Bushe Kuti Mwaipeelesha pa Mulandu wa bufumu?

“Lesa atemwa uupeela ne nsansa.”—2 KOR. 9:7.

AMALEMBO YA KUTONTONKANYAPO

Bushe aya malembo kuti yamwafwa shani ukutontonkanya pa fyo mwaipeelesha ukubomba imilimo ya Bufumu?

1 Imilandu 29:9

1 Abena Korinti 16:1, 2

2 Abena Korinti 8:12

1. Finshi ifyo abantu abengi baipeelesha ukucita, kabili mulandu nshi?

ABANTU balaipeelesha ukucita ifintu ifyo bamona ukuti fyalicindama. Abafyashi balaipeelesha ukubomfya inshita yabo, indalama, na maka pa kuti fye abana babo baleikala bwino. Abacaice abangala amangalo ya kucimfyanya bapoosa inshita iikalamba mu kutukusha umubili no kuikansha ilyo abanabo baleangala. Yesu na o ali-ipeeleshe pa kuti acite ifintu ifyali ifyacindama. Talefwaya ukulaikala imikalile ya busambashi, kabili takwete abana. Lelo asalilepo ukubombesha mu mulimo wa Bufumu. (Mat. 4:17; Luka 9:58) Abasambi bakwe nabo balishiile fyonse ifyo balecita pa kuti balebombesha mu mulimo wa Bufumu. Umulimo wa Bufumu e wali uwacindama sana kuli bena, kabili bali-ipeeleshe pa kuti balebombesha muli uyu mulimo. (Mat. 4:18-22; 19:27) Kanshi kuti twayipusha atuti, ‘Finshi nacindamika sana mu bumi bwandi?’

2. (a) Fintu nshi ifyacindama ifyo Abena Kristu ba cine baipeelesha ukucita? (b) Milimo nshi imbi iyo bamo babombako iilanga ukuti bali-ipeelesha?

² Ifintu fimo ifyo Abena Kristu ba cine baipeelesha ukucita fyalicindama sana kabili filalenga baba ifibusa na Yehova. Pa fyo tuipeelesha ukucita paba ukubomfya inshita yesu na maka ku kupepa, ku kubelenga Baibolo, ku mapepo ya lupwa, ku kulongana, no kushimikila. * (Yosh. 1:8; Mat. 28:19, 20; Heb. 10:24, 25) Pa mulandu wa kuti tulabombesha kabili Yehova alatupaala, umulimo wa kushimikila ulebombwa bwangu, kabili abantu abengi balekonkomokela ku “lupili lwa ng’anda ya kwa Yehova.” (Esa. 2:2) Pa kuti babombeshe mu mulimo wa Bufumu, abengi bali-ipeelesha ukubombela pa Bethel,  ukukuula Amayanda ya Bufumu ne Fikuulwa fya Kulonganinamo Ukulongana Kukalamba, ukupekanya ukulongana kukalamba, nelyo ukwafwilisha abaponenwe no tuyofi. Ukuipeelesha ukubomba iyi milimo te kwingalenga umuntu ukuba no mweo wa muyayaya, lelo kwalicindama ku kutwala pa ntanshi umulimo wa Bufumu.

3. (a) Busuma nshi bwaba mu kuipeelesha ukubomba imilimo ya Bufumu? (b) Mepusho nshi tufwile ukuyipusha?

³ Ababomfi abengi aba kubomba imilimo ya Bufumu balefwaikwa sana. Tulatemwa ukumona uko abengi baleipeelesha ukubombela Yehova. (Belengeni Amalumbo 54:6.) Nga twaipeelesha, tukaba ne nsansa kabili Lesa akatupaala ilyo tulelolela Ubufumu bwakwe. (Amala. 16:15; Imil. 20:35) Lelo ifwe bonse tufwile ukuiceeceeta no kuyipusha atuti, Bushe pali fimbi ifyo twingacita pa kuti tulebombesha mu mulimo wa Bufumu? Bushe tubomfya shani inshita yesu, indalama, amaka ne fyo twacenjelamo? Finshi tushilingile ukulekelesha ilyo tuleipeelesha ukubomba imilimo ya Bufumu? Natulande pa fyo twingasambililako ku malambo ayo abena Israele baleitemenwa ukutuula pa kuti tuleba sana ne nsansa.

AMALAMBO AYO ABENA ISRAELE BALETUULA

4. Bushe abena Israele balenonkelamo shani mu kutuula amalambo?

⁴ Pa kuti abena Israele belelwe imembu, balingile ukutuula amalambo. Na pa kuti umuntu apaalwe na Yehova alekabila ukutuula amalambo. Amalambo yamo baleyatuula pa mulandu wa kuti lyali lifunde e lyo yambi baleyatuula fye mu kuitemenwa. (Lebi 23:37, 38) Umutuulo wa koca uo baletuula wali mutuulo wa kuitemenwa nelyo ubupe kuli Yehova. Ilyo kwali ukupeela itempele mu nshiku sha kwa Solomone, abantu balituulile amalambo ayengi kuli Yehova.—2 Imila. 7:4-6.

