‘Mwileka Amatontonkanyo Yenu Yafulungane Bwangu’!
‘Mwileka Amatontonkanyo Yenu Yafulungane Bwangu’!
“Mwe bamunyinefwe, . . . mwileka amatontonkanyo yenu yafulungane bwangu.”—2 TES. 2:1, 2.
IFISHINKA FYA KUTONTONKANYAPO
Kusoka nshi ukwa pa nshita yalinga uko Paulo asokele abena Tesalonika mu makalata abalembeele?
Finshi fingatwafwa ukukanabepwa?
Bushe ukuba abacincila ukushimikila pa Bufumu kutucingilila shani?
1, 2. Mulandu nshi abantu abengi babepela ubufi, kabili bufi bwa musango nshi babepa? (Moneni icikope cili pa ntendekelo ya cino cipande.)
MUNO calo namufula sana abantu aba bufi, incenjeshi na bapuupu. Tatufwile ukupapa ilyo tulemona ifi filecitika. Baibolo yalilanda fye apabuuta ukuti Satana Kaseebanya, ni ncenjeshi ya kapela makufi kabili e kateka wa cino calo. (1 Tim. 2:14; 1 Yoh. 5:19) Ilyo impela ya cino calo ilepalama, Satana alekalipilako pantu ali “ne nshita iinono” fye. (Ukus. 12:12) Kanshi tufwile ukwenekela abantu abatungululwa na Satana ukulabepa sana ubufi, kabili bafwaisha ukubepa bakapepa ba kwa Yehova.
2 Limo limo pa milabasa balalanda ifya bufi pa babomfi ba kwa Yehova ne fyo basuminamo. Abantu balasabankanya ifya bufi mu manyunshipepala, pa TV na pa Intaneti. Ici cilenga abantu bamo ukupelenganishiwa ica kuti basumina ne fya bufi.
3. Cinshi cingatwafwa pa kuti tatubepelwe?
3 Tulatasha ukuti Lesa alitupeela Icebo cakwe ica “mulimo . . . ku kulungika ifintu” icitwafwa pa kuti uyu mulwani wesu tatubepele. (2 Tim. 3:16) Kanshi nacicindama ukusambilila kuli filya umutumwa Paulo alembele pa Bena Kristu bamo mu Tesalonika ukuti balilufiwe, pantu basumine amalyashi ya bufi. Abebele ukuti tabafwile ukuleka ‘amatontonkanyo yabo ukufulungana bwangu.’ (2 Tes. 2:1, 2) Finshi twingasambilila ku fyo Paulo afundile abena Tesalonika, kabili kuti twakonka shani uku kufunda?
UKUSOKA KWA PA NSHITA YALINGA
4. Finshi Abena Kristu mu Tesalonika babasokele pa kwisa kwa “bushiku bwa kwa Yehova,” inga ifwe batusoka shani?
4 Muli kalata ya kubalilapo iyo Paulo alembeele aba mu cilonganino ca ku Tesalonika, alandile pa kwisa kwa “bushiku bwa kwa Yehova.” Alefwaya Abena Kristu banankwe ukuti baipekanye no kukanaba mu mfifi. E ico abebele ukuti apo bali “bana aba lubuuto” balingile ukuba ‘abalola no kutekanya.’ (Belengeni 1 Abena Tesalonika 5:1-6.) Muno nshiku, tulelolela ukonaulwa kwa Babiloni Mukalamba, ukupepa konse ukwa bufi. Ukonaulwa kwa Babiloni kukaba e ntendekelo ya bushiku bukalamba ubwa kwa Yehova. Caliwama ukuti twalishiba ifingi pa fyo Yehova akafikilisha ubufwayo bwakwe. Na kabili, lyonse pa kulongana tulasambilila ifyo twingacita pa kuti tube abatekanya. Nga tulebika amano ku fyo batusambilisha lyonse, tukatwalilila ukubombela Lesa ‘na maka yesu aya kupelulula.’—Rom. 12:1.
