1, 2. Mulimo nshi Yehova apeele Mose, kabili mashiwi nshi aya kumukosha ayo amwebele?

BUSHE kuti mwaumfwa shani nga ca kuti balimwebele ukuyalandilako abantu ba kwa Yehova kuli kateka uwakwatisha amaka? Ukwabula no kutwishika kuti mwamona kwati tamufikilepo, kuti mwasakamana icine cine kabili kuti mwaumfwa no mwenso. Kuti mwapekanya shani ifya kuyalanda? Kuti mwacita shani pa kuti ifyo mwalayalanda fiyefika kateka pa mutima ilyo mwalayaimininako Lesa wa maka yonse?

² Ifi fine e fyo cali na kuli Mose. Yehova atumine Mose uwali “uwafuukisha pa bantu bonse abali pano isonde” ukuyalubula abantu ba kwa Lesa abatekelwe ubusha kuli Farao mu Egupti. (Impe. 12:3) Lelo Farao ali muntu wa musaalula kabili uwatalama. (Ukufu. 5:1, 2) Yehova aebele Mose ukutila ebe Farao ukuti aleke abantu abengi abo atekele ubusha! Lelo pa mulandu ne fyo Farao aali, Mose aebele Yehova ati: “Nine nani uwa kuya kuli Farao no kufumya abana ba kwa Israele mu Egupti?” Mose afwile aleimona ukuti tafikilepo ukuyalanda na Farao. Lelo Lesa alimwebele ukuti ali no kumwafwa. Amwebele ukuti “nkaba na iwe.”—Ukufu. 3:9-12.

3, 4. (a) Finshi Mose aletiina? (b) Bwafya nshi ubo nalimo mwingakwata ubwapalana no bwakwete Mose?

³ Finshi Mose aletiina? Aletontonkanya ukuti Farao taumfwe  nelyo ukubika amano ku fyo uo Yehova Lesa atumine alamweba. E lyo Mose aletiina na bantu bakwe bene ukuti tabakasumine ukuti Yehova e wamutumine ukubalubula mu Egupti. E ico Mose aebele Yehova ati: “Tutile bakaana ukusumina kabili bakaana no kukutika kwi shiwi lyandi, pantu bakatila, ‘Yehova tamoneke kuli iwe.’”—Ukufu. 3:15-18; 4:1.

⁴ Kuti twasambililako isambililo ilyacindama ku fyo Yehova ayaswike Mose e lyo ne fyacitike pa numa. Kwena nalimo imwe tamwakeminine pa ntanshi ya kwa cilolo wa buteko. Lelo bushe cilamukosela ukulanda na bantu pali Lesa na pa Bufumu bwakwe? Nga cilamukosela, moneni ifyo mwingasambililako ku cacitike kuli Mose.

5. Maka nshi Yehova apeele Mose, kabili yamupwishishe shani umwenso? (Moneni icikope pa ntendekelo ya cino cipande.)

⁵ Ilyo Mose alandile ukuti alemona kwati Farao na bena Israele banankwe tabakamumfwe, Lesa alimwebele ifyo aali no kucita. Ilyashi ilyalembwa mwi buuku lya Ukufuma litila: “Yehova amwipwishe ati: ‘Cinshi cili mu minwe yobe?’ na o atile: ‘Ni nkonto.’ E lyo atile: ‘Ipoose pa nshi.’ Awe apoosele nkonto pa nshi, na yo yasangwike insoka; na Mose e pa kufulumukako. Yehova nomba atile kuli Mose: ‘Tambaliko kuboko kobe no kuikata ku mucila.’ Awe atambalike ukuboko kwakwe no kwikata ku mucila wa nsoka, na yo yasangwike inkonto mu minwe yakwe. Kabili Lesa amwebele ukuti ifi e fyo akacite ‘pa kuti bakasumine ukuti Yehova . . . alimoneke kuli ena.’” (Ukufu. 4:2-5) Lesa alipeele Mose icishibilo ca maka icali no kulenga Farao na bena Israele basumine ukuti ni Yehova e wamutumine. Ico abantu balemona ukuti ni nkonto fye, calesanguka insoka pa mulandu na maka ya kwa Lesa! Ici icipesha amano, cali bushininkisho bwa kutila Yehova aali nankwe! E ico Yehova nomba amwebele ati: “Ukasende iyi nkonto mu minwe yobe pa kuti ukalecitilako ifipesha amano.” (Ukufu. 4:17) Amaka ya kucita icipesha mano ayo Lesa amupeele, yalengele Mose ukuyaimininako Lesa wa cine ku bantu bakwe na kuli Farao.—Ukufu. 4:29-31; 7:8-13.