5. Cinshi Yehova acitile pa kuti na bapiina nabo baletuula amalambo?

⁵ Yehova alishibe ukuti abena Israele teti batuule amalambo yamo yene, e ico abebele ukutuula fye ifyo bengakumanisha. Mu mafunde yakwe, Yehova atile umulopa wa nama walingile ukusuuma, pantu wali e “cinshingwa ca fintu ifisuma ifikesa” ukupitila mu Mwana wakwe, Yesu. (Heb. 10:1-4) Lelo Yehova tatile umuntu onse afwile fye ukutuula inama. Ku ca kumwenako, Lesa alisuminishe abantu abashakwete inama ukutuula ifipeele. Kanshi, na bapiina nabo  baletuula amalambo kuli Yehova kabili baleba ne nsansa. (Lebi 1:3, 10, 14; 5:7) Nangu ca kuti amalambo ya nama ayo baletuula yaleba ayapusanapusana, kwali ifintu fibili ifyo Yehova alefwaya ukuti abaletuula balecita.

6. Bushe uwaletuula umutuulo alingile ukucita finshi, kabili mulandu nshi ukucita ifi kwacindamine?

⁶ Ica kubalilapo, uwaletuula umutuulo alingile ukutuula umutuulo uusuma nga nshi. Yehova aebele abena Israele ukuti bafwile fye ukutuula inama iisuma pa ‘kuti bapokelelwe.’ (Lebi 22:18-20) Nga batuula inama iyalemana, Yehova talepokelela ilambo. Ica bubili, umuntu uwaletuula umutuulo alingile ukuba uwa busaka kabili uwasanguluka. Nga nakowela afwile ukutuula umutuulo wa pa lubembu nelyo uwa pa mulandu ilyo ashilatuula umutuulo wa kuitemenwa pa kuti Yehova amupokelele. (Lebi 5:5, 6, 15) Ukucita ifi kwalicindeme sana. Yehova atile nga ca kuti umuntu nakowela e lyo alyako ilambo lya mutende, alingile ukwipaiwa. (Lebi 7:20, 21) Lelo nga ca kuti umuntu uuletuula ilambo nasanguluka kabili ne nama aletuula taikwete ubulema, uuletuula aleumfwa bwino kabili aleba ne nsansa.—Belengeni 1 Imilandu 29:9.

AMALAMBO TUTUULA MUNO NSHIKU

7, 8. (a) Bushe abaipeelesha ukubomba umulimo wa Bufumu banonkelamo shani? (b) Finshi twakwata ifyo twingapeela Yehova?

⁷ Muno nshiku abengi balaipeelesha mu mulimo wa kwa Yehova, kabili Yehova alatemwa pa milimo babomba. Ukubombela bamunyinefwe, kulatuletela sana insansa. Munyinefwe umo uukuulako Amayanda ya Bufumu no kwafwilisha abaponenwe no tuyofi atile, te kuti alondolole insansa akwata pa kubombako uyu mulimo. Alandile ukuti, “Nga namona ifyo bamunyinefwe baba ne nsansa ilyo batendeka ukulonganina mu Ng’anda ya Bufumu iipya nelyo nga bapokelela ubwafwilisho pa numa ya kayofi, ndomfwa bwino sana kabili imona imilimo iyo mombako ukuti taiya fye nga mu menshi.”

⁸ Icilonganino ca kwa Yehova ica muno nshiku calibika amano ku kutungilila umulimo wa kwa Yehova. Mu 1904, munyinefwe C. T. Russell alembele ukuti: “Cila muntu afwile ukuimona ukutila Shikulu e wamusala ukuba kangalila pa nshita yakwe, amaka, indalama na fimbi ifyo akwata, kabili cila muntu afwile ukubomfya ifi fintu no mweo onse ku kucindika Shikulu.” Nangu ca kuti tufwile ukuipeelesha pa  kuti tutuule amalambo kuli Yehova, na lyo line tulapaalwa sana pa kuipeelesha kwesu. (2 Sam. 24:21-24) Bushe kuti twacitapo fimo pa kuti tulebomfya bwino ifyo twakwata?