5, 6. (a) Muli kalata ya bubili iyo Paulo alembeele abena Tesalonika, finshi alandilepo? (b) Finshi Lesa ali no kucita nomba line ukubomfya Yesu, kabili mepusho nshi tufwile ukuyipusha?
5 Pa numa ya kulembela abena Tesalonika kalata ya kubalilapo, Paulo alibalembeele kalata na imbi iya bubili. Muli iyi kalata Paulo alandile pa bucushi ubwali no kwisa ilyo Shikulu Yesu akapingula “abashaishiba Lesa na bashinakila imbila nsuma.” (2 Tes. 1:6-8) Ifyalembwa mu cipandwa ca bubili muli iyi kalata filanga ukuti bamo mu cilonganino batendeke “ukutunsha imitima” pa bushiku bwa kwa Yehova ica kuti bacetekele no kuti nabufika. (Belengeni 2 Abena Tesalonika 2:1, 2.) Balya Bena Kristu baishibe fye ifinono pa bufwayo bwa kwa Yehova. Nangu fye ni Paulo alilandilepo ukuti tabaumfwikishe ubusesemo, atile: “Tatwaishiba fyonse kabili tatusesema fyonse; lelo ilyo tukeshiba fyonse, kabili ilyo tukasesema fyonse, ifi ifya lubali fikapwa.” (1 Kor. 13:9, 10) Lelo ifyebo fyafumine kuli Lesa ifyo Paulo, umutumwa Petro, e lyo na abasubwa bambi aba cishinka balembele, fyali no kwafwa abena Tesalonika ukutwalilila ne citetekelo.
6 Pa kulungika aba bwananyina, Paulo alembele ukuti ilyo ubushiku bwa kwa Yehova bushilaisa, ubusangu e lyo no “muntu wa bumpulamafunde” e fifwile ukubalilapo ukwisa. * Lyena, pa nshita yakwe iyalinga, Shikulu Yesu ‘akonaula’ bonse abasumine ifya bufi. Umutumwa Paulo alandile ukuti ico bali no kubapingwila ifi, mulandu wa kuti “tabatemenwe icine.” (2 Tes. 2:3, 8-10) E ico tufwile ukuyipusha ukuti: ‘Bushe nalitemwa icine? Bushe ndeshiba ubulondoloshi ubupya ububa muli ino magazini na mu mpapulo shimbi isho balembela ababa mu cilonganino ca kwa Lesa?’
MULESALA BWINO IFIBUSA
7, 8. (a) Finshi ifyo Abena Kristu baliko mu nshita ya batumwa balingile ukutalukako? (b) Finshi ifingonaula icitetekelo ca Bena Kristu muno nshiku?
7 Kwena, amafya Abena Kristu bali no kukwata tayali no kufuma fye ku basangu nelyo ku fisambilisho fya bufi ifyo aba basangu balesambilisha. Paulo alembeele Timote ukuti “ukutemwa indalama e ntulo ya bubi bwa misango yonse.” Umutumwa Paulo atile “bamo pa kushitemwisha balilufya icitetekelo no kuilasaula abene amacushi ayengi.” (1 Tim. 6:10) “Imicitile ya muntu umubembu” na yo yali no kulenga balebepwa.—Gal. 5:19-21.
