Mu 1985, ilyo nali ne myaka 10, kwali abana abafumine ku Cambodia abaishile pa sukulu nalesambilila mu Columbus, Ohio, ku U.S.A. Umulumendo umo alishibeko iciNgeleshi. Alebomfya ifikope pa kunshimikila pa fyabipa ifyalecitika ku Cambodia, ifyo abantu balebacusha, ukubepaya, ne fyo abantu balefulumuka mu calo. Ubushiku, nalelila nga natontonkanya pali aba bana abafumine ku Cambodia. Nalefwaya ukubashimikila pali Paradaise na pe subilo lya kubuuka, nomba tabaleumfwa ululimi nalelanda. Nangu ca kutila nali fye umwaice, napingwilepo ukusambilila iciCambodia pa kuti ndebasambilisha pali Yehova. Nshaishibe ukuti ifi napingwilepo ukucita fikangafwa mu fyo nkalacita ku ntanshi.

Ukusambilila iciCambodian kwalinkoseele. Imiku ibili napene ndeke ukusambilila, lelo Yehova alinkoseleshe ukubomfya abafyashi bandi. Mu kuya kwa nshita, bakafundisha na bana be sukulu banandi batendeke ukulankoselesha ukuti nkengile incito ya kuti nkalefola indalama ishingi. Lelo nalefwaya ukuba painiya, e ico nasalilepo ukusambilila incito iya kubomba fye ama-awala ayanono pa kuti nkalebomba bupainiya. Nga nainuka ku sukulu, naleya mu kushimikila na bapainiya. E lyo kabili nalesambilisha ne ciNgeleshi. Ifi nasalilepo ukucita fyaishilengafwa sana.

Ilyo nali ne myaka 16, naumfwile ukuti ku Long Beach, ku California, mu U.S.A., kwali ibumba lya bakasabankanya abalelanda iciCambodian. E ico naliileko mu kutandala kabili e ko nailesambilila ukubelenga iciCambodian. Ilyo fye napwishishe isukulu, nalitendeke bupainiya kabili naleshimikila abena Cambodia abaleikala mupepi no ko naleikala. Ilyo nali ne myaka 18, natendeke ukutontonkanya pa kukuukila ku Cambodia. Pali iyi nshita, ku Cambodia kwalibipile sana, lelo nalishibe ukuti abantu fye abanono pa bantu 10 milioni abali muli ici calo, e baumfwile imbila nsuma iya Bufumu. Pali ilya nshita, mu Cambodia mwali fye icilonganino cimo umwali bakasabankanya 13. Umuku wa kubalilapo nailetandala kuli ici calo, nali ne myaka 19. Ilyo papitile imyaka ibili, nalikuukile no kuya mu kwikala kulya kwine. Nalisangile incito iya kubomba fye ama-awala ayanono iya kupilibula e lyo no kufunda iciNgeleshi. Mu kuya kwa nshita, nalisangile umwanakashi wa kuupa, kabili na o alefwaya ukubomba umulimo wa nshita yonse. Twalibombela pamo ukwafwa abena Cambodia abengi ukuipeela kuli Lesa.

Yehova alimpeela ‘ififwaya umutima wandi.’ (Amalu. 37:4) Umulimo wa kulenga abantu ukuba abasambi e mulimo fye uulenga umuntu ukuba ne nsansa nga nshi. Pa myaka 16 iyo naikala mu Cambodia, icilonganino umwali fye bakasabankanya 13, ino nshita calikula kabili mu Cambodia mwaba ifilonganino 12 ifya Nte sha kwa Yehova na mabumba yane ayabela ku ncende sha kutali!—Abashimika ili lyashi ni ba Jason Blackwell.