9. Finshi twingasambilila ku mashiwi Yesu alandile ayaba pali Luka 10:2-4 pa fyo tufwile ukulabomfya inshita?

⁹Inshita yesu. Palakabila inshita iikalamba no kubombesha pa kuti bapilibule no kupulinta impapulo, bakuule ififulo fya kupepelamo, bapekanye ukulongana kukalamba, bafwe abaponenwe no tuyofi e lyo no kubomba imilimo iingi iyalekanalekana. Mu bushiku bumo twakwata fye ama-awala 24. Yesu alilandile pa fingatwafwa ukubomfya bwino inshita. Ilyo atumine abasambi bakwe mu kushimikila, abebele ukuti “mwiposha umuntu nangu umo mu nshila.” (Luka 10:2-4) Mulandu nshi Yesu abebele aya mashiwi? Uwasoma Baibolo umo atile: “Abena Kabanga tabaleposhanya nge fi tuposhanya ino nshita, ica kuti umuntu ainama fye panono, nelyo atambika fye ukuboko; lelo bena balekumbatana imiku iingi, e lyo no kwinama, nangu fye ukulakunkula pa nshi. Pa kuti bacite fyonse ifi balepoosa inshita iikalamba.” Ifi Yesu aebele abasambi bakwe aya mashiwi talebasambilisha ukukanaba no mucinshi. Lelo, alefwaya beshibe ukuti bakwete fye inshita iinono kabili balingile ukuibomfya bwino ku kucitamo ifintu ifyacindeme sana. (Efes. 5:16) Ala kuti cawama na ifwe nga twalikonkele aya mashiwi Yesu aebele abasambi bakwe pa kuti tulekwata inshita iikalamba iya kubombako imilimo ya Bufumu!

10, 11. (a) Bushe indalama tusangula ku mulimo wa mwi sonde lyonse shibomfiwa shani? (b) Bushe mashiwi nshi ayaba pali 1 Abena Korinti 16:1, 2 ayengatwafwa?

¹⁰Indalama shesu. Indalama ishingi nga nshi shilakabilwa pa kutungilila imilimo ya Bufumu. Cila mwaka indalama amamilioni ayengi shilabomfiwa ku kusakamana bakangalila benda, bapainiya baibela, na bamishonari. Ukutula mu 1999, Amayanda ya Bufumu ukucila pali 24,500 yalikuulwa mu fyalo ifipiina. E lyo kabili, Amayanda ya Bufumu mupepi na 6,400 yalekabilwa. Cila mweshi magazini ya Ulupungu lwa kwa Kalinda na Loleni! iyo bapulinta ilafika amamilioni 100. Iyi milimo yonse itungililwa ne misangulo iyo imwe musangula mu kuitemenwa.

¹¹ Umutumwa Paulo alilandile pa fyo twingacita nga tulefwaya ukusangwilako. (Belengeni 1 Abena Korinti 16:1, 2.) Paulo akoseleshe aba bwananyina ba mu Korinti ukupaatulapo indalama sha kusangula ilyo umulungu watendeka, te kulolela ukuti umulungu upwe pa kuti bamone indalama ishikashalapo e lyo bakasangule. Nga filya bamunyinefwe mu nshita ya batumwa balecita, na muno nshiku mwine bamunyinefwe abengi balapaatwilapo libela indalama isha kusangula ukulingana ne sho bakwete. (Luka 21:1-4; Imil. 4:32-35) Yehova alatasha sana pali bukapekape bwa musango uyu.

12, 13. Finshi fingalenga bamo ukukanabomfya amaka yabo ne fyo bacenjelamo mu mulimo wa Bufumu, lelo bushe Yehova kuti abafwa shani?

¹²Amaka yesu ne fyo twacenjelamo. Yehova alatwafwa nga tulebomfya amaka yesu ne fyo twacenjelamo mu mulimo wa Bufumu. Alitulaya ukutwafwa nga twanaka. (Esa. 40:29-31) Bushe tuimona ukuti tapali nangu fimo ifyo twaishiba ifyo twingacita mu mulimo wa Bufumu? Bushe tutontonkanya ukuti kwaliba bambi abengabomba bwino imilimo ukutucila? Muleibukisha ukuti Yehova kuti atwafwa ukubomba bwino nga filya ayafwile Besalele na Oholiabu.—Ukufu. 31:1-6; moneni icikope cili pa ntendekelo ya cino cipande.

¹³ Yehova atukoselesha ukuti tulemupeela ifisuma. (Amapi. 3:27) Ilyo abaYuda mu Yerusalemu balekuula itempele cipya cipya, Yehova abebele ukutontonkanya pa fyo balecita ku kwafwilisha umulimo wa kukuula. (Hag. 1:2-5) Balipumbwilwe kabili  tababikile amano ku mulimo wa kwa Yehova. Tufwile ukumona nga ca kuti ifyo twacindamika e fyo na Yehova amona ukuti e fyacindama. Bushe kuti ‘twatontonkanya bwino pa mibele yesu’ pa kuti tulebombesha mu mulimo wa Bufumu muli shino nshiku sha kulekelesha?

UKUPEELA UKULINGANA NE FYO TUKWETE

14, 15. (a) Finshi twingasambilila ku fyo bamunyinefwe abapiina bacita? (b) Cinshi tufwile ukulafwaisha ukucita?

