“Mulecita Ici ku Kunjibukisha”

“Ilyo atootele, aliumokawile no kutila: ‘Uyu mukate cimpashanya ca mubili wandi uulepeelwa pa mulandu wenu. Mulecita ici ku kunjibukisha.’”—1 KOR. 11:24.

KUTI MWAYASUKA SHANI?

Bushe basala shani ubushiku bwa Cibukisho?

Bushe umukate no mwangashi wa pa Cibukisho fimininako finshi?

Nampo nga twakwata isubilo lya kuya ku muulu nelyo ukwikala pe sonde, mulandu nshi cacindamina ukusangwa ku Cibukisho?

1, 2. Finshi abatumwa bafwile baletontonkanya ilyo Yesu ashilaya ku Yerusalemu?

ABALINSHI ba mu Yerusalemu balimwene umweshi ilyo fye wamoneke, ninshi uli fye ngo lwala. Baile-eba aba mu cilye ca Sanhedrini ukuti umweshi naumoneka kabili nabo balibilishe ukuti umweshi uwa Nisani nautendeka. Lyena pa kwishibisha abantu ili lyashi nalimo balisanike ifishibilo fya mulilo nangu ukutuma inkombe. Abatumwa balishibe ukuti inshita ya Ca Kucilila yalipaleme. Bafwile balishibe ukuti Yesu alefwaya ukuti baye ku Yerusalemu pa kuti bayefika ilyo Ica Kucilila tacilatendeka.

² Pali iyi nshita, Yesu na batumwa bakwe bali mu Perea (bushilya bwa Yordani) ninshi bali pa lwendo lwa kulekeleshako ukuya ku Yerusalemu. (Mat. 19:1; 20:17, 29; Marko 10:1, 32, 46) AbaYuda nga baishiba ubushiku bwa kubalilapo mu mweshi wa Nisani, palepita inshiku 13 e lyo basefya Ica Kucilila pa Nisani 14 lilya akasuba kawa.

3. Mulandu nshi Abena Kristu babikila amano ku bushiku balesefeshapo Ica Kucilila?

³ Ubushiku bwa Mulaalilo wa kwa Shikulu, ububako pa bushiku bulya bwine balesefeshapo Ica Kucilila, bukabako pa 14 April, mu 2014, lilya akasuba kawa. Bukaba bushiku ubwaibela ku Bena Kristu ba cine na bafwaya ukwishiba icine. Mulandu nshi? Mulandu wa filya tubelenga pali 1 Abena Korinti 11:23-25, apatila: “Ubushiku Shikulu Yesu alefutukwamo abuulile umukate kabili, ilyo atootele, aliumokawile no kutila: ‘Uyu mukate cimpashanya ca mubili wandi uulepeelwa pa mulandu wenu. Mulecita ici ku kunjibukisha.’ Acitile cimo cine na kuli kapu.”

4. (a) Fipusho nshi nalimo twingaipusha ilyo Icibukisho cishilafika? (b) Bushe cila mwaka beshiba shani ukuti ubu e bushiku bwa Cibukisho? (Moneni akabokoshi kaleti “Icibukisho ca mu 2014.”)

⁴ Ukwabula no kutwishika, na imwe mukasangwako ku Mulaalilo wa kwa Shikulu uo Yesu aebele abasambi bakwe ukulaibukisha cila mwaka. Ilyo ubu bushiku  bushilafika mufwile ukuipusha amuti: ‘Finshi ningacita pa kuipekanya? Fimpashanya nshi bakabomfya? Bushe ukulongana kukaba shani? Mulandu nshi Icibukisho ne fimpashanya fyacindamina kuli ine?’

IFIMPASHANYA

5. Finshi Yesu aebele abatumwa bakwe ukupekanya pa Ca Kucilila ca kulekeleshako?

⁵ Ilyo Yesu aebele abatumwa bakwe ukuti bapekanye umuputule wa kuliilamo Ica Kucilila, tabebele ukuti bauyemfye sana; lelo alefwaya fye umuputule uusuma, uwa busaka kabili uwingakumana bonse abali no kusangwako. (Belengeni Marko 14:12-16.) Baali no kupekanya fyonse ifyalekabilwa ukubikako no mukate uushatutumuka no mwangashi uwakashika. Ilyo bapwishishe ukulya Ica Kucilila, Yesu alandile pali ifi fimpashanya fibili.

