TULEIKALA mu nshita ishayafya nga nshi. (2 Tim. 3:1-5) Cila bushiku tuleshiwa mu fyo twatemwa Yehova na mu fyo tufwaisha ukulakonka amafunde yakwe ayalungama. Yesu alishibe ukuti kukaba inshita sha musango uyu, kabili alyebele abasambi bakwe ukuti akalabakosha pa kuti bakatwalilile ukushipikisha ukufika na ku mpela. (Mat. 24:3, 13; 28:20) E ico pa kuti alebakosha, asontele umusha wa cishinka pa kuti alebapekanishisha “ifya kulya pa nshita yalinga.”—Mat. 24:45, 46.

Ukutula fye mu 1919 ilyo umusha wa cishinka asontelwe, abantu abengi “aba mu ng’anda” abafuma mu ndimi shonse balilonganikwa mu cilonganino ca kwa Lesa kabili balalya ifya kulya fya ku mupashi. (Mat. 24:14; Ukus. 22:17) Lelo, ifi fya kulya tafisangwa mu ndimi shonse, kabili te bantu bonse babelenga impapulo shesu pa Intaneti. Abantu abengi te kuti batambe amavidio nelyo ukubelenga amalyashi ayo tusabankanya fye pa Webu saiti yesu iya jw.org. Bushe ici cilolele mu kuti abantu bamo tabakwata ifya kulya fya ku mupashi ifyo bakabila pa kuti batwalilile ne citetekelo icakosa? Pa kuti tusange amasuko, natulande pa fipusho fine ifyakonkapo.

Ilyo Satana atunkile Yesu ukwalula amabwe ukuba umukate, Yesu amwaswike ati: “Te ku fya kulya fyeka umuntu ekalila no mweo, lelo na ku mashiwi yonse ayafuma mu kanwa ka kwa Yehova.” (Mat. 4:3, 4) Amashiwi ya kwa Yehova yaba mu Baibolo. (2 Pet. 1:20, 21) Kanshi ico balandapo sana mu fya kulya ifyo Yehova apekanya ni Baibolo.—2 Tim. 3:16, 17.

Icilonganino ca kwa Yehova calipilibula Baibolo ya Amalembo ya Calo Cipya yonse nelyo fye Amalembo ya Bwina Kristu aya ciGriki mu ndimi ukucila pali 120, kabili indimi na shimbi shilelundwako cila mwaka. Na kabili, kwaliba amabilioni ayengi aya maBaibolo yambi mu ndimi ishingi sana. Ifi fyonse filelanga ukuti ukufwaya kwa kwa Yehova kwa kuti “abantu balekanalekana bakapusuke no kwishiba bwino bwino icine.” (1 Tim. 2:3, 4) Kabili apo “takwaba icibumbwa icafisama ku cinso cakwe [Yehova],” te kuti tutwishike ukuti akakulila bonse “abaishiba ukuti balakabila ifya kwa Lesa” ku cilonganino cakwe no kulabapekanishisha ifya kulya fya ku mupashi.—Heb. 4:13; Mat. 5:3 6; Yoh. 6:44; 10:14.

Pa kuti umuntu akwate icitetekelo icakosa, talingile ukupelela fye pa kubelenga Baibolo. Afwile ukumfwa ifyo alebelenga no kulacita ifyo alesambilila. (Yako. 1:22-25) Mutungwi umwina Ethiopia uwaliko mu nshita ya batumwa alishibe bwino ici cishinka. Alebelenga Icebo ca kwa Lesa ilyo Filipi kabila wa mbila nsuma amwipwishe ati: “Bushe cine cine nawishiba ifyo ulebelenga?” Na o atile: “Bushe kuti naishiba shani, apabula uwa kuntungulula?” (Imil. 8:26-31) Filipi alyafwile uyu mutungwi ukwishiba bwino bwino Icebo ca kwa Lesa. Ifyo uyu mutungwi aumfwile fyalimufikile sana pa mutima ica kuti alipingwilepo no kubatishiwa. (Imil. 8:32-38) Impapulo shesu ishilanda pali Baibolo nasho shilatwafwa ukwishiba bwino bwino icine. Ifyaba mu mpapulo shesu filatufika pa mutima, ica kuti tulafwaya sana no kulakonka ifyo tusambilila.—Kol. 1:9, 10.

Ukubomfya impapulo kulenga ababomfi ba kwa Yehova balekwata ifya kulya fya ku mupashi ifingi sana. (Esa. 65:13) Ku ca kumwenako, Ulupungu lwa kwa Kalinda lulapilibulwa mu ndimi ukucila pali 210, lulalondolola ubusesemo bwa mu Baibolo, lulatwafwa ukumfwikisha icine icashika, kabili lulenga tulekonka sana ifishinte fya mu Baibolo. Magazini ya Loleni!, iisabankanishiwa mu ndimi 100, ilatwafwa ukwishiba ifingi pa bubumbo bwa kwa Yehova no kutwafwa ukwishiba ifyo twingalabomfya ukufunda kusuma ukwa mu Baibolo. (Amapi. 3:21-23; Rom. 1:20) Umusha wa cishinka alapekanya impapulo ishilanda pali Baibolo mu ndimi ukucila pali 680! Bushe cila bushiku mulapaatulako inshita ya kubelenga Baibolo? Bushe mulabelenga magazini nga yafuma e lyo ne mpapulo ishipya ishifuma mu lulimi lwenu?