6. (a) Cinshi twikata mu minwe nga tuleshimikila, kabili mulandu nshi? (b) Londololeni ifyo “icebo ca kwa Lesa caba ica mweo” ne fyo caba ica “maka.”

⁶ Ilyo tuya mu kushimikila, na ifwe kuti twaipusha cilya cipusho Lesa aipwishe Mose ica kuti “cinshi cili mu minwe yobe?” Lyonse nga tuleshimikila tulakwata Baibolo mu minwe. Nangu ca kutila bamo kuti bamona kwati Baibolo citabo fye, e mo Yehova alandila kuli ifwe. (2 Pet. 1:21) E mwalembwa ifyo atulaya ifikacitika mu Bufumu bwakwe. E mulandu wine Paulo alembeele ukuti: “Icebo ca kwa Lesa ca mweo kabili ca maka.” (Belengeni AbaHebere 4:12.) Fyonse ifyo Yehova atulaya fikacitika nangu cikabe shani, pantu alitwalilila ukubomba pa kuti akafikilishe amalayo yakwe. (Esa. 46:10; 55:11) Umuntu nga aishiba ukuti ifi e fyo Icebo ca kwa Yehova cilanda, ifyo abelenga mu Baibolo kuti fyalenga ayaluka.

7. Kuti twacita shani pa kuti ‘tulungike pa kusambilisha icebo ca cine’?

⁷ Kanshi Yehova alitupeela Icebo cakwe ica mweo ico twingabomfya pa kupeela ubushininkisho bwa kutila ifyo tushimikila fya cine kabili fyafuma kuli ena. E mulandu wine Paulo, pa numa ya kulembela abaHebere kalata, akoseleshe Timote uo alekansha ‘ukuibikilishako pa kuti alelungika ukusambilisha icebo ca kwa Lesa ica cine.’ (2 Tim. 2:15) Kuti twabomfya shani ukufunda kwa kwa Paulo? Icingatwafwa kulaikatisha nga tulebelenga amalembo ayo tupekenye ukuyalanshanya na bengatemwa ukukutika. Amatrakiti ayo twapokelele pa kulongana kwa citungu mu mwaka wa 2013, kuti yatwafwa ukulacita ifi fine.

8. Cinshi kangalila wa mulimo alandile pa matrakiti?

⁸ Amatrakiti ayapya bayapanga fye cimo cine. Kanshi nga twaishiba ifya kubomfya trakiti imo ninshi natwishiba ne fya kubomfya yonse. Bushe  yalyanguka ukubomfya? Kangalila wa mulimo mu Hawaii ku America atile: “Tatwaishibe bwino ukuti aya matrakiti ayapya yalabomba bwino sana mu mulimo wa kushimikila ku ng’anda ne ng’anda na ku cintubwingi.” Asanga ukuti aya amatrakiti yalilembwa bwino sana ica kutila yalalenga abantu balefwaisha ukukutika ku mbila nsuma, ne ci cilenga alelanshanya bwino na bantu. Uyu munyinefwe atile, icalenga aya amatrakiti ukulabomba bwino sana, ni co yalikwata icipusho pa ntendekelo e lyo na masuko ayo umuntu engasala. Kanshi uo muleshimikilako te kuti asakamane ifyo alayasuka icipusho.

9, 10. (a) Bushe amatrakiti yapya yatwafwa shani ukufwaya ukubelenga Baibolo? (b) Ni trakiti nshi iyo mwabomfyapo bwino sana, kabili mulandu nshi?