6. (a) Ilyo bapwishishe ukulya Ica Kucilila, finshi Yesu alandile pa mukate? (b) Mukate wa musango nshi babomfya pa Cibukisho?

⁶ Umutumwa Mateo e ko ali kuli ici Ca Kucilila kabili pa numa alembele ukuti: “Yesu abuulile umukate, kabili ilyo apepele, aliumokawile, no kupeela abasambi, ati: ‘Buuleni mulye.’” (Mat. 26:26) “Umukate” wali uushatutumuka, nga ulya balebomfya pa Ca Kucilila. (Ukufu. 12:8; Amala. 16:3) Pa kupanga umukate balebomfya fye ubuunga bwa ngano na menshi, tabalebikamo icitutumushi nelyo ifintu fimbi pamo nga umucele. Apo tabalebikamo icitutumushi, umukate tawaletutumuka. Tamwaleba icili conse, waleba uwauma kabili uwakosa ica kuti tawaleafya pa kumokola. Muno nshiku ilyo ubushiku bwa Cibukisho bushilafika, baeluda kuti baeba umo mu cilonganino ukupanga umukate ukubomfya ubuunga bwa ngano na menshi. Pali pani ya kufumbikilapo umukate kuti bashingapo fye utumafuta utunono. (Nga ca kuti ca-afya ukusanga ubuunga bwa ngano, kuti mwabomfya ubuunga bwa mupunga, ubwa barle, ubwa mataba nelyo ubwa masaka.)

7. Bushe Yesu abomfeshe umwangashi wa musango nshi, kabili mwangashi wa musango nshi twingabomfya pa Cibukisho?

⁷ Mateo akonkenyepo ukulemba ati: “[Yesu] abuulile kapu, kabili ilyo atashishe kuli Lesa, alibapeele, ati: ‘Nwenimo bonse.’” (Mat. 26:27, 28) Kapu iyo Yesu abuulile mwali umwangashi uwakashika. (Uyu  mwangashi tawapangilwe ku myangashi iya kuti e lyo basaba fye, pantu pali iyi nshita ninshi ni kale basombola imyangashi.) Pa Ca Kucilila ca kubalilapo mu Egupti tapali umwangashi, na lyo line Yesu tatile calilubene ukubomfya umwangashi pa Ca Kucilila. Alibomfeshe umwangashi ilyo balelya Umulaalilo wa kwa Shikulu. E ico, Abena Kristu balabomfya umwangashi pa Cibukisho. Apo umulopa wa kwa Yesu wali kale kale uwacindama sana ica kuti tawalekabila ukubikamo ifili fyonse fimbi, no mwangashi babomfeshe tababikilemo ifili fyonse. E ico umwangashi uwakashika uo bashabikamo ifili fyonse e ufwile ukubomfiwa pa Cibukisho. Kuti mwapanga fye ku ng’anda nelyo ukuyashita. Umwangashi umo uo mwingabomfya ni Claret, Burgundy, nelyo Chianti.

IFYO IFIMPASHANYA FIMININAKO

8. Mulandu nshi Abena Kristu babikila amano ku fyo umukate no mwangashi fimininako?

⁸ Umutumwa Paulo atile te batumwa fye beka abalingile ukulaibukisha Umulaalilo wa kwa Shikulu, lelo na Bena Kristu bonse. Alembeele Abena Kristu banankwe mu Korinti ukuti: “Ico napokelele kuli Shikulu e co namushiilile, ica kuti ubushiku Shikulu Yesu . . . abuulile umukate kabili, ilyo atootele, aliumokawile no kutila: ‘Uyu mukate cimpashanya ca mubili wandi uulepeelwa pa mulandu wenu. Mulecita ici ku kunjibukisha.’” (1 Kor. 11:23, 24) Ukufika na muno nshiku, Abena Kristu cila mwaka balebukisha ubu bushiku kabili balibika amano ku fyo umukate no mwangashi fimininako.