8 Kanshi kuti mwamona icalengele ukuti Paulo asoke abena Tesalonika ukuti tabafwile ukwampana na bantu ba musango uyu abo mu makalata yambi aitile ukuti “abatumwa ba bufi.” Pali aba pali na balelanda “ifyanyongana pa kuti bongole abasambi, balebakonka.” (2 Kor. 11:4, 13; Imil. 20:30) Yesu atashishe aba mu cilonganino ca ku Efese pantu bena tabalefwaya “ababi nangu panono.” Abena Efese ‘bale-esha’ abantu abali abatumwa ba bufi. (Ukus. 2:2) Muli kalata ya bubili iyo alembeele abena Tesalonika, Paulo abacincishe ukuti: “Nomba tulemupa ifipope, mwe ba bwananyina, mwi shina lya kwa Shikulu Yesu Kristu, ukutalukako ku wa bwananyina onse uushumfwa.” Lyena alandile pa Bena Kristu ‘abashalefwaya ukubomba.’ (2 Tes. 3:6, 10) Nga ca kutila abebele ukutaluka ku bantu abashalefwaya ukubomba, ninshi abasangu bena tabalingile ukwampana nabo nangu fye panono! Ukwabula no kutwishika, ukwampana pamo na bantu ba musango uyu kwali no kubaletelela kabili balingile ukubataluka, na ino ine nshita tatufwile ukwampana nabo.—Amapi. 13:20.
9. Mulandu nshi tulingile ukuba abacenjela kuli bamunyinefwe abatemwa ukulengulula nelyo ukulanda ifintu ifyo Baibolo ishalandapo?
9 Apo ubucushi bukalamba nabupalama sana kabili impela ya cino calo ili mupepi, uku kusoka uko basokele Abena Kristu mu nshita ya batumwa nakucindama sana. Ukwabula no kutwishika, tatufwaya ‘ukulacita ifipusene no bufwayo’ bwa cikuuku ca kwa Yehova no kupanya ishuko lya kuba no mweo wa muyayaya, nampo nga ni ku muulu nelyo pano isonde. (2 Kor. 6:1) Tufwile ukucenjela kuli bamunyinefwe bamo abatemwa ukulengulula nelyo abafwaya ukuti tusumine ifyo batontonkanya ifyo Baibolo ishalandapo.—2 Tes. 3:13-15.
‘IKATISHENI IFYO MWASAMBILILE’
10. Finshi ifyo Abena Kristu mu Tesalonika babakoseleshe ukwikatisha?
10 Paulo akoseleshe Abena Kristu banankwe mu Tesalonika ‘ukwiminina ndi’ no kwikatisha ifyo basambilile nelyo intambi. (Belengeni 2 Abena Tesalonika 2:15.) Finshi ifyo ‘basambilile’? Te fisambilisho fya bufi ifyo basambilisha mu mipepele ya bufi kabili ifyo abantu bamona ukuti fyalicindama sana nga filya Baibolo isambilisha. Lelo, Paulo alelanda pa masambilisho ayo ena na batumwa bambi basambilile kuli Yesu e lyo na yo Lesa abebele ukulemba, kabili ifingi ifyo basambilile fyaba mu Malembo ya mushilo. Paulo atashishe aba bwananyina aba mu cilonganino ca mu Korinti, abalembeele ukuti, “mulanjibukisha muli fyonse kabili mulakonka intambi, ukulingana fye ne fyo namwebele.” (1 Kor. 11:2) Aya masambililo yafumine kuli Yehova no Mwana wakwe, kanshi balingile ukuyacetekela.
11. Finshi fingacitika nga ca kuti bamo basumina ubufi?
11 Ilyo Paulo alembeele AbaHebere, alandile pa fintu fibili ifingonaula icitetekelo ca Mwina Kristu no kumulenga afilwa ukwiminina ndi. (Belengeni AbaHebere 2:1; 3:12.) Alandile pa ‘kusensenunwa’ no ‘kufuma kuli Lesa.’ Ubwato nga buli mu mbali ya mumana e lyo bwatendeka ukusensenunwa, tabumoneka ukuti bulesela. Lelo panono panono bulaya bulesela mpaka bwafika na mu kati ka mumana. Lelo limo umuntu e wingasunka ubwato pa kuti busele ukufuma mu mbali ya mumana. Ifi filangililo fibili filetulanga ifingacitika nga ca kuti bamo basumina ubufi no kuleka ukucetekela icine.