⁹ Amatrakiti yonse ayapya yalatwafwa ukubelenga amalembo ayapekanishiwa bwino. Ku ca kumwenako, lolesheni pali trakiti iitila Bushe Ukucula Kukatala Akupwa? Te mulandu ne fyo umuntu muleshimikila ayasuka ilyo mwamwipusha, nampo nga atila “ee,” “awe,” nelyo “nalimo”, ukwabula ukulanda nangu cimo kuti mwaya pe bula lyakonkapo no kulanda ukuti, “Moneni ifyo Baibolo ilanda.” Lyena belengeni Ukusokolola 21:3, 4.

¹⁰ E fyo mufwile ukucita na lintu muleshalika trakiti iitila Bushe Mutila Baibolo ni Cinshi? tamufwile ukusakamana pa casuko ico umuntu muleshimikilako asala. Kabiyeni fye pe bula lyakonkapo no kulanda umuti, “Baibolo ilanda ukuti ‘Amalembo yonse yafuma kuli Lesa.’” Kuti mwalanda no kuti “Kwena, fingi ifyo ili ilembo lilandapo.” Lyena isuleni Baibolo yenu no kubelenga ilembo lyonse ilya 2 Timote 3:16, 17.

11, 12. (a) Fisuma nshi musanga ilyo muleshimikila? (b) Bushe amatrakiti kuti yamwafwa shani ukupekanya ukubwelela kubo mwashimikileko?

¹¹ Ifyo umuntu muleshimikila aleankulako e fikalenga mwishibe ubwingi bwa fyebo ifyo mufwile ukubelenga muli trakiti no kulanshanyapo. Icintu icikalamba sana ca kuti, pa mbali ya kupeela umuntu trakiti, tufwile ukumubelengela ne Cebo ca kwa Lesa, nangu limbi kuti mwabelenga fye icikomo cimo nelyo fibili. Pa numa, kuti mwabwelelako no kutwalilila ukulanshanya nankwe.

¹² Pe bula lya kulekeleshako ilya aya matrakiti, pa kamutwe akatila “Ifyo Mulingile Ukulatontonkanyapo” paliba icipusho e lyo na malembo ifyo mwingalanshanyapo nga mwabwelelako. Muli trakiti iitila Bushe Mumona Shani Ifyo  Ifintu Fikaba ku Ntanshi?, icipusho mwingayalanshanyapo nga mwabwelelako ca kuti “Bushe Lesa akalenga shani ifintu ukuwama pano calo?” Paliba ne lembo lya kwa Mateo 6:9, 10 na Daniele 2:44. Pali trakiti itila Bushe Cine Cine Abafwa Kuti Baba aba Mweo na Kabili? paba icipusho icitila “Mulandu nshi tukotela no kufwa?” Paliba ne lembo lya Ukutendeka 3:17-19 na Abena Roma 5:12.

13. Londololeni ifyo twingabomfya amatrakiti ku kutendeka amasambililo ya Baibolo.

¹³ Bomfyeni amatrakiti ku kutendeka amasambililo ya Baibolo. Nga ca kuti umuntu mwashila trakiti acita scan QR code iyaba pe bula lya kulekeleshako ilya trakiti, kuti asanga ifyebo na fimbi pali Webu saiti yesu iya jw.org ifingalenga afwaye ukulasambilila Baibolo. Pali aya matrakiti paliba ne cikope ca broshuwa iitila Imbila Nsuma Ukufuma Kuli Lesa! kabili cila trakiti ilalanda ne sambililo ilyo mufwile ukulanshanyapo muli iyi ine broshuwa. Ku ca kumwenako, trakiti iitila Kateka wa Calo Conse Nani? ilanda pe sambililo 5 ilya muli iyi ine broshuwa. Trakiti iitila Cinshi Cingalenga Ulupwa Luleba ne Nsansa? ilanda pe sambililo 9 muli iyi ine broshuwa. Nga tulebomfya amatrakiti ukulingana ne fyo tufwile ukuyabomfya, ninshi tukalabomfya bwino Baibolo ilyo tulelanshanya na bantu pa muku wa kubalilapo na lintu tulebwelelako. Nga tulecita ifi, tukalatendeka amasambililo ya Baibolo ayengi. Finshi fimbi ifyo twingacita pa kuti tulebomfya bwino Icebo ca kwa Lesa ilyo tuleshimikila?