9. Bufi nshi bamo baishiba pa mukate no mwangashi?

⁹ Bamo abaya ku mapepo batila, Yesu atile: ‘Uyu mubili wandi,’ kanshi basumina ukuti umukate waishilesanguka umubili wakwe uwa cine cine. Lelo ubu bufi. * Yesu ali  pamo na batumwa bakwe aba cishinka, kabili no mukate uushatutumuka uo bali no kulya na o wali pa ntanshi yabo. Kanshi, Yesu abomfeshe fye amashiwi ya mampalanya nga filya fine alecita pa kulanda na pa fintu fimbi.—Yoh. 2:19-21; 4:13, 14; 10:7; 15:1.

10. Bushe umukate uo babomfya pa Mulaalilo wa kwa Shikulu wimininako cinshi?

¹⁰ Umukate uo abatumwa balemona kabili uo bali no kulya waleimininako umubili wa kwa Yesu. Mubili nshi? Inshita imo, ababomfi ba kwa Lesa baishibe ukuti apo Yesu alimokawile umukate lelo tapali ifupa nangu limo ilyafunike, ninshi umukate waleimininako “umubili wa kwa Kristu,” e kutila icilonganino ca basubwa. (Efes. 4:12; Rom. 12:4, 5; 1 Kor. 10:16, 17; 12:27) Lelo mu kupita kwa nshita, pa numa ya kufwailisha mu Malembo baishileishiba ukuti umukate waleimininako umubili wa kwa Yesu, uo bamupekanishishe. Yesu “aliculile ilyo aali no mubili wa buntunse,” ica kuti balimwipeye no kumwipaya. Kanshi, umukate babomfya pa Mulaalilo wa kwa Shikulu, wimininako umubili wa kwa Yesu ‘uwasendele imembu shesu.’—1 Pet. 2:21-24; 4:1; Yoh. 19:33-36; Heb. 10:5-7.

11, 12. (a) Finshi Yesu alandile pa mwangashi? (b) Bushe umwangashi babomfya pa Mulaalilo wa kwa Shikulu wimininako cinshi?

¹¹ Ukwishiba ifyo umukate wimininako kulatwafwa ukwishiba umo Yesu aloseshe ilyo alandile pa mwangashi. Baibolo itila: “Acitile cimo cine na kuli kapu, ilyo apwa ukulya umulaalilo, atile: ‘Iyi kapu cipangano cipya pa mulandu wa mulopa wandi.’” (1 Kor. 11:25) Bushe kapu iyo Yesu aikete e cipangano cipya? Iyo. Ishiwi lya kuti “kapu” lyalelosha ku fyali muli kapu, e kutila, umwangashi. Bushe Yesu atile umwangashi waleimininako cinshi? Waleimininako umulopa wakwe.

¹² Mu Mbila Nsuma iya kwa Marko, Yesu alandile amashiwi ya kuti: “Uyu mwangashi cimpashanya ca ‘mulopa wandi uwa cipangano,’ uuli no kupongolwelwa pa mulandu wa bengi.” (Marko 14:24) Kanshi, umulopa wa kwa Yesu wali no ‘kusuumina pa mulandu wa bengi pa kuti bakabelelwe uluse pa membu.’ (Mat. 26:28) E ico, umwangashi uwakashika waleimininako umulopa wa kwa Yesu. Umulopa wakwe e ulenga “tubelelwe uluse pa membu shesu.”—Belengeni Abena Efese 1:7.