Ukusansha pa mpapulo ishifuma, icilonganino ca kwa Yehova cilapekanya amalyashi ya Baibolo ayalandwa pa Ng’anda ya Bufumu na pa kulongana konse ukukalamba. Ilyo muli pali uku kulongana, bushe mulomfwa bwino ukukutika ku malyashi, ku fyangalo, ku filangililo, e lyo na lintu baleipusha bamunyinefwe bamo mu malyashi? Cine cine Yehova alatupekanishisha umutebeto!—Esa. 25:6.

Awe iyo. Kabili tatulingile ukupapa ukuti ababomfi ba kwa Yehova bamo limo balakwata ifya kulya fya ku mupashi ifingi ukucila bambi. Mulandu nshi cabela ifi? Natulande pa batumwa. Abatumwa balisambilile ifintu ifingi ukucila abasambi bambi abaliko mu nshiku sha batumwa. (Marko 4:10; 9:35-37) Na lyo line, abasambi bambi tabalebulisha ifya kulya fya ku mupashi; balekwata ifyo balekabila.—Efes. 4:20-24; 1 Pet. 1:8.

Na kabili kuti cawama ukwishiba ukuti ifingi ifyo Yesu alandile ne fyo acitile ilyo ali pano calo, tafyalembwa mu mabuuku ya Mbila Nsuma. Umutumwa Yohane alembele ati: “Na kuba, kwaliba ifintu na fimbi ifingi ifyo Yesu acitile, ifyo nga fyalilembelwe fyonse, ndetila, pano calo tapengakumana amabuuku ayengalembwa.” (Yoh. 21:25) Nangu ca kuti abasambi ba kwa Yesu aba mu nshiku sha batumwa balishibepo ifingi pali Yesu uwali uwapwililika ukucila ifyo twaishiba, na lyo line twalishiba ifyo tulingile ukwishiba pali ena. Yehova alitwafwa ukwishiba ifyo tulingile ukwishiba pali Yesu pa kuti tulekonka sana mu ntampulo shakwe.—1 Pet. 2:21.

Tontonkanyeni na pa makalata ayo abatumwa balelembela ifilonganino. Kalata imo iyo Paulo alembele tayabamo mu Baibolo. (Kol. 4:16) Bushe twalibulisha Icebo ca kwa Lesa pantu tatwakwata iyi kalata? Awe iyo. Yehova alishiba ifyo tukabila kabili alitupeela ifya kulya fya ku mupashi ifyalinga pa kuti tube abakosa lwa ku mupashi.—Mat. 6:8.

Muno nshiku, ababomfi ba kwa Yehova bamo balikwata ifya kulya fya ku mupashi ifingi ukucila bambi. Bushe ululimi mulanda mwaba fye impapulo ishinono? Nga ca kuti ifi e fyo caba, ishibeni ukuti Yehova alimubikako amano. Mulebelenga impapulo isho mwakwata, kabili nga cingacitika, mulelongana mu lulimi ulo mumfwa. Mwilatwishika ukuti Yehova akulamukosha lwa ku mupashi.—Amalu. 1:2; Heb. 10:24, 25.

Pali Webu saiti yesu tulabikapo magazini iyalekanalekana e lyo ne mpapulo ishingi ishilanda ifyaba mu Baibolo. Palaba ne fyebo ifyafwa abaupana, imisepela, e lyo ne ndupwa ishakwata abana. Indupwa shilanonkelamo ukubomfya ifi fyebo pa Mapepo ya Lupwa. Na kabili pali iyi Webu saiti palaba amalipoti ya maprogramu ayaibela, pamo nga Isukulu lya Gileadi, ukukumana kwa pa mwaka, kabili aba bwananyina isonde lyonse balabeshibisha ifilecitika nga kwapona utuyofi, e lyo na malipoti pa milandu iikumine abantu ba kwa Yehova. (1 Pet. 5:8, 9) Iyi Webu saiti ilabomba bwino sana ku kushimikila ica kuti na bantu abekala mu ncende umo babinda umulimo wesu uwa kushimikila balasambilila icine.

Na lyo line, nampo nga mulabelenga ifyebo pali iyi Webu saiti nelyo iyo, kuti mwatwalilila abakosa lwa ku mupashi. Umusha alabombesha ukupekanya no kupulinta impapulo pa kuti bonse aba mu ng’anda balekwata ifya kulya fya ku mupashi ifyakumanina. Kanshi tamulingile ukulamona ukuti mufwile fye ukushita kompyuta nelyo foni pa kuti mulebelenga ifyebo pa jw.org. Bamo balalanshanya na bakwata Intaneti pa kuti babapulintileko ifyebo ifiba pali iyi Webu saiti, lelo ifilonganino tafilingile ukulacita ifi.

Ala tulatasha nga nshi kuli Yesu pa fyo afikilisha ifyo alaile ukuti akalatupekanishisha ifya ku mupashi ifyo tukabila. Apo shino nshiku ishayafya shili no kupwa nomba line, te kuti tutwishike ukuti Yehova akatwalilila ukutupekanishisha “ifya kulya pa nshita yalinga.”