12. Muno nshiku, finshi fingatonawila bucibusa bwesu na Lesa?
12 Ifi nalimo e fyacitikile abena Tesalonika bamo. Bushe na muno nshiku ifya musango uyu kuti fyacitika? Muno calo mwaliba ifintu ifingi ifingatonawila inshita. Tontonkanyeni pa ma-awala ubwingi ayo abantu bapoosa pa Intaneti, ukutuma amameseji no kulanda pa foni, nelyo ukutamba ifyangalo pa TV. Ifi fintu kuti fyapumbula Umwina Kristu kabili kuti aleka ukuba uwacincila. Ne ci kuti calenga aleka ukupepa ukufuma pa nshi ya mutima, ukuisambilisha Icebo ca kwa Lesa, ukulongana, no kushimikila imbila nsuma. Finshi tufwile ukucita pa kuti amatontonkanyo yesu tayafulungene bwangu?
IFYO TWINGACITA PA KUTI AMATONTONKAYO YESU TAYAFULUNGENE
13. Nga fintu Baibolo yasobele, finshi abantu batontonkanya pa nshiku sha kulekelesha, kabili finshi fikatwafwa ukucingilila icitetekelo cesu?
13 Cimo ico tulingile ukucita, kwishiba inshita tuleikalamo no kwishiba ububi ubwaba mu kwampana pamo na bantu abakaana ukuti shino te “nshiku sha kulekelesha.” Umutumwa Petro atile: “Mu nshiku sha kulekelesha mukesa bakapumya no kupumya kwabo, abakalakonkelela fye ulunkumbwa lwabo no kusosa abati: ‘Bushe filya alaile ukuti akabapo, e po aba? Pantu ukufuma pa bushiku ifikolwe fyesu fyafwila, ifintu fyonse fyaba fye filya fine fye fyali ukufuma apo icalo capangiilwe.’” (2 Pet. 3:3, 4) Ukubelenga Icebo ca kwa Lesa cila bushiku no kulaisambilisha lyonse kukatwafwa ukulaibukisha ukuti tuleikala mu “nshiku sha kulekelesha.” Abasangu abo Baibolo yasobele, batendeke kale kabili na ino ine nshita e ko baba. “Umuntu wa bumpulamafunde” e po acili kabili alitwalilila ukukaanya ababomfi ba kwa Lesa. Kanshi lyonse tufwile ukulaibukisha ukuti ubushiku bwa kwa Yehova nabupalama.—Sefa. 1:7.
14. Bushe ukuba abacincila mu mulimo wa kwa Lesa kutucingilila shani?
14 Cimbi icingatwafwa ukuba abalola pa kuti amatontonkanyo yesu tayafulungene bwangu, kulashimikila lyonse imbila nsuma iya Bufumu. Kanshi, umulimo Kristu Yesu, Umutwe wa cilonganino apeele abatumwa bakwe uwa kulenga aba nko shonse ukuba abasambi no kubasambilisha ukulakonka fyonse ifyo abebele, wali mulimo uwali no kubacingilila. (Mat. 28:19, 20) Pa kuti tukonke ifyo alandile tufwile ukuba abacincila mu kushimikila. Bushe mulemona ukuti bamunyinefwe mu Tesalonika balebombela fye ico cine umulimo wa kushimikila no kusambilisha? Ibukisheni ifyo Paulo abebele, atile: “Mwilashimya umupashi. Mwilasuula amashiwi ya kusesema.” (1 Tes. 5:19, 20) Ala mwandini amasesemo tusambilila no kushimikilako bambi yasuma icine cine!