¹⁴ Abantu abengi bekala mu fyalo ifipiina. Icilonganino cesu cilabombesha ukwafwa bamunyinefwe ababa muli ifi fyalo ifipiina. (2 Kor. 8:14) Na lyo line, bamunyinefwe abapiina nabo balaitemenwa ukupeela. Yehova alatemwa sana nga amona uko bamunyinefwe abapiina balepeela ne nsansa.—2 Kor. 9:7.

¹⁵ Mu calo cimo icipiina mu Africa, bamunyinefwe balipaatulako ulubali lumo ulwe bala umo balima ifya kushitisha pa kuti balesangamo indalama sha kusangula ku mulimo wa Bufumu. Muli ici cine calo, balipekenye ukutendeka ukukuula Ing’anda ya Bufumu iyo balekabila sana. Bamunyinefwe balefwaisha ukubombako uyu mulimo. Lelo inshita bali no kutendeka ukukuula Ing’anda ya Bufumu, e nshita balima no kubyala imbuto. Na lyo line, apo bamunyinefwe balefwaisha ukubombako, baleya mu kukuulako Ing’anda ya Bufumu akasuba e lyo icungulo baya mu kubomba mu mabala. Ala mwandini bali-ipeleshe icine cine! Ifi fine e fyacitile na bamunyinefwe abena Makedonia mu nshita ya batumwa. Nangu ca kuti “bali bapiina nga nshi,” balombele ukuti bapeele ubupe bwa kwafwilisha bamunyinabo. (2 Kor. 8:1-4) Shi na ifwe natulepeela ‘ukulingana ne fyo Yehova Lesa wesu atupaala.’—Belengeni Amalango 16:17.

16. Finshi tulingile ukucita pa kuti Yehova alepokelela amalambo yesu?

¹⁶ Lelo ilyo tuleipeelesha ukubomba imilimo ya Bufumu tufwile ukucenjela pa kuti tatulekeleshe imilimo imbi iyacindama nga nshi pamo nga ukusakamana ulupwa lwesu. Nga filya cali ku bena Israele, na ifwe tufwaya Lesa alepokelela amalambo ayo tutuula mu kuitemenwa. Tufwile ukulaibukisha ukuti ukusakamana bwino ulupwa lwesu no kupepa Yehova e milimo iyacindama sana iyo tulingile ukubikako amano. Ukubomfya inshita yesu ne fyo twakwata ku kwafwa bambi takufwile ukulenga twalekelesha ulupwa lwesu mu fyo lukabila na mu fya kwa Lesa, pantu ninshi tulepeela ifyo tushikwete. (Belengeni 2 Abena Korinti 8:12.) E lyo kabili tufwile ukutwalilila ukukosha bucibusa bwesu na Lesa. (1 Kor. 9:26, 27) Tufwile ukucetekela ukuti nga tulekonka amafunde ayaba mu Baibolo, amalambo twakulatuula yakulalenga tulesekelela no kuba ne nsansa, kabili Yehova ‘akulayapokelela.’

AMALAMBO TUTUULA YALICINDAMA NGA NSHI

17, 18. Bushe tumfwa shani pa fyo bamunyinefwe baipeelesha ukubombesha mu mulimo wa Bufumu, kabili cinshi ico ifwe bonse tufwile ukutontonkanyapo?

¹⁷ Bamunyinefwe abengi na bankashi ‘bali-ituula kwati mutuulo wa mwangashi’ ku kubomba imilimo ya Bufumu. (Fil. 2:17) Tulatasha nga nshi bonse abaipeelesha ukubomba iyi milimo. Na kabili tulatasha abakashi na bana ba bamunyinefwe ababomba imilimo ya Bufumu pa kuipeelesha kwabo.

¹⁸ Tufwile ukubombesha pa kuti tulebombako imilimo ya Bufumu. Shi bonse natulepepa no kutontonkanyapo sana pa fyo twingacita pa kuti tulebombesha mu mulimo wa Bufumu. Nga tulecita ifi, tukapaalwa sana pali ino nshita kabili “ku ntanshi” tukapokelela icilambu icikalamba nga nshi.—Marko 10:28-30.

[Futunoti]

[Ifipusho]

[Ifikope pe bula 12, 13]

Amalambo ayengi yaleba ya kuitemenwa, nga filya fine fyaba imituulo tutuula muno nshiku (Moneni amaparagrafu 7-13)

[Icikope pe bula 12]

Bakasabankanya bali pa Ng’anda ya Bufumu mu Kenya, mu Africa

[Caption pe bula 12, 13]

Munyinefwe uwaba muli Komiti ya Makuule mu Tuxedo, mu New York, ku U.S.A.

[Icikope pe bula 13]

Ababomfi ba pa Bethel ku Australia