14, 15. Bushe kuti mwapashanya shani ifyo Paulo alemona ukushimikikla imbila nsuma?

¹⁴ Paulo alefwaisha ukushimikila ‘abantu abengi.’ (Belengeni 1 Abena Korinti 9:19-23.) Paulo alicetekele ukuti, kuti ‘anonka abaYuda, anonka abakonka amafunde, nelyo ukunonka abashikonka amafunde, no kunonka abanaka.’ Ca cine, Paulo alefwaya ukushimikila ku ‘bantu bonse pa kuti mu nshila iili yonse apususheko bamo.’ (Imil. 20:21) Kuti twapashanya shani Paulo ilyo tuleipekanya ukushimikila “abantu balekanalekana” mu cifulo tushimikilamo?—1 Tim. 2:3, 4.

¹⁵ Cila mweshi mu Ubutumikishi Bwesu Ubwa Bufumu mulaba ifyebo pa fya kushimikila. Mulefibomfya. Lelo nga ca kuti kuli fimo ifisakamike abantu mu cifulo mushimikila, pekanyeni bwino ifyo mwingatendeka ukulanshanya na bantu pa kuti bengafwaisha ukukutika ku mbila nsuma. Muletontonkanya pa cifulo mwikalamo, abantu mwikala nabo ne fintu ifyo batontonkanyapo sana. Tontonkanyeni pe lembo ilyo mwingabomfya ilingabafwa. Kangalila wa muputule umo alandile pa fyo ena no mwina mwakwe babomfya Baibolo, atile: “Abantu abengi abo tusanga pa mayanda balatusuminisha ukubabelengela icikomo cimo nga ca kuti tatwapose inshita. Tulakupukwila limo Baibolo pa kuti nga twaposhanya fye, twababelengela ilembo.” Moneni amalyashi yamo, ifipusho, na malembo bamo babomfyapo ifyo na imwe nalimo mwingabomfya mu cifulo mushimikila.

16. Londololeni ifyo twingabomfya Esaya 14:7 ilyo tuleshimikila.

¹⁶ Nga mwikala mu cifulo umushaba sana umutende, kuti mwaipusha umuntu amuti: “Bushe mulemona ukutila kuti kwaba inshita ilyo abantu mwi sonde lyonse bengekala umutende, ne nsansa ukwabula ne fya kubatiinya’? Ifi fine e fyo Baibolo yalaya pali Esaya 14:7. Na kuba, mu Baibolo mwaliba amalayo ya kwa Lesa ayengi ayalanga ukuti akaleta umutende pano calo.” Pa numa, belengeni amalayo yamo ayaba mu Baibolo.

17. Kuti mwabomfya shani Mateo 5:3 pa kulanshanya no muntu?

¹⁷ Bushe calyafya ku bantu abengi ukusanga umwakulila ku cifulo mwikala? Nga e fyo caba, pa kutendeka ukulanshanya kuti mwaipusha amuti: “Ni ndalama shinga umuntu afwile ukukwata pa kuti ulupwa lwakwe lube ne nsansa?”  Nga baasuka, kuti mwalanda ukuti: “Nangu ca kuti abantu abengi balakwata indalama ishingi sana, indupwa shabo tashaba ne nsansa.” Kanshi, cinshi cifwaikwa pa kuti indupwa shileba ne nsansa? Lyena belengeni Mateo 5:3 no kutendeka isambililo lya Baibolo.

18. Kuti mwabomfya shani Yeremia 29:11 nga mulefwaya ukusansamusha abantu?

¹⁸ Bushe mu cifulo mwikala mwalicitika akayofi akalenga ukuti abantu balecula? Kuti mwatendeka ukulanshanya no muntu uo mwasanga, amashiwi ya kuti: “Na mutandalila pa kuti tulanshanyeko amashiwi ya cisansamushi? (Belengeni Yeremia 29:11.) Bushe mwamona ifintu fitatu ifyo Lesa afwaya ukutucitila? Afwaya ukuti tukakwate ‘umutende,’ ‘inshita ya ku ntanshi iisuma’, no kuba ‘ne subilo.’ Bushe tatutemwa pa kwishiba ukuti Lesa afwaya tuleikala bwino? Bushe ifi kuti fyacitika?” Lyena kabiyeni pe sambililo ililanda ukuti ifi fikacitika, muli broshuwa ya Imbila Nsuma.