15. Finshi twingalanshanyapo pa mapepo ya lupwa?
15 Bonse tulafwaya ukwafwa indupwa shesu ukulashimikila bwino. Bamunyinefwe na bankashi abengi basanga ukuti ukulanshanyako ifya kushimikila ilyo bali pa mapepo ya lupwa kwalibafwa. Nalimo kuti mwalanshanya ifyo aba mu lupwa lwenu bakayalanda ku bantu bashimikileko abalefwaya ukwishiba icine. Finshi bakayalanda nga babwelelako? Finshi mukayalanda ifikalenga umwine wa ng’anda ukufwaya ukusambilila? Ni nshita nshi iingawama ukubwelelako? Bamo nabo balapekanya ukulongana pa mapepo ya lupwa. Bushe na imwe e fyo mucita no lupwa lwenu? Nga muleasukapo pa kulongana icitetekelo cenu cikakoselako kabili amatontonkanyo yenu tayakafulungane bwangu. (Amalu. 35:18) Amapepo ya lupwa yakatwafwa ukukanatunganya pa fintu ifyo Baibolo ishalandapo nelyo ukulatwishika.
16. Cilambu nshi Abena Kristu basubwa bakapokelela pa mulandu wa kubomfya bwino amaka yabo aya kupelulula?
16 Ukutontonkanya pa fyo Yehova ayafwa abantu bakwe ukumfwikisha ukusesema kwaba muli Baibolo, kukalenga tukacetekele sana ukuti ku ntanshi akatupaala. Abasubwa bakwata isubilo lya kuteka na Kristu ku muulu. Isubilo bakwata lilabafwa ukulabomfya bwino amaka yabo aya kupelulula! Amashiwi Paulo alembeele abena Tesalonika kuti yabomba na ku basubwa, atile: “Ifwe tufwile ukutootela Lesa lyonse pali imwe, mwe bamunyinefwe abatemwikwa kuli Yehova, pantu Lesa alimusalile . . . pa kumulenga ukuba aba mushilo ku mupashi kabili na pa mulandu wa kuti mwatetekele icine.”—2 Tes. 2:13.
17. Bushe amashiwi yaba pali 2 Abena Tesalonika 3:1-5 yamukoselesha shani?
17 Abakwata isubilo lya kuba no mweo wa muyayaya pano calo nabo tabafwile ukuleka amatontonkanyo yabo ukufulungana bwangu. Nga mwakwata isubilo lya kwikala pano calo, mulekonka amashiwi ya kukoselesha ayo Paulo alembeele abasubwa banankwe mu Tesalonika. (Belengeni 2 Abena Tesalonika 3:1-5.) Tufwile ukulatasha pali aya mashiwi ayasuma ayo Paulo alandile. Mu makalata Paulo alembeele abena Tesalonika mwaba ukusoka pa fyo tushifwile ukulatunganya pa fintu ifyo Baibolo ishalandapo nelyo ukusumina ifya bufi. Apo impela ili mupepi sana, aya mashiwi ya kusoka nayacindama nga nshi ku Bena Kristu pali ino nshita.
[Futunoti]
^ para. 6 Pa Imilimo 20:29, 30, Paulo alandile ukuti mu cilonganino ca Bena Kristu mukema “abantu abakalasambilisha ifyanyongana pa kuti bongole abasambi, balebakonka.” Ilyashi lya kale lilangilila ukuti mu kupita kwa nshita kwaishileba ibumba lya bashimapepo e lyo na bantu yawe yawe. Muli ba 200 C.E., “umuntu wa bumpulamafunde” alimoneke, kabili aishibikwe ukuti libumba lya bashimapepo ababa mu mipepele iitunga ukuba iya Bena Kristu.—Moneni Ulupungu lwa kwa Kalinda ulwa February 1, 1990, amabula 10-14.
[Ifipusho]
[Icikope pe bula 7]
Mu makalata Paulo alembeele Abena Kristu mwali ukusoka ukwa pa nshita yalinga (Moneni paragrafu 4 na 5)
[Icikope pe bula 10]
Ukupekanya bwino no kubombako umulimo wa kushimikila kulatwafwa ukukanaleka ‘amatontonkanyo yesu ukufulungana bwangu’ (Moneni amaparagrafu 14 na 15)
