamo abali ababipa. (Ruti 4:1-3; Mat. 26:18) Pali bamalaika bonse aba cishinka, Baibolo yalumbulapo fye babili.—8/1, ibula 10.

Ukulunda pa maka ayo Lesa abapeele, cinshi cimbi icayafwile ba Nte 230 abafumine mu nkambi ya kucushishamo abantu iya Sachsenhausen ukupusuka ulwendo ulutali ulwa ku mfwa?

Nangu ca kutila tabakwete amaka pa mulandu wa nsala no kulwala, balekoseleshanya ukutwalilila abakosa.—8/15, ibula 18.

Mulandu nshi ilyashi lya fyo abena Israele bayabwike Umumana wa Yordani pa kwingila mu Calo ca Bulayo litukoselesesha?

Nangu ca kutila umumana walipoosele, Yehova alipaatukenye amenshi pa kuti abantu bakwe baabuke. Ici cacitike cifwile calilengele abena Israele ukutetekela sana Lesa no kumucetekela. Na ifwe bene ili lyashi kuti lyatukoselesha.——9/15, ibula 16.

Bushe ifi Baibolo ilanda sana pa malangi fitulanga finshi?

Fitulanga ukuti Lesa alishiba ukuti amalangi yalakuma ifyo abantu bomfwa no kuti yalatwafwa ukwibukisha ifintu.—10/1, amabula 14-15.

Bushe ukusesema kwa pali Mika 5:5 ukulanda pali bacilolo na bakacema kulefikilishiwa shani muno nshiku?

Twalishiba ukuti ‘bakacema 7 na bacilolo 8’ abo Mika 5:5 ilandapo ni baeluda abasontwa abalekosha abantu ba kwa Lesa ku kusansa ukuli ku ntanshi.—11/15, ibula 20.

Mulandu nshi tukabila Lesa?

Tulakabila ubutungulushi ubusuma no kwishiba umulandu tuculila kabili ni Lesa fye e wingatutungulula no kutweba umulandu tuculila. Alafwaya ukutwafwa pa kuti tuleikala bwino no kuba ne nsansa kabili akafikilisha fyonse ifyo atulaya mu Cebo cakwe.—12/1, amabula 4-6.