19. Londololeni ifyo mwingabomfya Ukusokolola 14:6, 7 pa kushimikila abantu abatemwa ifya kwa Lesa.

¹⁹ Bushe mwikala mu cifulo umo abantu batemwa ifya kwa Lesa? Nga e fyo caba, pa kutendeka ukulanshanya kuti mwaipusha ati: “Bushe malaika nga alandile nenu, kuti mwakutika ku fyo alelanda? (Belengeni Ukusokolola 14:6, 7.) Apo uyu malaika atila ‘tiiineni Lesa,’ bushe te kuti cibe bwino ukwishiba Lesa uo uyu malaika alelandapo? Uyu malaika alalenga twaishiba Lesa uo alelandapo ilyo asosa ukuti e ‘wapangile umuulu ne sonde.’ Bushe ni Lesa nshi uyo wine?” Lyena belengeni Amalumbo 124:8, apatila: “Ukwafwiwa kwesu kwaba mwi shina lya kwa Yehova, Uwapangile umuulu ne sonde.” Pa numa, lanshanyeni ilyo mukabwelelako pa kuti mukayelanshanya na fimbi pali Yehova Lesa.

20. (a) Bushe kuti twabomfya shani Amapinda 30:4 ku kusambilisha umuntu ishina lya kwa Lesa? (b) Bushe kwaliba ilembo na limbi ilyo mubomfya nga muleshimikila ilibomba bwino?

²⁰ Pa kutendeka ukulanshanya no wacaice kuti mwatila: “Bushe kuti watemwa ukubelenga ilembo apaba icipusho cacindama. (Belengeni Amapinda 30:4.) Takwaba umuntu nangu umo uwingacita ifi, ili lembo uo lilandapo fye ni Kabumba wesu. * Kuti twaishiba shani ishina lyakwe? Kuti natemwa ukukulanga apalembwa ishina lyakwe mu Baibolo.”

21, 22. (a) Bushe ukubelengela umuntu ilembo ilyo mupekenye bwino kuti kwayafwa shani uo muleshimikilako? (b) Cinshi mulefwaya sana ukulacita ilyo muleshimikila?

²¹ Te kuti mwishibe ifyo abantu bengankulako nga mwababelenga ilembo ilyo mupekenye bwino. Ku ca kumwenako, ba Nte babili mu Australia baile pa ng’anda apali umukashana pa kuti bamushimikile. Umo amwipwishe ati, “Bushe walishiba ishina lya kwa Lesa?” kabili amubelengele Amalumbo 83:18. Umukashana atile: “Nalipapile icine cine ilyo namwene ishina lya kwa Lesa. Ilyo aba ba Nte baile, nabulile motoka no kwensha amakilomita 56 ukuya kwi shitolo uko bashitisha ifitabo pa kuti njemone ili shina nga lilasangwa na mu maBaibolo yambi kabili nafwaile na muli dikishonari no kumona umo lyalola. Ilyo nashininkishe ukuti ishina lya kwa Lesa ni Yehova, natampile ukutontonkanya nga kwali na fimbi ifyo nshaishibe.” Mu kupita kwa nshita, uyu mukashana no wali no kuba umulume wakwe balitendeke ukusambilila Baibolo, kabili pa numa balibatishiwe.

²² Icebo ca kwa Lesa cilalula abantu abacibelenga no kutetekela amalayo ya kwa Yehova. (Belengeni 1 Abena Tesalonika 2:13.) Ifyo Baibolo isambilisha filafika sana abantu pa mutima ukucila pali fyonse ifyo twingasosa. Kanshi nacicindama sana ukuti lyonse tulebomfya Icebo ca kwa Lesa. Ala ca mweo!