1. Apo twabumbwa mu cipasho ca kwa Lesa, twakwata amaka ya kucita finshi?

NALIMO mulomfwa uko abantu abengi balanda ukuti: “Ulya mwana apala fye bawishi.” Ca cine, abana abengi balapala abafyashi babo. Pantu na kuba, mu cifyalilwa fye abafyashi e bapasha abana imibele ne mimonekele. Yehova, Shifwe wa ku muulu, e watupeela ubumi. (Amalu. 36:9) Kabili fwe bana bakwe, twalimupalako muli fimo. Apo twabumbwa mu cipasho cakwe, twalikwata amaka ya kutontonkanya, aya kupingula ifya kucita no kupanga ifibusa.—Ukute. 1:26.

2. Finshi fingalenga ukuti Yehova abe Cibusa wesu uwa cine cine?

² Yehova kuti aba Cibusa wesu. Ukucetekela twacetekela Lesa no Mwana wakwe, e lyo ne fyo atutemwa e fingalenga twaba ifibusa fyakwe. Yesu atile: “Lesa atemenwe nga nshi aba pano calo ica kuti apeele Umwana wakwe uwafyalwa eka, ukuti onse uumutetekela ekonaika lelo akabe no mweo wa muyayaya.” (Yoh. 3:16) Kwali abantu abengi abali ifibusa fya kwa Yehova. Twalalanda pa bantu babili. Pa kuba ifibusa fyakwe, tulingile ukuba ne citetekelo muli ena e lyo na mu Mwana wakwe e lyo na o afwile ukututemwa.

3, 4. Cinshi calengele ukuti bucibusa bwa kwa Abrahamu na Yehova bupusaneko no bwa bena Israele?

³ Yehova aitile Abrahamu, icikolwe ca bena Israele ukuti, “cibusa wandi.” (Esa. 41:8) Kabili 2 Imilandu 20:7 ilanda ukuti Lesa alitemenwe Abrahamu. Cinshi calengele ukuti Abrahamu atwalilile ukuba cibusa wa kwa Kabumba wakwe? Mulandu wa kuti ali ne citetekelo.—Ukute. 15:6; belengeni Yakobo 2:21-23.

⁴ Abana ba kwa Abrahamu abaishileba uluko lwa bena Israele, nabo Yehova ali ni Shibo kabili Cibusa wabo. Ku ca bulanda, bucibusa bwabo na Lesa bwalipwile. Mulandu nshi? Pantu tabatwalilile ukutetekela amalayo ya kwa Yehova.

5, 6. (a) Bushe Yehova aishileba shani Cibusa wenu? (b) Mepusho nshi tufwile ukuyipusha?

⁵ Ilyo muletwalilila ukusambilila pali Yehova, icitetekelo cenu cikakoselako, kabili mukamutemwa sana. Baleni tontonkanyeni ifyo cali ilyo mwaishibe ukuti Lesa e ko aba kabili kuti mwaba cibusa wakwe. Mwalisambilile no kuti bonse tufyalwa no lubembu pantu Adamu alipondweke. Mwaishileishiba no kuti abantu bonse balitaluka kuli Lesa. (Kol. 1:21) Lyena mwaishileiluka ukuti Shifwe wa ku muulu uwatutemwa taba ukutali na ifwe kabili alitubikako amano. Ilyo twasambilile ukuti Lesa alitupeela Umwana wakwe ukuba icilubula kabili twatetekela na muli ili ilambo, twalitendeke ukuba ifibusa fya kwa Lesa.

⁶ Nga twatontonkanya pa fyo twaishileishiba Yehova, kuti twayipusha ukuti: ‘Bushe bucibusa bwandi na Lesa bulekoselako? Bushe cila bushiku ndatemenwako Cibusa wandi Yehova no kumucetekela sana?’ Umbi na o uwali cibusa wa kwa Yehova ni Gideone. Natulande pa fyo acitile ne fyo twingamupashanya.

7-9. (a) Cinshi cacitikile Gideone, kabili finshi fyafuminemo? (Moneni icikope cili pa ntendekelo ya cino cipande.) (b) Kuti twacita shani pa kuti tube ifibusa fya kwa Yehova?