UKWIBUKISHA IMFWA YA KWA KRISTU

13. Londololeni ificitika pa Cibukisho ca mfwa ya kwa Kristu.

¹³ Nga ca kutila e muku wa kubalilapo mukalongana ne Nte sha kwa Yehova ku kwibukisha imfwa ya kwa Kristu, finshi mule-enekela ukumona? Uku kulongana kukabela mu cifulo icisuma icayemfiwa bwino. Nalimo bakabikamo amaluba lelo tamwakabe ifya kuyemfya ifingi kabili takwakabe kwati muli ku mutebeto. Eluda uwafikapo akalondolola bwino kabili mucinshi mucinshi ifyo Baibolo ilanda pa Cibukisho. Akalondolola ukuti Kristu alitufwilile pa kuti tukabe no mweo. (Belengeni Abena Roma 5:8-10.) Eluda akalondolola ubupusano bwaba pe subilo Baibolo yalandapo ilyo Abena Kristu bakwata, isubilo lya kuya ku muulu ne lya kwikala pe sonde.

14. Mwi lyashi lya Cibukisho, lisubilo nshi balandapo?

¹⁴ Bamo bakwata isubilo lya kuya mu kuteka pamo na Kristu ku muulu. Abakwata ili subilo basambi ba kwa Kristu abanono fye, pamo nga abatumwa ba cishinka. (Luka 12:32; 22:19, 20; Ukus. 14:1) E lyo Abena Kristu abengi ababombela Lesa ne cishinka, bakwata isubilo lya kwikala pe sonde ku ciyayaya muli paradaise. Lyena ukufwaya kwa kwa Lesa kukacitwa pano isonde nga mu muulu, icintu ico Abena Kristu bapepela pa myaka iingi. (Mat. 6:10) Kabili Amalembo yalanda pa fintu ifisuma ifikabako umuyayaya.—Esa. 11:6-9; 35:5, 6; 65:21-23.

15, 16. Bushe finshi bacita ku mukate pa Mulaalilo wa kwa Shikulu?

 ¹⁵ Munyinefwe nga apwisha ukulondolola ifi, lyena akatila nomba ni nshita ya kucita filya Yesu aebele abatumwa bakwe ukucita. Nga fintu tulandilepo kale, ifimpashanya fibili e fyo bakabomfya, e kutila, umukate uushatutumuka no mwangashi uwakashika. Ifi nalimo kuti fyaba pe tebulo mupepi na kalanda we lyashi. Munyinefwe akabelenga ilembo muli Baibolo ililanda pa fyo Yesu alandile ne fyo acitile ilyo atendeke ukusefya. Ku ca kumwenako, muli Mateo tubelengamo ukuti: “Yesu abuulile umukate, kabili ilyo apepele, aliumokawile, no kupeela abasambi, ati: ‘Buuleni mulye. Uyu mukate cimpashanya ca mubili wandi.’” (Mat. 26:26) Yesu alimokawile umukate uushatutumuka pa kuti apeeleko abatumwa bakwe abo ali nabo. Pa kulongana ukukabako pa 14 April, 2014, bakabomfya umukate uushatutumuka uo bakamokawila libela ninshi nabaubika pa mbale.

¹⁶ Bakabomfya imbale ishingi pa kuti bekapoosa inshita ukupishamo ifimpashanya. Takwakabe ifyaibela ifikalacitika. Bakapepa ipepo ilipi, lyena pa numa bakapishamo imbale, ukulingana ne fyo bacita ku ncende mwikala. Banono fye abakalyako umukate (e lyo limbi takwakabe nangu umo uukalyako), nga filya cali mu filonganino ifingi ilyo balepishamo umukate pa Cibukisho icaliko mu 2013.

17. Finshi ficitika pa Cibukisho ukukonka filya Yesu acitile ku mwangashi?

¹⁷ Pa numa, kalanda akacita filya Mateo alondolwele ukuti: “[Yesu] abuulile kapu, kabili ilyo atashishe kuli Lesa, alibapeele, ati: ‘Nwenimo bonse; pantu uyu mwangashi cimpashanya ca “mulopa wandi uwa cipangano,” uulesuumina pa mulandu wa bengi pa kuti bakabelelwe uluse pa membu.’” (Mat. 26:27, 28) Bakacita nga filya fine Yesu acitile, na kabili bakapepa e lyo bakapishamo ‘amakapu’ ya mwangashi.

18. Apo banono fye abalyako ifimpashanya kabili limo takuba na balyako, mulandu nshi cacindamina ukusangwako ku Cibukisho?

