Bushe mwalibelenga bwino bwino magazini ya Ulupungu lwa kwa Kalinda iya nomba line? Moneni nga kuti mwayasuka ifi fipusho:

Ni nshita nshi baleipailapo impaanga ya Ca Kucilila pa bushiku bwa Nisani 14?

AmaBaibolo ayengi yalanda ukuti baleipaya impaanga “icungulo,” yambi yatila “icungulo cinono,” e kutila lilya akasuba kawa nelyo ilyo takulafiita sana. (Ukufu. 12:6)—12/15, amabula 18-19.

Kufunda nshi ukwingafwa abacaice ukusala bwino ifya kucita?

Kwaba kutatu (1) Mulefwaya intanshi Ubufumu bwa kwa Lesa no bulungami bwakwe. (Mat. 6:19-34) (2) Muleba ne nsansa ilyo mulebombela bambi. (Imil. 20:35) (3) Bombeleni Lesa ilyo mucili abaice. (Luk. Mil. 12:1)—1/15, amabula 19-20.

Bushe ni bakabalwe nshi bane ababombesha ukutula 1914?

Yesu uwanina pali kabalwe wabuuta, alitamfya Satana ne fibanda fyakwe mu muulu. Uwanina pali kabalwe wakashika e mininako inkondo ishateeka abantu ku munga we fwafwa. Uwanina pali kabalwe wafiita e mininako icipoowe. Uwanina pali kabalwe wabutulukila aleta imfwa pa calo ne fikuko ifipaya abantu abengi nga nshi. (Ukus. 6:2-8)—2/1, amabula 6 na 7.

Ni lilali kukaba “ubwinga bwa Mwana wa mpaanga”? (Ukus. 19:7)

“Ubwinga bwa Mwana wa mpaanga” bukabako ilyo Imfumu Yesu Kristu akapwishishisha ukucimfya abalwani bakwe, e kutila pa numa ninshi Babiloni Mukalamba naonaulwa, e lyo ne nkondo ya Armagedone naipita.—2/15, ibula 10.

Mulandu nshi abaYuda ba mu nshiku sha kwa Yesu ‘balelolelela’ Mesia? (Luka 3:15)

Tapaba ubushininkisho ubulanga ukuti abaYuda abaliko mu nshita ya batumwa balishibe ukusesema kwa kwa Daniele ukulanda pali Mesia nge fyo ifwe twaishiba. (Dan. 9:24-27) Lelo bafwile balishibe amashiwi bamalaika baebele bakacema, nelyo amashiwi kasesema mwanakashi Ana alandile ilyo amwene Yesu ninshi ali akanya ilyo bamutwele pe tempele. Na kabili, ababukila ku ntanda baliile mu kufwaya ‘imfumu ya baYuda iyafyelwe.’ (Mat. 2:1, 2) Pa numa, Yohane Kabatisha alangile ukuti tapali na kukokola, Kristu ali no kumoneka.—2/15, amabula 26 na 27.

Kuti twacita shani pa kuti Ee yesu taileba Iyo? (2 Kor. 1:18)

Kwena limo kulaba ificitika ukwabula ukwenekela ifingalenga twifikilisha ifyo twalaile. Lelo nga twalaya ukucita fimo, tufwile ukwesha na maka yonse ukufikilisha ifyo twalaya.—3/15, ibula 32.

Kuti twacita shani pa kuti tucimfye itunko lya kutamba ifye shiku?

Kwaba ifintu fitatu ifingatwafwa (1) Nga mwamona ifye shiku, ilyo line fye mulefumyako amenso. (2) Mwilatontonkanya pa fyabipa, muletontonkanya pa fintu ifisuma kabili mulepepa kuli Lesa. (3) Muletaluka ku fyabipa, mwilatamba amafilimu nelyo ukuya pa ma Webu saiti apaba ifye shiku.—4/1, amabula 10-12.

Mafya nshi yengafumamo nga ca kuti Umwina Kristu asha ulupwa lwakwe no kuya mu kubomba incito ku calo cimbi?

Nga ca kutila abafyashi basalapo ukulaikala palepale, abana kuti baleba sana no bulanda, kabali nalimo kuti baba ne mibele yabipa. E lyo kabili nalimo kuti bakaana na bafyashi babo. E lyo na baupana bene abashileikala pamo na bena mwabo kuti baba na matunko ya kucita ubucende.—4/15, amabula 19-20.

Mulandu nshi balefunina amolu ya fipondo ifyo balepoopela pa fimuti?

Abena Roma balepoopela ifipondo fimo pa cimuti pa kufipaya. AbaYuda balombele ukuti bafune amolu ya fipondo fibili ifyo bapoopeele pamo na Yesu. Ukucita ifi kwalelenga ifipondo ukulafilwa ukupeema bwino, no kufwa bwangu. Kanshi ifipondo tafyaleshala ubushiku bonse pa fimuti ukwabula ukufwa. (Amala. 21:22, 23)—5/1, ibula 11.

Mepusho nshi yane ayo tulingile ukulatontonkanyapo ilyo tuleshimikila ku bantu?

Ilya kubalilapo lya kutila, Bushe uyu ndefwaya ukushimikilako aba shani? Ni kwisa ndeshimikila? Ni nshita nshi ndeshimikila? Ne lya kutila, Bushe mfwile ukulanshanya shani nankwe?—5/15, amabula 12-15.

Bubi nshi bwaba mu kupeepa fwaka?

Mu myaka 100 iyapita, fwaka yalipaya abantu 100 milioni. Muno nshiku, fwaka ipaya abantu nalimo 6 milioni cila mwaka.—6/1, ibula 3.