⁷ Umupingushi Gideone alebombela Yehova lintu ifintu fyayafishe sana ilyo abena Israele baingile mu Calo ca Bulayo. Ilembo lya Abapingushi icipandwa 6 lilondolola ukuti malaika wa kwa Yehova aile kuli Gideone mu Ofra. Pali ilya nshita, abena Midiani, abali abena mupalamano ba bena Israele balebatiinya sana kabili limo balebasansa no kubasansa. E calengele ukuti Gideone elapuulila ingano pa lwalala lelo alepuulila umwa kukamina imyangashi umo engashifisa bwangu bwangu. Gideone alipapile ilyo malaika amoneke kuli ena no kumweba ati “we mpalume.” Nangu ca kutila Yehova alilubwile abena Israele mu Egupti, Gideone aletwishika nga ca kutila Yehova ali no kubafwa. Yehova aebele Gideone ukupitila muli malaika ukuti akabafwa.

⁸ Gideone taishibe ifyo ali no kucita pa ‘kupususha Israele mu minwe ya bena Midiani.’ Yehova amwebele fye mu kulungatika ukuti: “Pantu nkaba na iwe, kabili ukucimfya ukacimfya Midiani kwati muntu fye umo.” (Abapi. 6:11-16) Na lyo line, Gideone aletontonkanya pa fyo ali no kucimfya abena Midiani, e ico alombele ukuti Lesa amulange icishibilo. Nga namumona, ilyo Gideone alelanshanya na Yehova, alemumona ukuti wa cine cine.

⁹ Icacitike pa numa, calikoseshe icitetekelo ca kwa Gideone kabili calengele ukuti apalame sana kuli Lesa. Gideone alipekenye ifya kulya no kutwalila malaika. Ilyo malaika atambike inkonto yakwe no kukumya ifya kulya ica kuti no kupya fyapya mu cisungusho, e lyo Gideone ailwike ukuti ulya malaika ali ni malaika wa kwa Yehova. Gideone alitiinine kabili atile: “Iye, mwe  Shikulu Mulopwe Yehova, pantu natumonana na malaika wa kwa Yehova pa menso!” (Abapi. 6:17-22) Bushe ici cacitike calengele ukuti Gideone etwalilila ukuba na bucibusa na Lesa wakwe? Awe nakalya! Gideone ashileishiba sana Yehova ica kuti ali pa mutende na Lesa. Twalishiba ifi pantu ilyo Gideone akuulile iciipailo pali ilya ncende, aciinike ati “Yehova-shalomu,” icalola mu kuti “Yehova wa Mutende.” (Belengeni Abapingushi 6:23, 24.) Nga tuletontonkanya pa fyo Yehova atucitila cila bushiku, tuleluka ukuti ni Cibusa wesu uwa cine cine. Nga tulepepa lyonse kuli Lesa, tulaba sana no mutende kabili bucibusa bwesu nankwe bulakoselako.

10. Ukulingana na Amalumbo 15:3, 5, bushe Yehova afwaya ukuti tulecita finshi pa kuti tube ifibusa fyakwe?

¹⁰ Lelo kwaliba fimo ifyo Yehova afwaya ukuti tulecita pa kuti abe Cibusa wesu. Mu Amalumbo 15, Davidi aimbile pa fyo umuntu afwile ukucita pa kuti abe ‘umweni mwi tenti lya kwa Yehova,’ nangu ukuba cibusa wa kwa Lesa. (Amalu. 15, 1) Twalalanda pa fintu fibili ifyo afwaya, e kutila ukukanacita ulwambo no kuba aba cishinka muli fyonse. Davidi alandile pa wingaba umweni mwi tenti lya kwa Yehova ukuti: ‘Tacita ulwambo ku lulimi lwakwe kabili tapoka amafisakanwa ku kufyengelesha uwa kaele.’—Amalu. 15:3, 5.

11. Mulandu nshi tushifwile ukubela no lwambo?

¹¹ Mwi lumbo limbi, Davidi asokele ukuti: “Wileka ululimi lobe lulelanda ifyabipa.” (Amalu. 34:13) Nga tatuleumfwila uku kufunda ukwafuma kuli Lesa, bucibusa bwesu na Shifwe wa ku muulu kuti bwapwa. Na kuba, ulwambo e mibele iyo Satana, umulwani mukalamba uwa kwa Yehova akwata. Ishiwi lya kuti “Kaseebanya” lyafuma kwi shiwi lya ciGriki ilipilibula ukuti “uwa lwambo.” Nga tatulelanda ifyabipa pa bantu bambi tukatwalilila ukupalama kuli Yehova. Tatufwile ukulanda ifyabipa maka maka pa baume abo Lesa asonta ukulatungulula icilonganino.—Belengeni AbaHebere 13:17; Yuda 8.