¹⁸ Abengi abakalongana tabakalyeko umukate nelyo ukunwako umwangashi ilyo bakalapishamo pantu Yesu atile ni balya fye abakalateka nankwe mu Bufumu bwa ku muulu e balingile ukulyako. (Belengeni Luka 22:28-30; 2 Tim. 4:18) Abengi abakabako bakalatambako fye. Na lyo line, ukusangwako ku Mulaalilo wa kwa Shikulu kwalicindama, pantu abasangwako balanga ukuti balicindika ilambo lya kwa Yesu. Pa Cibukisho, kuti batontonkanya pa mapaalo bakakwata pa mulandu we lambo lya cilubula ilya kwa Yesu. Balikwata isubilo lya kuba pe “bumba ilikalamba” abakapusuka “ubucushi bukalamba” ubuleisa. Aba bantu ba kwa Lesa ‘abacapa amalaya yabo no kuyabuutusha mu mulopa wa mwana wa mpaanga.’—Ukus. 7:9, 14-17.

19. Finshi tufwile ukucita pa kuti tuipekanye ku Mulaalilo wa kwa Shikulu na pa kuti tukanonkelemo?

¹⁹ Inte sha kwa Yehova isonde fye lyonse balaipekanishisha kuli uku kulongana ukwacindama. Nga kwashala imilungu iinono ukuti Icibukisho cibeko, tukalaita abantu ukuti bakesesangwako. Na kabili nga kwashala inshiku ishinono, fwe bengi tukalabelenga amalyashi ayalanda pa fyo Yesu acitile ne fyacitike ilyo kwashele inshiku ishinono ilyo kushilaba Umulaalilo wa kwa Shikulu mu 33 C.E. Tukaipekanya pa kuti twikapuswako. Cisuma ukufika bwangu ilyo bashilaimba ulwimbo lwa kwiswila ne pepo pa kuti tukasengele abeni abakesa ku Cibukisho. Ifwe bonse, ukubikako fye na beni, tukanonkelamo nga ca kuti ilyo kalanda alebelenga amalembo na ifwe tulekonkamo muli Baibolo yesu. Ne cacilapo ukucindama ca kuti, nga twasangwa ku Cibukisho tukalanga ukuti tulatasha pe lambo lya cilubula ilya kwa Yesu kabili tulomfwila ne funde lya kuti: “Mulecita ici ku kunjibukisha.”—1 Kor. 11:24.

[Futunoti]

[Ifipusho]

[Akabokoshi pe bula 23]

ICIBUKISHO CA MU 2014

Cila mweshi, umweshi ulashinguluka isonde. Ilyo umweshi uleshinguluka isonde, kulaba inshita ilyo wisa mu kuba pa kati ke sonde na kasuba. Nga waba pa kati ke sonde na kasuba, e lyo bawita ukuti “umweshi upya.” Pali iyi nshita umweshi taumoneka pano calo, lelo wisa mu kumoneka nga papita ama-awala 18 ukufika ku 30.

Ku Yerusalemu, mu 2014, umweshi ukaba pa kati ke sonde na kasuba pa 30 March ne nshita ya 20:45 hrs. Nga papita ama-awala 21 e lyo akasuba kakawa mu Yerusalemu (pa 31 March). Pali iyi nshita, umweshi tawakamoneke. Kanshi umweshi ufwile ukamoneka ilyo akasuba kakawa mu Yerusalemu pa 1 April. Ukulingana ne fyo abaYuda balependa inshita, ubu e bukaba ubushiku bwa kubalilapo mu mweshi (pa Nisani 1) pa numa ya kuwa kwa kasuba.

E ico, Inte sha kwa Yehova mu calo conse balibeshibisha ukuti Nisani 14 ikatendeka pali Cimo, pa 14 April, 2014, cilya akasuba kawa. Pali iyi nshita ninshi umweshi naubulungana.

[Icikope pe bula 24]

Abatumwa balinwene umwangashi uwaleimininako umulopa wa kwa Yesu uwa cipangano (Moneni amaparagrafu 11 na 12)