12, 13. (a) Mulandu nshi tulingile ukubela aba cishinka muli fyonse? (b) Finshi fingafumamo nga ca kuti tuli ba cishinka?

¹² Ababomfi ba kwa Yehova baishibikwa ukuti ba cishinka. Umutumwa Paulo atile: “Muletupepelako, pantu natucetekela ukuti tuli na kampingu umusuma, apo tufwaya ukuba aba cishinka muli fyonse.” (Heb. 13:18) Apo tufwaya “ukuba aba cishinka muli fyonse,” tatuliila Abena Kristu banensu amasuku pa mutwe. Ku ca kumwenako, nga ca kuti twalingisha Abena Kristu banensu incito, tufwile ukulababomfya bwino no kubalipila ukulingana ne fyo twapangana. Apo tuli Bena Kristu, twaliba ne cishinka ku bo twaingisha incito na ku bantu bambi. Kabili nga twalingila incito ku Mwina Kristu munensu, tatufwile ukwenekela ukuti aletucitila ifintu ukupusanako ne fyo acitila ababomfi bakwe bambi.

¹³ Ilingi line abantu balatasha pa fyo ba Nte baba aba cishinka! Ku ca kumwenako, dairekita wa kampani imo iya makuule alandile ukuti Inte sha kwa Yehova balacita ifyo basosa. Atile: “Lyonse mulafikilisha icipangano.” (Amalu. 15:4) Ukuba aba cishinka kulalenga twatwalilila ukuba ifibusa fya kwa Yehova. Na kabili, kulalenga Shifwe wa ku muulu ukulumbanishiwa.

14, 15. Kuti twa-afwa shani abantu ukuba ifibusa fya kwa Yehova ilyo tuleshimikila?

¹⁴ Nangu ca kutila abantu tusanga ilyo tuleshimikila balisumina ukuti Lesa e ko  aba, abengi tabamumona ukuti ni Cibusa wabo. Bushe kuti twa-afwa shani abantu ba musango uyu? Moneni ifyo Yesu aebele abasambi bakwe 70 ilyo abatumine babili babili mu kushimikila, atile: “Mu ng’anda yonse umo mwaingila, mubale musose amuti, ‘Umutende ube muli ino ng’anda.’ Kabili ngo muntu uulefwaya umutende e mo ali, umutende wenu ukaba pali ena. Lelo nga talimo, ukabwelela kuli imwe.” (Luka 10:5, 6) Nga tuli na bucibusa ku bantu, tukalenga bakafwaye ukusambilila icine. Nangu fye ni balya abakaanya, nalimo inshita imbi kuti bafwaya ukukutika ku mbila nsuma.

¹⁵ Nga twasanga abantu abacincila sana mu mipepele ya bufi nelyo abakonka intambi isho Baibolo yakaanya, tulatwalilila ukuba aba bucibusa kabili aba mutende. E lyo kabili, tulapokelela bwino na bantu abesa mu kulongana, abapata ifyabipa ificitika mu bwikashi kabili abafwaya ukwishibilapo ifingi pali Lesa tupepa. Mu fipande fitila “Baibolo Ilaalula Abantu” mwaliba amalyashi ya bantu abengi aba-aluka.

16. Bushe kuti twaba shani ifibusa fya kwa Yehova kabili ‘ababombela pamo’ nankwe?

¹⁶ Ilingi line abantu ababombela pamo balaba ifibusa sana. Bonse abaipeela kuli Yehova balaba ifibusa fyakwe kabili ‘balabombela pamo’ nankwe. (Belengeni 1 Abena Korinti 3:9.) Ilyo tuleshimikila no kulenga abantu ukuba abasambi, tuleshibilako imibele iisuma iyo Shifwe wa ku muulu akwata. Tulamona ifyo umupashi wakwe uwa mushilo utwafwa ilyo tulebomba umulimo wa kushimikila uo atupeela.

17. Bushe ifyo tusambilila pa kulongana kukalamba filanga shani ukuti Yehova ni Cibusa wesu?

¹⁷ Nga tuleshimikila sana imbila nsuma tulapalama sana kuli Yehova. Ku ca kumwenako, tulamona ifyo Yehova acincintila abakaanya imbila nsuma. Nga twatontonkanya pa fyacitika mu myaka iyapita, bushe tatumona ukuti Lesa alatutungulula? Tulapapa ukuti lyonse Yehova alatusambilisha ifisuma ifingi nga nshi. Ilyo tuli pa kulongana kukalamba, tulamona ukuti Shifwe alishiba amafya tupitamo ne fyo tukabila. Pa numa ya kulongana icitungu, ulupwa lumo lwalembele kalata ya kutasha. Balembele ukuti: “Ifyo tusambilile nafitufika sana pa mutima. Natumona ifyo Yehova atutemwa ne fyo afwaisha ukuti tutunguluke.” Pa numa ya kusangwa ku kulongana kwa citungu ukwaibela mu Ireland, abaupana abena Germany balitashishe sana pa fyo babapokelele bwino ne fyo babasakamene. Bakonkenyepo abati: “Lelo tuletasha sana Yehova na Yesu Kristu Imfumu. Balituleta muli ulu luko ulwaikatana. Tatulanda fye pa kwikatana lelo cila bushiku tulaipakisha uku kwikatana. Ifyacitike  ilyo twalongene ukulongana kwa citungu ukwaibela mu Dublin kukalatwibukishako lyonse pe shuko lyaibela ilyo twakwata ilya kubombela Lesa wesu uwakulisha pamo na imwe.”

18. Finshi tufwile ukuyipusha pa fyo tulanshanya na Yehova?

¹⁸ Bucibusa bulakoselako nga ca kuti ifibusa filalanshanya bwino. Muno nshiku abantu balalanshanya sana ukubomfya Intaneti no kutumishanya amameseji pa foni. Inga ifwe, tulanshanya shani na Cibusa wesu, Yehova? Ca cine ukuti ‘Alomfwa ipepo.’ (Amalu. 65:2) Nomba bushe tulalanda nankwe lyonse?

19. Finshi fingatwafwa nga ca kutila tulefilwa ukweba Shifwe wa ku muulu ifili mu mutima wesu?

¹⁹ Ababomfi ba kwa Lesa bamo balafilwa ukweba Lesa fyonse ifili mu mutima wabo. Lelo Yehova afwaya ukuti tulemweba fyonse ifili mu mutima wesu. (Amalu. 119:145; Inyimbo 3:41) Kwaliba ifingatwafwa nga ca kutila tulefilwa ukulondolola bwino ifyo tuleumfwa. Umutumwa Paulo alembeele Abena Kristu mu Roma ukuti: “Pantu ubwafya tulingile ukupepela ilyo tulefwaya ukupepa tatubwishiba, lelo umupashi wine ulatupapaatilako ilyo tuleteta ukwabula ukulanda. Lelo uufwayafwaya mu mitima alishiba ififwaya umupashi, pantu ulapapaatilako aba mushilo ukulingana no kufwaya kwa kwa Lesa.” (Rom. 8:26, 27) Ukulatontonkanya pa fyalembwa mu mabuuku ya mu Baibolo pamo nga Yobo, Amalumbo, na Amapinda, kukatwafwa ukulaeba Yehova fyonse ifili mu mutima wesu.

20, 21. Bushe amashiwi Paulo alandile pa Abena Filipi 4:6, 7 yatusansamusha shani?

²⁰ Nga twaba na mafya, tuleibukisha amashiwi ayafuma kuli Lesa ayo Paulo alembeele abena Filipi, ukuti: “Mwisakamikwa nangu kamo, lelo muli fyonse lekeni ifyo mulelomba fishibikwe kuli Lesa mu kupepa no kupapaata pamo no kutootela.” Nga tulepepa kuli Yehova muli iyi nshila, tukalasansamushiwa, pantu Paulo alandile no kuti: “Umutende wa kwa Lesa uwacila amatontonkanyo yonse ukalinda imitima yenu na matontonkanyo yenu muli Kristu Yesu.” (Fil. 4:6, 7) E ico, natutwalilile ukulatasha pa “mutende wa kwa Lesa” uulinda imitima yesu na matontonkanyo.

²¹ Ipepo lilalenga twaba ifibusa na Yehova. E ico ‘natulepepa ukwabula ukuleka.’ (1 Tes. 5:17) Lekeni ukuti ifyo twasambilila fitwafwe ukulakosha bucibusa bwesu na Lesa no kutwalilila ukulacita ifyo afwaya. Kabili natuletontonkanya pa mapaalo twakwata pa mulandu wa kuti Yehova ni Shifwe, Lesa wesu kabili Cibusa wesu.